एप्पा चोङ्सा 23 - याम्फु1 पावलडे़ॽ मोबेॽ सुम्बॽआ चोप खाङ्नुङ इडोॽ लुसु, “होउ वावानिसाजि, आयुरो के़ए़ हिङ्मवाबेॽ निवाहाङ्मि पोम्बेॽ चोखो निवा युङ्इटुङे।” 2 पावलडे़ॽ इगो खा लुबॽआ खेम्नुङ चोप्पा एप्पा याडाङ्बा हननियाडे़ॽ पावलमि के़क्पेॽ येःप्खुबा याॽमिजि पावलमि याबुकपेॽ उबानुमे लुसुजि। 3 तर पावल हननियालाम हिङ्घे़ॽनुङ लुसु, “होउ खेवा खामडे़ॽ रे़ङ्बॽआ भित्ता! खाङ्माबेॽ नुबा, तर मङे़ॽमा निवा खिघुबा हे़नसो निवाहाङ्डे़ॽ मोःक्इये। हे़न मोसाडे़ॽ पिबॽआ नियमडोॽ के़ए़ न्याय ले़ःॽसिॽ पेङ्इटे़होङ्सो नियममि टेडिगरिक ले़ःॽनुङ का मोःक्मे आग्या इन्ढोङ पिन्डुजे ?” 4 पावलमि के़क्पेॽ येःप्खुबा याॽमिजिडे़ॽ पावल लुसुजि, “इमा हे़ने़ॽ निवाहाङ्डे़ॽ से़न्बॽआ चोप्पा एप्पा याडाङ्बासो योप्इन्डुए ?” 5 पावलडे़ॽ माहाजि लुसुजि, “होउ वावानिसाजि, खोनोॽ चोप्पा एप्पा याडाङ्बा ले़ये लुमे खा के़ॽ मे़लेसुङ। टाङ्बामि याॽमिजिबेॽ अधिकार ले़ःॽखुबा चोप्पा एप्पा याडाङ्बामि बिरोधबेॽ कामा फे़न्निबा लुमे खा धारमिक नेॽचिराबेॽ साप्पॽआ खा के़ॽसो लेनुङे़।” 6 यहुदिजि सुम्ढाम खिमबेॽ सदुकिनुङ फरिसि हुलबेॽहा याॽमिजि टुम्मे लुमे खा लेनुङ पावलडे़ॽ बेॽए सेम्लाडे़ॽ लुसु, “होउ वावानिसाजि, का फरिसिमि पसा फरिसिनोॽ ले़ङे। सिघे़ॽपॽआजि फेरि हिङ्बोइम्मे लुमे आसा ले़ःॽपॽआसे़ॽ इगोबेॽ के़ए़ मुद्द लिमे़ॽनिङ्सिये।” 7 पावलडे़ॽ लुबॽआ इघा खाडे़ॽ फरिसिनुङ सदुकिजिमि रुम्बेॽ खा मे़न्टोक्सा, मोबा यहुदिजि सुम्ढाम खिमबेॽ फाक्खडामि। 8 इन्ढोङ्होङ सदुकिजिडे़ॽ याॽमि सिघे़ॽनुङ फेरि हिङ्बोइम्मे लुमे खाबेॽ बिस्वास मे़ले़टुजे। मोबा थाङ्सिरिदुतनुङ होङ्निवानोॽ माॽआये लुसुजे। तर फरिसिजिडे़ॽ चाहिँ इघा सुम्जि खाबेॽनोॽ बिस्वास ले़टुजे। 9 मोडोगे़ॽ मोबेॽ बेॽए हल्ला लिसा। फरिसि हुलबेॽहा आढा धारमिक खा इःॽखुबाजिडे़ॽ येपोक्नुङ सदुकिजिमि मारे बिरोध ले़ःॽसाङ लुसुजि, “कानिङे़ॽको इगो याॽमिमि इमाङ्सो आप्टिक मे़न्चुप्टुङ्मा। इगो याॽमिबाङ होङ्निवा अथबा थाङ्सिरिदुत यामुबॽआनोॽहोङ्सो इमाङ्डे पिॽखे़ये!” 10 माहाजिमि रुम्बेॽ खिमावा बेॽए लिघडा। मोडोॽ खोजि खिमाबेॽ पावल सेॽनेन्डुजेन्डे मिॽनुङ तिरिङ्गाजिमि चोप्पा एप्पाडे़ॽ “पावल मो यहुदिजिबाङ खोजि पेन्ढाम खिमबेॽ चिॽखे़ॽटानुमे” लुनुङ तिरिङ्गाजि लुसुजि। 