Biblia Todo Logo
Bìoball air-loidhne

- Sanasan -


एप्‍पा चोङ्‌सा 12 - याम्फु


हाङ्‌बा हेरोद अग्‍रिपाडे़ॽ मन्‍डलिबेॽ याॽमिजि चुङ्‌जाबॽआ

1 मोडोक्‍पेॽ हाङ्‌बा हेरोद अग्‍रिपाडे़ॽ मन्‍डलिबेॽहा बिस्‍वासि वावानिसाजि बेॽलोनोॽ चुङ्‌जोबोगुजि।

2 मोसे़ॽ युहन्‍नामि वावा याकुब ताब्‍याडे़ॽ चेन्‍नेमेॽटु।

3 इगो योम्‍बोकडे़ॽ यहुदि याॽमिजि साप्‍थाङ्‌बॽआ खाङ्‌नुङ मोसे़ॽ पत्‍रुससो राःप्‍मेॽटु। इगो खा सिडा मे़न्‍ठुबॽआ चरेपा चामे चाडमि बेलाबेॽ सिॽपॽआ ले़टे़।

4 हाङ्‌बा हेरोदडे़ॽ पत्‍रुस राःप्‍मेॽनुङ तिरिङ्‌गा खिमबेॽ से़गु। मोबा मोबेॽ इक्‍पोङ चुक्‍चि जना तिरिङ्‌गाजि रिबाङ रिबाङ्‌मि हुल लिनुङ पत्‍रुस सेन्‍डा लेन्‍डा हुङ्‌मेॽटुजि। मोबा हाङ्‌बा हेरोदडे़ॽ मो यहुदिजिमि छुट्‌कारामि चाड ए़क्‍साङ पत्‍रुस यहुदिजिमि पोम्‍बेॽ लाप्‍मा मिॽटु।

5 पत्‍रुस तिरिङ्‌गा खिमबेॽ टुमाबेॽ मन्‍डलिबेॽहा याॽमिजिडे़ॽ खोमि लागि बेॽलो पारथना ले़ःॽमे़ॽनिङ्‌सिडुजे।


तिरिङ्‌गा खिमबाङ पत्‍रुस लेॽखे़ॽपॽआ

6 हाङ्‌बा हेरोदडे़ॽ पत्‍रुस याॽमिजिमि पोम्‍बेॽ लाप्‍मे याकमि याक्‍लोए सेन्‍डा पत्‍रुस निप्‍पाङ तिरिङ्‌गाजिमि रुम्‍बेॽ इम्‍मे़ॽनिङ्‌सिडे़। खो निच्‍चि चे़क्‍चिमि कोङ्‌डे़ॽ हिःक्‍पॽआ ले़टे़। तिरिङ्‌गा खिममि राम्‍बडेम्‍बेॽसो तिरिङ्‌गाजिडे़ॽ हुङ्‌मे़ॽनिङ्‌सिडुजे।

7 मोबा हाजोक्‍टोॽ इक्‍को थाङ्‌सिरिदुत मो तिरिङ्‌गा खिमहोङ्‌सिॽयु उज्‍यालो जोतिनुङ खाङ्‌मुसा। मो थाङ्‌सिरिदुतडे़ॽ पत्‍रुसमि अक्‍टाङ्‌बेॽ चोक्‍साङ “चान्‍डो पुकाडे” लुनुङ हुम्‍बोगु। मोडोक्‍पेॽ पत्‍रुसमि हुकपेॽ हिःक्‍पॽआ चे़क्‍चिमि कोङ हेम्‍बोक्‍खडा।

8 मोबा थाङ्‌सिरिदुतडे़ॽ खो लुसु, “थोङ्‌माइ हिःक्‍नुङ राङ्‌सुप चाक्‍से।” मोबा पत्‍रुसडे़ॽ मोडोक्‍नोॽ ले़टु। मोबा फेरि थाङ्‌सिरिदुतडे़ॽ लुसु, ओप्‍ताङ खाम्‍नुङ “के़ए़ ए़ङ्‌गुवा ए़ङ्‌गुवा आबे।”

