एप्पा चोङ्सा 15 - याम्फुयरुसलेममि सभाखिम 1 मोबा ए़क्साङ आढा याॽमिजि यहुदिया ठाउँबाङ लेन्नुङ एन्टिओखिया सहरबेॽहा बिस्वासिजि इडोॽ इःॽपोगुजि, “मोसाडे़ॽ साप्पॽआ यहुदि धारमिक नियमडोॽ खतना मे़ले़टानुमहोङ हे़निङे़ॽ मुक्ति चुप्हेसानुम्नि।” 2 इडोक्हा सिक्छे खेम्नुङ पावलनुङ बारनाबास माहाजिनुङ बेॽलो काघुसे़ॽ चुसाजि। मोडोगे़ॽ मोबेॽहा वावाजिडे़ॽ पावल, बारनाबासनुङ हाइखा इन्डोक जनाजि इगो खामि फसेला ले़ःॽसिॽ यरुसलेमबेॽ पेङ्घुबा एप्पा चोङ्साजिनुङ मन्डलिबेॽहा एलडरजिबेॽ खे़ॽमे निधो ले़टुजि। यरुसलेममि बेॽए सभा 3 मन्डलिबेॽहा बिस्वासि वावानिसा नानुसाजिडे़ॽ खोजि रामबेॽ पाप्मिहा खा सहायता पिहाङ्नुङ बिदा ले़टुजि। पावलनुङ बारनाबास फोनिके लुमे ठाउँ लिसाङ सामरियाबाङ खडाजि। इडोॽ खे़ॽमाबेॽ खोजिडे़ॽ ठाउँ ठाउँबेॽहा बिस्वासि वावानिसाजि अयहुदि जातिहा याॽमिजिडे़ॽसो बिस्वास ले़ःॽपॽआ लुमे खा खेम्मेॽटुजि। मो खा खेम्खुबा वावानिसाजि बेॽलो साप्थाक्सामि। 4 खोजि यरुसलेम सहरबेॽ लेम्माबेॽ परभुबेॽ बिस्वास ले़ःॽखुबा मोबेॽ टुघुबा वावानिसाजि, एप्पा चोङ्साजिनुङ मन्डलिबेॽहा अगुवाजिडे़ॽ स्वागत ले़टुजि। मोबा ए़क्साङ पावलनुङ बारनाबासडे़ॽ मोबेॽ सुम्बॽआ चोप याॽमिजि खोजिबाङ निवाहाङ्डे़ॽ ले़ःॽपॽआ योम्बोकमि खा लुबेॽटुजि। 5 माहा खा खेम्नुङ परभुबेॽ बिस्वास ले़ःॽखुबा आढा फरिसि हुलबेॽहा याॽमिजि चाहिँ येपोक्नुङ इडोॽ लुसुजि, “अयहुदि जातिजिबाङ चोङ्सा लिघुबाजिडे़ॽ यहुदि रितिबेॽ लुडिडोॽ खतना ले़ःॽमानोॽ खे़ये। मोबा मोसाडे़ॽ पिबॽआ यहुदि धारमिक नियमबेॽहा चोप खा पालना ले़ःॽमेॽमा खे़म्मे।” 6 मोडोगे़ॽ एप्पा चोङ्साजिनुङ मन्डलिबेॽहा एलडरजि सुम्नुङ इगो खामि टुम्बेॽ छलफल ले़टुजि। 7 मोबेॽ बेॽलो खा लिबॽआसे़ॽ पत्रुस येपोक्नुङ लुसु, “होउ वावानिसाजि, हे़निङे़ॽ लेन्डानुम, अयहुदि जातिजिडे़ॽ परभु येसुमि सुसमाचार खेम्नुङ बिस्वास ले़टुजिरो मोबा माहाजिडे़ॽ मुक्ति चुप्टुजिरो लुनुङ निवाहाङ्डे़ॽ का हे़निङ्मि रुम्बाङ्नोॽ बेॽलो याक्लो से़म्बॽआ ले़टे़। 