एप्पा चोङ्सा 25 - याम्फुपवालडे़ॽ रोमि मायोङ्बा फेस्तसनुङ बिन्ति ले़ःॽपॽआ 1 फेस्तस मायोङ्बा लिनुङ रोमबाङ यहुदिया ठाउँबेॽ लेम्बॽआ सुम याक ए़क्साङ्नोॽ कैसेरियाबाङ यरुसलेम खडा। 2 खो मोबेॽ टुमाबेॽ एप्पा याडाङ्बाजिनुङ यहुदि डायोङ्बाजिडे़ॽ पावलमि बिरोधबेॽ आप्टिक टिसुजि। 3 मोबा माहाजिडे़ॽ फेस्तस इन्डोॽहोङ्सो पावल यरुसलेमबेॽ पाङ्बेॽमाना लुनुङ बिन्ति ले़टुजि, इन्ढोङ्होङ पावल माहाजिडे़ॽ रामबेॽनोॽ सेॽनेमामि मोत्ता इःबॽआ ले़टे़। 4 तर फेस्तसडे़ॽ माहाजि इडोॽ लुसुजि, “पावल गो कैसेरियामि तिरिङ्गा खिमबेॽ से़क्युङ्बॽआ ले़ये। कासोङ चान्डोनोॽ कैसेरियाबेॽ खे़ए़ङे। 5 हे़निङ्बेॽ आढा नेताजि कानुङ खे़ॽमा मिङ्इन्डानिङेहोङ पाक्सानुमे। पावलडे़ॽ चइबानोॽ बिरोङ ले़ःॽपॽआहोङ खोमि बिरोधबेॽ मोबेॽनोॽ उजुर टिहेन्डुजे।” 6 इक्पोङ याकडोॽ फेस्तस यरुसलेमबेॽ पेना मोबा खो कैसरियाबेॽ टेसा। कैसेरिया रुक्नुङ वागियारामनोॽ न्याय ले़ःॽठामबेॽ पेन्नुङ “पावल मोबेॽ चिॽआप्टानुमे” लुनुङ आग्या पिसु। 7 पावल मोबेॽ लेस्सा मोबा यरुसलेमबाङ लेङ्खुबा यहुदिजि खोमि खिरिरि येःप्नुङ खाल खालहा आप्टिक टिसुजि। तर खोजिडे़ॽ टिबॽआ आप्टिक चइबानोॽ लुनुङ पक्का मे़ले़ःॽहेसुजि। 8 मोबा पावलडे़ॽ माहाजि इडोॽ लुसुजि, “के़ॽको यहुदि धरममि बिरोध मे़ले़टिॽ, मन्दिरनुङ रोमि बेॽए हाङ्बामि बिरोधसो मे़ले़टिॽ।” 9 तर फेस्तसडे़ॽ यहुदि एप्पाजिमि निवा हेजामामि पावल लुसु, “हे़न यरुसलेम पाङ्इन्ने़ मोबेॽनोॽ इघा चोप हे़ने़ए़ टुम्बेॽहा खामि न्याय ले़नुङे, फे़न्निबा ?” 10 तर पावलडे़ॽ लुसु, “का रोमि सिजरमि न्याय ले़ःॽठाममि पोम्बेॽ टुङे। के़ए़ न्याय इगोबेॽनोॽ लिमा खे़ये। इन्ढोङ्होङ यहुदिजिमि बिरोधबेॽ के़ॽ इमाङ्सो माङे़ॽमा योम्बोक मे़ले़ःॽटिॽ लुमे खा हे़ने़ॽसो लेन्डुए। 11 “के़ॽ देसमि नियममि टेडिघरिक्नुङ आढा याॽमि सेॽमे योम्बोक ले़ःॽपॽआ चुप्होङ मोमि सजाय का सिमा सिॽहोङ्सो सिङे। तर यहुदिजिडे़ॽ का टिबॽआ आप्टिक चइबानोॽ मे़ले़ःॽहोङ असे़ॽसो का खोजिमि हुकपेॽ पिहेनि। का रोमि बेॽए हाङ्बाबेॽ बिन्ति युङ्डोक्मे अधिकार ङाक्इङे।” 12 मोबा फेस्तस खोमि हाइखा लङ्गामजिनुङ छलफल ले़ःॽनुङ पावल लुसु, “हे़ने़ॽ रोमि बेॽए हाङ्बाबेॽ बिन्ति युङ्डोक्मे लुनुङ लुसु। मोडोगे़ॽ हे़न खोबेॽनोॽ पाङ्इन्ने़।” फेस्तसडे़ॽ हाङ्बा अग्रिपानुङ सल्लाह ले़ःॽपॽआ 13 इक्याक नियाक ए़क्साङ हाङ्बा अग्रिपासनुङ खोमि निसा बरनिकि लुमे फेस्तस स्वागत ले़ःॽमामि कैसेरियाबेॽ लेस्साजि। 14 माहाजि मोबेॽ इक्याक नियाक पेङ्नुङ ए़क्साङ फेस्तसडे़ॽ हाङ्बा अग्रिपा पावलमि टुम्बेॽ खा इडोॽ खेम्मेॽटु, “इगोबेॽ फेलिक्सडे़ॽनोॽ से़क्पॽआ इक्को याॽमि टुये। 