एप्पा चोङ्सा 21 - याम्फुपावल यरुसलेम खे़ॽपॽआ 1 एफिससमि मन्डलिबेॽहा बिस्वासिजिनुङ बिदा लिनुङ कानिङ योङा जहाजबाङ कोस लुमे पोङ्बोङ्माबेॽ ले़न्डिङ्मा। मोबा वागियाराम रोडस लुमे पोङ्बोङ्माबेॽ रुक्नुङ मोबाङ ओङ्लाम पटारा सहरबेॽ लेॽसिङ्मा। 2 मोबेॽ कानिङे़ॽ फोनिके ठाउँ खे़ॽठाम योङा जहाज चुप्टुङ्मानुङ मोबेॽनोॽ साङ्नुङ खडिङ्मा। 3 मोबा साइपरस पोङ्बोङ्मामि के़क्बाङ लाङ्गेतलाम लिसाङ कानिङ सिरियालाम खडिङ्मा। टुरोस लुमे सहरबेॽ कोक्नाम चाङ्मामि योङा जहाज नासा। मोडोगे़ॽ कानिङ्सो ओरलबा लिसिङ्मा। 4 मोबा मोबेॽ पेङ्खुबा परभुमि बिस्वासि वावानिसाजि चुप्सिॽ खे़ॽनुङ मोबेॽ साता इक्को माहाजिनुङ्नोॽ पेनिङ्मा। पबित्रा होङ्निवाडे़ॽ लुबॽआसे़ॽ माहाजिडे़ॽ पावल “यरुसलेमबेॽ ए़ॽखे़ॽने” लुनुङ बिन्ति ले़टुजि। 5 मोबा इक साता ए़क्साङ मोबेॽ पेम्मे बेला रुक्खे़ॽनुङ कानिङ राम्बोक्माबेॽ मोबेॽहा बिस्वासि वावानिसा, नानुसाजिनुङ पिच्छा चोप कानिङ चिक्आसिॽ सहरबाङ किॽयुठोक आबामि। मोबा कानिङ चोबे़ॽ माहोङ्मामि के़क्पेॽ टुम्रुक ठोःक्नुङ पारथना ले़ःॽनुङ मो ठाउँबाङ बिदा लानुङ हाःघडिङ्मा। 6 मोबा ए़क्साङ कानिङ योङा जहाजबेॽ साक्सिङ्मा खोजि चाहिँ खिमबेॽ टेखडामि। 7 कानिङ टुरोस सहरबाङ टोलेमाइस लुमे सहरबेॽ रुक्नुङ योङा जहाजबाङ ओरलबा लिसिङ्मा। मोबेॽ कानिङ परभुबेॽ बिस्वास ले़ःॽखुबा वावानिसाजिनुङ चुप्सिॽ खे़ॽनुङ इक्याक खोजिनुङ्नोॽ पेनिङ्मा। 8 मोबाङ बिदा लिघे़ॽनुङ वागियाराम कानिङ कैसरिया सहरबेॽ रुक्टुङ्मा। मोबेॽ कानिङ सुसमाचारमि खा परचार ले़ःॽखुबा फिलिपमि खिमबेॽ पेनिङ्मा। फिलिप चाहिँ यरुसलेमबेॽ निवाहाङ्मि योम्बोक ले़ःॽमामि से़म्बॽआ एच्चि जनाबेॽ खोसो इक्को ले़टे़। 9 खोमि रिबाङ फुङ्सया मे़ले़ःॽपॽआ सम्समा पसाजि टुसामे। खोजिबेॽ अगमबानि इःमे बरदान टुसहा। 10 कानिङ फिलिपमि खिमबेॽ इक याक नियाक पेम्माबेॽ यहुदिया ठाउँबाङ अगाबस निङ ले़ःॽखुबा अगमबक्ता यहुदि कानिङ्बेॽ लेस्सा। 11 अगाबसडे़ॽ पावलमि थोङ्माइ लानुङ टाङ्बामि हुक सराङ हिःक्नुङ लुसु, “पबित्रा होङ्निवाडे़ॽ इडोॽ लुये, इगो थोङ्माइ असामि ले़ये, खो यरुसलेमबेॽ खे़ॽयेम्बाङ यहुदि अगुवाजिडे़ॽ राःप्नुङ इडोक्नोॽ हिःक्इन्डुजेनुङ अयहुदि जातिजिमि हुकपेॽ पिन्डुजे।” 