8 चोप याॽमिमि निवामि खा लेघुबा निवाहाङ्डे़ॽ अयहुदि जातिहा याॽमिजि पबित्रा होङ्निवा कानिङ पिडिडोक्नोॽ खोजिसो पिनुङ टाङ्बामि याॽमि टोङ्बॽआ खा खाङ्मुसु। 9 निवाहाङ्डे़ॽ अयहुदि जातिजिनुङ कानिङ यहुदिजिमि रुम्बेॽ इमाङ्सो हेलाहोचो मे़ले़टुजि। खोजिडे़ॽसो निवाहाङ्बेॽ बिस्वास ले़ःॽपॽआसे़ॽ खोजिमि निवा चोखो टोङ्बेॽटुजि। 10 हागो ले़ःॽमा छॽइये यहुदि चलन अयहुदि जातिहा याॽमिजि ले़ःॽमेॽनुङ कानिङे़ॽ इन्ढोङ निवाहाङ सुरके़ॽमेॽमे़ ? इगो चलनगो कानिङ्मि टुबा लाबाजिडे़ॽसो मे़ले़ःॽहेसुजि मोबा कानिङे़ॽसो मे़ले़ःॽहेसुङ्मा। 11 आक्टोॽ ए़ले़ःॽमा, कानिङे़ॽ परभु येसुबेॽ बिस्वास ले़ःॽनुङ खोमि अनुग्रहाडे़ॽ मुक्ति चुप्मिटुङ्मे। मोडोक्नोॽ खोजिडे़ॽसो मुक्ति चुप्मिटुजे।” 12 मोडोक्पेॽ चोप योङ उगामि मोबा बारनाबासनुङ पावलडे़ॽ खोजिबाङ निवाहाङ्डे़ॽ ले़ःॽपॽआ खरिहा योम्बोकनुङ खामि टुम्बेॽ अयहुदि जातिजिमि रुम्बेॽ इःमाबेॽ मोबेॽ सुम्बॽआ बेॽहा याॽमिजिडे़ॽ निवा टिनुङ खेप्सुजि। 13 मोबा माहाजिडे़ॽ लुसेॽनुङ ए़क्साङ याकुबडे़ॽ येपोक्नुङ लुसु, “होउ वावानिसाजि, के़ए़ खा खेप्सानुमे! 14 निवाहाङ खोमदाङ्बे़ॽ अयहुदि जातिजिमि निवाबेॽ योम्बोक ले़ःॽनुङ माहाजि खोमि याॽमिजि टोक्सुजि। इगो खागो सिमोन पत्रुसडे़ॽ हागोनोॽ हे़निङ लुबेटे़। 15 इगो खागो अगमबक्ताजिडे़ॽ इःबॽआ खानुङ टोङ्इये। धारमिक नेॽचिराबेॽ इडोॽ साप्पॽआ ले़ये, 16 मोबा ए़क्साङ का टेघे़ॽनुङ दाउदमि काङ्घे़ॽपॽआ पेन्ढाम फेरि येपोक्इनुङे। मोबा योघे़ॽपॽआ खिम आङ्इनुङेनुङ के़ॽ फेरि खोमि राज्य सक्तिसालि टोङ्इनुङे। 17 “एम्बॽआ चोप याॽमिजिडे़ॽ परमपरभु योक्हेसुजिरोनुङ के़ॽ टाङ्बाङ टोङ्मामि के़ॽपॽआ अयहुदि जातिहा याॽमिजिसो काबेॽ लेम्मिरो, 18 लुनुङ परभु निवाहाङ्डे़ॽ लुये। खोसे़ॽ बेॽलो याक्लो इगो खा इःबॽआ ले़टे़। 19 “मोबा याकुबडे़ॽ इःबोगु मोडोगे़ॽ निवाहाङ्बेॽ लेङ्घुबा अयहुदि जातिहा याॽमिजि दुःख ए़ॽपिमाजि लुनुङ के़ॽ मिॽइटुङे। 