एप्पा चोङ्सा 16 - याम्फुपावलनुङ सिलासडे़ॽ तिमोथि चुप्पॽआ 1 पावल डरबि सहर लिसाङ लुस्त्रा सहरबेॽ लेस्सा। मोबेॽ तिमोथि लुमे इक्को बिस्वासि पेने। खोमि मामासो परभुबेॽ बिस्वास ले़ःॽखुबा यहुदि ले़टे़, तर खोम्बा चाहिँ गिरिक जातिमि ले़टे़। 2 लुस्त्रानुङ आइकोनियनबेॽहा चोप बिस्वासि वावानिसाजिडे़ॽ तिमोथि नुबा याॽमि मिॽटुजे। 3 पावलडे़ॽ तिमोथिसो चिॽखे़ॽमा मिॽटु। मोबा मोबेॽहा यहुदिजि बाधा मे़सिॽलो लुनुङ पावलडे़ॽ तिमोथिमि खतना ले़पेॽटु, इन्ढोङ्होङ तिमोथिमि पाबा गिरिक जाति ले़टे़ लुमे खा मोबेॽए चोप यहुदिजिडे़ॽ लेसुजे। 4 मोबा ए़क्साङ खोजि सहरबेॽ खे़ॽनुङ परभुमि चोप चोङ्साजि यरुसलेमबेॽहा एप्पा चोङ्साजिनुङ मन्डलिबेॽहा एल्डरजिडे़ॽ टोङ्बॽआ रितिडोॽ ले़टानुमे लुनुङ लुसाजु। 5 इडोॽ मन्डलिबेॽहा याॽमिजिमि बिस्वास छना नुबा लिघडा, मोबा परभुबेॽ बिस्वास ले़ःॽखुबा याॽमिजि बेॽलो लिघडामि। पावलडे़ॽ तोरोआस सहरबेॽ माक्पॽआ सेन्जिसेम्माङ 6 पबित्रा होङ्निवाडे़ॽ पावल, सिलासनुङ तिमोथि एसिया ठाउँबेॽ सुसमाचार परचार ए़ले़टानुमे लुबॽआसे़ॽ खोजि फिरगियानुङ गलातिया लुमे ठाउँ लिसाङ खडामि। 7 खोजि माइसिया लुमे ठाउँमि के़क्पेॽ रुक्नुङ बिथिनियाराम खे़ॽमे निवा ले़टुजि। तर येसुमि होङ्निवाडे़ॽ खोजि मोबेॽसो परचार मे़ले़ःॽमेॽटुजि। 8 मोडोगे़ॽ खोजि माइसियाबाङ ओङ्लाम टोम्लिॽवामि के़क्पेॽए तोरोआस लुमे सहरबेॽ युसामि। 9 मो सेन्डानोॽ पावलडे़ॽ परभुबाङ इक्को सेन्जिसेम्माङ चुप्टु। खोसे़ॽ माकेडोनिया ठाउँबेॽए इक्को याॽमिडे़ॽ येःप्नुङ इडोॽ लुसाङ बिन्ति ले़ःॽपॽआ खाङ्डोक्टु, “माकेडोनिया आप्नुङ कानिङ सहायता ले़ःॽमा।” 10 पावलडे़ॽ इडोक्मा सेन्जिसेम्माङ मक्मा सोरोॽनोॽ कानिङ रिबाङ माकेडोनियालाम खे़ॽमामि पोरोगिङ्मा, इन्ढोङ्होङ मोबेॽहा याॽमिजि परभुमि सुसमाचार खेम्मेॽसिॽ निवाहाङ्डे़ॽनोॽ के़ःॽपॽआ ले़ये लुनुङ कानिङे़ॽ लेसुङ्मा। लिडियामि बिस्वास 11 मोडोगे़ॽ कानिङ तोरोआसबाङ योङा जहाजबेॽ साङ्नुङ मे़ए़रे़ङ सामोथ्राके लुमे पोङ्बोङ्बेॽ खाडिङ्मा। मोबा वागियाराम नियापोलिस सहरबेॽ रुक्टुङ्मा। 12 मोबाङ कानिङ राम्नुङ माकेडोनियामि बेॽएम्मा सहर फिलिप्पिलाम खाडिङ्मा। मो सहर रोमिजिमि अधिनबेॽ टुसे़। मोबेॽ कानिङ इक याक नियाक पेनिङ्मा। 13 यिवामि के़क्पेॽ पारथना ले़ःॽठाम ठाउँ टुउ होला मिॽनुङ कानिङ नाजामे याकपेॽ मोबेॽ खाडिङ्मा। मोबा मोबे़ॽ सुम्बॽआ मेॽनामिॽचिनुङ खा इःबोगिङ्मा। 14 मोबेॽ कानिङ्मि खा खेम्खुबाजिबेॽ लिडिया निङ ले़ःॽखुबा इक्को मेॽनामिॽ टुसे़। खो थिआटिरा लुमे ठाउँबेॽए ले़टे़नुङ खो बैजनि रङ्मा चेॽ इन्जामे योम्बोक ले़टे़। खो निवाहाङ्मि सेवा ले़ःॽखुबा मेॽनामिॽ ले़टे़। पावलडे़ॽ लुबॽआ खा खेम्नुङ बिस्वास ले़टुरो लुनुङ परभुडे़ॽ खोमि निवा हेम्बेबेॽटु। 