एप्पा चोङ्सा 14 - याम्फुआइकोनियन सहरबेॽ पावलनुङ बारनाबास 1 आइकोनियन सहरबेॽसो पावलनुङ बारनाबास यहुदिजि सुम्ढाम खिमबेॽ खडाजि। मोबेॽ खोजिडे़ॽ निवाबेॽ पे़ॽखेॽलो मोबेॽ टुघुबा बेॽलो यहुदिजिनुङ अयहुदिजिमि पोम्बेॽ यामुसाजि, मोबा बेॽलो यहुदिजिनुङ अयहुदि जातिजिडे़ॽसो परभु येसुबेॽ बिस्वास ले़टुजि। 2 तर बिस्वास मे़ले़ःॽखुबा यहुदिजिडे़ॽ चाहिँ मोबेॽहा अयहुदि जातिजि चोम्नुङ परभुबेॽ बिस्वास ले़ःॽखुबा वावानिसाजिमि बिरोध ले़ःॽपोगुजि। 3 मोडोक्सो पावलनुङ बारनाबास मो सहरबेॽ बेॽलो याक पेनाजि। खोजिडे़ॽ परभुमि निङ्बेॽ भरोसा ले़ःॽनुङ परभुमि परचार ले़टुजि। परभुडे़ॽ खोजि खरि खरिहा योम्बोक ले़ःॽमे सक्ति पिनुङ खोजिडे़ॽ अनुग्रहानुङ्हा बचन चइबानोॽहा लुनुङ पक्का ले़ःॽपेॽटुजि। 4 मो सहरबेॽहा याॽमिजि निच्चि हुल लिसामि आढा एप्पा चोङ्साजिलाम, आढाजि यहुदिजिलाम लिसामि। 5 मोबेॽ अयहुदि जातिहा याॽमिजिनुङ बिरोध ले़ःॽखुबा यहुदिजि मोबा खोजिमि अगुवाजिनुङ टोङ्नुङ पावलनुङ बारनाबास रुङ्गोॽवाडे़ॽ ए़ःॽनेमा लुनुङ मोत्ता इःसुजि। 6 तर इगो खा पावलनुङ बारनाबासडे़ॽ खेम्डोक्नुङ खोजि मोबाङ चिखे़ॽनुङ लुकोनिया ठाउँमि लुस्त्रानुङ डरबि लुमे सहरबेॽ खडाजि। 7 खोजिडे़ॽ मो निच्चि सहरनुङ मोमि किॽयु मिॽयु सिॽइहा ठाउँराजिसो सुसमाचार परचार ले़टुजि। लुस्त्रानुङ डरबि सहरबेॽ 8 लुस्त्रा सहरबेॽ इक्को सोगुबा याॽमि पेने़। खो टोक्पॽआबाङ्नोॽ सोगुबा ले़टा खो इन्डोक्पेॽसो मे़राम्बॽआ ले़टे़। 9 पावलडे़ॽ इःबॽआ खा खोसे़ॽ नुरोॽ खेम्मे़ॽनिङ्सिडुए। पावलडे़ॽसो खोमि नजिकपेॽ नुरोॽ खाक्सु। “मो याॽमिडे़ॽ कासो नुबोक्हेङे” लुनुङ बिस्वास ले़न्डुएले़ लुनुङ पावलडे़ॽ लेडोक्टु। 10 पावलडे़ॽ बेॽए सेम्ले़ॽ लुसु, “येपोक्नुङ टाङ्बामि सराङ्बेॽ येबे।” इडोॽ लुबॽआ खेम्मासोरोॽ मो याॽमि सुवाक्टोॽ येपोक्नुङ राम्बोगा। 11 पावलडे़ॽ ले़ःॽपॽआ इडोक्मा योम्बोक खाङ्नुङ मोबेॽहा याॽमिजिडे़ॽ खोजिमि लुकोनिया खाप्लाबेॽ इडोॽ कासामि, “देउताजिगो याॽमि लिनुङ कानिङ्बेॽ लेङ्इटामि।” 12 खोजिडे़ॽ बारनाबास चाहिँ जिउस लुमे देबता मिॽटुजि मोबा पावलडे़ॽ चाहिँ याक्लो परचार ले़ःॽपॽआसे़ॽ खो हरमेस लुमे एप्पा देउता मिॽटुजि। 13 जिउस लुमे देबतामि मन्दिर मो सहरमि के़क्पेॽनोॽ टुसे़। मो मन्दिरमि याडाङ्बाडे़ॽ उङ्मि मालानुङ सुःक्मा टिङ्मानुङ सहरमि राम्डेमबेॽ लेस्सा। माहाजिडे़ॽ बारनाबासनुङ पावलमि पोम्बेॽ माहा सुःक्माजि भोग पिमामि पोरोगुजि। 14 इगो खा लेडोक्नुङ बारनाबासनुङ पावलडे़ॽ हागो ने़ॽनिबा योम्बोक लिसिॽपोरोगा लुनुङ दुःख मिङ्साङ निप्पाङे़ॽ खोजिमि चेॽ नाःक्साङ याॽमिजिमि रुम्बेॽ पिङ्खे़ॽनुङ इडोॽ कासाजि, 15 “ने़ॽनि, हे़निङे़ॽ इगो इमाङ्डे ले़ःॽमामि पोरोक्इटानुमे ? कानिङ्सो हे़निङ्डोॽ दुःख सुख आङ्घुबा याॽमिनोॽ ले़न्डिङ्मा। कानिङ गो हे़निङ निवाहाङ्बेॽ टेआप्मामि सुसमाचार खेम्मेॽसिॽ लेङ्इटिङ्मे। इघा योम्बोक मे़ॽनिङ्हा खा लेॽपेनुङ, नान्द्रुङ्मा, माहोङ्मानुङ मक्खाम्डेम मोबेॽ टुहा चोप टोङ्खुबा हिङ्रिक निवाहाङ्मि सेवा ले़ःॽमा खे़ये। 