12 इगो खा खेम्नुङ कानिङ्नुङ मोबेॽहा चोबे़ॽ पावल “यरुसलेम एॽखे़ॽने” लुनुङ बिन्ति ले़ःॽटुङ्मा। 13 तर पावलडे़ॽ इडोॽ लुसा, “हे़निङे़ॽ हाःप्नुङ इन्ढोङ के़ए़ निवा निरास टोङ्इन्डानुमे ? कागो यरुसलेमबेॽ खे़ॽनुङ हिःक्चिमुमारेॽनोॽ ने़ॽनि, तर परभु येसुमि लागि सिघे़ॽमासो राजि ले़ङे।” 14 कानिङे़ॽ पावल मे़से़क्हेसुङ्मा मोडोगे़ॽ कानिङे़ॽ खो “निवाहाङ्मि हुकपेॽ युङ्नुङ” योङ उगिङ्मा। 15 मोबा ए़क्साङ कानिङ्मि कोक्नाम पोरोक्नुङ यरुसलेम राम्बुगिङ्मा। 16 कैसरियाबेॽहा आढा बिस्वासि वावानिसाजिसो कानिङ्नुङ्नोॽ सोरि खडामि। मोबा साइपरस योङेॽ यिजुम्बॽआ पोङ्बोङ्माबेॽए इक्को मनासोन निङ ले़ःॽखुबा याॽमिमि खिमबेॽ पेङ्सिॽ कानिङ चिक्खे़ॽटामि। खो याक्लोए बिस्वासि ले़टे़। पावलडे़ॽ याकुब चुप्पॽआ 17 मोबा कानिङ यरुसलेमबेॽ रुक्माबेॽ मोबेॽहा बिस्वासिजिडे़ॽ कानिङ साप्थाङ्मानुङ स्वागत ले़टामि। 18 वागियाराम पावलडे़ॽ कानिङ याकुबमि खिमबेॽ चिक्खे़ॽटा। याकुबमि खिमबेॽ चोप एलडरजि सुम्बॽआ ले़टामि। 19 पावलडे़ॽ खोजि चुप्नुङ स्वागत ले़टुजि खोजिनुङ अयहुदि जातिजिमि रुम्बेॽ सुसमाचार परचार ले़ःॽमाबेॽ निवाहाङ्डे़ॽ इन्डोक्हा योम्बोक ले़टुहा लुनुङ चोप खा मोबेॽहाजि इःबेॽटुजि। 20 पावलमि खा खेम्नुङ माहाजिडे़ॽ निवाहाङ्मि ओहाङ ले़टुजि। मोबा माहाजिडे़ॽ पावल इडोॽ लुसुजि, “इगोबेॽसो बेॽलो यहुदिजिडे़ॽ परभुबेॽ बिस्वास ले़ःॽनुङ मोसाडे़ॽ पिबॽआ यहुदि धारमिक नियममि खासो नुरोॽ पालना ले़ःॽमे़ॽनिङ्सिन्डुजे। 21 तर हागो ‘मोसाडे़ॽ पिबॽआ नियम ले़ःॽमा पाप्निबा मोबा वडाङ्पसे़ॽ खतनासो ले़ःॽमा पाप्निबा, यहुदिजिमि नियमसो ले़ःॽमा पाप्निबा’ लुनुङ अयहुदि जातिजिमि रुम्बेॽ पेङ्खुबा यहुदिजि हे़ने़ॽ इःन्डुएरो लुमे खा खोजिडे़ॽ खेम्इटुजे। 22 मोडोगे़ॽ हागो कानिङ इन्डोक्टे ले़ःॽमे ? हे़न इगोबेॽ लेङ्नुङ पेङ्इटे़ लुनुङ माहाजिडे़ॽ चइबानोॽ खेम्इन्डुजे। 23 मोडोगे़ॽ कानिङे़ॽ लुबॽआ खेप्से। कानिङ्नुङ इगोबेॽ निवाहाङ्नुङ हे़न्ज्रुङ हे़न्खुबा रिबाङ याॽमिजि टुम्मे। 