एप्पा चोङ्सा 11 - याम्फुपत्रुसडे़ॽ यरुसलेममि मन्डलिबेॽ सेन्जिसेम्माङ्मि टुम्बेॽ इःबेॽपॽआ 1 मोबा ए़क्साङ अयहुदि जातिहा याॽमिजिडे़ॽसो येसुबेॽ बिस्वास ले़टुजि लुमे खा यहुदियाबेॽहा एप्पा चोङ्साजिनुङ बिस्वासिजिडे़ॽ खेम्डोक्टुजि। 2 मोबा पत्रुस यरुसलेमबेॽ रुक्माबेॽ खतना ले़ःॽमा खे़ये लुघुबा यहुदि बिस्वासिजिडे़ॽ खो इःजोबोगुजि, 3 “हे़न इन्ढोङ खतना मे़ले़ःॽपॽआ याॽमिजिनुङ सोरि पेन्नुङ चामे, उङ्मे योम्बोक ले़ये ?” 4 मोडोगे़ॽ पत्रुसडे़ॽ खोमि सेन्जिसेम्माङ्बेॽ लिबॽआ चोप खा लुबेॽटुजि, 5 “योप्पा सहरबेॽ टुमाबेॽ पारथना ले़ःॽमे़ॽनिङ्सिडिङे मोडोक्पेॽ, नान्द्रुङ्माबाङ बेॽए ओप्ताङ रिलामबेॽ हिःक्नुङ के़ए़ के़क्पेॽ हेओक्मे़ॽनिङ्सिबॽआ के़ॽ खाक्सुङ। 6 मोबेॽ के़ॽ नुरोॽ खाङ्माबेॽ मक्खाम्डेमबेॽहा चोप खालहा जिवातजि, पेरसेॽवा से़ॽसाङ राम्खुबाजि, नाम्भुङ्लाबेॽ पेङ्घुबाजिनुङ नान्द्रुङ्माबेॽ पेघुबा सोङाजि टुसामि। 7 मोबा इडोॽ लुबॽआ के़ॽ खेप्सुङ, ‘होउ पत्रुस, हे़न येपोक्नुङ इघाजि सेॽचोसे।’ 8 “तर के़ॽ लुसुङ, ‘इडोक्हा असुद्ध जिवातजि इन्डोक्टे चामे। के़ॽको आइरो इघाजि मे़न्चाडिॽ।’ 9 “फेरि थाङ्सिरिबाङ इडोॽ लुबॽआ के़ॽ खेप्सुङ, ‘निवाहाङ्डे़ॽ सुद्ध टोङ्बॽआ खा हे़ने़ॽ असुद्ध ए़ॽलुसे।’ 10 सुमघे़ॽ इडोॽ खेप्सुङ मोबा थाङ्सिरिॽटुनोॽ माहा चोप टेघडा। 11 मोडोक्पेॽनोॽ कैसेरिया लुमे ठाउँबाङ का के़ःॽसिॽ सुमबाङ याॽमिजि का पेम्बॽआ खिमबेॽ लेस्सामि। 12 इमाङ्सो मे़मिन्लेॽ माहाजिनुङ खे़ॽमामि पबित्रा होङ्निवाडे़ॽ का लुसिङा। मोबेॽ एच्चि जना बिस्वासि वावानिसाजिसो कानुङ सोरि आबामि। इडोॽ कानिङ सोरि करनेलियसमि खिम रुक्नुङ खिमहोङ्सिॽयु पे़खडिङ्मा। 13 मोबा करनेलियसडे़ॽ इक्को थाङ्सिरिदुत खोमि खिमबेॽ खाङ्मुनुङ खो लुबॽआ कानिङ खेम्मेॽटा, ‘योप्पा सहरबेॽ सिमोन पत्रुस टुये खो के़ःॽसिॽ याॽमिजि पाक्से।’ 14 खोसे़ॽ हे़न सुसमाचार खेम्मेये मोबा हे़न्नुङ हे़ने़हा खिमबेॽहा चोबे़ॽ पापबाङ छुट्कारा चुप्मिन्डानुमे। 15 “मोबा का माहा याॽमिजिनुङ यामुमे़ॽनिङ्सिडिङे। मोडोक्पेॽनोॽ पबित्रा होङ्निवा याक्लो कानिङ्बेॽ लेम्बॽआडोक्नोॽ खोजि सोक्पेॽसो उक्सा। 16 मोबा के़ॽ परभुडे़ॽ लुबॽआ खा मिॽटोगुङ, ‘युहन्नाडे़ॽको योङेॽ बप्तिस्मा पिसुजे, तर हे़निङ चाहिँ पबित्रा होङ्निवाडे़ॽ बप्तिस्मा लिन्डानिङे।’ 17 कानिङे़ॽ परभु येसु खिरिस्टबेॽ बिस्वास ले़टुङ्मा। मोबा निवाहाङ्बाङ कानिङे़ॽ पबित्रा होङ्निवामि बरदान चुप्टुङ्मा। मोडोक्नोॽ अयहुदि जातिहा याॽमिजिडे़ॽसो निवाहाङ्बेॽ बिस्वास ले़ःॽनुङ खोबाङ पबित्रा होङ्निवा चुप्टुजि। इडोॽ निवाहाङ्डे़ॽनोॽ माहाजि पबित्रा होङ्निवा पिन्डुजेहोङ मो योम्बोक के़ॽ इन्डोक्टे से़क्मे़ ?” 