20 तर खोजि इडोॽ लुनुङ इक्को पत्रा साप्हाङ्मा, खोजिडे़ॽ मुरतिबेॽ चेॽटिबॽआ इमाङ्सो ए़च्चोसुजिरो, बेभिचार योम्बोक ए़ले़ःॽमिरो, मोबा चोरा फिन्नेबॽआ जिवातमि सा ए़च्चोसुजिरो इमाङ्मिसो हरि ए़ॽचोसुजिरो। 21 इन्ढोङ्होङ मोसाडे़ॽ साप्पॽआ यहुदि धारमिक नियमगो याक्लोएम्बाङ्नोॽ चोप सहरबेॽ परचार लिमे़ॽनिङ्सिये सानिङ नाजामे याकपेॽ यहुदिजि सुम्ढाम खिमबेॽ नेॽपॽआ चोबे़ॽ खेम्इटुजे मोडोगे़ॽ सहरबेॽहा याॽमिजिडे़ॽ लेबेटुजे।” बिस्वास ले़ःॽखुबा अयहुदि जातिजि साप्पॽआ नेॽचिरा 22 मोडोगे़ॽ एप्पा चोङ्साजिनुङ मन्डलिबेॽहा एल्डरजिडे़ॽ परभुबेॽ बिस्वास ले़ःॽखुबा वावानिसाजिनुङ टोङ्नुङ निप्पाङ याॽमि से़नुजि। मोबा खोजिडे़ॽ मो निप्पाङ याॽमिजि पावलनुङ, बारनाबासनुङ सोरि एन्टिओखिया सहरबेॽ पाङ्मे निधो ले़टुजि। मो निप्पाङ याॽमिजि बारसाबास लुमे यहुदानुङ सिलास ले़टाजे। परभुबेॽ बिस्वास ले़ःॽखुबजिबेॽ खोजि निप्पाङ चाहिँ अगुवा ले़टाजे। 23 माहा रिबाङ्मि हुकपेॽ इडोक्मा नेॽचिरा पाङ्हाक्सुजि, “एन्टिओखिया, सिरियानुङ किलिकियाबेॽ टुघुबा परभुबेॽ बिस्वास ले़ःॽखुबाजि कानिङ यरुसलेमबेॽहा एलडरनुङ एप्पा चोङ्साजिबाङ सेवा मुसिङ्मायो। 24 कानिङ्बाङ खे़ॽपॽआ आढा याॽमिजिडे़ॽ टेडिगरिक्हा सिक्छे खेम्मेॽनुङ हे़निङ दुःख पिसामिरो लुमे खा कानिङे़ॽ खेप्सुङ्मा। तर माहाजि कानिङे़ॽ पाङ्बॽआ ने़ॽनिहाजि। 25 मोडोगे़ॽ कानिङे़ॽ नुरोॽ छलफल ले़ःॽनुङ याॽमिजि से़न्नुङ कानिङे़ॽ नम्नम ले़ःॽपॽआ बारनाबास, पावलनुङ सोरि मोजिसो पाङ्मे निधो ले़ए़टुङ्मे़। 26 पावलनुङ बारनाबास कानिङ्मि परभु येसु खिरिस्टमि सेवा ले़ःॽमाबेॽ ए़डे़ॽवे़ॽ मे़सिघडाजि। 27 इगोजिनुङ्नोॽ कानिङे़ॽ यहुदानुङ सिलाससो हे़निङ्बेॽ पाङ्इटुङ्मे। कानिङे़ॽ साप्पॽआ खा खोजिडे़ॽसो हे़निङ इःबेम्मे। 28 पबित्रा होङ्निवानुङ कानिङे़ॽ इघा खाबाङ हाइखा खा हे़निङ ले़ःॽमेॽमा मे़मिॽटुङ्मा। 