24 हागो खोजिनुङ हे़नसो मन्दिरबेॽ खे़ॽनुङ चोखो लिमामि खोजिनुङ पेने। मोडोक्पेॽ इघाजि पाप्मिहा खरचा चाहिँ हे़ने़ॽ फोङ्बेॽनुङ माहाजिमि टाङ खोमेॽटाजे। इडोॽ हे़ने़ॽ यहुदि धारमिक नियमडोॽ ले़ःॽपॽआ खाङ्नुङ माहाजिडे़ॽ खेम्बॽआ खा चाइबानोक्मा ने़ॽनिहाले़ लुनुङ लेडोक्इन्डुजे। 25 परभु येसुबेॽ बिस्वास ले़ःॽखुबा अयहुदि जातिहा याॽमिजि चाहिँ ‘मुरतिबेॽ चेॽटिबॽआ खा ए़ॽचामे, हरि ए़ॽचामेनुङ बेॽला फिन्नेबॽआ जिवातमि सा ए़ॽचामे मोबा बेभिचार योम्बोकबाङ ओः पेम्मे’ लुनुङ कानिङे़ॽ निधो ले़ःॽनुङ पत्रा साप्हाङ्इटुङ्मे़।” 26 इडोॽ पावलडे़ॽ इगो खा खसिनुङ वागियाराम माहा रिबाङ याॽमिजि चिक्मानुङ चोखो लिमामि मे़न्जारेॽ पेन्नुङ मन्दिरबेॽ खडा। खोसे़ॽ माहाजिनुङ सोरि चोख्याबा लिमे मे़न्चारेॽ पेन्नुङ चोख्याबा लिसा। मोबा ए़क्साङ पावल चोखो लिमे मे़न्चारेॽ पेन्नुङ भोग पिमे याक इन्डोक्पेॽटे सिॽइये लुनुङ याडाङ्बाजि लुसिॽ मन्दिर होङ्सिॽयु पे़खडा। पावल मन्दिरबेॽ राःप्पॽआ 27 चोखो लिमे एच्चिमा याक पुरा लिसिॽपोरोक्पॽआ ले़टा। मोडोक्पेॽ एसिया ठाउँबेॽहा यहुदिजिडे़ॽ पावल मन्दिर होङ्सिॽयु खाङ्डोक्टुजि। माहाजिडे़ॽ याॽमिजि चोप्टिनुङ पावल राःबुजि। 28 मोबा माहाजि बेॽए सेम्ले़ॽ वोसाङ इडोॽ काबोगामि, “आबानिङे इस्राएलि वावानिसाजि, इगो याॽमिनोॽ कानिङ्नुङ कानिङ्हा यहुदि नियममि बिरोध ले़ःॽखुबा मोबा मन्दिरबेॽ पुजासो ए़ले़ःॽमे लुनुङ याॽमिजिमि निवा फेङ्घुबा ले़ये। मोडोक्रेॽनोॽ ने़ॽनि अयहुदि जातिहा याॽमिजि मन्दिर होङ्सिॽयु चिक्खे़ॽनुङ पबित्रा ठाउँसो इगोसे़ॽ असुद्ध टोङ्इटुए।” 29 माहाजिडे़ॽ एफिससबाङ लेम्बॽआ तोरफिमस पावलनुङ सोरि सहरबेॽ खाङ्बॽआ ले़टे़। माहाजिडे़ॽ मिॽटुजि पावलडे़ॽ मो याॽमि मन्दिर होङ्सिॽयुसो चिक्खे़ॽटु। 30 इगो खा सहरबेॽहा चोप याॽमिजिडे़ॽ लेडोक्टुजि, मोबा चोप याॽमिजि मोबेॽ पिन्जासामि। माहाजिडे़ॽ पावल राःप्नुङ मन्दिरबाङ पाखे़ॽयु से़ॽआप्नुङ मन्दिरमि राम्डेम से़क्टिसुजि। 