एप्पा चोङ्सा 13 - याम्फुसावलनुङ बारनाबास से़म्बॽआ 1 एन्टिओखिया सहरमि मन्डलिबेॽ अगमबक्ताजिनुङ खा इःॽखुबा बेॽलो याॽमिजि टुसामे। माहाजि बारनाबास, काला लुमे सिमियोन, कुरेनिया ठाउँबेॽए लुकियस, हाङ्बा हेरोदएन्टिपासनुङ सोरि वाबोक्पॽआ मनेननुङ सावल टुसामि। 2 इक्याक माहाजि मे़न्चारेॽ पेन्नुङ पारथना ले़ःॽसाङ परभुमि आराधना ले़ःॽमे़ॽनिङ्सिमाबेॽ पबित्रा होङ्निवाडे़ॽ माहाजि इडोॽ लुसुजि, “खेप्सानुमे, बारनाबासनुङ सावल के़ॽ इमाङ योम्बोकमि लागि से़न्इटुङ्हाजि, खोजि मो योम्बोकपेॽनोॽ टिसानुमे।” 3 मोडोगे़ॽ माहाजिडे़ॽ फेरि मे़न्चारेॽ पेन्नुङ बारनाबासनुङ सावलसोक्पेॽ हुक युङ्नुङ पारथना ले़ःॽपेॽनुङ परभुमि योम्बोकपेॽ पाक्सुजि। बारनाबासनुङ सावल साइपरस लुमे पोङ्बोङ्माबेॽ 4 पबित्रा होङ्निवाडे़ॽ पाङ्बॽआ बारनाबासनुङ सावल एन्टिओखिया सहरबाङ राम्बोगाजि, खोजि सिलुकिया सहरबेॽ खडाजि। मोबाङ माहोङ्मामि राम लिसाङ साइपरस पोङ्बोङ्माबेॽ खडाजि। 5 मोबा सलामिस सहरबेॽ रुक्नुङ यहुदिजि सुम्ढाम खिमबेॽ पे़ए़न्नुङ माहाजिडे़ॽ निवाहाङ्मि बचन खेम्मेॽटुजि। मो योम्बोक टिङ्माराप्खुबा मरकुस लुमे युहन्नासो खोजिडे़ॽ चिक्खे़ॽपॽआ ले़टे़। 6 माहाजि साइपरस पोङ्बोङ्मा चोप वाइसेॽनुङ पाफोस लुमे सहरबेॽ रुक्टुजि। मोबेॽ खोजिडे़ॽ इक्को बार-येसु लुमे चटक ले़ःॽखुबा यहुदि चुप्टुजि। मोसे़ॽ खोम्दाङ्बा अगमबक्ता मिॽटुए। 7 मो चटक ले़ःॽखुबा याॽमि चाहिँ साइपरस पोङ्बोङ्माबेॽए डायोङ्बा सरगियस पौलुसमि खिमबेॽ पेने़। सरगियस पौलुस निवादाङ्बा ले़टे़। खोसे़ॽ निवाहाङ्मि बचन खेम्जामा मिॽपॽआसे़ॽ बारनाबासनुङ सावल के़ःॽसिॽ पाक्सु। 8 तर मो एलुमास लुमे चटक ले़ःॽखुबाडे़ॽ (एलुमास लुबॽआ चटक ले़ःॽखुबा लिये) सावलनुङ बारनाबास बिरोध ले़ःॽनुङ सरगियस पौलुस बिस्वासबाङ फेम्बेमा योगु। 9 मोबा सावलडे़ॽ (सावलनोॽ पावलसो लुन्डुजे) पबित्रा होङ्निवामि सक्तिडे़ॽ टिप्नुङ एलुमास खाङ्साङ लुसु, 10 “हे़न चोप नुबा खामि सतुर, मोबा मङे़ॽमा योम्बोकनुङ मङे़ॽमा निवा खिघुबा सैतानमि पसा ले़ये। इमाङ हे़ने़ॽ परभुमि सोझो राम किॽयु मिॽयु फेम्मा इन्डोक्पेॽसो लेडुने ? 