एप्पा चोङ्सा 10 - याम्फुकरनेलियसडे़ॽ पत्रुस के़ःॽपॽआ 1 कैसरिया सहरबेॽ तिरिङ्गाजिमि एप्पा करनेलियस निङ ले़ःॽखुबा इक्को याॽमि पेने़। खो रोमि तिरिङ्गामि इटालिया निङ्मा पल्टनमि एप्पा ले़टे़। 2 खोनुङ खोमि जाहानजि धारमिक याॽमिजि ले़टामे मोबा खोजिडे़ॽ चोबे़ॽ निवाहाङ्मि आदर ले़टुजे। खोसे़ॽ खाँचोबेॽ सिॽपॽआ याॽमिजि नम्नमनुङ सहायोग ले़टुजे, मोबा सानिङ्नोॽ निवाहाङ्नुङ पारथना ले़टामे। 3 इक्याक लेन्डा सुमबोङ्राजि करनेलियसडे़ॽ इक्को सेन्जिसेम्माङ्बेॽ निवाहाङ्मि इक्को थाङ्सिरिदुत नुरोॽ खाङ्डोक्टु। मो थाङ्सिरिदुतडे़ॽ लुसु, “होउ करनेलियस!” 4 करनेलियसडे़ॽ किस्सिमानुङ खाङ्साङ लुसु, “हे परभु” लुमा। मो थाङ्सिरिदुतडे़ॽ खो लुसु, “हे़ने़ॽ ले़ःॽपॽआ पारथनानुङ इमाङ मे़काप्खुबाजि नम्नम ले़ःॽपॽआ खा निवाहाङ्डे़ॽ निवाबेॽ मिॽयुङ्इटुहा। 5 हागो योप्पा सहरबेॽ टुये पत्रुस लुमे सिमोन के़ःॽसिॽ याॽमि पाक्से। 6 खो साउकमि योम्बोक ले़ःॽखुबा सिमोनमि खिमबेॽ टुये। खोमि खिम टोम्लिॽवा के़क्पेॽ काप्मिन्डुए।” 7 मो थाङ्सिरिदुत इडोॽ लुनुङ खडा। मोबा ए़क्साङ करनेलियसडे़ॽ निप्पाङ खोमि योम्बोक ले़ःॽखुबानुङ निवाहाङ्मि खा खेम्खुबा खोमि तिरिङ्गा के़डु। मो तिरिङ्गाडे़ॽ खोमि नुबा योम्बोक ले़टुए। 8 करनेलियसडे़ॽ सेन्जिसेम्माङ्बेॽ माक्पॽआ चोप खा माहाजि इःबेॽनुङ योप्पा सहरबेॽ पत्रुस चिक्सिॽ पाङ्हाक्सुजि। पत्रुसमि सेन्जिसेम्माङ 9 वागियाराम लेन्डा बारोबोङ्राजि माहाजि योप्पा सहरमि के़क्पेॽ रुक्टुजि। मोडोक्पेॽ पत्रुस पारथना ले़ःॽसिॽ तलाबेॽ सक्सा। 10 पत्रुस पारथना ले़ःॽमे़ॽनिङ्सिमाबेॽ खो बेॽलो सगे़ॽ सिनुङ इमा इमा चामा मिना। हाइखाजि चामा ङिमे़ॽनिङ्सिमाबेॽ पत्रुस चाहिँ पारथनाबेॽ टुसा मोडोक्पेॽ इक्को खरिमा सेन्जिसेम्माङ मागु। 11 थाङ्सिरि हेम्बोगा मोबा मोबेॽ बेॽए ओप्ताङ्डोॽमा रिउमलामबेॽ हिःक्नुङ मक्खाम्डेमलाम हेॽओक्मे़ॽनिङ्सिबॽआ खाङ्डोक्टु। 12 मोबेॽ मक्खाम्डेमबेॽहा चोप खालहा जिवातजि पेरसेॽवा राम्खुबाजि, नान्द्रुङ्माबेॽ पेघुबा सोङाजि टुसामि। 