एप्पा चोङ्सा 22 - याम्फु1 “होउ पाबाजि, वावानिसानुङ नानुसाजि, हे़निङ्मि पोम्बेॽ के़ॽ लुमानोॽ खे़ये खा हागो लुनिम्ने़ खेप्सानुमो।” 2 पावल टाङबामि हिब्रु खाप्लाबेॽ यामुबॽआ खेम्नुङ चोप याॽमिजि योङ उगामि। 3 पावलडे़ॽ लुसु, “का किलिकिया ठाउँमि टारसस सहरबेॽए यहुदि ले़ङे। तर का इगो यरुसलेम सहरबेॽनोॽ गमलियलबाङ कानिङ्मि टुबालाबाजिडे़ॽ ले़ःॽआप्पॽआ धारमिक नेॽचिरामि खा नुरोॽ चिङ्इटुङे। आयु हे़निङ निवाहाङ्लाम इन्डोक पाङ्नुन्डानिङे मोडोक्नोॽ याक्लो कासो पाङ्नुसिङे। 4 याक्लो के़ॽ निवाहाङ्मि रामबेॽ राम्खुबा वडाङ्पसाजिनुङ मेॽनामिॽचि राःप्आप्नुङ तिरिङ्गा खिमबेॽ से़क्मेॽनुङ सिघे़ॽलो चुङ्जासुङ्हाजि। 5 इघा के़ॽ लुबॽआ खा चइबानोॽ ले़हा लुनुङ चोप्पा एप्पा यहुदिजि सुम्ढाम खिमबेॽहा याॽमिजिडे़ॽसो लुहेन्डुजे। खोजिडे़ॽनोॽ का दमस्कस लुमे ठाउँबेॽ टुघुबा यहुदि वावानिसाजि राःप्मे अधिकार पत्रा पिबॽआ ले़टामे। मोडोगे़ॽ का माहाजि राःप्नुङ यरुसलेमबेॽ लाजे़ॽनुङ दन्डा पिमामि दमस्कसबेॽ खडिङ। 6 “का दमसकस रुक्सिॽपोरोक्माबेॽ नाम्लेलुम याक्खे़ॽपॽआ ले़टा। मोडोक्पेॽनोॽ नान्द्रुङ्माबाङ हजोक्टोॽ बेॽलोनोॽ उज्यालो कासोक्पेॽ पोगा। 7 का भुइबेॽ काङ्घडिङ। मोडोक्पेॽनोॽ के़ॽ इक्को इडोॽ लुबॽआ खेप्सुङ, ‘सावल, होउ सावल, हे़ने़ॽ का इन्ढोङ चुङ्जाङे ?’ 8 मोबा के़ॽ लुसुङ, ‘परभु! हे़न असाडे ?’ मोबा खोसे़ॽ का लुसिङ, ‘का नासरतबेॽए येसु ले़ङे, हे़ने़ॽ का चुङ्जामे़ॽनिङ्सिङे’। 9 मोडोक्पेॽ कानुङ खे़ॽखुबाजिडे़ॽ उज्यालो खाङ्डोक्टुजि, सेम्लासो खेप्सुजि, तर मो सेम्लाडे़ॽ का इमाङ लुमे़ॽनिङ्सिडिङे लुनुङ मे़लेसुजि। 10 के़ॽ लुसुङ, ‘हे परभु, हागो के़ॽ इमाङ ले़ःॽमे ?’ खोसे़ॽ का लुसिङा, ‘येपोक्नुङ दमस्कस सहरबेॽ खडे, हे़ने़ॽ ले़ःॽमे योम्बोकमि टुम्बेॽ मोबेॽनोॽ लुये’। 11 मो बेॽलो पोक्पॽआ उज्यालोडे़ॽ का मिकसुरुम्बा लिसिङ मोबा के़हा लङ्गामजिडे़ॽ हुकपेॽ राःप्नुङ दमस्कस चिक्खे़ॽटामि। 12 “मो सहरबेॽ हननिया निङ ले़ःॽखुबा इक्को याॽमि पेने़। खो मोसाडे़ॽ पिबॽआ यहुदि धारमिक नियम नुरोॽ पालना ले़ःॽखुबा धरमि याॽमि ले़टे़। खो मोबेॽहा चोप यहुदिजिडे़ॽ सम्मान ले़टुजे। 13 मो याॽमिडे़ॽ काङ्मि के़क्पेॽ येःप्नुङ लुसा, ‘सावल निसा, हे़ने़ए़ मिक ए़पोक्लो’। खोसे़ॽ इडोॽ लुमासोरोॽ के़ॽ खो खाङ्डोक्टुङ। 14 मोबा खोसे़ॽ का लुसिङ, ‘हे़ने़ॽ कानिङ्मि टुबाजिमि निवाहाङ्मि निवे़ॽ मिॽपॽआ खा लेहेसे लुनुङ हे़न से़ङ्इटे़। हे़ने़ॽ धरमि सेवाक येसु खाङ्डोक्टु मोबा खोसे़ॽ लुबॽआ खा खेम्डोक्टु। 15 इन्ढोङ्होङ खोमि गबाहि लिनुङ हे़ने़ॽ खाङ्बॽआनुङ खेम्बॽआ खा चोप याॽमिजि खेम्मेॽमा खे़ये। 16 मोडोगे़ॽ हागो इमाङ हुङ्इन्डुए ? येःपोक्नुङ बप्तिस्मा लासे मोबा येसुमि निङ लानुङ टाङ्बामि पापबाङ चोखो लिसे’। 17 “मोबाङ का यरुसलेम खडिङ मोबा मन्दिरबेॽ पारथना ले़ःॽमारोनोॽ सेन्जिसेम्माङ्बेॽ मागुङ मोडोक्पेॽ। 