एप्पा चोङ्सा 24 - याम्फुएप्पा मायोङ्बा फेलिक्समि पोम्बेॽ पावल 1 ङाउम याक ए़क्साङ चोप्पा एप्पा याडाङ्बा हननियानुङ यहुदि धारमिक खा इःॽखुबाजि तरतुल्लस लुमे वकिल चिक्मानुङ कैसरियाॽबेॽ लेस्सामि। माहाजि चोबे़ॽ बेॽए मायोङ्बामि पोम्बेॽ पावल आप्टिक टिसाङ बिरोध ले़टुजि। 2 पावल मोबेॽ के़ःॽनुङ तरतुल्लसडे़ॽ पावलमि आप्टिक इडोॽ लुसाङ फेलिक्समि पोम्बेॽ युक्सु “के़ए़ आदरनिया मायोङ्बा फेलिक्स, हे़न निवादाङ्बा मायोङ्बा ले़ःॽपॽआसे़ॽ बेॽलो निङ्बाङ कानिङ सान्तिबेॽ पेन्डोक्इटिङ्मे। मोबा कानिङ्मि देसबेॽ नुबा नुबा योम्बोक लिमे़ॽनिङ्सिये। 3 इगो खा कानिङे़ॽ मिॽयुङ्इटुङ्मे़ मोबा मोमि लागि निवा होङ्सिॽयुरा हे़न ओहाङ पिनिम्ने़। 4 हे़न्नुङ इॽछोॽ यामुमे खा टुये। मो बिन्ति खेम्बेॽमाना। 5 कानिङे़ॽ लेबॽआ इगो याॽमि हुल-दुङ्गा ले़ःॽखुबा ले़ये। इगोसे़ॽ नासरि धरम हुलबेॽए नेता लिनुङ मक्खाम्डेमबेॽहा यहुदिजिमि रुम्बेॽ हुल-दुङ्गा ले़ःॽसाङ राम्इये। 6 इगो याॽमिडे़ॽ मन्दिर असुद्ध टोङ्मा योक्माबेॽ कानिङे़ॽ राःबुङ्मा। [मोबा कानिङ्मि नियमडोॽ न्याय ले़ःॽमा पोरोक्पॽआ ले़टे़। 7 तर तिरिङ्गामि चोप्पाङ एप्पा लुसियसडे़ॽ येॽयेॽ कानिङ्मि हुकबाङ इगो याॽमि ङाप्खे़ॽटु। 8 मोबा लुसियसडे़ॽ आप्टिक टिघुबा याॽमिजि आदरनिया मायोङ्बाबेॽ खे़ॽमिरो लुनुङ आग्या पिसु।] हे़ने़ॽ टाङ्बे़ॽनोॽ इगो याॽमि सिम्होङ कानिङे़ॽ खोमि बिरोधबेॽ टिबॽआ आप्टिक चइबानोॽ ले़ए़ लुनुङ लेडोक्इन्डुए।” 9 मोबेॽ हाइखा यहुदिजिडे़ॽसो मो आप्टिक चइबानोॽ ले़ये लुनुङ गबाहि पिसुजि। फेलिक्समि पोम्बेॽ पावल 10 मोबा बेॽए मायोङ्बाडे़ॽ पावल “यामुसे़” लुनुङ हुकमि खाप्ले़ॽ लुसु, पावलडे़ॽ इडोॽ लुसु, “आदरनिया एप्पा मायोङ्बा, हे़न बेॽलो निङ्बाङ इगो देसबेॽ न्याय ले़ःॽखुबा लुमे खा के़ॽ लेनुङे़। मोडोगे़ॽ के़ए़ खा युङ्मामि के़ए़ निवा साप्थाङ्इटे़। 11 यरुसलेमबेॽ निवाहाङ्मि सेवा ले़ःॽसिॽ का खे़ॽपॽआ इक्पोङ नियाकबाङ बेॽलो मे़लिडिॽ। इगो खागो हे़ने़ॽ ने़ःक्चइ लेडोक्इन्डुए। 12 का आप्टिक टिघुबाजिडे़ॽ का मन्दिरबेॽ असानुङ्सो खिबॽआ खा इक्को यहुदिडे़ॽसो दाबि ले़ःॽहेसुनि। ना माहाजिडे़ॽ के़ॽ यहुदिजि सुम्ढाम खिमनुङ सहरबेॽहा याॽमिजि मङे़हा खा इःॽनुङ हुल-दुङ्गा ले़ःॽपॽआनोॽ दाबि ले़ःॽहेन्डुजे। 13 ना अक्खाजिडे़ॽ काबेॽ टिबॽआ दोसमि गबाहिनोॽ लाप्हेन्डुजे। 14 तर इक्को खा चाहिँ के़ॽ लुनुङे मुक्ति चुप्मिये राम इघाजिडे़ॽ मे़ॽनोक्मा लुन्डुजे मो रामबेॽ का राम्इङेनुङ कानिङ्मि टुबाजिडे़ॽ ओहाङ ले़ःॽपॽआ निवाहाङ्मि ओहाङ ले़नुङे। तर मोसाडे़ॽ पिबॽआ नियमनुङ अगमबक्ताडे़ॽ साप्पॽआ नेॽचिराबेॽ टुहा चोप खाबेॽ के़ॽ बिस्वास ले़नुङे। 