एप्पा चोङ्सा 26 - याम्फुहाङ्बा अग्रिपामि पोम्बेॽ पावल 1 मोबा ए़क्साङ अग्रिपाडे़ॽ पावल लुसु, “हागो हे़ने़ए़ खा युङ्मा टुउहोङ युङ्डोॽइन्डुए।” पावलडे़ॽ खोमि हुक ठेॽसाङ टाङ्बामि खा इःबोगु 2 “हे हाङ्बा अग्रिपास, कासोक्पेॽ यहुदिजिडे़ॽ टिबॽआ दोसमि टुम्बेॽहा खा हे़ने़ए़ पोम्बेॽ युङ्डोक्माबेॽ काङ्दाङ्बा ओहाक मिङ्इटिङे। 3 हाङ्बा हे़ने़ॽ यहुदिजिमि चाल चलन, रितिथितिनुङ खा इःजारेबॽआसे़ॽ का छना ओहाक मिङ्इङे। मोडोगे़ॽ हागो के़हा खा युङ्इनुङ्हा, के़हा खा नुरोॽ खेम्बेॽमा। 4 “का काङ्मि देसबेॽ मोबा यरुसलेम सहरबेॽ यहुदिजिमि रुम्बेॽनोॽ वाबुगिङ। मोडोगे़ॽ इघा यहुदिजिडे़ॽ का इन्डोक्मा याॽमि ले़ङे लुमे खा खोजिडे़ॽ पिच्छाबाङ्नोॽ का नुरोॽ लेम्मे। 5 याक्लोएम्बाङ का कानिङ्मि फरिसि धारमिक नियम इक्कोसो मे़लेॽलेॽ ले़ःॽमा खे़ये लुघुबाजिमि हुलबेॽए इक्को ले़टिङे मोबा मो धरमबेॽनोॽ टुसिङे। मोडोगे़ॽ माहाजिडे़ॽ लेन्डुजे इघा खा खोजि टाङ्बे़ॽसो लुहेन्डुजे। 6 निवाहाङ्डे़ॽ कानिङ्मि टुबालाबाजिनुङ ले़ःॽपॽआ हेन्ज्रुङ्बेॽनोॽ भरोसा ले़ःॽपॽआसे़ॽ का आयु न्याय ले़ःॽठामबेॽ येःप्मा सिॽटिङ। 7 हे हाङ्बा अग्रिपास, मोनोॽ हेन्ज्रुङ चुप्मे आसाबेॽ कानिङ्मि इक्पोङ निच्चि कुलमि टुबालाबाजिडे़ॽ निवा टिनुङ लेन्डा, सेन्डा निवाहाङ्मि ओहाङ ले़टुजे। के़ॽसो मोनोॽ आसा ले़ःॽपॽआसे़ॽ इघा यहुदिजिडे़ॽ आयु कासोक्पेॽ आप्टिक टिटामे। 8 निवाहाङ्डे़ॽ याॽमिजि सिघे़ॽपॽआबाङ हिङ्बोक्इन्डुजे लुमे खाबेॽ इन्ढोङ हे़निङे़ॽ बिस्वास ले़ःॽहेसानुम्निबा ? 9 “याक्लो के़ॽसो नासरतमि येसुमि बेॽलो बिरोध ले़ःॽमा खे़ये लुनुङ मिॽटुङ। 10 के़ॽ यरुसलेमबेॽ मोडोक्नोॽ बिरोध ले़टुङ। के़ॽ एप्पा याडाङ्बाजिबाङ अधिकार लानुङ बेॽलो निवाहाङ्मि याॽमिजि तिरिङ्गा खिमबेॽ से़गुङ्जिङ मोबा खोजि सेॽनेमा नुये लुसुङ। 11 बेॽलोखेॽ के़ॽ खोजि ‘हागोएम्बाङ नासरतमि येसुबेॽ बिस्वास ले़ःॽङानि लुमेॽमामि यहुदिजि सुम्ढाम खिमबेॽ से़ॽखे़ॽनुङ सजाय पिमेॽटुङ्जि।’ का खोजिनुङ सारोनोॽ सुरकाडिङे मोडोगे़ॽ के़ॽ हाइखा देसबेॽहा सहरराजिसो खे़ॽनुङ खोजि चुङ्जासुङ्जि। पावलमि हिङ्मवा फेम्बॽआ ( एप्पा चोङ्सा ९:१९ ; २२:६-१६ ) 12 “इडोॽ इक्याक एप्पा याडाङ्बाजिबाङ अधिकार चुप्नुङ येसुबेॽ बिस्वास ले़ःॽखुबाजि राःप्सिॽ दमस्कस लुमे ठाउँबेॽ खे़ॽमे़ॽनिङ्सिडिङे। 13 हे हाङ्बा, मो लेन्डा रामबेॽ खे़ॽमे़ॽनिङ्सिमाबेॽ नमबाङ्सो बेॽलो उज्यालो काङ्मि खिरिरि पोगा। 14 मोबा कानिङ चोप भुइबेॽ काङ्घडिङ्मा मोडोक्पेॽनोॽ हिब्रु खाप्लाबेॽ इडोॽ लुबॽआ के़ॽ खेप्सुङ, ‘सावल, होउ सावल, हे़ने़ॽ का इन्ढोङ चुङ्जाङे ? चुजुमा टाकुवाबेॽ हे़ने़ॽ सराङेॽ इक्माबेॽ हे़ने़ए़न्नोॽ सराङ्बेॽ खाॽइये’। 15 मोबा के़ॽ ‘परभु हे़न असाडे ले़ये ?’ लुनुङ सिप्सुङ। मोबा परभुडे़ॽ फेरि लुसिङ, ‘का हे़ने़ॽ चुङ्जामे़ॽनिङ्सिबॽआ येसु ले़ङे। 16 हागो पुकाडे के़ॽ हे़न काङ्मि योम्बोक ले़ःॽखुबानुङ के़ए़ साक्छि पिघुबा याॽमि टोङ्इन्ने़। मोडोगे़ॽ का हे़न्नुङ खाङ्मुटिङे। हे़ने़ॽ के़ए़ टुम्बेॽ खाङ्बॽआ खानुङ ए़क्साङ के़ॽ हे़न खाङ्मुनुङ्हा खासो हाइखा याॽमिजि हे़ने़ॽ खेम्मेॽमा खे़ये। 17 हागो के़ॽ हे़न यहुदिजिनुङ अयहुदि जातिहा याॽमिजिमि रुम्बेॽ पाङ्मे़ॽनिङ्सिन्ने़। हे़न माहाजिबाङ जोगबा ले़न्ने़। 18 “‘हे़ने़ॽ माहाजिमि मिक हेम्बेॽनुङ सेन्जुगुप्बाङ उज्यालोबेॽ लाप्मा खे़ये। मोबा सैतानमि हुकबाङ निवाहाङ्लाम टेआप्मा खे़म्मे। माहाजिडे़ॽ काबेॽ बिस्वास ले़न्डुजेनुङ माहाजिमि पाप वासोक्खे़हा मोबा माहाजिडे़ॽ निवाहाङ्डे़ॽ से़म्बॽआ याॽमिजिनुङ सोरि सेवा ले़टोक्इन्डुजे’। 19 “हे हाङ्बा अग्रिपास, थाङ्सिरिबाङ चुप्पॽआ इगो सेन्जिसेम्माङ निवाबेॽ युङ्नुङ पेङ्हेङानि। 20 याक्लो दमसकसबेॽनुङ यरुसलेमबेॽ मोबा चोप यहुदिया देसबेॽ मोबा अयहुदि जातिहा याॽमिजिसो पाप ले़ःॽमा लेॽनुङ निवाहाङ्लाम टेसानिङे लुनुङ खेम्मेॽटुङ्जि। निवाहाङ्लाम टेआप्पॽआ खा पक्का ले़ःॽमामि योम्बोकपेॽ खाङ्मुमा खे़ये लुनुङ इःडुङ्जि। 21 मोडोगे़ॽनोॽ का यहुदिजिडे़ॽ मन्दिरबेॽ राःप्नुङ सेॽनेमा योगामि। 