9 पत्‍रुस थाङ्‌सिरिदुतमि ए़ङ्‌गुवा ए़ङ्‌गुवा राम्‍नुङ तिरिङ्‌गा खिमबाङ पे़ए़आबा तर पत्‍रुसडे़ॽ इगो योम्‍बोक थाङ्‌सिरिदुतडे़ॽ चइबानोॽ इडोॽ ले़ःॽपॽआ लुनुङ मे़लेसु। खोसे़ॽ मिॽटु, “के़ॽ सेम्‍माङ माक्‍मे़ॽनिङ्‌सिनुङे।”

10 इडोॽ पत्‍रुसनुङ थाङ्‌सिरिदुत याक्‍लोएनुङ हाइके राम हुङ्‌घुबा तिरिङ्‌गाजि येःप्‍ठाम ठाउँ काःक्‍नुङ सहर पे़खे़ॽठाम चे़क्‍चिमि मुल राम्‍बडेम्‍बेॽ लेस्‍साजि। मो राम्‍डेम खोम्‍दाङ्‌बा हेम्‍बोगा, मोबा निप्‍पाङ पाखे़ॽयु लेस्‍साजि। माहाजि सहरमि हाइके ए़डेॽमा मरामबेॽ लेम्‍मासोरोॽ थाङ्‌सिरिदुतडे़ॽ पत्‍रुस याःॽयोसु।

11 मोडोक्‍पेॽरेॽ पत्‍रुसडे़ॽ खोबेॽ लिबॽआ चोप खा चइबानोॽ लिबॽआ ले़येले़ लुनुङ लेडोक्‍टु। मोबा खोमदाङ्‌बे़ॽ इडोॽ लुसु, “परभुडे़ॽ चइबानोॽ खोमि थाङ्‌सिरिदुत पाङ्‌नुङ हाङ्‌बा हेरोदनुङ यहुदिडे़ॽ का पिमायोक्‍पॽआ दुःखबाङ जोगबा ले़टिङ।”

12 इगो खा पत्‍रुसडे़ॽ लेडोक्‍नुङ मरकुस लुमे युहन्‍नामि मामा मरियममि खिमबेॽ खडा। मोबेॽ बेॽलो बिस्‍वासि याॽमिजि सुम्‍नुङ पारथना ले़ःॽमे़ॽनिङ्‌सिडामे।

13 पत्‍रुसडे़ॽ राम्‍डेम पाखे़ॽयुबाङ रोःक्‍माबेॽ रोदा निङ ले़ःॽखुबा सेउतेनि, राम्‍डेम हेन्‍सिॽ लेस्‍सा।

14 मोसे़ॽ पत्‍रुसमि सेम्‍ला खेम्‍डोक्‍नुङ राम्‍डेम मे़हेन्‍लेॽ साप्‍थाङ्‌मानुङ पिङ्‌खे़ॽनुङ “पत्‍रुस पाखे़ॽयु लेङ्‌इटा” लुसु।

15 माहाजिडे़ॽ मो लुसुजि, “हे़न नाक्‍सुमा लिटेन्‍डे” तर मोसे़ॽ “चइबानोॽ पत्‍रुसनोॽ लेङ्‌इटे़ लुनुङ येॽयेॽ” लुसु। माहाजिडे़ॽ लुसुजि, “पत्‍रुस खाङ्‌खुबा थाङ्‌सिरिदुत होला।”

16 पत्‍रुसडे़ॽ चाहिँ राम्‍डेम रोःक्‍मा मे़लेडु। मोबा माहाजिडे़ॽ राम्‍डेम हेम्‍बोक्‍माबेॽको चइबानोॽ पत्‍रुसनोॽ खाङ्‌डोक्‍नुङ, खरि मिनामि।

17 पत्‍रुसडे़ॽ माहाजि हुकमि खाप्‍लाडे़ॽ योङ उगानिङे लुसुजि। मोबा इन्‍डोक्‍टे निवाहाङ्‌डे़ॽ खो तिरिङ्‌गा खिमबाङ पाखे़ॽयु लाआप्‍टे लुमे खा माहाजि पत्‍रुसडे़ॽ नुरोॽ इःबेॽटुजि। मोबा “इगो खा याकुबनुङ मन्‍डलिबेॽहा बिस्‍वासि वावानिसाजिसो हे़निङे़ॽ लुबेॽटानुमो” लुनुङ पत्‍रुस मोबाङ खे़ॽपेसा।