15 का यरुसलेमबेॽटु खे़ॽमाबेॽ एप्पा याडाङ्बाजिनुङ यहुदि डायोङ्बाजिडे़ॽ खोमि टुम्बेॽ आप्टिक टिबॽआ ले़टे़नुङ खो दन्डा पिमा खे़ये लुसुजि। 16 “तर के़ॽ माहाजि इडोॽ लुसुङ्जि ‘याॽमि टिबॽआ आप्टिक पक्का मे़लिरो रोमि नियमडे़ॽ दन्डा पिडोक्निबा। आप्टिक टिबॽआ याॽमिडे़ॽ आप्टिक टिघुबा याॽमिमि पोम्बेॽ टाङ्बामि खा लुडोक्मा खे़ये।’ 17 मोबा माहाजि काबेॽ लेस्सामि के़ॽ चान्डो ले़ःॽनुङ वागियारामनोॽ पावल न्याय ले़ःॽठामबेॽ चिॽआप्टानुमे लुसुङ्जि। 18 पावल आप्टिक टिघुबाजिडे़ॽ खो चइबानोॽ आप्टिकनुङ्मा ले़ये लुनुङ पक्का ले़न्डुजि होला मिडुङे तर के़ॽ मिॽपॽआडोॽ माहाजिडे़ॽ खा पक्का मे़ले़ःॽहेसुजि। 19 खोजिमिनोॽ धरमनुङ सिघे़ॽपॽआ येसुमि टुम्बेॽरेॽ पावलनुङ खिमावा काप्टुजि। मो पावलडे़ॽ चाहिँ सिघे़ॽपॽआ येसु हिङ्बोइटे़ लुमे खाबेॽ येॽयेॽ बोल ले़न्डुएले़। 20 मोबा इघा खामि टुम्बेॽ के़ॽ इमाङ्सो मे़सिम्हेसुङ। मोडोगे़ॽ के़ॽ पावल ‘यरुसलेमबेॽटु खे़ॽनुङ मोबेॽनोॽ हे़ने़ए़ न्याय ले़ःॽमा फे़न्ने़ ?’ लुनुङ सिप्सुङ। 21 तर पावलडे़ॽ खोमि मुद्दमि न्याय रोमि हाङ्बाबाङ्नोॽ ले़ःॽटोक्मा लुनुङ बिन्ति ले़ःॽपॽआसे़ॽ के़ॽसो खो हाङ्बाबेॽ मे़म्पाङ्लो तिरिङ्गामि पोम्बेॽनोॽ नुरोॽ हुङ्मे आग्या पिटुङे।” 22 मोडोगे़ॽ अग्रिपास हाङ्बाडे़ॽ फेस्तस लुसु, “इगो याॽमिनुङ्नोॽ चुप्नुङ खोमि खा खेम्मा मिॽइनुङे।” फेस्तसडे़ॽ इडोॽ लुसु, “वागियारामनोॽ हे़ने़ॽ खेम्डोक्इन्डुए।” पावल अग्रिपामि पोम्बेॽ 23 मोबा वागियाराम हाङ्बा अग्रिपासनुङ बरनिकि बेॽए सम्माननुङ लेस्साजि। खोजि यहुदिजि सुम्ढाम खिमबेॽ तिरिङ्गामि एप्पाजिनुङ सहरमि चोप्पा बेॽहाजिनुङ पेनाजि। मोबा फेस्तसडे़ॽ पावल चिक्आप्मे आग्या पिनुङ ए़क्साङ खो मोबेॽ चिक्चे़डुजि। 24 मोबा मायोङ्बा फेस्तसडे़ॽ लुसु, “हाङ्बा अग्रिपासनुङ इगोबेॽ लेङ्घुबा चोप वावानिसाजि, यहुदिजि चोबे़ॽ काबेॽ उजुर ले़ःॽपॽआ याॽमि इगोनोॽयो। इगो याॽमि चोप यहुदिजिडे़ॽ यरुसलेमबेॽनुङ कैसेरियाबेॽसो सेॽनेमा लुनुङ के़ए़म्बेॽ बिन्ति ले़ए़टुजे। 25 तर इगो याॽमि सेॽनेमानोॽ खे़ये खालमा मङे़ॽमा योम्बोक ले़ःॽपॽआ इमाङ्सो के़ॽ मे़न्चुप्टुङ। तर इगो याॽमिडे़ॽ खोमदाङ्बे़ॽनोॽ रोमि हाङ्बाबाङ्नोॽ न्याय ले़ःॽटोक्मा लुनुङ बिन्ति ले़ःॽपॽआसे़ॽ के़ॽसो खो पाङ्मामि पक्का ले़टुङ। 26 तर इगोमि टुम्बेॽ रोमि हाङ्बा इमाङ्सो मे़साप्हेसुङ। मोडोगे़ॽ इगो याॽमि हे़निङ्मि पोम्बेॽ चिक्चे़टुङे। चइबानोॽ इमाबेॽ के़ॽ हाङ्बा अग्रिपामि पोम्बेॽ चिक्चे़ॽमा मिङ्इटुङे। हे़निङे़ॽ इगो नुरोॽ सिम्नुङ जाँच ले़ःॽपेॽटानुमहोङ के़ॽ साप्मे खा चुप्मिनुङेन्डे लुमे आसा ले़ए़टुङे। 27 इन्ढोङ्होङ खोबेॽ इमाङ आप्टिक मे़न्चुप्लेॽ सिजरबेॽ पाङ्मा नुबा मे़मिॽटुङ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.