22 तर आयुरो निवाहाङ्डे़ॽनोॽ जोगबा ले़ःॽमे़ॽनिङ्सिङे। मोडोगे़ॽ का इगोबेॽ टुघुबा चोपमि पोम्बेॽ येःप्नुङ येसुमि साक्छि पिमे़ॽनिङ्सिनुङे। मोसानुङ अगमबक्ताजिडे़ॽसो ए़क्साङ लिये लुनुङ लुबॽआ खाबाङ हाइखा बेॽलो इमाङ्सो के़ॽ मे़इःडिॽ। 23 मुक्ति पिघुबा हाङ्बा खिरिस्टडे़ॽ खेः आङ्मानुङ सिमा खे़ये, खो सिघे़ॽपॽआबाङ हिङ्बोक्खुबाजिबेॽ चोप्पाङ याक्लोमा लियेनुङ खोसे़ॽ मुक्तिमि उज्यालो यहुदिजिनुङ अयहुदि जातिहा याॽमिजिबेॽसो लाजे़न्डुए, लुनुङ अगमबक्ताजिडे़ॽ लुबेबॽआ ले़टे़।” 24 पावलडे़ॽ लुबॽआ इघा खा खेम्नुङ फेस्तसडे़ॽ वोसाङ लुसु, “पावल हे़न गो नाङ्बोइटा, हे़न गो हे़ने़ए़ निवाडे़ॽ हे़न नाक्सुबाङ टोङ्इटा।” 25 तर पावलडे़ॽ लुसु, “आदरनिया डायोङ्बा फेस्तस, का नाङ्बोक्पॽआ ने़ॽनि, कागो साध्देनोॽ ले़ङे चाइबानोक्मा खा इःमे़ॽनिङ्सिनुङे। 26 हाङ्बा अग्रिपाडे़ॽ इघा चोप खा नुरोॽ लेन्डुए इघा खामि टुम्बेॽ के़ॽ खो मे़ङ्किस्सिॽरेॽ लुहेनुङे। खोसे़ॽ इघा खामि टुम्बेॽ नुरोॽ लेन्डुहा इन्ढोङ्होङ इघा खा चोप याॽमिजिमि रुम्बेॽ लिबॽआ ले़टे़। 27 हे हाङ्बा अग्रिपास, इमा हे़ने़ॽ अगमबक्ताजिमि खाबेॽ बिस्वास ले़न्डुए ? चइबानोॽ हे़ने़ॽ बिस्वास ले़न्डुए लुमे खा के़ॽ लेनुङे़।” 28 मोडोक्पेॽनोॽ अग्रिपाडे़ॽ पावल लुसु, “इडोॽ ए़डेॽवा खाडे़ॽ हे़ने़ॽ का खिरिस्टियन टोङ्मा योॽइये ?” 29 पावलडे़ॽ लुसु, “हागो ए़डे़ॽवाहोङ्सो बेॽलोहोङ्सो इगो के़हा खाडे़ॽ हे़नरेॽनोॽ ने़ॽनि आयु टुघुबा चोबे़ॽ के़ॽ लुबॽआ खा खेम्नुङ चोप याॽमिजि काडोक्मा बिस्वासि लिसामिहोङ नुबा लिसे़। के़ॽ इगोमि लागि निवाहाङ्नुङ पारथना ले़नुङे।” 30 मोडोक्पेॽ हाङ्बा अग्रिपा, बेॽए मायोङ्बा फेस्तस, बरनिकिनुङ माहाजिनुङ लेम्बॽआ याॽमिजि मोबा चोप याॽमिजिसो सुवाक्टोॽ येःपोगामि 31 मोबा पाखे़ॽयु खे़ॽमाबेॽ खोजि खोजि इडोॽ कासामि, “इगो याॽमिडे़ॽ सेॽनेमे खालमा सजाय चुप्मारोमा बिरोङ्गो मे़ले़ःॽटिॽटुए ले़ए़।” 32 हाङ्बा अग्रिपाडे़ॽ मायोङ्बा फेस्तस लुसु, “इगो याॽमिडे़ॽ रोमि बेॽए हाङ्बा सिजरबेॽ बिन्ति मे़ङाःक्पॽआ ले़टाहोङ्गो लेॽहाङ्मासो नुडे़।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.