15 बिस्वास ले़ःॽनुङ लिडियानुङ खोमि चोप खिम खिमबेॽहाजिडे़ॽ बप्तिस्मा लासुजि। मोबा खोसे़ॽ कानिङ खोमि खिमबेॽ पेम्मे बिन्ति ले़ःॽसाङ लुसा, “चइबानोॽ हे़निङे़ॽ का परभुबेॽ बिस्वास ले़ःॽपॽआ निसा मिॽइन्डानुमेहोङ काङ्मि खिमबेॽ आप्नुङ पेम्बेॽमाजे।” इडोॽ खोसे़ॽ कानिङ खोमि खिमबेॽ खे़ॽमानोॽ खे़ये लुसा। पावलनुङ सिलास तिरिङ्गा खिमबेॽ 16 इक्याक कानिङ पारथना ले़ःॽसिॽ खे़ॽमाबेॽ रामबेॽ इक्को सेउतेनि चुप्टुङ्मा। खो मङे़ॽमा चाबे़ॽ राःप्पॽआ ले़टे़ मो मङे़ॽमा चापमि सक्तिडे़ॽ खोसे़ॽ हाइखा याॽमिजिमि भाग्यमि जोखना खाङ्बेॽनुङ खोमि मायोङ्बाजि बेॽलो याङ टोङ्नुङ पिसुए। 17 हागो मोसे़ॽ पावलनुङ कानिङ टिङ्साङ इडोॽ काबोगा, “इघा याॽमिजि बेॽए निवाहाङ्मि याॽमिजि ले़म्मे। इघाजिडे़ॽ मुक्ति चुप्मे खामि टुम्बेॽ परचार ले़न्डुजे।” 18 मोसे़ॽ बेॽलो याक मोडोॽ कासा। मोबा इडोॽ बेॽलो याक काबॽआसे़ॽ पावल झिजो मिॽनुङ मो मेॽनामिॽलाम हिङ्घे़ॽनुङ मङे़ॽमा चाप इडोॽ लुसाङ योबु, “येसु खिरिस्टमि निङ्बेॽ हे़न आग्या पिन्ने़, हे़न इगो मेॽनामिॽबाङ खे़ॽपेसे।” पावलडे़ॽ इडोॽ लुमासोरोॽनोॽ मो मङे़ॽमा चाप खे़ॽपेसा। 19 तर खोमि मायोङ्बाजिमि याङ टोङ्मे राम मे़ःखे़ॽपॽआ लेडोक्टुजि, मोबा माहाजिडे़ॽ पावलनुङ सिलास राःप्नुङ सेॽसाङ मो सहरमि सासकजिबेॽ लाघे़ॽटुजि। 20 इडोॽ पावलनुङ सिलास सहरमि रोमि एप्पा डायोङ्बाजिमि पोम्बेॽ येःप्मेॽसाङ इडोॽ लुसुजि, “इघा यहुदिजिडे़ॽ कानिङ्मि सहरबेॽ हुल-दुङ्गा ले़ःॽनुङ कानिङ दुःख पिमे़ॽनिङ्सिम्मे। 21 इघाजिडे़ॽ कानिङ्मि रोमि नियममि टेडिगरिक्हा रिति बिधि इःॽमे़ॽनिङ्सिन्डुजे।” 22 मोडोक्पेॽनोॽ मोबेॽ सुम्बॽआ याॽमिजि पावलनुङ सिलासबेॽ पेडिखडामि। मोबेॽहा एप्पा याॽमिजिडे़ॽ पावलनुङ सिलासमि चेॽ नाःक्नुङ राप्पेबेॽटुजि मोबा कोरराडे़ॽ साःबानुमे लुनुङ आग्या पिसुजि। 23 मोबा खोजि बेॽलो साःप्नुङ पावलनुङ सिलास तिरिङ्गा खिमबेॽ चिॽखे़ॽनुङ इगो निप्पाङ याॽमिजि मे़लेॽखे़ॽमिरो नुरोॽ से़गानुमो लुनुङ मोबेॽए एप्पा लुओसुजि। 24 इडोक्मा आग्या चुप्नुङ तिरिङ्गा खिमबेॽहा एप्पाडे़ॽ मोजि चोप्पाङ होङ्सिॽयुए कोठाबेॽ चिॽखे़ॽनुङ सराङ्बेॽ सिङ्बुमि ठिङ्गुरो ठागुजि। 25 सेन्डा पावलनुङ सिलास पारथना ले़ःॽसाङ निवाहाङ्मि सेम सेम्लुसाङ ओहाङ ले़ःॽमे़ॽनिङ्सिडाजि। हाइखा कैदिजिडे़ॽ चाहिँ खेम्मे़ॽनिङ्सिडामे। 26 मोडोक्पेॽनोॽ हाजोक्टोॽ किस्सिमारोमा बेॽए रुॽमि लेन्नुङ तिरिङ्गा खिममि चरनोॽ सोक्सा। चोप राम्डेम हेम्बोगा मोबा चोप कैदिजि हिःक्पॽआ कोङ हेङ्घडा। 