एप्पा चोङ्सा 18 - याम्फुपावल कोरिन्थ सहरबेॽ 1 मोबा ए़क्साङ पावल एथेन्स सहरबाङ बिदा लिनुङ कोरिन्थ सहरबेॽ खडा। 2 मोबेॽ खोसे़ॽ अकिलास निङ्मा इक्को यहुदि चुप्टु। अकिलास पोन्टस ठाउँबेॽ टोक्पॽआ ले़टानुङ खोमि जहान पिरिस्किलानुङ भरखरि इटालि लुमे देसबाङ लेम्बॽआ ले़टाजे। इन्ढोङ्होङ रोमि हाङ्बा क्लौडियासडे़ॽ चोप यहुदिजि रोम सहर ले़ःॽमे हुकुम पिबॽआ ले़टा। पावल खोजि चुप्सिॽ खडा। 3 मोबा माहाजिडे़ॽ पाल टोङ्मे योम्बोक ले़ःॽचासामे। पावलसो खोजिनुङ्नोॽ पेना इन्ढोङ्होङ खोसे़ॽसो पाल टोङ्मे योम्बोक ले़टुए। 4 पावल चोप नाजामे याकपेॽ यहुदिजि सुम्ढाम खिमबेॽ खे़ॽनुङ यहुदिनुङ गिरिक जातिजिनुङ छलफल ले़ःॽसाङ मो निच्चि जातिहा याॽमिजिडे़ॽ लेसुजिरो लुनुङ नुरोॽ लुबेॽटुजे। 5 सिलासनुङ तिमोथि माकेडोनिया लुमे ठाउँबाङ मोबेॽ लेस्साजि, पावलडे़ॽ चाहिँ सानिङ्नोॽ परचारमि योम्बोक ले़टु। खोसे़ॽ यहुदिजि “येसुनोॽ पापबाङ छुट्कारा पिघुबा हाङ्बा खिरिस्ट ले़ये” लुमे साक्छि पिसुजि। 6 तर माहाजिडे़ॽ पावल बिरोध ले़ःॽनुङ खो योबुजि। पावलडे़ॽ खोजिमि बिरोधबेॽ खोमि चेॽपेॽहा धुलो फाप्साङ माहाजि इडोॽ लुसुजि, “हे़निङ्मि पापमि आप्टिक हे़निङ सोक्पेॽनोॽ सिॽरो। मोमि आप्टिक कासोक्पेॽ सिॽनिबा। हागोएम्बाङ का अयहुदिहा याॽमिजिबेॽ खे़ए़ङे।” 7 मोबा ए़क्साङ पावल यहुदिजि सुम्ढाम खिमबेॽ खे़ॽमा लेॽपेसु। मो यहुदिजि सुम्ढाम खिम के़क्पेॽ निवाहाङ्मि ओहाङ ले़ःॽखुबा तितस युस्तस निङ ले़ःॽखुबा गिरिक जाति याॽमिमि खिमबेॽ पेन्सिॽ पावल खडा। 8 यहुदिजिमि सुम्ढाम खिमबेॽए सासक किरिस्पसनुङ खोमि खिमबेॽहाजिडे़ॽ परभुबेॽ बिस्वास ले़टुजि। कोरिन्थबेॽहा हाइखा बेॽलो याॽमिजिडे़ॽसो पावलमि सिक्छे खेम्नुङ बिस्वास ले़टुजि, मोबा बप्तिस्मा लासामि। 9 इक्सेङ परभुडे़ॽ पावल सेन्जिसेम्माङ्बाङ इडोॽ लुसु, “हे़न असानुङ्सो ए़क्किसिने, योङ उःक्नुङ ए़पेने। सुसमाचार खेम्मेॽसाङ खडे। 10 इन्ढोङ्होङ का हे़न्नुङ्नोॽ टुङेनुङ असे़ॽसो हे़न इमाङ्सो ले़ःॽहेमिनिबा, इन्ढोङ्होङ इगो सहरबेॽ के़हा याॽमिजि बेॽलो टुम्मे।” 11 इडोॽ पावल कोरिन्थ सहरबेॽ इक्निङ चुक्चि महिनाडोॽ निवाहाङ्मि बचन इःॽसाङ पेना। 12 अखैया ठाउँबेॽ गालियोन निङ ले़ःॽखुबा याॽमि बेॽए डायोङ्बा टुमाबेॽ यहुदिजि टोङ्नुङ पावलसोक्पेॽ पेडिखे़ॽनुङ खो राःबुजि। मोबा पावल बेॽए डायोङ्बाबेॽ लाजे़ॽनुङ लुसुजि, 13 “इगो याॽमिजिडे़ॽ कानिङ्मि यहुदि धारमिक नियमडे़ॽ लुबॽआबाङ टेडिगरिक्लाम निवाहाङ्मि ओहाङ ले़ःॽमेॽमामि याॽमिजि इःमे़ॽनिङ्सिन्डुए।” 14 मोबा पावलडे़ॽ लुसिॽपोरोक्माबेॽ गलियोनडे़ॽ माहा यहुदिजि इडोॽ लुसुजि, “होउ यहुदि याॽमिजि, इगो याॽमिडे़ॽ मङे़ॽमा योम्बोकनुङ अपराध योम्बोक ले़ःॽपॽआ ले़टाहोङ के़ॽ हे़निङ्मि खा खेम्नुङ न्याय ले़ःॽमा नुबा लिसा होला। 