13 मोबा इडोॽ लुबॽआ पत्रुसडे़ॽ खेप्सु। “होउ पत्रुस, पुके़ॽनुङ इघाजि सेॽचोसे।” 14 तर पत्रुसडे़ॽ लुसु, “ने़ॽनि परभु, इडोक्हा असुद्ध थोक इन्डोक्टे के़ॽ चामे! इडोक्हागो आयुरो के़ॽ मे़न्चाडिॽ।” 15 मोबा फेरि इडोॽ काबॽआ खेम्मुसा, “निवाहाङ्डे़ॽ चोखो टोङ्बॽआ चामे खा हे़ने़ॽ चोखो ले़ःॽनिहा ए़लुसे।” 16 सुम्घे़ॽटोॽ इडोॽ लुबॽआ खेप्सु। मोबा मो ओप्ताङ फेरि थाङ्सिरिॽटुनोॽ टेघडा। 17 पत्रुसडे़ॽ इगो सेन्जिसेम्माङ्डे़ॽ लुमायोक्पॽआ खा इमाङ्डे लुनुङ खरि मिन्साङ मिॽमे़ॽनिङ्सिडुए, मोडोक्पेॽ करनेलियसडे़ॽ पाङ्बॽआ याॽमिजि सिमोनमि खिम योक्साङ राम्डेमबेॽ येबामि। 18 मोबा माहाजिडे़ॽ मो खिमबेॽहा याॽमिजि के़ःॽसाङ इडोॽ सिप्सुजि, “पत्रुस लुमे सिमोन इगोबेॽ टुयेन्डे, माये ?” 19 मोडोक्पेॽ पत्रुस खोसे़ॽ खाङ्बॽआ सेन्जिसेम्माङ्डे़ॽ लुबॽआ इमाङ होला लुनुङ नुरोॽ मिॽमे़ॽनिङ्सिडे़। मोडोक्पेॽनोॽ पबित्रा होङ्निवाडे़ॽ पत्रुस लुसु, “खेप्से सिमोन, मिॽमु सुम्बाङ याॽमिजिडे़ॽ हे़न योक्मे़ॽनिङ्सिम्मे। 20 मोडोगे़ॽ हे़न इमाङ मे़मिन्लेॽ मिॽमु खडे। अक्खाजि के़ॽनोॽ पाङ्इटुङ्हाजि।” 21 मोबा पत्रुस मिम्मु उङ्नुङ माहा याॽमिजि लुसुजि, “हे़निङे़ॽ योक्पॽआ याॽमि कानोॽ ले़ङे। इन्ढोङ हे़निङे़ॽ का योॽइन्डानिङे ?” 22 माहाजिडे़ॽ खो लुसुजि, “कानिङ गो तिरिङ्गाजिमि चोप्पा एप्पा करनेलियसडे़ॽ पाङ्इटे़। खो धरमिनुङ निवाहाङ्मि आदर ले़ःॽखुबा याॽमि ले़ये। खो यहुदिजिडे़ॽसो आदर सम्मान पिन्डुजे। निवाहाङ्डे़ॽ पाङ्बॽआ इक्को थाङ्सिरिदुतडे़ॽ हे़न खोमि खिमबेॽ के़ःॽनुङ हे़ने़हा खा खेप्से लुनुङ लुबॽआसे़ॽ करनेलियसडे़ॽ कानिङ हे़न चिक्सिॽ पाङ्इटे़।” 23 मोबा पत्रुसडे़ॽ खोजि खिमहोङ्सिॽयु के़ःॽनुङ चाबाङ्मि सेवा ले़टु। मोबा मो सेन्डा मोबेॽनोॽ पोबामि। वागियाराम माक्मि पोरोक्नुङ योप्पाबेॽहा परभुबेॽ बिस्वास ले़ःॽखुबा आढा याॽमिजि पत्रुसनुङ खडामि। पत्रुस करनेलियसमि खिमबेॽ खे़ॽपॽआ 24 सिङ्आराम माहाजि कैसरियाबेॽ रुक्टुजि। करनेलियसडे़ॽ चाहिँ खोमि टाङ्बाङ्जिनुङ लङ्गामजि के़ःॽनुङ पत्रुसमि राम वाःप्मे़ॽनिङ्सिडुए। 