एप्पा चोङ्सा 17 - याम्फुपावलनुङ सिलास थेस्लोनिकि सहरबेॽ चुङ्जाघुबाजि 1 पावलनुङ सिलास अम्फिपोलिसनुङ अपोल्लोनिया सहर लिसाङ थेस्लोनिकि सहरबेॽ रुक्टाजु। मोबेॽ यहुदिजि सुम्ढाम खिम टुसे़। 2 सानिङ्डोक्नोॽ पावल यहुदिजि सुम्ढाम खिमबेॽ खडा। खोसे़ॽ सुम साता नाजामे यिडे़ॽ मोबेॽहा याॽमिजिनुङ धारमिक नेॽचिराबाङ नुरोॽ खा इःसु। 3 खोसे़ॽ धारमिक नेॽचिराबेॽए खा चइबानोॽ ले़ये लुनुङ नुरोॽ लुबेॽटुजि, “छुट्कारा पिघुबा हाङ्बा खिरिस्टडे़ॽ खेः आङ्नुङ सिमा खाडे़नुङ फेरि हिङ्बोक्मा खाडे़। इगो के़ॽ इःबॽआ येसुनोॽ मुक्ति पिघुबा हाङ्बा खिरिस्ट ले़ये।” 4 इडोॽ खोमि खा खेम्नुङ आढा यहुदिजिडे़ॽ परभुबेॽ बिस्वास ले़टुजि। मोडोक्नोॽ निवाहाङ्मि ओहाङ ले़ःॽखुबा बेॽलो गिरिक जातिजिनुङ निङ मुक्पॽआ एप्पा मेॽनामिॽचिडे़ॽसो बिस्वास ले़ःॽनुङ पावलनुङ सिलासबेॽ टोङ्आबामि। 5 तर हाइखा यहुदिजिडे़ॽ चाहिँ खोजिनुङ चेजेवा ले़ःॽनुङ मो सहरबेॽहा मङे़हा याॽमिजि सुम्नुङ सहरबेॽ बेॽए हुल-दुङ्गा ले़ःॽमेॽटुजि। माहाजिडे़ॽ पावलनुङ सिलास चिआप्नुङ याॽमिजिमि पोम्बेॽ येःप्मेॽमामि यासोनमि खिमबेॽयु पिङ्खडामि। 6 तर माहाजिडे़ॽ पावलनुङ सिलास मोबेॽ मे़न्चुप्टुजि। मोडोगे़ॽ यासोननुङ परभुबेॽ बिस्वास ले़ःॽखुबा हाइखा वावानिसाजि राःप्नुङ से़ॽखे़ॽटुजि। माहाजि सहरमि मायोङ्बाजिबेॽ लाजे़ॽनुङ इडोॽ लुसुजि, “इघा मक्खाम्डेमबेॽ हुल-दुङ्गा ले़ःॽखुबा याॽमिजि कानिङ्मि सहरबेॽसो लेङ्इटामे 7 इगो यासोनडे़ॽ माहाजि खिमबेॽ कुनुङ युङ्इटुजेले़। माहाजिडे़ॽ रोमि हाङ्बामि हुकुम मे़ङ्खेम्लेॽ येसु लुमे हाइको हाङ्बा टुये लुनुङ लुन्डुजे।” 8 इगो खा खेम्नुङ मोबेॽ सुम्बॽआ याॽमिजिनुङ सहरबेॽहा मायोङ्बाजि अलमल लिसामि। 9 ए़क्साङ माहाजिडे़ॽ यासोननुङ हाइखा वावानिसाजि याङ फोङ्मेॽनुङ लेॽहाक्सुजि। पावलनुङ सिलास बेरिया सहरबेॽ 10 मोबा नम किक्खे़ॽमासोरोक्नोॽ परभुबेॽ बिस्वास ले़ःॽखुबा वावानिसाजिडे़ॽ पावलनुङ सिलास बेरिया सहरलाम पाङ्हाक्सुजि। मोबेॽ रुक्नुङ खोजि यहुदिजि सुम्ढाम खिमबेॽ खडाजि। 11 मो बेरिया लुमे ठाउँबेॽहा याॽमिजि थेस्लोनिकि ठाउँबेॽहा याॽमिजिबाङ बेॽलो नुबा ले़टामि। माहाजिडे़ॽ निवाहाङ्मि बचन सारोनोॽ नुबा मिॽनुङ नुरोॽ खेप्सुजि। पावलडे़ॽ लुबॽआ खा धारमिक नेॽचिराबेॽहा खानुङ टोङ्इहाडे टोङ्निहा लुनुङ सानिङ्नोॽ नेॽनुङ खोजिडे़ॽ जाँच ले़टुजे। 