18 पत्रुसबाङ इघा खा खेप्सुजेबाङ परभुबेॽ बिस्वास ले़ःॽखुबाजिडे़ॽ पत्रुस आप्टिक टिमा लेॽनुङ, खोजि इडोॽ कासामि, “निवाहाङ्डे़ॽ अयहुदि जातिजिसो पापबाङ टेआप्मे नुबा बेला पिटुजि” लुनुङ निवाहाङ्मि ओहाङ ले़ःॽपोगामि। एन्टिओखिया लुमे सहरबेॽए मन्डलि 19 स्तिफनस सेॽनेसुजेम्बाङ येसुबेॽ बिस्वास ले़ःॽखुबाजि चुङ्जाबॽआसे़ॽ चोप चिःॽखडामि, आढा फोनिके लुमे ठाउँबेॽ, आढा साइपरस लुमे पोङ्बोङ्माबेॽ खडामि, मोबा आढा एन्टिओखिया सहरठोक रुक्टुजि। खोजिडे़ॽ याक्लो यहुदिजिरेॽ सुसमाचार खेम्मेॽटुजि। 20 तर साइप्रसनुङ कुरेनिया लुमे ठाउँबाङ लेम्बॽआ येसुमि बिस्वासि चोङ्साजिडे़ॽ चाहिँ एन्टिओखियाबेॽ लेन्नुङ अयहुदि जातिजिसो परभु येसुमि टुम्बेॽहा खा खेम्मेॽटुजि। 21 परभुमि सक्ति खोजिनुङ टुसा। मोडोगे़ॽ बेॽलो याॽमिजिडे़ॽ बिस्वास ले़टुजि। 22 मोबा इगो खा यरुसलेममि मन्डलिबेॽहा याॽमिजिडे़ॽ खेप्सुजि। मोबा मन्डलिबेॽहा अगुवाजिडे़ॽ बारनाबास एन्टिओकबेॽ पाक्सुजि। 23 बारनाबास एन्टिओकबेॽ लेम्माबेॽ मोबेॽहा याॽमिजि निवाहाङ्डे़ॽ नम्नावानुङ आसिस पिबॽआ खाङ्डोक्नुङ बेॽलो साप्थाक्सा। खोसे़ॽ मोबेॽहा बिस्वासिजि सानिङ्नोॽ परभुबेॽ नुरोॽ बिस्वास ले़ःॽमे लुनुङ अरति पिसुजि। 24 बारनाबास चाहिँ, पबित्रा होङ्निवानुङ येसुबेॽ नुरोॽ बिस्वास ले़ःॽखुबा ले़टे़। मोडोगे़ॽ माहा खा खाङ्नुङ हाइखा बेॽलो याॽमिजिडे़ॽ परभुबेॽ बिस्वास ले़टुजि। 25 मोबा बारनाबास, सावल योक्सिॽ टारसस सहरबेॽ खडा। 26 खोसे़ॽ सावल मोबेॽ चुप्नुङ एन्टिओखिया सहरबेॽ चिक्चे़डु। खोजिडे़ॽ इक निङ्डोॽ एन्टिओखियामि मन्डलिबेॽहा याॽमिजिनुङ सेवा ले़ःॽसाङ बेॽलो याॽमिजि इःडुजि। बिस्वासिजि एन्टिओखियाबेॽनोॽ चोप्पा याक्लो “खिरिस्टियन” लुबॽआ ले़टे़। 27 मोडोक्पेॽनोॽ अगमबक्ताजि यरुसलेमबाङ एन्टिओखियाबेॽ लेस्सामि। 28 माहाजिबेॽ अगाबस निङ ले़ःॽखुबा इक्को याॽमि टुसे़। खोसे़ॽ पबित्रा होङ्निवामि सक्तिडे़ॽ मन्डलिबेॽ खे़ॽनुङ याॽमिजि इगो खा इःबेॽटुजि, “हागो मक्खाम्डेमबेॽ बेॽए साक्आङ्सा लेङ्इये।” (ए़क्साङ क्लौडियस निङ ले़ःॽखुबा रोम देसमि हाङ्बा लिमाबेॽ मो साक्आङ्सा लिसा)। 29 अगाबसमि इगो खा खेम्नुङ एन्टिओकबेॽहा परभुमि चोङ्साजिडे़ॽ खोजिडे़ॽ पिहेरो भेटि सहायोग यहुदियाबेॽ पेङ्घुबा वावानिसाजि पिमे निवा ले़टुजि। 30 मोडोगे़ॽ माहाजिडे़ॽ इडोॽ सुम्बॽआ भेटि बारनाबासनुङ सावलमि हुकबाङ यहुदियाबेॽहा मन्डलिमि अगुवाजि पाङ्बेॽटुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.