एप्पा चोङ्सा 20 - याम्फुपावल माकेडोनियानुङ गिरिस देसबेॽ 1 मो हुलदुङ्गा एॽयुनुङ ए़क्साङ पावलडे़ॽ परभु येसुमि चोङ्साजि सुम्नुङ खोजि बिस्वासबेॽ बोलियो लिमिरो लुनुङ सिक्छे पिआनुङ बिदा लिसा। मोबा माकेडोनियालाम खडा। 2 मोबेॽ रुक्नुङ खोसे़ॽ ठाउँ ठाउँबेॽ खे़ॽनुङ परभुमि चोङ्साजि सहास पिसुजि। मोबा ए़क्साङ खो गिरिस देसबेॽ लेस्सा 3 मोबा खो सुम महिनाडोक मोबेॽनोॽ पेना। मोबा पावलडे़ॽ योङा जहाजबाङ सिरियालाम खे़ॽमा मिना। इडोॽ पावल खे़ॽमामि पोरोक्माबेॽ यहुदिजिडे़ॽ खोमि बिरोधबेॽ मोत्ता इःबॽआ खोसे़ॽ लेडोक्टु। मोडोगे़ॽ खो योङा जहाजबाङ ने़ॽनि सराङेॽ राम्साङ माकेडोनिया लिसाङ खे़ॽमा मिना। 4 मोडोक्पेॽ खोनुङ मन्डलिबेॽहा हाइखा बेॽलो वावानिसाजि योम्बोक ले़टामे। माहा वावानिसाजिबेॽ बेरिया सहरबेॽ पेङ्खुबा सोपात्रोस लुमे पुरसमि पसा, थेस्लोनिकि सहरबेॽ पेङ्खुबा अरिस्तारखसनुङ सिकन्दस निङ ले़ःॽखुबा, डरबि सहरबेॽ पेङ्खुबा गायसनुङ तिमोथि मोबा एसिया ठाउँबाङ लेम्बॽआ तुखिकसनुङ तोरफिमस ले़टामे। 5 खोजि चाहिँ कानिङ्बाङ याक्लोनोॽ खे़ॽनुङ तोरोआस सहरबेॽ कानिङ हुक्सामि। 6 कानिङ चाहिँ छुट्कारा चाडमि ए़क्साङ फिलिप्पि सहरबाङ टोम्लिॽवामि राम लिसाङ खडिङ्मा। मोबाङ ङाउम याक ए़क्साङ खोजि तोरोआस सहरबेॽ कानिङे़ॽ चुप्टुङ्मा। मोबेॽ कानिङ साता इक्कोडोॽ पेनिङ्मा। पावल ए़क्साङ्एखेॽ तोरोआस सहरबेॽ 7 मोबा सातामि याक्लोए याक युडा कानिङ मोबेॽ टुघुबा बिस्वासि वावानिसाजिनुङ परभु भत्तेर चासिॽ सोरि सुप्सिङ्मा। पावल चाहिँ वागियारामनोॽ खे़ॽपेमा सिॽपॽआसे़ॽ खोजिनुङ सेन्डा बेॽलो पेन्नुङ यामुसामि। 8 कानिङ सुम्बॽआ मिॽटुए तलाबेॽ बेॽलो कुप्पि उःप्पॽआ ले़टा। 9 मो तलामि जोस्केलोबेॽ युटिकस लुमे इक्को वेन्जा पिच्छा पेम्बॽआ ले़टा। पावल यामुमे़ॽनिङ्सिमाबेॽ मो पिच्छा इम्मे़ॽमिॽचोसु। मोडोगे़ॽ खो इॽछोॽपेॽ इम्डिघे़ॽनुङ सुम तलाबाङ मिम्मु भुइबेॽ हेडा। मिम्मु खे़ॽनुङ खाङ्माबेॽ खो सिघे़ॽपेबॽआ ले़टा। 10 पावल मिम्मु उङ्नुङ मो पिच्छा हेप्साङ खोसे़ॽ याॽमिजि लुसुजि, “हे़निङ सुरता ए़ले़ःॽटानिङे, इगो पिच्छागो हिङ्रिकनोॽ ले़ये।” 11 मोबा ए़क्साङ पावल मिन्डुए तलाबेॽ साङ्नुङ चोबे़ॽ परभु भत्तेर चासामि। परभु भत्तेर चासेॽनुङ खो सेन्से खोजिनुङ यामुसा मोबा खोजिनुङ बिदा लानुङ खडा। 