11 हागो खाक्से हे़न सोक्पेॽ परभुमि चापहिमा सिॽपॽआसे़ॽ हे़ने़ए़ मिक ए़ःॽनिबा इन्डोक्रो हे़ने़ॽ नमसो खाङ्हेसुने!” इडोॽ लुमासोरोॽनोॽ एलुमासमि मिक खिम्मिॽवाडे़ॽ टे़क्पॽआडोॽ लिसा मोबा हुगे़ॽ इगिॽयु मिॽयु राःप्ठाम योक्पोगु। 12 मोबा मो खा बेॽए डायोङ्बाडे़ॽ मोबेॽ परभुमि सिक्छेबेॽ टुबॽआ खरिमा सक्ति खाङ्नुङ खरि मिना मोबा खोसे़ॽ परभुबेॽ बिस्वास ले़टु। बारनाबासनुङ पावल पिसिदियामि एन्टिओखिया सहरबेॽ 13 मोबा पावलनुङ खोमि लङ्गामजि पाफोसबाङ योङा जहाजबेॽ साङ्नुङ पाम्फेलिया ठाउँमि परगा लुमे सहरबेॽ रुक्टाजु। मोबाङ मरकुस लुमे युहन्नाडे़ॽ, पावलनुङ बारनाबास याःॽयानुङ, यरुसलेमलाम टेघडा। 14 मोबा पावलनुङ बारनाबास चाहिँ परगाबाङ पिसिडिया ठाउँमि एन्टिओक सहरबेॽ खडाजि। मोबा नाजामे याकपेॽ यहुदिजि सुम्ढाम खिमबेॽ खे़ॽनुङ पेनाजि। 15 मोसामि यहुदि धारमिक नियममि नेॽचिरानुङ अगमबक्ताजिमि नेॽचिरा नेॽपेनुङ यहुदि सुम्ढाम खिमबेॽहा डायोङ्बाजिडे़ॽ बारनाबासनुङ पावल इडोॽ लुमे लम्बवाँ पाक्सुजि, “होउ, निसाजि कानिङ्मि याॽमिजि साहस पिढाम नुबा खा हे़न्जिङ्नुङ टुहाहोङ इगोबेॽ इःसाजे।” 16 खेम्नुङ पावल येपोक्नुङ हुकमि खाप्लाबाङ इःमा तरिगु, “इस्राएलि वावानिसाजि मोबा निवाहाङ्मि आदर ले़ःॽखुबा याॽमिजि, के़हा खा खेप्सानुमे! 17 इगो इस्राएलि जातिजिमि निवाहाङ्डे़ॽ कानिङ्मि टुबा पाबाजि से़न्नुङ मिस्रा देसबेॽ टुमाबेॽ चोप खाबेॽ महान जाति टोक्सु। मोबा खोमि बेॽए सक्तिडे़ॽ मिस्रा देसबाङ चिॽआप्टुजि। 18 माहाजि रे़क्रे़क्मा ठाउँबेॽ रिक्पोङ निङ्ठोक टुमाबेॽ निवाहाङ्डे़ॽ माहाजि खाक्सुजि। 19 निवाहाङ्डे़ॽ कनान देसबेॽए एच्चि जातिजि नासि ले़ःॽनुङ मो देस कानिङ्मि टुबालाबाजि पिसुजि। 20 “मोडोक्रो रिउम सय ङाक्पोङ निङ याक्खे़ॽपॽआ ले़टे़। मोबा निवाहाङ्डे़ॽ इघाजि सासन ले़ःॽमामि न्यायधिसजि पाक्सुजि। पालो पालो ले़ःॽसाङ अगमबक्ता सामुएल मे़लेन्रो खोजिडे़ॽ मो योम्बोक ले़टुजि। 