27 एप्पा हुम्बुगा तिरिङ्गा खिममि चोप राम्डेम हेम्बॽआ खाङ्डोक्टु। चोप कैदिजि चिःॽखडामि होला मिॽनुङ खोसे़ॽ सिप्पॽआ ताब्या रिक्नुङ चेन्सिघे़ॽमा योगा। 28 इगो खाङ्नुङ पावलडे़ॽ खो इडोॽ लुसु, “होउ एप्पा, आक्टोॽ ए़ले़टे कानिङ चोप इगोबेॽनोॽ टुन्डिङ्मा।” 29 इडोक्मा खा खेम्नुङ मो एप्पा उःप्चिरा ङाःक्नुङ पिन्साङ होङ्सिॽयु आबा मोबा खो किस्सिमे़ॽ योङ्साङ पावलनुङ सिलासमि सराङ्बेॽ उःक्मानुङ सेवा मुसु। 30 मोबा ए़क्साङ मोसे़ॽ खोजि पाखे़ॽयु लाप्नुङ सिप्सुजि, “के़ए़ पापबाङ आम्लाङ चुप्मामि इमाङ ले़ःॽमा खे़ये ?” 31 खोजिडे़ॽ लुसाजु, “परभु येसुबेॽ बिस्वास ले़टे मोबा हे़न्नुङ हे़ने़हा खिमबेॽहाजिडे़ॽ मुक्ति चुप्मिन्डानुमे।” 32 मोबा पावलनुङ सिलासडे़ॽ परभुमि बचन खोनुङ खोमि खिमबेॽहाजि खेम्मेॽटुजि। 33 मोबा ए़क्साङ मो एप्पाडे़ॽ सेन्डानोॽ पावलनुङ सिलास चिक्खे़ॽनुङ खोजिमि हुवा वासोक्पेॽटु। खोनुङ खोमि खिमबेॽहाजि चोबे़ॽ बप्तिस्मा लासुजि। 34 मोबा ए़क्साङ पावलनुङ सिलास खोमि खिमबेॽ चिॽखे़ॽनुङ चामा हिक्सुजि। खोनुङ खोमि खिमबेॽहाजिडे़ॽ निवाहाङ्बेॽ बिस्वास ले़ःॽपॽआसे़ॽ बेॽलो माहाजि हाङ्हाङ मिनामि। 35 वागियाराम माक्मि सहरबेॽहा एप्पाजिडे़ॽ पावलनुङ सिलास तिरिङ्गा खिमबाङ लेप्पेसानुमे लुमे आग्या पिनुङ तिरिङ्गाजि पाक्सुजि। 36 मोबा तिरिङ्गा खिमबेॽए मायोङ्बाडे़ॽ पावल इडोॽ लुसु, “सहरबेॽहा एप्पाजिडे़ॽ हे़न्नुङ सिलास लेॽहाङ्मे लुनुङ लम्बवाँ पाङ्इटामे। मोडोगे़ॽ हे़न्जिङ नुरोॽ खडाजे।” 37 तर पावलडे़ॽ माहा लम्बवाँ लाजे़ॽखुबा तिरिङ्गाजि लुसुजि, “कानिङ रोमि जनताजि ले़न्डिङ्माहोङ्सो इघाजिडे़ॽ इमाङ्सो आप्टिक मे़ॽनिङ्नोॽ याॽमिमि रुम्बेॽ कानिङ हेःरो कोरराडे़ॽ पे़गामि। मोबा फेरि तिरिङ्गा खिमबेॽसो से़गामि। आयु खुस्रिङ लेप्पेमा योॽइम्मे ? कानिङ खडिङ्मानि। माहा आग्या पिघुबा एप्पाजिडे़ॽनोॽ लेन्नुङ कानिङ लेॽमा खे़ये।” 38 मोबा पावलडे़ॽ लुबॽआ खा तिरिङ्गाजिडे़ॽ माहा एप्पाजि खेम्मेॽटुजि। माहाजिडे़ॽ पावलनुङ सिलास रोमि जनताजि ले़म्मे लुनुङ लेडोक्नुङ माहाजि किस्सिडामि। 39 मोबा माहाजि मोबेॽ लेन्नुङ खोजिनुङ आम्लाङ ङाःक्नुङ खोजि तिरिङ्गा खिमबाङ पाखे़ॽयु चिॽखे़ॽनुङ बिन्ति ले़टुजि “हागो इगो सहरबाङ हे़न्जिङ खे़ॽपेसाजे”। 40 मोबा पावलनुङ सिलास तिरिङ्गा खिमबाङ लेॽखे़ॽनुङ लिडियामि खिमबेॽ खडाजि। खोजिडे़ॽ मोबेॽहा बिस्वासिजि चुप्नुङ बिस्वासबेॽ नुरोॽ निवा टिमे लुनुङ आट पिआनुङ मोबाङ खोजि खडाजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.