12 मोबेॽहा चोङ्साजिडे़ॽ मो पिच्छा खोमि खिमबेॽ चिक्टियोसुजि। मो पिच्छा हिङ्बॽआ खाङ्नुङ माहाजि बेॽलोनोॽ साप्थाक्सामि। तोरोआसबाङ मिलेटस ठाउँठोक राम्बॽआ 13 तोरोआसबाङ पावल हाइखाजि चाहिँ योङा जहाजबेॽ साङ्नुङ अस्सोस लुमे सहरबेॽ खडिङ्मा। पावल चाहिँ अस्सोस सहरठोक सराङेॽ राम्साङ खे़ॽमा मिॽपॽआसे़ॽ अस्सोस सहरबाङ्रेॽनोॽ योङा जहाजबेॽ साङ्मे खा टोङ्बॽआ ले़टे़। 14 कानिङ आस्सोसबेॽ रुक्माबेॽ पावलसो मोबेॽ लेस्सा मोबाङ कानिङ सोरि योङा जहाजबेॽ साङ्नुङ मितिलेने लुमे सहरबेॽ खाडिङ्मा। 15 वागियाराम कानिङ टोम्लिॽवामि राम लिसाङ खियस लुमे योङेॽ यिजुम्बॽआ पोङ्बोङ्मामि के़क्पेॽ रुक्टुङ्मा। सिङ्आराम सामोस लुमे पोङ्बोङ्माबेॽ रुक्टुङ्मा। मोबा हाइके याक चाहिँ मिलेटस लुमे सहरबेॽ लेन्डिङ्मा। 16 एसियाबेॽ हागो बेॽलो ए़पेम्मामि पावल एफिसस सहरबेॽ खे़ॽमा मे़मिना। इन्ढोङ्होङ खो चान्डो चान्डो यरुसलेम रुक्मा खडे़। खो इन्डोॽहोङ्सो पेन्तिकोसमि चाडबेॽ रुक्मा मिॽटुए। एफिससबेॽहा मन्डलिमि अगुवाजिनुङ पावल हाःघे़ॽपॽआ 17 पावलडे़ॽ मिलेटस सहरबाङ एफिसस सहरबेॽ टुघुबा मन्डलिबेॽहा एलडरजि मिलेटस सहरबेॽ के़ःॽहाक्सुजि। 18 माहाजि मोबेॽ लेस्सामि मोबा पावलडे़ॽ इडोॽ इःसु, “का एसियाबेॽ लेम्बॽआ याकबाङ्नोॽ हे़निङ्नुङ पेम्माबेॽ माहा याक के़ॽ इन्डोॽ पेनिङे माहा चोप हे़निङे़ॽ लेन्डानुमे। 19 यहुदिजिडे़ॽ घरि घरि चुङ्जामाबेॽसो के़ॽ ए़डेम्मा लिनुङ परभुमि योम्बोक हाःप्साङ ले़टुङ। 20 मोबा हे़निङ चोपमि पोम्बेॽनुङ हे़निङ्मि खिम-खिमबेॽ लेन्नुङ नुबा खा इःॽमाबेॽ के़ॽ इमाङ खासो के़ए़ निवाबेॽ चुम्नुङ मे़युक्सुङ। 21 ‘के़ॽ यहुदिजिनुङ अयहुदि जातिहा याॽमिजि चोप टाङ्बामि पापि योम्बोक लेॽनुङ निवाहाङ्बेॽ टेसानिङे’ मोबा कानिङ्मि परभु येसुबेॽ बिस्वास ले़टानुमे लुनुङ परचार ले़टुङ। 22 “हागो का पबित्रा होङ्निवाडे़ॽ लुबॽआ खा खेम्नुङ यरुसलेम खे़ॽमामि पोरोक्इटिङे। मोबेॽ के़ॽ इमाङ इमाङ आङ्मा खे़हा, के़ॽ लेसुङ्नि। 23 तर के़ॽ इडोॽ चाहिँ लेनुङे़, का खे़ए़ङे चोप सहरबेॽ के़ॽ खेः आङ्मा खे़येनुङ तिरिङ्गा खिमबेॽ सिॽइये लुनुङ का पबित्रा होङ्निवाडे़ॽ लुटिङे। 24 तरसो के़ए़ हिङ्मवागो काङ्मि लागि इमाङ्सो योम्बोक ले़ःॽनिबा। के़ॽ मिॽपॽआ इगोरेॽनोॽ टुये निवाहाङ्डे़ॽ चोप याॽमिजि अनुग्रहा ले़ए़टे़ लुमे सुसमाचार चोप ठाउँराजि खेम्मेहेमा। इगो योम्बोक चाहिँ का परभु येसुडे़ॽ ले़ःॽमा लुटिङे। 