21 मोबा माहाजिडे़ॽ हाङ्बा ङागुजि। मोबा निवाहाङ्डे़ॽ खोजि बेन्यामिन कुलमि किस लुमे याॽमिमि पसा सावल हाङ्बा टोङ्बेॽटुजि। मोसे़ॽ रिबोङ निङ्ठोक राज्य लेटु। 22 निवाहाङ्डे़ॽ खो हाङ्पेन्ढामबाङ चाङ्बेनुङ दाउद हाङ्बा टोक्सु। निवाहाङ्डे़ॽ दाउदमि टुम्बेॽ इडोॽ लुसु, ‘यिसैमि पसा दाउद के़ए़ नेन्जाबॽआ याॽमि चुप्मिटुङे। खोसे़ॽ के़ए़ निवाडे़ॽ मिॽपॽआडोक्नोॽ ले़न्डुए।’ 23 “इगो याॽमिमि पसाजिबाङ निवाहाङ्डे़ॽ हेन्ज्रुङ हेम्बॽआडोक्नोॽ मुक्ति पिघुबा येसु कानिङ इस्राएलिजिबेॽ पाङ्इन्डुए। 24 येसुडे़ॽ खोमि योम्बोक तरिक्मा याक्लो युहन्नाडे़ॽ इस्राएलिजिमि चोप याॽमिजि पापबाङ टेआप्नुङ बप्तिस्मा लासानुमे लुनुङ परचार ले़टु। 25 मोबा युहन्नाडे़ॽ खोमि सेवामि योम्बोक येॽपेमे बेलाबेॽ याॽमिजि इडोॽ लुसुजि, ‘का असाडे लुनुङ मिॽइन्डानुमे ? कागो हे़निङे़ॽ आसा ले़ःॽपॽआ याॽमिगो ने़ॽनि, खोगो काबाङ्सो ए़क्साङ लेङ्इये। कागो खोमि राङ्सुपमि तुना हेम्मारोमासो ले़ःॽङानि।’ 26 “होउ, अब्राहाममि पसाजि, इस्राएलि वावानिसाजि, निवाहाङ्मि आदर ले़ःॽखुबाजि, निवाहाङ्डे़ॽ इगो सुसमाचार कानिङ चोपमि लागि पाङ्बॽआ ले़हा। 27 तर यरुसलेमबेॽ पेङ्घुबा याॽमिजिनुङ खोजिमि डायोङबाजिडे़ॽ येसु छुट्कारा पिघुबा लुनुङ मे़लेसुजि। खोजिडे़ॽ अगमबक्ताजिडे़ॽ धारमिक नेॽचिराबेॽ साप्पॽआ खा नाजामे याकपेॽ सानिङ्नोॽ नेॽमाबेॽसो माहाजिडे़ॽ मे़लेहेसुजि। येसु सेॽनेनुङ दन्डा पिसुजि इडोॽ धारमिक नेॽचिराबेॽ साप्पॽआ खा खोजिमि योम्बोगे़ॽ पुरा ले़टुजि। 28 खो सेॽमारोमा आप्टिक मे़न्चुप्माबेॽसो सेॽनेमानोॽ खे़ये लुनुङ रोम देसबेॽए एप्पा मायोङ्बा पिलातस बिन्ति ले़टुजि। 29 खोमि टुम्बेॽ धारमिक नेॽचिराबेॽ साप्पॽआ खा पुरा लिसा मोबा माहाजिडे़ॽ खो काप्सिङ्बाङ रिओक्नुङ येःॽमाबेॽ युक्सुजि। 30 तर निवाहाङ्डे़ॽ खोगो सिघे़ॽपॽआबाङ हिङ्बोगु। 