25 पत्रुस मोबेॽ लेन्नुङ खिमहोङ्सिॽयु पे़खेॽसिॽ पोरोक्माबेॽ करनेलियसडे़ॽ खोमि सराङ्बेॽ उःक्युनुङ सेवा मुसु। 26 तर पत्रुसडे़ॽ करनेलियस इडोॽ लुसु, “हे़न पुकडे, कासो हे़नडोॽमा याॽमिनोॽ ले़ङे।” 27 पत्रुस करनेलियसनुङ यामुसाङ खिमहोङ्सिॽयु पे़ए़म्माबेॽ मोबेॽ बेॽलो याॽमिजि सुम्बॽआ खाक्सु। 28 मोबा पत्रुसडे़ॽ माहाजि लुसुजि, “कानिङ यहुदि जातिजि अयहुदि जातिहा याॽमिजिनुङ सोरि पेम्मा, मोबा खोजिमि खिमबेॽ खे़ॽमा, कानिङ्मि धरमबेॽ फे़न्निबा लुमे हे़निङे़ॽ नुरोॽ लेन्डानुमे। तर निवाहाङ्डे़ॽ असासो असुद्ध मिॽमा फे़म्मिनि लुनुङ का लुबेटिङे। 29 मोडोगे़ॽ हे़ने़ॽ पाङ्बॽआ याॽमिजिनुङ इमाङ्सो मे़मिन्रेॽ का इगोबेॽ लेङ्इटिङे। हागो का लुङे इन्ढोङ हे़ने़ॽ का के़डिङे ?” 30 करनेलियसडे़ॽ पत्रुस लुसु, “रियाक याक्लोए खा ले़ये, का लेन्डा सुम्बोङ्राजि पारथना ले़ःॽमे़ॽनिङ्सिडिङे। मोडोक्पेॽ इक्को सेन्जिसेम्माङ मगुङ मोबेॽ पोॽइये चेॽ चाङ्खुबा याॽमि के़ए़ पोम्बेॽ खाङ्मुसा। 31 मोबा का लुसिङ, ‘होउ करनेलियस, हे़ने़ॽ ले़ःॽपॽआ पारथना निवाहाङ्डे़ॽ खेम्इटुए, मोबा हे़ने़ॽ इमाङ मे़ङ्काप्खुबाजि नम्नावा ले़ःॽपॽआसो निवाहाङ्डे़ॽ मिॽइटुए। 32 सिमोन लुमे पत्रुस योप्पा सहरबेॽ टुये, खो चिक्सिॽ याॽमिजि पाक्से। खो साउकमि योम्बोक ले़ःॽखुबा सिमोनमि खिमबेॽ पेङ्इटे़। मो खिम टोम्लिॽवामि के़क्पेॽ टुये।’ 33 मोडोगे़ॽ मो खा लेमा सोरोॽनोॽ के़हा याॽमिजि हे़न चिक्सिॽ पाङ्बॽआ। के़हा याॽमिजिनुङ हे़नसो दुःख ले़ःॽनुङ इगोबेॽ लेम्बेॽटा। हागो निवाहाङ्डे़ॽ हे़न आग्या पिबॽआ खा खेम्सिॽ इगोबेॽ कानिङ परभुमि पोम्बेॽ सुम्इटिङ्मे।” पत्रुसडे़ॽ सुसमाचार खेम्मेॽपॽआ 34 मोबा पत्रुसडे़ॽ लुबोगु, “चइबानोॽ निवाहाङ्डे़ॽ आढाजि नम्नम, आढाजि सिॽचामा ले़टुजिनिबा लुमे खा हागो के़ॽ लेटुङे। 35 तर खो आदर ले़ःॽखुबानुङ खोसे़ॽ लुबॽआडोॽ योम्बोक ले़ःॽखुबा चोप जातिहा याॽमिजि निवाहाङ्डे़ॽ नेन्जोन्डुजे। 36 हागो हे़निङे़ॽ लेन्डानुमे मुक्ति पिघुबा हाङ्बा खिरिस्ट येसु चोपमि परभु ले़ये। खोबाङ्नोॽ निवाहाङ्डे़ॽ सान्तिनुङ्मा सुसमाचार चोप इस्राएलिजिबेॽ पाङ्इटुए। 