31 माहाजिडे़ॽ पावल सेॽनेसिॽ पोरोक्पॽआ ले़टे़। मोडोक्पेॽनोॽ यरुसलेमबेॽ याॽमिजि सेॽखुसे़ॽचुसिॽ पोरोक्इटामे लुमे खा रोमि तिरिङ्गाजिमि चोप्पाङ एप्पा तिरिङ्गाडे़ॽ खेम्डोक्टु। 32 मो खा खेम्मासोरोॽनोॽ खो तिरिङ्गाजिनुङ तिरिङ्गाजिमि एप्पा चिक्मानुङ याॽमिजि सुम्बॽआ ठाउँलाम खडा। माहा तिरिङ्गाजि मोबेॽ लेम्बॽआ खाङ्नुङ पावल रोम्मा लेडुजि। 33 मो तिरिङ्गामि चोप्पा एप्पाडे़ॽ पावल राःप्नुङ चे़क्चिमि निच्चि कोङ्डे़ॽ हिःक्मे़ॽटुजि। मोबा मोसे़ॽ याॽमिजि सिप्सुजि, “इगोसे़ॽ इमाङ्डे ले़टुए ? इगो याॽमि हाम्बिएन्डे ?” 34 तर माहा याॽमिजिबेॽ आढाडे़ॽ इक्को खा लुसुजि, आढाजिडे़ॽ हाइको खा लुसुजि। तर हाइखाजिडे़ॽ हाइके खा लुसुजि। इडोॽ मो तिरिङ्गामि चोप्पाङ एप्पाडे़ॽ इमाङ खाडे लुनुङ मे़लेहेसु। मोडोगे़ॽ खोसे़ॽ पावल तिरिङ्गाजि पेन्ढाम ठाउँबेॽ लाघे़ॽमे़ॽटुजि। 35 माहा तिरिङ्गाजिडे़ॽ पावल चिक्खे़ॽमाबेॽ बेॽलो याॽमिजिसो खोजि टिङ्साङ ए़ङ्गुवा ए़ङ्गुवा खडामि। थेनाङ्बाङ मिन्डु साङ्मे़ॽनिङ्सिमाबेॽ पावल सेॽनेमामि माहा याॽमिजि पेडिखडामि। मोडोगे़ॽ माहा याॽमिजिबाङ जोगा ले़ःॽमामि तिरिङ्गाजिडे़ॽ पावल हुगे़ॽ ठेॽखे़ॽटुजि। 36 मोडोॽलोसो माहा याॽमिजिडे़ॽ पावल सेॽनेमानोॽ खे़ये कासाङ वोमे़ॽनिङ्सिडामे। 37 तिरिङ्गाजिमि पेन्ढाम खिमबेॽ पे़खे़ॽसिॽ पोरोक्माबेॽ पावलडे़ॽ तिरिङ्गाजिमि चोप्पाङ एप्पा लुसु “हजुर, के़ए़ इक्को खा के़ॽ हे़न्नुङ युङ्हेनुङे ?” तिरिङ्गाजिमि चोप्पा एप्पाडे़ॽ लुसु, “इमा हे़ने़ॽ गिरिक खाप्लासो लेन्डुए ? 38 इमा हे़न मो हुल-दुङ्गा ले़ःॽखुबा मिस्रि याॽमि ने़ॽने, हे़ने़ॽ रिक्पोङ हजार सरकारमि बिरोध ले़ःॽखुबाजि नाम्भुङ्लाबेॽ लाघे़ॽटुजे ?” 39 पावलडे़ॽ लुसु, “ने़ॽनि हजुर, कागो किलिकिया ठाउँमि टारसस लुमे सहरबेॽए यहुदि जाति ले़ङे। का मो निङ मुक्पॽआ सहरमि इक्को याॽमि ले़ङे। नम्नावा ले़ःॽनुङ इघा याॽमिजिमि पोम्बेॽ का इॽछोॽ खा इःमेॽमा।” 40 तिरिङ्गाजिमि चोप्पाङ एप्पाडे़ॽ यामुसे़ लुसु, मोबा पावलडे़ॽ थेनाङ्बेॽ येःप्नुङ याॽमिजि हुकमि खाप्लाडे़ॽ योङ उगानिङे लुसुजि। मोबाङ ए़क्साङ पावलडे़ॽ हिब्रु खाप्लाबेॽ इःबोगु– |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.