31 मोबा बेॽलो याकरो खोनुङ गालिलबाङ यरुसलेम लेङ्खुबाजिडे़ॽ खोमि सेन्जिसेम्माङ चुप्टुजि। मोबा आयु माहाजिनोॽ इस्राएलि याॽमिजिमि लागि खो खाङ्मुघुबा साक्छि ले़म्मे। 32 “हागो निवाहाङ्डे़ॽ याक्लोनोॽ कानिङ्मि पाबा टुबाजिनुङ हे़म्बॽआ हेन्ज्रुङ्मि सुसमाचार खेम्मेॽसिॽ हे़निङ्बेॽ कानिङ लेङ्इटिङ्मे। 33 इगो सुसमाचार चाहिँ निवाहाङ्डे़ॽ येसु सिघे़ॽपॽआबाङ हिङ्बोक्नुङ कानिङ खोमि पसाजिमि लागि मो हेन्ज्रुङ हे़म्बॽआ पुरा ले़ःॽपॽआ ले़ये। मो भजनसङ्ग्रहमि ए़क्साङ्ए भागबेॽ निवाहाङ्डे़ॽ इडोॽ लुबॽआ ले़ये, ‘हे़न के़ए़ पसा ले़ये, आयु का हे़ने़ए़ पाबा लिटिङे।’ 34 “निवाहाङ्डे़ॽ येसु सिघे़ॽपॽआबाङ हिङ्बोक्माबेॽ फेरि इन्डोक्पेॽसो ए़ॽसिॽघे़ॽलो लुनुङ धारमिक नेॽचिराबेॽ इडोॽ लुबॽआ ले़ये ‘के़ॽ दाउद पिन्ने़ लुनुङ हेन्ज्रुङ हे़म्बॽआ पबित्रानुङ चाइबानोक्मा आसिस हे़निङ पिनिम्ने़।’ 35 मोबा भजनसङ्ग्रहबेॽसो इडोॽ साप्पॽआ ले़ये, ‘हे़ने़ॽ हे़ने़ए़ पबित्रा याॽमिजिमि हिङा किम्घे़ॽमेॽटुनिबा।’ 36 “दाउदडे़ॽ खोमि हिङ्मवा टुरो निवाहाङ्मि सेवा ले़टु, मोबा खो सिघे़ॽनुङ, खोमि पाबा टुबाजिनुङ्नोॽ येःॽमाबेॽ किम्घडा। 37 तर निवाहाङ्डे़ॽ सिघे़ॽपॽआबाङ हिङ्बोक्पॽआ येसुमि हिङा चाहिँ मे़ङ्किम्घे़ॽमेॽटु। 38 “मोडोगे़ॽ वावानिसाजि, येसुबाङ कानिङ्मि चोप पापमि आम्लाङ लिहा लुनुङ चाइबानोक्मा खा खेम्मेॽनिम्ने़। 39 येसुबेॽ बिस्वास ले़ःॽखुबाजि चोपजिमि पाप आम्लाङ लिनुङ निवाहाङ्मि पोम्बेॽ धरमि लिटानिङे। इगो खा यहुदि धारमिक नियमडे़ॽ मे़ले़ःॽहेसु। 40 मोडोगे़ॽ हे़निङ चङ्खो पेनानिङे, ने़ॽनिहोङ्गो अगमबक्ताजिडे़ॽ साप्पॽआ खा हे़निङ्सोक्पेॽ लेङ्इये। 41 खाक्सानुमे, ‘सिःक्चाघुबाजि हे़निङ खरि मिनानिङे मोबा नासि लिबेसानिङे इन्ढोङ्होङ हे़निङ्मि बेलाबेॽ के़ॽ इडोक्मा योम्बोक ले़नुङे, इगो योम्बोकमि टुम्बेॽ हे़निङ हाइखाजिडे़ॽ लुबेॽटानिङ्होङ्सो हे़निङे़ॽ बिस्वास ले़टानुम्ने’।” 