37 युहन्नाडे़ॽ बप्तिस्मामि टुम्बेॽ इःमा ए़क्साङ्बाङ गालिलबाङ्नुङ यहुदियाबेॽहा चोपराजि लिबॽआ खा हे़निङे़ॽ लेन्डानुमे। 38 निवाहाङ्डे़ॽ नासरतबेॽए येसु पबित्रा होङ्निवामि सक्ति पिसु। मोबा खोनुङ निवाहाङ टुबॽआसे़ॽ खोसे़ॽ याॽमिजि भलाइमि योम्बोकनुङ सैतानडे़ॽ चुङ्जाबॽआजि नुबोक्साङ चोपराजि राम्डुसा। 39 मोबा येसुडे़ॽ यरुसलेमनुङ यहुदिया देसबेॽ ले़ःॽपॽआ चोप योम्बोकमि कानिङ साक्छि टुन्डिङ्मा। खो यहुदिजिडे़ॽ काप्सिङ्बेॽ किङ्नेसुजि। 40 तर निवाहाङ्डे़ॽ सुम याकपेॽ हिङ्बोक्नुङ याॽमिजिडे़ॽ खो खाङ्डोक्टुजि। 41 खो चोपनुङ मे़ङ्खाङ्मुसा। सिघे़ॽनुङ हिङ्पुक्पॽआ खामि साक्छि पिमामि लागि से़न्बॽआ कानिङ्नुङ्रेॽ खो खाङ्मुसा। मोबा कानिङ्नुङ सोरि चासा उक्सा। 42 निवाहाङ्डे़ॽ सिघे़ॽपॽआजिनुङ हिङ्रिकजिमि न्याय ले़ःॽमे योम्बोकमि लागि येसु पाङ्इटुए। इगो खामि साक्छि पिमामिनुङ चोप याॽमिजि सुसमाचारमि खा खेम्मेॽसिॽ येसुडे़ॽ कानिङ आग्या पिटे़। 43 अगमबक्ताजि चोबे़ॽनोॽ खोमि टुम्बेॽ लुबॽआ ले़टे़। येसुबेॽ बिस्वास ले़ःॽखुबाजि चोबे़ॽ पापबाङ आम्लाङ चुप्मिन्डुजे लुमे खा खोजिडे़ॽ याक्लोनोॽ इःबॽआ ले़टा।” अयहुदि जातिजिडे़ॽ पबित्रा होङ्निवा चुप्पॽआ 44 पत्रुसडे़ॽ इघा खा इःमे़ॽनिङ्सिमाबेॽ खेम्खुबाजि चोपपेॽ पबित्रा होङ्निवा लेस्सा। 45 अयहुदि जातिजिडे़ॽ पबित्रा होङ्निवामि बरदान चुप्पॽआ खाङ्नुङ पत्रुसनुङ योप्पाबाङ सोरि आप्खुबा यहुदि बिस्वासिजिसो खरि मिनामि। 46 इन्ढोङ्होङ माहा याॽमिजिडे़ॽ हाइखा खाप्लाबेॽ यामुबॽआनुङ निवाहाङ्मि ओहाङ ले़ःॽपॽआ माहाजिडे़ॽ खेप्सुजि। मोबा पत्रुसडे़ॽ माहाजि लुसुजि, 47 “इघा याॽमिजिडे़ॽसो कानिङे़ए़डोक्नोॽ पबित्रा होङ्निवा चुप्मिटुजे। हागो इघाजि बप्तिस्मा लामाबाङ असे़ॽ से़क्हेन्डुजे ?” 48 मोडोगे़ॽ पत्रुसडे़ॽ माहाजि येसु खिरिस्टमि निङ्बेॽ बप्तिस्मा पिमे आग्या पिसुजि। मोबा ए़क्साङ माहाजिडे़ॽ हागोसो पत्रुस इक याक नियाक कानिङ्नुङ्नोॽ पेने लुनुङ बिन्ति ले़टुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.