एप्पा चोङ्सा 19 - याम्फुपावल एफिसस सहरबेॽ 1 अपोल्लोस कोरिन्थ सहरबेॽ टुमाबेॽ पावल एसिया ठाउँमि मेॽटोङ्बाङ एफिसस सहरबेॽ उक्सा। मोबेॽ पवालडे़ॽ परभुबेॽ बिस्वास ले़ःॽखुबा आढा चोङ्साजि चुप्टुजि। 2 खोसे़ॽ माहाजि सिप्सुजि, “इमाङ हे़निङे़ॽ परभुबेॽ बिस्वास ले़ःॽनुङ पबित्रा होङ्निवा चुप्टानुमे ?” माहाजिडे़ॽ लुसुजि, “कानिङे़ॽको पबित्रा होङ्निवा टुये लुमे खागो खेम्सो मे़ङ्खेम्डिॽ।” 3 फेरि पावलडे़ॽ माहाजि सिप्सुजि, “मोडोक्होङ हे़निङे़ॽ इन्डोक्मा बप्तिस्मा लासानुमे ?” माहाजिडे़ॽ लुसुजि, “युहन्नाडे़ॽ इःॽपॽआ बप्तिस्मा लासुङ्मा।” 4 पावलडे़ॽ लुसु, “युहन्नाडे़ॽ पिबॽआ बप्तिस्मा चाहिँ पापबाङ टेआप्मामि लागि पिसुजि। खोसे़ॽको लुबॽआ ले़टे़ ‘काबाङ ए़क्साङ लेङ्घुबाबेॽ बिस्वास ले़ःॽमे’। खोबाङ ए़क्साङ लेङ्घुबा चाहिँ येसुनोॽ ले़ये।” 5 इगो खा खेम्नुङ माहाजिडे़ॽ परभु येसुमि निङ्बेॽ बप्तिस्मा लासुजि। 6 मोबा पावलडे़ॽ माहाजिसोक्पेॽ हुक युङ्नुङ माहाजिबेॽ पबित्रा होङ्निवा लेस्सा। मोडोक्पेॽ माहाजिडे़ॽ हाइखा खाप्लाबेॽ यामुसामिनुङ अगमबानि इःबोगुजि। 7 माहाजि जम्मा बारो जनाडोक टुसामे। 8 पावल यहुदिजि सुम्ढाम खिमबेॽ खे़ॽनुङ सुम महिनाडोक मे़ङ्किस्सिरेॽ निवाहाङ्मि राज्यमि टुम्बेॽ याॽमिजि इःडुजि। खोसे़ॽ लुबॽआ खा नुरोॽ लेसुजिरो लुनुङ निवाहाङ्मि राज्यमि टुम्बेॽहा खा लुमा मे़लेडु। 9 तर आढाजिडे़ॽको परभुबेॽ बिस्वास मे़ले़टुजि। तर खोजिडे़ॽको परभुडे़ॽ इःॽपॽआ हिङ्मवामि बिरोध ले़टुजि। माहाजिडे़ॽनोॽ पावलडे़ॽ इःॽपॽआ खामि बिरोध ले़ःॽपोगुजि। मोडोगे़ॽ पावल यहुदिजि सुम्ढाम खिमबेॽ खे़ॽमानोॽ लेप्पेनुङ परभुबेॽ बिस्वास ले़ःॽखुबा चोङ्साजि खोनुङ चिॽखे़ॽटुजि। मोबा ए़क्साङ पावलडे़ॽ टुरान्नस निङ ले़ःॽखुबा याॽमिमि पाठसालाबेॽ सानिङ्नोॽ याॽमिजिनुङ चुप्नुङ मुक्तिमि टुम्बेॽ छलफल ले़टु। 10 इडोॽ निनिङ्डोॽ पावलडे़ॽ इगो योम्बोक ले़टु। मोबा एसिया ठाउँबेॽहा यहुदिनुङ अयहुदि जातिहा याॽमिजिडे़ॽ परभुमि बचन खेप्सुजि। निवाहाङ्डे़ॽ पावलमि हुकबाङ खरिहा योम्बोक ले़ःॽपॽआ 11 निवाहाङ्डे़ॽ पावलमि हुकबाङ खरिहानुङ बेॽहा बेॽहा योम्बोक ले़टु। 12 खोसे़ॽ के़क्पॽआ रुमालनुङ ओप्ताङ लाघे़ॽनुङ टुक्खुबाजिसोक्पेॽ युङ्बेॽमाबेॽ याॽमिजि नुबोगामेनुङ मङे़ॽहा चापजि चिःॽखडामि। 13 ठाउँ ठाउँ वाइसाङ मङे़हा चापजि यिॽखुबा यहुदिजिडे़ॽसो परभु येसुमि निङ्बेॽ मङे़हा चापजि यिक्मा योगुजि। माहाजिडे़ॽ मङे़ॽमा चाप इडोॽ लुसुजे, “पावलडे़ॽ परचार ले़ःॽपॽआ येसुमि निङ्बेॽ हे़न खे़ॽपेसे लुनुङ आग्या ले़न्ने़”। 