15 खोजिमिडोक्नोॽ धरमिजिनुङ पापिजि सिघे़ॽनुङ फेरि हिङ्बोॽइम्मे लुमे खामि आसा काबेॽसो टुये। 16 मोडोगे़ॽ का निवाहाङ्नुङ याॽमिजिमि पोम्बेॽ के़ए़ निवा चोखो युङ्मा मिॽइनुङे। 17 “यरुसलेमबेॽ बेॽलो निङ ए़क्साङ के़हा यहुदि वावानिसाजिमि लागि सुम्बॽआ दाननुङ भेटि पिसिॽ लेस्सिङे। 18 इडोॽ लेम्माबेॽ खोजिडे़ॽ का मन्दिरबेॽ चुबामि। मोडोक्पेॽ चोखो लिमे रिति ले़ःॽसेॽपॽआ ले़टिङे। मोडोक्पेॽ कानुङ याॽमिमि हुलसो माडामि, इमाङ हुल दुङ्गासो मे़लिडिॽ। 19 तर एसिया ठाउँबाङ आप्खुबा आढा यहुदिजिडे़ॽ का मन्दिरबेॽ खाक्डोक्टामि। के़ए़ बिरोधबेॽ लुमाहा खा खोजिनुङ टुसाहोङ खोजिनोॽ हे़ने़ए़ पोम्बेॽ लेन्नुङ उजुर ले़ःॽमा खाडे़। 20 ने़ॽनिहोङ यहुदिजि सुम्ढाम खिमबेॽ के़ए़ बिरोधबेॽ आप्टिक टुउहोङ इगोबेॽ टुघुबाजिडे़ॽ लुसुजिरो। 21 इक्को खाबेॽ इघाजिडे़ॽ आप्टिक टिम्मे। मो खा के़ॽ इडोॽ लुबॽआ ले़टे़, ‘सिघे़ॽखुबाजि हिङ्इम्मे लुमे खाबेॽ के़ॽ बिस्वास ले़नुङे लुबॽआसे़ॽ आयु इघाजिडे़ॽ के़ए़ न्याय ले़ःॽमे़ॽनिङ्सिम्मे’।” 22 फेलिक्सडे़ॽ इगो मुक्तिमि राममि टुम्बेॽए खा नुरोॽ लेबॽआ ले़टे़। मोडोगे़ॽ खोसे़ॽ इडोॽ लुनुङ बिदा पिसुजि, “हागो हे़निङ्मि उजुरिमि खा तिरिङ्गामि चोप्पाङ एप्पा लुसियस लेन्नुङ्रेॽ लिये।” 23 मोबा फेलिक्सडे़ॽ तिरिङ्गाजिमि चोप्पाङ एप्पा इडोॽ लुनुङ आग्या पिसु, “पावल नुरोॽ हुङ्मे तर खो पाप्मिहा कोक्नाम याङ्घिॽखुबा खोमि लङ्गामजि चाहिँ ए़से़क्माहाजि।” पावल फेलिक्सनुङ दुरसिल्लामि पोम्बेॽ 24 मोबा इक याक नियाक ए़क्साङ फेलिक्स खोमि बनिमा दुरसिल्लानुङ लेस्सा। दुरसिल्ला यहुदि ले़टे़। मोसे़ॽ पावल के़ःॽनुङ खिरिस्ट येसुबेॽ बिस्वासमि टुम्बेॽहा खा पावलबाङ खेप्सु। 25 तर पावलडे़ॽ खा इःघे़ॽमाबेॽ इडोॽ लुसु, “निवाहाङ्मि धारमिक आग्याडे़ॽ लुडिडोॽ योम्बोक ले़ःॽमा खे़हा, कानिङ्मि निवा नुबा योम्बोकपेॽ टिमा खे़हानुङ, निवाहाङ्मि न्यायमि याक लेम्मे़ॽनिङ्सिये” लुमाबेॽ फेलिक्सडे़ॽ किस्सिसाङ पावल लुसु, “हागो हे़न खडे, हाइखा खा वागिया सिङ्आ इःमा सिॽहोङ के़ए़न्ने़।” 26 फेलिक्सडे़ॽ पावलबाङ याङ चुप्मियेन्डे लुनुङ आसा ले़ःॽपॽआ ले़टे़। मोडोगे़ॽ घरि घरि पावल के़ःॽनुङ यामुसे़। 27 मोबा ङिनिङ ए़क्साङ फेलिक्समि साटोबेॽ परकिअस फेस्तस निङ ले़ःॽखुबा मायोङ्बा लिसा। फेलिक्सडे़ॽ चाहिँ यहुदिजि साप्थाङ्मेॽमामि छना पावल तिरिङ्गा खिमबेॽ से़क्नुङ युक्सु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.