42 पावलनुङ बारनाबास यहुदिजि सुम्ढाम खिमबाङ पे़आप्नुङ खे़ॽमाबेॽ याॽमिजिडे़ॽ माहाजि, “फेरि हाइको नाजामे याकपेॽ हे़निङ लेन्नुङ इगो खा फेरि कानिङ खेम्मेॽमा” लुनुङ के़डुजि। 43 मोबा यहुदिजि सुम्ढाम खिमबेॽ खा येॽनुङ ए़क्साङ बेॽलो यहुदिजिनुङ यहुदि धरमबेॽ बिस्वास ले़ःॽखुबाजिडे़ॽ पावलनुङ बारनाबास टिक्सुजि। मोबा पावलनुङ बारनाबासडे़ॽ माहाजिनुङ खा इःनुङ सानिङ निवाहाङ्मि नम्नावाबेॽ टुढुङ्घे़ॽमे लुनुङ बिन्ति ले़टुजि। 44 मोबा हाइको नाजामे याकपेॽ मो सहरमि चोप याॽमिजि परभुमि बचन खेम्सिॽ लेस्सामि। 45 तर यहुदि एप्पाजिडे़ॽ मोढे़ःॽलो याॽमिजि सुम्बॽआ खाङ्नुङ चेजेवा ले़ःॽसाङ पावलडे़ॽ लुबॽआ खामि बिरोध ले़ःॽसाङ पावल वोबुजि। 46 तर पावलनुङ बारनाबासडे़ॽ मे़ङ्किस्सिरेॽ इडोॽ लुसुजि, “निवाहाङ्मि बचनगो चोपबाङ याक्लो हे़निङ यहुदिजि खेम्मेॽमा खाडे़, तर हे़निङे़ॽनोॽ इगो खा मे़ङ्खेप्सानुम। हे़निङ टाङ्बे़ॽनोॽ मो इन्डोक्पेॽसो ए़ॽसिघे़ॽमे हिङ्मवा ओः टोक्सानुम। हागो कानिङ अयहुदि जातिजिबेॽ खाडिङ्मा। 47 इन्ढोङ्होङ परभुडे़ॽ इडोॽ कानिङ आग्या पिटे़, ‘मक्खाम्डेमबेॽहा चोप याॽमिजिडे़ॽ छुट्कारा चुप्टुजिरो लुनुङ के़ॽ हे़निङ अयहुदि जातिजिमि लागि जोतिडोॽ टोङ्नुङ पाङ्बॽआ ले़ये’।” 48 इगो खा अयहुदि जातिजिडे़ॽ खेम्नुङ बेॽलो साप्थाक्साङ निवाहाङ्मि बचनमि ओहाङ ले़टुजि। मोबा इन्डोक्पेॽसो ए़ॽसिघे़ॽमे हिङ्मवामि लागि याक्लोनोॽ निवाहाङ्डे़ॽ से़म्बॽआजिडे़ॽ परभुबेॽ बिस्वास ले़टुजि। 49 मोबा निवाहाङ्मि बचन चोप ठाउँराजि मुक्खडा। 50 तर यहुदिजिडे़ॽ निवाहाङ्मि आदर ले़ःॽखुबा एप्पा मेॽनामिॽचिनुङ मो सहरबेॽहा एप्पा याॽमिजि पावलनुङ बारनाबासमि मङे़हा खा इःबेॽनुङ चोप्सुजि। मोबा पावलनुङ बारनाबास मो ठाउँबाङ यिक्हाक्सुजि। 51 मोडोगे़ॽ पावलनुङ बारनाबास खोजिमि सराङ्फे़क्माबेॽहा आक्खामा मोबेॽहा याॽमिजिमि बिरोधबेॽ फाॽपॽआनुङ, खोजि आइकोनियनलाम खडाजि। 52 मोबा चोङ्साजिसो पबित्रा होङ्निवामि बोलडे़ॽ सान्ति लिनुङ हाङ्हाङ ले़ःॽसाङ साप्थाक्सामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.