25 “हागो खाक्सानुमे, हे़निङ असा असाजिमि पोम्बेॽ के़ॽ निवाहाङ्मि राज्य परचार ले़टुङ, हागोएम्बाङ ए़क्साङ फेरि हे़निङ्नुङ का इन्डोक्पेॽसो चुप्हेङानि लुनुङ के़ॽ लेनुङ्हा। 26 मोडोगे़ॽ के़ॽ आयु हे़निङ लुनिम्ने़, हे़निङ्बेॽ असाहोङ्सो नासि लिसानिङ्होङ काबेॽ मोमि आप्टिक सिॽनिबा। 27 इन्ढोङ्होङ निवाहाङ्डे़ॽ कानिङ्मि लागि ले़ःॽपॽआनुङ ए़क्साङ लिहा खामि टुम्बेॽहा इमाङ खासो के़ए़ निवाबेॽ मे़युङ्लेॽ हे़निङ लुबेॽनिम्ना। 28 मोडोगे़ॽ हागो हे़निङ टाङ्बानुङ मन्डलिबेॽहा याॽमिजिमि लागिसो होसियार ले़टानिङे। पबित्रा होङ्निवाडे़ॽ हे़निङ खाङ्घुबा टोङ्बॽआसे़ॽ निवाहाङ्मि पसामि हरिडे़ॽ इम्बॽआ मन्डलि नुरोॽ खाक्सानुमे। 29 के़ॽ लेनुङे़ का खे़ॽपेङे मोबा ए़क्साङ नाम्भुङ्लाबेॽहा एभा लेन्नुङ सामुजि इमा मे़युङ्रेॽ सेॽनेबॽआडोॽ हे़निङ्मि रुम्बेॽ ने़ॽनिहा खा इःॽखुबाजि लेङ्इम्मेनुङ ने़ॽनिहा ने़ॽनिहा खा इःॽनुङ मन्डलिबेॽहाजि सानिङ दुःख पिन्डुजे। 30 हे़निङ्मि रुम्बेॽसो मे़ॽनोक्हा सिक्छे इःॽखुबा याॽमिजि लिम्मे। माहाजिडे़ॽ परभुमि चोङ्साजि खोजिमि टेडिगरिक रामलाम लाघे़ॽमा योॽइन्डुजे। 31 मोडोगे़ॽ चङ्खो लिनुङ पेनानिङे मोबा के़ॽ सुम्निङ्डोक लेन्डा सेन्डा हाःप्मानुङ परभुमि चोप चोङ्साजि होसियार ले़टानुमे लुनुङ इःडुङ्घे़ॽटुङ। 32 “हागो के़ॽ हे़निङ निवाहाङ्मि हुकपेॽ जिम्मा टिमे़ॽनिङ्सिनुङे मोबा खोमिन्नोॽ अनुग्रहानुङ्मा बचनमि भोरबेॽ याःॽयानिम्ने़। मोसे़ॽनोॽ हे़निङ निवाहाङ्डे़ॽ बिस्वासबेॽ बोलियो टोङ्इयेनुङ खोसे़ॽ से़न्बॽआजिनुङ हकदार टोङ्इये। 33 के़ॽ असामिसो सुनानुङ सिसे़ङ्मि के़ङ्गेङ मे़मिॽटुङ। 34 हे़निङे़ॽनोॽ लेन्डानुमे, के़ए़ हुगे़ॽ योम्बोक ले़ःॽनुङ्नोॽ कानुङ के़हा लङ्गामजि पाप्मिहा खा पुरा ले़ए़टुङे। 35 के़ॽ ले़ःॽपॽआ चोप योम्बोकको के़ॽ हे़निङ्मि पोम्बेॽनोॽ खाङ्मेटुङे, ‘लाघुबाजिबाङ पिघुबाजि बेॽलो आसिस चुप्खुबाजि लिम्मे’ लुनुङ परभु येसु खोमदाङ्बे़ॽ लुबॽआ खा मिॽनुङ कमजोर याॽमिजिमि ले़ख्खो ले़टानुमेनुङ नुरोॽ योम्बोक ले़चासानिङे लुनुङ के़ॽ चोप खा खेम्मेॽनिम्ने़।” 36 इडोॽ लुनुङ पावलडे़ॽ खोजिनुङ सोरि टुम्रुक ठोःक्नुङ पारथना ले़टु। 37 मोबेॽ सुम्बॽआजि बेॽलोनोॽ हाःप्साङ पावल हेप्नुङ चुम्बन ले़ःॽनुङ बिदा ले़टुजि। 38 पावलडे़ॽ खोजिनुङ फेरि इन्डोक्पेॽसो कानिङ चुबिनि लुबॽआ खाडे़ॽसो माहाजि बेॽलो हाःबामि। मोबा खोजिडे़ॽ पावल खो खे़ॽठाम योङा जहाजठोक चिक्टिओसुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.