18 के़ॽ परभु खाङ्डोक्टुङ मोबा परभुडे़ॽ का लुबॽआ खेप्सुङ, ‘चान्डोनोॽ यरुसलेमबाङ राम्बोक्पेसे इन्ढोङ्होङ हे़ने़ॽ के़ए़ टुम्बेॽ लुमाबेॽ इगोबेॽहा याॽमिजिडे़ॽ खेप्सुजिनि’। 19 “के़ॽ परभु लुसुङ, ‘हे परभु, के़ॽ चोप यहुदिजि सुम्ढाम खिमबेॽ खे़ॽनुङ हे़नबेॽ बिस्वास ले़ःॽखुबा याॽमिजि राःप्नुङ मोःक्साङ्नुङ से़ॽखे़ॽसाङ तिरिङ्गा खिमबेॽ से़क्पॽआ खा इघाजि चोबे़ॽ लेन्डुजे।’ 20 हे़ने़ए़ टुम्बेॽ गबाहि पिघुबा स्तिफनस हरि चे़क्चे़क मोःक्नुङ सेॽनेमाबेॽ कासो मोबेॽनोॽ टुसिङे। खो सेॽनेघुबाजिनुङ टोङ्नुङ खोजिमि चेॽ हुङ्मानुङ का मोबेॽ पेम्बॽआ ले़टिङे। 21 तर परभुडे़ॽ लुसिङ, ‘हे़न खडे, के़ॽ ओः ओःराजि अयहुदि जातिजिबेॽ हे़न पाङ्मे़ॽनिङ्सिन्ने़’।” 22 इडोॽ लुडिङ्लो याॽमिजिडे़ॽ पावलमि खा योङ खेप्सुजि। तर मोबा ए़क्साङ वोसाङ काबुगामि, “इगो सेॽनेमानोॽ खे़ये! सेॽनेमानोॽ खे़ये! हागो इगो याॽमि हिङ्रिक लेॽमा फे़न्निबा।” 23 इडोॽ सुरके़ॽमानुङ खोजिडे़ॽ टाङ्बा टाङ्बामि खाम्मा चेॽ हेनुजि मोबा नान्द्रुङ्मे़ॽटु धुलो टुप्साङ काबोगामि। 24 इगो खाङ्नुङ रोमि तिरिङ्गामि चोप्पा एप्पाडे़ॽ “पावल होङ्सिॽयु चिक्खे़ॽनुङ कोरराडे़ॽ रेक्मेॽनुङ इडोॽ लुसु, इडोॽ कोरराडे़ॽ मोःक्माबेॽको इन्ढोङ यहुदिजि सुरके़ॽपॽआ खामि टुम्बेॽ लुन्डुएन्डे ?” 25 इडोॽ कोररा टिमामि तिरिङ्गाजिडे़ॽ पावल हिःक्माबेॽ पावलडे़ॽ खोम के़क्पेनोॽ येःप्खुबा तिरिङ्गाजिमि एप्पा लुसु, “इमा रोमि जनताजि खोजिमि आप्टिक मे़न्चुप्लेॽ कोरराडे़ॽ रे़क्मा नुये ? इमा रोमि नियमडे़ॽ इडोक्नोॽ ले़ःॽमा लुटे़ ?” 26 मोबा मो एप्पा तिरिङ्गा चोप्पाङ एप्पा तिरिङ्गाबेॽ खे़ॽनुङ इगो खा खेम्मेॽसाङ लुसु, “हजुर! इमाङ्डे ले़ःॽमा योॽइटुए ? हे़ने़ॽ लेन्डुए ? इगो याॽमिगो रोमि याॽमिरे ले़येले़!” 27 इगो खा खेम्नुङ तिरिङ्गाजिमि चोप्पा एप्पाडे़ॽ होङ्सिॽयु पे़खे़ॽनुङ पावल सिप्सु, “इमा हे़न चइबानोॽ रोमिनोॽ ले़ये ?” पावलडे़ॽ लुसु, “एइ”। 28 चोप्पा एप्पा तिरिङ्गाडे़ॽ लुसु, “कागो बेॽलो याङ फोङ्नुङ रोमि लिबॽआ।” पावलडे़ॽ लुसु, “कागो टोक्माबेॽनोॽ रोमि ले़ङे।” 29 तर इडोक्मा खा खेम्मासोरोॽ पावल जाँच ले़ःॽसिॽ लेम्बॽआ याॽमिजि ए़ङ्गुवाराम सेनामि। इगो खा लेडोक्नुङ चोप्पा एप्पा तिरिङ्गासो किस्सिडा इन्ढोङ्होङ खोसे़ॽ पावल चे़क्चिमि कोङ्डे़ॽ हिःक्मे़ॽपॽआसे़ॽ मो रोमि तिरिङ्गामि एप्पा किस्सिडा। पावल यहुदिजिमि सुम्ढाम खिमबेॽ 30 यहुदिजिडे़ॽ पावल इन्ढोङ आप्टिक टिबॽआ लुमे खा मो तिरिङ्गाजिमि चोप्पा एप्पाडे़ॽ लेमा मिॽटुए। मोडोगे़ॽ वागियाराम खोसे़ॽ एप्पा याडाङ्बाजिनुङ चोप यहुदिजि सुम्ढाम खिमबेॽहा याॽमिजि सुम्नुङ सभा ले़ःॽमे हुकुम पिसुजि। मोबा पावल चिॽखे़ॽनुङ चोपमि पोम्बेॽ येःप्मेॽटु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.