11 मो सेन्डानोॽ परभुडे़ॽ पावलमि के़क्पेॽ लेन्नुङ लुसु, “ए़क्किसिने! इगो यरुसलेमबेॽ के़ए़ साक्छि पिडिडोक्नोॽ हे़ने़ॽ रोम देसबेॽसो पिमा खे़ये।” पावल सेॽनेमामि मोत्ता इःबॽआ 12 वागियाराम माक्मि यहुदिजि सुम्नुङ पावल सेॽनेमे मोत्ता इःनुङ खोजिडे़ॽ इडोॽ कामानुङ हेन्ज्रुङ हे़नुजि, “पावल मे़सेॽनेरो कानिङे़ॽ इमाङ्सो चामा उङ्मा फे़न्निबा।” 13 इडोॽ पावल सेॽनेमा खे़ये लुनुङ मोत्ता इघुबाजि रिक्पोङ्बाङ्सो बेॽलो टुसामि। 14 मोबा ए़क्साङ माहाजिडे़ॽ एप्पा याडाङ्बाजिनुङ हाइखा यहुदि धारमिक नियम इःॽखुबाजिबेॽ खे़ॽनुङ लुसुजि, “कानिङे़ॽ पावल मे़सेॽनेरो इमाङ्सो चासुङ्मानि लुनुङ इगो पावल चइबानोॽ सेॽनेमे हेन्ज्रुङ हे़न्इटुङ्मे। 15 हागो हे़निङे़ॽ तिरिङ्गाजिमि चोप्पा एप्पा इडोॽ लुसानुमे ‘यहुदिजि सुम्ढाम खिमबाङ पावलमि टुम्बेॽहा बेॽलो खा लेमा मिॽइन्डुङ्मा’ लुनुङ पावल तिरिङ्गाजि पेन्ढाम खिमबाङ के़ःॽपिॽमाना, मोबा यहुदिजि सुम्ढाम खिमबेॽ पावल आप्माबेॽ कानिङे़ॽ खो राम्बेॽनोॽ सेॽनेन्डुङ्मे।” 16 तर माहा यहुदिजिडे़ॽ पावल सेॽनेमामि रामबेॽ सुक्मे़ॽनिङ्सिन्डुजे लुमे खा पावलमि हाङ्लेॽसाडे़ॽ लेडोक्टु। मोबा खोसे़ॽ तिरिङ्गाजि पेन्ढाम खिमबेॽ खे़ॽनुङ खोमि कोयाङ पावल खेम्मेॽटु। 17 पावलडे़ॽ मो खा खेम्मासोरोॽ इक्को एप्पा तिरिङ्गा के़ःॽनुङ लुसु, “इगो पिच्छा तिरिङ्गामि चोप्पा एप्पानुङ बिन्ति ले़ःॽमे खा टुउरो, मोमि लागि इगो पिच्छा खोबेॽ चिक्ट्याबेॽमाना।” 18 मो तिरिङ्गाजिमि एप्पाडे़ॽ पावलमि हाङ्लेॽसा तिरिङ्गाजिमि चोप्पा एप्पाबेॽ चिॽखे़ॽनुङ लुसु, “हजुर, से़क्युङ्बॽआ पावलडे़ॽ का के़ःॽनुङ ‘इगो पिच्छामि हे़न्नुङ बिन्ति ले़ःॽमे खा टुये लुबॽआसे़ॽ’ इगो पिच्छा हे़ने़ए़म्बेॽ चिक्चे़टुङे।” 19 तिरिङ्गाजिमि चोप्पा एप्पाडे़ॽ मो पिच्छामि हुकपेॽ राःप्नुङ ए़डे़ॽ मेॽयोङ चिॽखे़ॽनुङ सिप्सु, “इमा खा लुमा टुहा ? इःबेसे।” 20 मो पिच्छाडे़ॽ लुसु, “वागिया यहुदिजिडे़ॽ ‘पावल यहुदिजि सुम्ढाम खिमबेॽ हाइखा खा सिम्मामि लाघे़ॽटोक्मा’ लुनुङ हे़नबेॽ बिन्ति ले़ःॽसिॽ लेम्मामि मोत्ता इःटुजे। 21 तर हे़ने़ॽ खोजिमि खा ए़ॽखेम्मे! इन्ढोङ्होङ रिक्पोङ्बाङ्सो बेॽलो यहुदिजिडे़ॽ ‘पावल मे़न्सेॽलो इमाङ्सो ए़ॽचामे, ए़उङ्मे’ लुनुङ हेन्ज्रुङ हे़न्इटुजे। खोजि हागोनोॽ पावल सेॽनेमामि रामबेॽ सुक्मे़ॽनिङ्सिम्मेनुङ खोजिडे़ॽ हे़ने़ए़ आग्यामि आसाबेॽ पेङ्इटामे।” 