12 बेॽलो यहुदिजिडे़ॽ बिस्वास ले़टुजि। मोबा निङ मुक्पॽआ गिरिक जातिहा वडाङ्पसानुङ मेॽनामिॽचिडे़ॽसो बिस्वास ले़टुजि। 13 तर थेस्लोनिकिबेॽहा बिरोध ले़ःॽखुबा यहुदिजिडे़ॽ बेरियाबेॽ पावलडे़ॽ निवाहाङ्मि बचन परचार ले़ःॽमे़ॽनिङ्सिन्डुए लुमे खा खेम्डोक्टुजि। मोबा माहाजि बेरियाबेॽसो लेन्नुङ याॽमिजि पावलमि बिरोधबेॽ चोम्नुङ बिरोध ले़टुजि। 14 इडोक्मा खा लेडोक्मासोरोॽनोॽ मोबेॽहा बिस्वासि वावानिसाजिडे़ॽ पावल टोम्लिॽवामि के़क्लाम पाङ्हाक्सुजि। तर सिलासनुङ तिमोथि चाहिँ बेरियाबेॽनोॽ पेनाजि। 15 पावल चिक्टियासिॽ खे़ॽखुबा वावानिसाजिडे़ॽ एथेन्स लुमे सहरठोक चिक्टियोसुजि। मोबाङ टेघुबा वावानिसाजिनुङ पावलडे़ॽ “सिलासनुङ तिमोथि चान्डोनोॽ का चुप्सिॽ आप्चिरो लुबेॽमायो” लुनुङ लम्बवाँसो हाक्सु। पावलडे़ॽ एथेन्सबेॽहा याॽमिजि इःॽपॽआ 16 पावल एथेन्स सहरबेॽ सिलासनुङ तिमोथि हुङ्साङ पेम्मे़ॽनिङ्सिडे़। मोडोक्पेॽ मो सहरबेॽ बेॽलो मुरतिरेॽ खाङ्डोक्नुङ पावलमि सारोनोॽ निवा टुगा। 17 खोसे़ॽ यहुदिजि सुम्ढाम खिमबेॽहा यहुदिजिनुङ निवाहाङ्मि ओहाङ ले़ःॽखुबा गिरिक जातिहा याॽमिजिनुङ येसुमि टुम्बेॽ छलफल ले़टु। मोडोक्नोॽ मो सहरमि हाटाबेॽ लेङ्घुबा याॽमिजिनुङ्सो खोसे़ॽ बेॽलो खा इःसु। 18 आढा इपिक्युरिनुङ स्तोइकि गुरुजिसो पावलनुङ खा इःबोगामि। माहाजिबेॽ इन्डोक जनाजिडे़ॽ लुसुजि, “इगो फतफत्याडे़ॽ इमाङ इन्डुहा ?” आढाजिडे़ॽ चाहिँ, “इगोसे़ॽको चोङ निवाहाङ्मि टुम्बेॽहा खा इन्डुए” लुसुजि। इन्ढोङ्होङ पावलडे़ॽ येसुमि टुम्बेॽ मोबा सिबॽआबाङ हिङ्बोक्मे खामि सुसमाचार इःसुहा। 19 मोबा माहाजिडे़ॽ पावल अरियोपागस लुमे सभाबेॽ लाघे़ॽनुङ इडोॽ लुसुजि, “हे़ने़ॽ इःबॽआ चोङ सिक्छेमि टुम्बेॽहा खा कानिङेसो खेम्मा मिॽटुङ्मा। 20 हे़ने़ॽ इःबॽआ इगो खा कानिङ्मि लागि चोङ ले़ये। हे़ने़ॽ लुमायोक्पॽआ खा चाहिँ इमाङ्डे ? मो कानिङ इःबेॽमाना।” 21 (इन्ढोङ्होङ एथेन्सबेॽहा चोप याॽमिजिनुङ मो देसबेॽ पेङ्खुबा हाइखा देसबेॽहाजि चोङ खारेॽ इःमानुङ पेनामे।) 22 पावलडे़ॽ अरियोपागसमि सभामि पोम्बेॽ येःप्नुङ लुसुजि, “होउ एथेन्स सहरबेॽ पेङ्खुबा वावानिसाजि, हे़निङ धरमि याॽमिजि ले़न्डानिङे ले़ए़। 23 का हे़निङ्मि सहरबेॽ वाइमाबेॽ पुजा ले़ःॽठाम ठाउँसो के़ॽ खाक्सुङ। इक्को बलि पिढाम थानाबेॽ ‘मे़लेबॽआ चाप’ लुनुङ साप्पॽआ टुसा। हे़निङे़ॽ मे़लेरेॽ ओहाङ ले़ःॽपॽआ निवाहाङ्मि टुम्बेॽनोॽ आइ के़ॽ लुमे़ॽनिङ्सिनुङे। 