14 मोबेॽ इक्को स्केवास निङ ले़ःॽखुबा यहुदि चोप्पाङ एप्पा याडाङ्बामि एच्चि जना पसाजि टुसामे। खोजिडे़ॽसो मोडोक्मा योम्बोक ले़टुजे। 15 तर इक याक मङे़ॽमा चाबे़ॽ माहाजि इडोॽ लुसुजि, “के़ॽ येसु लेनुङे़, पावलसो लेनुङे़ तर हे़निङ चाहिँ असाजिडे ?” 16 इडोॽ कामानुङ मो मङे़ॽमा चाबे़ॽ राःप्पॽआ याॽमि माहाजिसोक्पेॽ पेडिघे़ॽनुङ माहाजि हेजोसुजि। माहाजि उक्चुङ्रे़क लिनुङ हुवा खिमानुङ मो ठाउँबाङ चिःॽखडामि। 17 इगो खा एफिससबेॽ टुघुबा चोप यहुदिजिनुङ गिरिक जातिजिडे़ॽ खेम्नुङ चोप किस्सिसामि। माहाजिडे़ॽ परभु येसुमि बेॽलो ओहाङ ले़टुजि। 18 बिस्वास ले़ःॽखुबाजि बेॽलो लेन्नुङ खोजिडे़ॽ ले़ःॽपॽआ मङे़हा योम्बोक याॽमिजिमि रुम्बेॽ लुनुङ स्विकार ले़टुजि। 19 इडोॽ बेॽलो चटक ले़ःॽखुबा, माङ्बा, याडाङ्बाजिमि योम्बोकमि टुम्बेॽ साप्पॽआ खोजिमि नेॽचिरा याॽमिजिडे़ॽ मोबेॽ लाजे़ॽनुङ चोपमि पोम्बेॽ हिॽपेसुजि। माहा हिॽपॽआ नेॽचिरामि दाम हिसाब ले़ःॽमाबेॽ सिसे़ङ्मि याङ ङाक्पोङ हजार लिसा। 20 मोबा इडोॽ परभुमि बचन सक्तिनुङ मुक्खडा। एफिससबेॽ हुल-दुङ्गा 21 मोबा ए़क्साङ पावलडे़ॽ माकेडोनियानुङ अखैया लुमे ठाउँ लिसाङ यरुसलेम खे़ॽमा मिना। खोसे़ॽ लुसु, “का मोबेॽ रुक्नुङ का रोम सहरबेॽसो खे़ॽमानोॽ खे़ये।” 22 मोबाङ ए़क्साङ खो योम्बोक ले़ःॽमाराप्खुबा तिमोथिनुङ इरास्तस माकेडोनियाबेॽ पाक्सुजि। तर खो चाहिँ इक याक नियाक एसियाबेॽनोॽ पेना। 23 मोडोक्पेॽ मुक्तिमि राममि खाडे़ॽ एफिससबेॽ बेॽए खैला बैला लिसा। 24 डेमेतिरियस लुमे सुनारडे़ॽ आरतेमिस देबिमि सिसे़ङ्मि ए़द्रिहा मन्दिर टोक्सुहा। इडोक्हा टोङ्नुङ खोनुङ खोसे़ॽ युङ्बॽआ याॽमिजिडे़ॽसो बेॽलो याङ टोक्सुजे। 25 हागो डेमेतिरियसडे़ॽ खोमि योम्बोक ले़ःॽखुबाजिनुङ हाइखा मोडोक्हा योम्बोक ले़ःॽखुबाजि चोप सुम्नुङ इडोॽ लुसुजि, “होउ निसाजि, हे़निङे़ॽ लेन्डानुमे, इगो योम्बोकबाङ्नोॽ कानिङे़ॽ याङ टोङ्इटुङ्माहा। 26 तर इगो पावलडे़ॽ इमाङ लुमे़ॽनिङ्सिन्डुए हे़निङे़ॽनोॽ खाङ्मे़ॽनुङ खेम्मे़ॽनिङ्सिन्डानुमे। याॽमिजिमि हुगे़ॽ टोङ्बॽआ देउताजि चाहिँ देउतानोॽ ने़ॽनिहाजि लुमे़ॽनिङ्सिये। इगोसे़ॽ इगो एफिससनुङ एसियाबेॽ पेङ्खुबा चोप याॽमिजि खोमि खा इःॽनुङ खोमिलाम लाघे़ॽसिॽपोरोइटुए। 27 इडोॽ कानिङ्मि योम्बोकमिरेॽनोॽ ने़ॽनि तर कानिङ्मि बेॽएम्मा देबि आरतेमिसमि मन्दिरमिसो हेला लिये मोबा एसियानुङ मक्खाम्डेमबेॽहा याॽमिजिडे़ॽ ले़ःॽमे़ॽनिङ्सिबॽआ आरतेमिसमि पुजा ले़ःॽमासो लेप्पेन्डुजे।” 