18 मोबा वागिया माक्‍मि नमटे़नुङ तिरिङ्‌गा खिमबेॽहा तिरिङ्‌गाजिमि रुम्‍बेॽ बेॽलो खायोक मायोक लिसा।

19 मो खा लेडोक्‍नुङ हाङ्‌बा हेरोदडे़ॽ तिरिङ्‌गाजि पत्‍रुस योक्‍मेॽटुजि, तर पत्‍रुस हाम्‍बेॽसो मे़न्‍चुप्‍टुजि। मोबा हाङ्‌बा हेरोदडे़ॽ तिरिङ्‌गाजि सिम्‍माबेॽ माहाजिबाङ इमाङ खासो मे़न्‍चुप्‍पॽआसे़ॽ खोजि सेॽनेमेॽटुजि। मोबा हाङ्‌बा हेरोद चाहिँ यहुदिया ठाउँबाङ कैसरिया खे़ॽनुङ मोबेॽनोॽ पेना।


हाङ्‌बा हेरोद सिघे़ॽपॽआ

20 हाङ्‌बा हेरोद टुरोसनुङ सिदोन ठाउँबेॽहा याॽमिजिनुङ बेॽलो सुरके़ॽपॽआ ले़टे़। तर माहा निच्‍चि ठाउँबेॽहा याॽमिजिमि लागि चामे उङ्‌मे खा हाङ्‌बा हेरोदमि ठाउँबाङ्‌नोॽ लाघे़ॽमा खडे़। मोडोगे़ॽ मो निच्‍चि ठाउँबेॽहा एप्‍पाजि इक्‍को लिनुङ हाङ्‌बानुङ लङ्‌गाम ले़ःॽसिॽ खे़ॽमा मिनाजि। मोबा माहाजिडे़ॽ हाङ्‌बा हेरोदमि भरसे़या याॽमि बलस्‍तस चोप्‍नुङ हाङ्‌बानुङ चुप्‍मामि बिन्‍ति ले़टुजि।

21 मोबा मो चुप्‍मे याकपेॽ हाङ्‌बा हेरोदडे़ॽ हाङ्‌बा चेॽ चाङ्‌मानुङ हाङ्‌बा पेन्‍ढामबेॽ पेन्‍नुङ माहा एप्‍पाजिनुङ हाइखा याॽमिजिमि पोम्‍बेॽ यासुरेना ले़टु।

22 मोबेॽ टुबॽआ याॽमिजिडे़ॽ हाङ्‌बामि यासुरेना खे़म्‍नुङ मोबेॽहा याॽमिजि इडोॽ कासामि, “इगो खागो निवाहाङ्‌मिनोॽ ले़ये, याॽमिमि गो ने़ॽनि” लुसाङ हाङ्‌बामि ओहाङ ले़ःॽपोगामि।

23 तर हाङ्‌बा हेरोदडे़ॽ निवाहाङ्‌मि महिमा मे़ले़ःॽपॽआसे़ॽ मोडोक्‍पेॽनोॽ परभुमि इक्‍को थाङ्‌सिरिदुतडे़ॽ खो दन्‍डा पिसु। मोबा खो फिबे़ॽ इःप्‍नुङ सिघडा।

24 तर निवाहाङ्‌मि बचन छना चोप याॽमिजिडे़ॽ खे़म्‍सुजि।

25 बारनाबासनुङ सावल खोजिमि योम्‍बोक येॽनुङ यरुसलेमबाङ एन्‍टिओखिया सहरबेॽ टेसाजि। खोजि टेमाबेॽ मरकुस लुमे युहन्‍नासो खडा।

© 2023, Wycliffe Bible Translators, Inc. and Nepal Bible Society

Wycliffe Bible Translators, Inc.
Lean sinn:



Sanasan