३ युहन्ना 1 - याम्फु1 के़ॽ नम्नम ले़ःॽपॽआ लङ्गाम गायस, इगो पत्रा का मन्डलिबेॽए एल्डरडे़ॽ साप्मे़ॽनिङ्सिन्ने़। हे़न के़ॽ चाइबमा नम्नम ले़ःॽए़टुङे। 2 होउ निसा, हे़ने़हा चोप खा नुबा लिरो लुनुङ के़ॽ पारथना ले़नुङ। हे़ने़ए़ होङ्निवा चइबानोॽ निरोगि ले़टिडोक्नोॽ हे़ने़ए़ हिङासो निरोगि लिरो लुनुङ के़ॽ पारथना ले़नुङे। 3 बेॽलो जना निसाजि काबेॽ लेन्नुङ हे़ने़ॽ चाइबमा खामि आदर ले़न्डुए लुमे खा का खेम्मेॽटामि। हे़ने़ए़ टुम्बेॽहा नुबा खा खेम्नुङ का बेॽलो साप्थाक्सिङ, के़ॽ लेनुङे़ चाइबमा खाडोक्नोॽ हे़ने़ए़ हिङ्मवा टुये। 4 के़हा पसाजि चाइबमा मरामबेॽ सानिङ राम्इम्मे लुमे खा खेम्डोक्माबाङ हाइखा बेॽए हाङ्हाङ काङ्मि लागि इमाङ्सो माॽआये। 5 काङ्मि निसा, हे़न भरोसा ले़ःॽहेमारोमा लिनुङ हे़ने़ॽ ले़ःपॽआ योम्बोक चाहिँ चोप बिस्वासि निसाजिमि लागि ले़टु, मोसो हे़ने़ॽ लेनोॽ मे़लेबॽआ याॽमिजिमि लागि ले़टु। 6 खोजिडे़ॽ मन्डलिमि पोम्बेॽ येःप्नुङ हे़ने़ॽ याॽमिजि ले़ःॽपॽआ नम्नममि साक्छि पिटुजे। निवाहाङ्डे़ॽ नेन्जामारोहा लिनुङ खोजि हाइको ठाउँबेॽ खे़ॽमामि लागि नुरोॽ बन्दोबस्तो ले़ःॽपेॽटाजे। 7 इन्ढोङ्होङ अक्खाजि परभुमि योम्बोक ले़ःॽमामि लागि राम्बोॽइटामे, खोजिडे़ॽ बिस्वास मे़ले़ःॽखुबाजिबाङ इमाङ्सो मे़लारेॽ लेङ्इटामे। 8 मोडोगे़ॽ इडोक्हा याॽमिजिमि सेवानुङ सहायता ले़ःॽमा खे़म्मे, मोडोॽ ले़ःॽमाहोङ कानिङ्सो चाइबमा खामि लागि खोजिनुङ सोरि राम्खुबा लिहेन्डिए। 9 के़ॽ मन्डलिमि लागि इक्को निच्चि खा साप्पॽआ ले़टे़। तर हे़निङ्मि रुम्बेॽ बेॽए रे़ङ्घुबा डियोतिरिफसडे़ॽ के़हा खा खेप्सुनिबा। 10 मोडोगे़ॽ का इन्डोक्पेॽ आक्कोबेॽ लेङ्इङे़, मोडोक्पेॽ खोसे़ॽ ले़ःॽमे़ॽनिङ्सिबॽआ खामि टुम्बेॽ इःनुङ्हा। खोसे़ॽ कानिङ्मि बिरोधबेॽ मङे़हा खा इःन्डुहा, मोडोक्रेॽ ने़ॽनि खो चाबाङ निसाजि स्वागत ले़ःॽमा मिन्निबा, स्वागत ले़ःॽमा योक्खुबाजिसो ले़ःॽमेॽटुजिनिबा, मोबा स्वागत ले़ःॽमा योक्खुबाजि मन्डलिबाङ यिक्सेन्डुजे। 11 के़ए़ निसा, मङे़हा योम्बोक असाबाङ्सो ए़ॽचिम्मे़, तर भलाइमि योम्बोकरेॽ चिम्मे़। भलाइ ले़ःॽखुबा निवाहाङ्बाङ्ए ले़ये, मङे़हा योम्बोक ले़ःॽखुबाडे़ॽ निवाहाङ लेनोॽ लेसुनिबा। 12 डेमेतिरियसमि गो चोबे़ॽनोॽ नुबा साक्छि पिन्डुजे, मोबा चाइबमा खाडे़ॽसो साक्छि पिन्डुए। कानिङे़ॽसो इगो साक्छि पिन्डुङ्मा। हे़ने़ॽसो लेन्डुए कानिङ्मि साक्छि चाइबमा ले़ये। 13 के़ॽ लुमाहा खागो बेॽलोनोॽ टुहा, तर इगो पत्राबाङ माहा खा साप्मा मे़मिॽटुङ। 14 हे़न्नुङ चुप्मे बेॽलो आसा ले़ए़टुङे मोडोक्पेॽ सोरि पेन्नुङ इघा चोप खा इःजामा। 15 हे़ने़ए़ हिङ्मवाबेॽ सान्ति लिरो। इगोबेॽहा चोप लङ्गामजिबाङ हे़न सेवायो लुटामे। आक्कोबेॽहा चोप लङ्गामजि खोजिमि निङ लासाङ काङ्मि सेवा खेम्मेॽटाजेओ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.