28 इगो खा खेम्नुङ मोबेॽ सुम्बॽआ चोप याॽमिजि सुरके़ॽनुङ इडोॽ काबोगामि, “एफिससबेॽ टुघुबा आरतेमिस देबिमि ओहाङ!” 29 मोडोॽ ओहाङ ले़ःॽपॽआसे़ॽ चोप सहरबेॽ मुगा। याॽमिजि सुम्नुङ लेस्सामि मोबा माकेडोनियाबाङ लेम्बॽआ पावलमि लङ्गामजि गायसनुङ अरिस्तारखस राःप्नुङ बेॽए डेम्माबेॽ लाघे़ॽटुजि। 30 पावलसो मोबेॽ खे़ॽमा योगा। तर बिस्वासि वावानिसाजिडे़ॽ खो मे़ङ्खे़ॽमेॽटुजि। 31 एसियाबेॽहा आढा सरकारि याॽमिजिडे़ॽसो पावलमि लङ्गामजि ले़टामि माहाजिडे़ॽसो मोबेॽ ए़खे़ॽने लुनुङ से़गुजि। 32 माहा सुम्बॽआ याॽमिजिबेॽ खाल खालहा खा पुःक्पॽआसे़ॽ बेॽए खायोक्मायोक लिसा। आढाजिडे़ॽ इक्को खा इःसुजे आढाजिडे़ॽ हाइको खा इसाङ वोसामे। तर मोबेॽ सुम्बॽआ बेॽलो याॽमिजिडे़ॽ इन्ढोङ सुम्नुङ इडोॽ काम्मे लुमे खा मे़लेसुजि। 33 यहुदिजिडे़ॽ मोडोक्पेॽ लिडिङ्बॽआ खामि टुम्बेॽ याॽमिजि लुबेॽमामि लागि अलेक्जेन्डर पोम्बेॽ येःमेॽटुजि। मोबा खोसे़ॽ हुकमि खाप्ले़ॽ योङ्उक्मेॽसाङ जोग लिमामि लागि खा इःमा योगु। 34 तर खो यहुदि लुनुङ माहाजिडे़ॽ लेडोक्नुङ याॽमिजिडे़ॽ निबोङ्ठोक “एफिससबेॽ टुये आरतेमिस देबिमि ओहाङ!” लुसाङ कासामि। 35 ए़क्साङ मो सहरबेॽए साप्खुबा एप्पाडे़ॽ चोप याॽमिजि योङ उःक्मे़ॽनुङ इडोॽ लुसु, “एफिससबेॽहा वावानिसाजि, एफिसिजिमि सहर चाहिँ बेॽए आरतेमिस देबिमि मन्दिरनुङ नान्द्रुङ्माबाङ हेओक्पॽआ खोमि मुरति जोगा ले़ःॽखुबा लुनुङ चोप याॽमिजिडे़ॽ लेन्डुजे। 36 असे़ॽसो इगो खा ने़ॽनि लुहेसुजिनि मोडोगे़ॽ हे़निङ चोप योङ पेनानिङे। इडोॽ नुरोॽ मे़मिॽलेॽ इमाङ योम्बोकसो ले़ःॽमा नुबा लिनिबा। 37 हे़निङे़ॽ राःप्नुङ लाजे़ॽपॽआ इघा याॽमिजिडे़ॽ कानिङ्मि मन्दिरबाङ इमाङ्सो मे़ङ्खुडिॽ मोबा कानिङ्मि देबिमि बिरोधसो मे़लेःॽटिटुॽजे। 38 हागो डेमेतिरयसनुङ खोमि सुना उप्खुबा लङ्गामजिमि हागोसो खा टुहोङ न्याय ले़ःॽठामबेॽ खे़ॽनुङ माहाजिमि रुम्बेॽ उजुर ले़टुजिरो। 39 तर मोबाङ्सो बेॽलो हाइखा खा हे़निङ्नुङ टुहोङ जनताजि के़ःॽनुङ मो खामि छलफल ले़ःॽपेॽहेन्डुङ्मे। 40 आयु इडोॽ हुल-दुङ्गा लिबॽआसे़ॽ मोमि आप्टिक कानिङ्सोक्पेॽ सिॽहेये। कानिङ्सोक्पेॽ इगो आप्टिक टिमिहोङ इमाङेॽ हुलदुङ्गा लिसे़ कानिङे़ॽ लुमे खा इमाङ्सो माॽआये।” 41 इडोॽ लुसे़ॽनुङ सुम्बॽआ याॽमिजि बिदा पिसुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.