22 इडोक्मा खा खे़म्नुङ तिरिङ्गाजिमि चोप्पाङ एप्पाडे़ॽ मो पिच्छा लुसु, “इगो खा हे़ने़ॽ का लुबॽआ लुनुङ असासो ए़ॽलुमेयो लुनुङ पाक्सु।” पावल बेॽए मायोङ्बा फेलिक्सबेॽ पाङ्बॽआ 23 मोबा ए़क्साङ तिरिङ्गाजिमि चोप्पा एप्पाडे़ॽ तिरिङ्गाजिमि निप्पाङ एप्पाजि के़ःॽनुङ लुसुजि, “कैसरिया खे़ॽमामि निच्चि सय तिरिङ्गाजि, एच्चि जनाडोॽ घोडा साङ्घुबाजिनुङ निच्चि सयडोॽ भाला खिघुबा तिरिङ्गाजि पोरोगानुमे। खोजि युडा नोक्चि बोङ्नोॽ राम्बोक्मा खेम्मे। 24 पावल साङ्मे घोडासो पोरोगानुमेनुङ खो नुरोॽ जोगा ले़ःॽनुङ बेॽए मायोङ्बा फेलिक्सबेॽ चिक्ट्यासानुमे।” 25 इडोॽ लुसेॽनुङ मो तिरिङ्गाजिमि चोप्पा एप्पाडे़ॽ बेॽए मायोङ्बा फेलिक्स इडोक्मा इक्को पत्रा साबु- 26 “आदरनिया बेॽए मायोङ्बा फेलिक्स, का क्लौडियस लुसियसबाङ सेवायो। 27 इगो याॽमि यहुदिजिडे़ॽ सेॽनेमामि राःप्मिटुजि, तर इगो रोमि जनता ले़येले़। इगो खा लेडोक्नुङ के़ॽ काङ्दाङ्बे़ॽ खे़ॽनुङ इगो जोगाबा ले़ए़टुङे। 28 इगोसे़ॽ इमाङ बिरोङ ले़ए़टु लुनुङ लेमामि के़ॽ यहुदिजि सुम्ढाम खिमबेॽसो चिॽखे़ॽटुङ। 29 तर इगो सेॽनेमारोमा, अथबा तिरिङ्गा खिमबेॽ से़क्मेडोॽमा बिरोङ्गो इमाङ्सो मे़ले़टिॽटु। खोजिडे़ॽ टिबॽआ आप्टिक चाहिँ मोसाडे़ॽ पिबॽआ खोजिमि यहुदि नियममि खामि टुम्बेॽ ले़ये। 30 यहुदिजिडे़ॽ इगो याॽमि सेॽनेमा योॽइन्डुजे, लुमे खा के़ॽ खेम्बॽआसे़ॽ हे़ने़ए़म्बेॽ पाङ्इटुङे।” 31 तिरिङ्गामि एप्पानुङ तिरिङ्गाजिडे़ॽ तिरिङ्गाजिमि चोप्पा एप्पामि आग्या खे़म्नुङ पावल चिक्मानुङ राम्बोगामि। खोजिडे़ॽ पावल मो सेन्डानोॽ एन्टिपात्रिस लुमे सहरठोक चिक्ट्यासु। 32 राम्घे़ॽखुबा तिरिङ्गाजि चाहिँ वागियाराम पावल घोडाबेॽ साङ्घुबा तिरिङ्गाजि जिम्मा पिआनुङ खोजि पेन्ढाम खिमबेॽ टेसामि। 33 घोडाबेॽ राम्खुबा तिरिङ्गाजि कैसरियाबेॽ रुक्टुजि। मोबा पावल चाहिँ बेॽए मायोङ्बाबेॽ तिरिङ्गाजिमि चोप्पा एप्पामि पत्रासो जिम्मा पिसुजि। 34 मो पत्रा नेॽसेॽनुङ बेॽए मायोङ्बाडे़ॽ पावल सिप्सु, “हे़ने़ए़ खिम हाम्बेॽटे ? हाम्बे ठाउँबेॽ सिॽइये ?” पावलडे़ॽ लुसु, “किलिकियाबेॽ सिॽइये।” 35 मोबा बेॽए मायोङ्बाडे़ॽ लुसु, “मोडोक्होङ हे़न उजुर ले़ःॽखुबाजि इगोबेॽ लेन्नुङ्रेॽ हे़ने़हा खा खेम्इनुङे।” मोबा बेॽए मायोङ्बाडे़ॽ पावल नुरोॽ हुङ्नुङ हाङ्बा हेरोदमि हाङ्खिमबेॽ युक्सानुमे लुनुङ आग्या पिसुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.