15 तर इगो खागो, हे़निङ्मि नियममि खा मोबा निङ्नुङ यहुदि धारमिक नेॽचिरामि टुम्बेॽरेॽ टुयेले़। मोडोगे़ॽ इगो खामि न्याय हे़निङे़ॽनोॽ ले़टानुमे। इगो खामि न्याय के़ॽ ले़टुङ्नि।” 16 इडोॽ लुनुङ माहाजि अदालतबाङ पाखे़ॽयु पाङ्हाक्सुजि। 17 मोबा माहाजिडे़ॽ यहुदि सुम्ढाम खिमबेॽहा सासक सोस्थेनेस राःप्नुङ अदालत पोम्बेॽनोॽ मोगुजि। तर गलियोनडे़ॽ मो खामि ले़ख्खोनोॽ मे़ले़टु। पावल एन्टिओखिया सहरबेॽ टेबॽआ 18 पावल बेॽलो याक कोरिन्थ सहरबेॽहा बिस्वासि वावानिसाजिनुङ पेना। मोबा ए़क्साङ पावल बिदा लिनुङ खोसे़ॽ याक्लो टाङ खोमे़ बाचा ले़ःॽपॽआसे़ॽ किन्किरिया सहरबेॽ खे़ॽनुङ खोमि टाङ खोसु। मोबा ए़क्साङ खो पिरिस्किला, अकिलासनुङ टोम्लिॽवामि राम लिसाङ सिरिया ठाउँलाम ए़नामि। 19 मोबा माहाजि एफिसस सहरबेॽ रुक्नुङ पिरिस्किलानुङ अकिलास मोबेॽनोॽ पेनाजि। तर पावल चाहिँ एफिससमि यहुदिजि सुम्ढाम खिमबेॽ पे़खे़ॽनुङ यहुदिजिनुङ नुरोॽ खा इःसु। 20 मोबा माहा यहुदिजिडे़ॽ इक्याक नियाक खोजिनुङ्नोॽ पेने लुनुङ बिन्ति ले़टुजि, तर खो पेम्मा मे़ङ्खसिडा। 21 पावल इडोॽ कासाङ माहाजिनुङ बिदा लिसा, “निवाहाङ्डे़ॽ मिॽटुहोङ फेरि का हे़निङ्बेॽ लेङ्इङे़।” मोबा ए़क्साङ खो जहाज साङ्नुङ एफिससबाङ खडा। 22 मोबा पावल कैसरिया सहरबेॽ लेन्नुङ यरुसलेमबेॽटु खडा। मोबा मोबेॽहा मन्डलिबेॽहा बिस्वासिजिनुङ चुबा। मोबा ए़क्साङ खो एन्टिओखिया सहरबेॽ खे़ॽनुङ 23 मोबेॽ इक्याक नियाक पेना। मोबा ए़क्साङ खो गलातियानुङ फिरगिया लुमे ठाउँ लिसाङ खे़ॽनुङ मोबेॽहा ठाउँ ठाउँहा बिस्वासिजि बिस्वासबेॽ बोलियो टोक्सुजि। एफिसस सहरबेॽ अपोल्लोस लेम्बॽआ 24 अलेक्जेन्ड्रिया सहरबेॽए अप्पोलोस निङ ले़ःॽखुबा इक्को यहुदि एफिससबेॽ लेस्सा। खो बेॽलो नुरोॽ यामुरेघुबा याॽमि ले़टे़नुङ खोसे़ॽ धारमिक नेॽचिरामि खा बेॽलो लेसुहा। 25 खोसे़ॽ परभु येसुडे़ॽ इःॽपॽआ हिङ्मवामि राममि टुम्बेॽ नुरोॽ चिम्बॽआ ले़टे़। तरसो खोसे़ॽ युहन्नाडे़ॽ पिबॽआ बप्तिस्मारेॽ लेसुहा। 26 खोसे़ॽ यहुदिजि सुम्ढाम खिमबेॽ मे़ङ्किस्सिरेॽ मो सिक्छे इःॽपोगुजि। खोमि सिक्छे खेम्नुङ पिरिस्किलानुङ अकिलासडे़ॽ मो याॽमि खोजिमि खिमबेॽ के़ःॽनुङ निवाहाङ्मि राममि टुम्बेॽए खा नुरोॽ इःबेॽटुजि। 27 मोबा ए़क्साङ अपोल्लोसडे़ॽ अखैया ठाउँबेॽ खे़ॽमा मिने़से़ॽ एफिससबेॽहा परभुमि चोङ्साजिडे़ॽ खो मोबेॽ खे़ॽमामि हाङ्हाङ पिसुजि। मोबा मोबेॽहा बिस्वासिजि अपोल्लोसमि नुरोॽ स्वागत ले़ःॽमे लुनुङ इक्को पत्रासो साप्पेॽटुजि। अखैयाबेॽ रुक्नुङ अपोल्लोसडे़ॽ मोबेॽहा परभुमि अनुग्रहाबेॽ लेम्बॽआ बिस्वासिजि बेॽलो सहायोग ले़टुजि। 28 इन्ढोङ्होङ याॽमिजिमि पोम्बेॽ मोबेॽहा यहुदिजिनुङ काघुसे़ॽ चुनुङ माहाजिमि बिरोध ले़ःॽनुङ खोसे़ॽ धारमिक नेॽचिरामि खाबाङ येसु खिरिस्टनोॽ छुट्कारा पिघुबा ले़ये लुनुङ पक्का ले़ःॽपेॽटुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.