16 उहिलेहा याॽमिजिगो निवाहाङ्डे़ॽ खोजिमि खुसि ले़टुजिरो लुनुङ योङ्मेॽटुजि। 17 खोसे़ॽको सानिङ्नोॽ नुबानुङ भलाइमि योम्बोक ले़ःॽमे़ॽनिङ्सिन्डुए। खोसे़ॽ नान्द्रुङ्माबाङ ठिक बेलाबेॽ वारि लेम्मेन्डुए, मोबा बेॽलो उब्जनि पिये, याॽमिजि चामे खा पिये। याॽमिजि साप्थाङ्मेन्डुजे। इडोॽ निवाहाङ्डे़ॽ खोमि योम्बोकडे़ॽनोॽ खोमि साक्छि पिन्डुए।” 18 इघा खा लुसाङ बारनाबासनुङ पावलडे़ॽ खोजिमि लागि भोग पिमामि पोरोक्पॽआ योम्बोक याप्चे़ॽ से़क्हेसाजु। 19 मोबा ए़क्साङ एन्टिओखियानुङ आइकोनियन सहरबाङ आढा यहुदिजि मोबेॽ लेस्सामि। माहाजिडे़ॽ याॽमिजि चोम्नुङ पावल रुङ्गोॽवाडे़ॽ सिघे़ॽलो फे़ङ्मेॽटुजि मोबा सिघडा मिॽनुङ खो से़ॽखे़ॽनुङ सहरबाङ पाखे़ॽयु राप्पेसुजि। 20 तर परभुमि चोङ्साजि लेन्नुङ पावलमि किॽयु मिॽयु सुम्माबेॽ, खो येपोक्नुङ मो सहरलामनोॽ खडा। वागियाराम बारनाबासनुङ डरबि सहरबेॽ खडाजि। पावलनुङ बारनाबास सिरियामि एन्टिओखियाबेॽ टेसाजि 21 पावलनुङ बारनाबासडे़ॽ मोबेॽ सुसमाचार परचार ले़ःॽनुङ बेॽलो याॽमिजि परभुमि चोङ्सा टोक्सुजि। मोबा ए़क्साङ खोजि लुस्त्रानुङ आइकोनियनमि राम लिसाङ पिसिदिया ठाउँमि एन्टिओखिया सहरबेॽ टेसाजि। 22 खोजिडे़ॽ मो ठाउँबेॽहा परभुबेॽ बिस्वास ले़ःॽखुबाजि बोलियो टोङ्साङ नुबा अरति पिसुजि। “निवाहाङ्मि राज्यबेॽ रुक्मा याक्लो कानिङे़ॽ बेॽलो खालहा चुङ्जामा खेः आङ्मानोॽ खे़ये” लुनुङ इःडुजि। 23 मोबा पावलनुङ बारनाबासडे़ॽ चोप मन्डलिबेॽ अगुवाजि से़नुजि, मोबा मे़न्चारेॽ पारथना ले़ःॽसाङ माहा चोङ्साजि टाङ्बे़ॽ बिस्वास ले़ःॽपॽआ परभुबेॽ खोजि युक्सुजि। 24 पिसिदिया ठाउँ लिसाङ खोजि पामफिलिया ठाउँबेॽ टेआबाजि। 25 खोजिडे़ॽ परगा लुमे ठाउँबेॽसो परभु येसु खिरिस्टमि टुम्बेॽ परचार ले़टुजि। मोबा खोजि अटालिया सहरलाम खडाजि। 26 मोबाङ माहाजि बेॽए योङा जहाजबेॽ साङ्नुङ एन्टिओखिया सहरबेॽ टेसाजि। इगो एन्टिओखिया सहरबेॽहा परभुबेॽ बिस्वास ले़ःॽखुबा वावानिसाजिडे़ॽनोॽ पावलनुङ बारनाबास निवाहाङ्मि अनुग्रहाबेॽ युङ्नुङ खोजि सुसमाचार परचार ले़ःॽमे योम्बोकपेॽ पाङ्बॽआ ले़टे़। खोजि मो योम्बोक येॽनुङ मो ठाउँबेॽनोॽ टेसाजि। 27 एन्टिओखियाबेॽ टेनुङ ए़क्साङ पावलनुङ बारनाबासडे़ॽ मन्डलिबेॽहा चोप बिस्वासिजि के़डुजि। निवाहाङ्डे़ॽ खोजिबाङ इन्डोक्हा योम्बोक ले़टुएनुङ खोसे़ॽ अयहुदि जातिजिडे़ॽसो बिस्वास ले़ःॽहेमे राम्डेम हेम्बेॽटुजि लुमे खा खोजिडे़ॽ माहाजि खेम्मेॽटुजि। 28 मोबा ए़क्साङ खोजि बेॽलो याकरो एन्टिओखियाबेॽहा बिस्वासिजिनुङ पेनाजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.