29 माहा खा चाहिँ इघानोॽ ले़हा- मुरतिबेॽ चेॽटिबॽआ ए़ॽचामे, इमाङ्मिसो हरि ए़ॽचामे, बेॽला यिङ्नुङ सेॽनेबॽआ जिवातमि सा ए़ॽचामे मोबा ब्यभिचारबाङ ओः पेम्मे। इघा खा पालना ले़टानुम्होङ हे़निङ नुबा लिये। कानिङे़ॽ लुमे खा इघानोॽ यो।” 30 मोबा ए़क्साङ माहा रिबाङ वावानिसाजि मो साप्पॽआ पत्रा खिमानुङ एन्टिओखिया सहर खडामि। मोबेॽ माहाजिडे़ॽ चोप बिस्वासिजि इक्को ठाउँबेॽ सुम्नुङ मो पत्रा पिसुजि। 31 मो पत्राबेॽ साप्पॽआ हाङ्हाङ्नुङ्मा खा खेम्नुङ चोप साप्थाक्सामि। 32 यहुदानुङ सिलास खोजिटाङ्बासो अगमबक्ता ले़टाजे। खोजिडे़ॽ बिस्वासि वावानिसाजि साहस पिनुङ बिस्वासबेॽ बोलियो टोक्सुजि। 33 इक्याक नियाक मोबेॽ पेन्नुङ मोबेॽहा वावानिसाजिडे़ॽ नुरोॽ खडानिङे लुनुङ खोजि बिदा लिसामि मोबा खोजि पाङ्घुबा वावानिसाजिबेॽ टेघडामि। 34 [तर सिलास चाहिँ मोबेॽनोॽ पेम्मा मिना] 35 पावलनुङ बारनाबासडे़ॽ एन्टिओखियाबेॽ हाइखा बेॽलो याॽमिजिनुङ टोङ्नुङ परभुमि सिक्छे पिसाङ परचार ले़टाजु। पावलनुङ बारनाबास फाक्खेॽपॽआ 36 ए़डे़ॽ ए़क्साङ पावलडे़ॽ बारनाबास लुसु, “हागो कानिङे़ॽ निवाहाङ्मि खा परचार ले़ःॽपॽआ चोप सहरबेॽ फेरि खे़ॽमा। मोबेॽ टुघुबा परभुबेॽ बिस्वास ले़ःॽखुबाजि इन्डोॽ ले़म्मे चुप्खाङ्माजि।” 37 मोबा बारनाबासडे़ॽ मरकुस लुमे युहन्नासो सोरि चिॽखे़ॽमा मिॽटु। 38 तर पावलडे़ॽ मरकुस चिॽखे़ॽमा मे़मिॽटु इन्ढोङ्होङ खोसे़ॽ याक्लोसो निवाहाङ्मि योम्बोक मे़येॽलेॽ खोजि याःॽयानुङ खो पामफिलिया लुमे ठाउँबाङ टेघे़ॽपॽआ ले़टे़। 39 मो खाबेॽ पावलनुङ बारनाबासमि रुम्बेॽ बेॽलोनोॽ खा लिसा मोबा खोजि फक्खडाजि। बारनाबासडे़ॽ चाहिँ मरकुस चिक्मानुङ माहोङ्मामि राम लिसाङ साइपरस लुमे पोङ्बोङ्मालाम खडा। 40 मोबा पावलडे़ॽ चाहिँ खोमि लागि लङ्गाम सिलास से़नु। मोबा ए़क्साङ खोजि बिस्वासि वावानिसाजिडे़ॽ परभुमि अनुग्रहाबेॽ युक्सुजि मोबाङ खोजि बिदा लिनुङ खडाजि। 41 खोजि सिरियानुङ किलिकिया लुमे ठाउँ लिसाङ खे़ॽमाबेॽ मोबेॽहा मन्डलिमि बिस्वासिजि बिस्वासबेॽ बोलियो टोङ्आसाङ खडाजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.