24 “मक्खाम्डेमनुङ मोबेॽ टुहा चोप थोक टोङ्घुबा निवाहाङ्नोॽ थाङ्सिरिनुङ मक्खाम्डेममि मायोङ्बा ले़ये। खो याॽमिजिडे़ॽ टोङ्बॽआ खिमबेॽ पेन्निबा। 25 मोबा याॽमिजिडे़ॽ चेॽटिबॽआ इमाङ थोकसो पाप्निबा, इन्ढोङ्होङ याॽमिजि हिङ्मवा, सोःक्मानुङ याॽमिजि पाप्मिहा चोप थोक पिघुबा खोनोॽ ले़ये। 26 मक्खाम्डेमबेॽ याॽमिजि पेम्मिरो लुनुङ निवाहाङ्डे़ॽनोॽ इक्को याॽमिबाङ चोप जातिहा याॽमिजि टोक्सु। खोजिडे़ॽ हिङ्मे उमेरनुङ पेम्मामि लागि खोसे़ॽनोॽ मक्खाम्डेम टोङ्बेॽटु। 27 याॽमिजिडे़ॽ खो योक्माबेॽनुङ सुःप्माबेॽसो सुःप्टोक्टुजिरो लुनुङ इडोॽ ले़टु। तरसो निवाहाङ कानिङ्बाङ ओः माॽआये। 28 इन्ढोङ्होङ इक्को याॽमिडे़ॽ इडोॽ लुटुए, ‘कानिङ खोबेॽनोॽ हिङ्इन्डिङ्मेनुङ किॽयु मिॽयु ले़न्डिङ्मा।’ इगो खामि टुम्बेॽ हे़निङ्मि इक्को कबिता साप्खुबाडे़ॽ इडोॽ लुबॽआ ले़ये, ‘चइबानोॽ कानिङ खोमि पसाजि ले़न्डिङ्मे’। 29 “इडोॽ कानिङ निवाहाङ्मि पसाजि लियेम्बाङ कानिङे़ॽ निवाहाङ याॽमिमि निवाडे़ॽनुङ सिपडे़ॽ टोङ्बॽआ सिसे़ङ्मि, रुङ्गोॽवामिनुङ सुनामि मुरतिडोॽमा कानिङे़ॽ मिॽमा फे़न्निबा। 30 मोडोगे़ॽ याक्लो मे़ल्लेरेॽ ले़ःॽपॽआ पाप निवाहाङ्डे़ॽ ले़ख्खो मे़ले़टु। तर हागो निवाहाङ्डे़ॽ चोप याॽमिजि ‘खोजिटाङ्बामि पाप मिॽनुङ फेरि मोडोॽ ए़ले़ःॽमे’ लुनुङ आग्या पिटे़। 31 इन्ढोङ्होङ निवाहाङ्डे़ॽ मक्खाम्डेमबेॽहा याॽमिजि न्याय ले़ःॽमे याक पक्का ले़पेटुए। मो यिडे़ॽ खोसे़ॽ से़न्बॽआ याॽमिबाङ मक्खाम्डेमबेॽहा याॽमिजिमि न्याय ले़न्डुए। चोप याॽमिजि न्याय ले़ःॽमे अधिकार खोबेॽ टुये लुमे खा पक्का ले़ःॽमेॽमामि लागिनोॽ निवाहाङ्डे़ॽ खो सिघे़ॽपॽआबाङ हिङ्बोइटुए।” 32 सिबॽआ याॽमि हिङ्रिक लिये लुमे खा पावलबाङ खेम्नुङ इन्डोक याॽमिजिडे़ॽ खो इःजोसुजि। तर आढा आढाजिडे़ॽ लुसुजि, “इगो खामि टुम्बेॽ फेरि हाइको खेपसो कानिङे़ॽ खेम्मा मिॽइन्डुङ्मे़।” 33 मोबा पावल माहाजिनुङ बिदा लिसा। 34 तर आढा याॽमिजिडे़ॽसो पावलमि इगो खा खेम्नुङ परभुबेॽ बिस्वास ले़टुजि। माहाजिबेॽ अरियोपागस लुमे सभामि डियनुसियस लुमे याॽमिनुङ दामारिस लुमे मेॽनामिॽ ले़टाजे। हाइखा याॽमिजिडे़ॽसो परभुबेॽ बिस्वास ले़टुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.