२ तिमोथि 4 - याम्फुयाॽमिजि सुसमाचार खेम्मे़ॽमे जिम्मा 1 निवाहाङ्मि पोम्बेॽ मोबा सिघे़ॽपॽआजिनुङ हिङ्रिकजिमि न्याय ले़ःॽसिॽ लेङ्खुबा खिरिस्ट येसुमि पोम्बेॽ मोबा खिरिस्ट लेङ्इये खानुङ खोमि राज्य निवाबेॽ मिॽसाङ के़ॽ हे़न इडोॽ आग्या ले़न्ने़, 2 बचन परचार ले़टे, मोमि लागि सानिङ्नोॽ टाङ्बा पोरोक्युक्से, अरति पिसाजे, वोबाजे, हौसला पिसाजे, हुङ्हेमे बोल पिमे खानुङ सिक्छे पिमे खा सानिङ्नोॽ नुरोॽ ले़टे। 3 इन्ढोङ्होङ इडोक्मा याकसो लेङ्इये, मोडोक्पेॽ याॽमिजिडे़ॽ चाइबमा सिक्छे खेम्नोॽ खेप्सुजिने। माहाजि टाङ्बे़ॽ नेन्जाबॽआ खारेॽनोॽ खेम्मा मिङ्इम्मे मोबा टाङ्बे़ॽ नेन्जाबॽआ सिक्छे इःॽखुबाजि बेॽलो याॽमिजि सुम्इन्डुजे। 4 माहाजिडे़ॽ चाइबमा खा खेम्मा मिॽटुजिने तर योम्बोक मे़ॽनिङ्हा पारलेम चाहिँ खेम्मा मिॽइन्डुजे। 5 तर आम्मि निवा अधिनबेॽ युक्से। खेः आक्से, परचारमि योम्बोक ले़टे, मोबा हे़ने़ए़ सेवामि योम्बोक नुरोॽ पुरा ले़टे। 6 इन्ढोङ्होङ कागो बलि लिसिॽ पोरोक्इटिङे। का बिदा लिमे बेला लेम्बेटे़। 7 के़ॽ काङ्मि ङे नुरोॽ ले़ःॽसेटुङे। के़ए़ पिम्मे योम्बोक येॽपेटुङेनुङ काङ्मि बिस्वास हिङ्रिकनोॽ युङ्इटुङे। 8 हागोगो के़ॽ निवाहाङ्मि पोम्बेॽ ले़ःॽपॽआ नुबा योम्बोकमि धारमिक मुकुट चुप्मे बेला लेङ्इटे़। मो मुकुट न्याय ले़ःॽखुबा परभुडे़ॽ नुबा बेलाबेॽ का पिये, इगो मुकुट कारेॽनोॽ ने़ॽनि, खोमि रामबेॽ नुरोॽ राम्साङ खोमि राम खाङ्खुबा धरमि याॽमिजि चोपनोॽ खोसे़ॽ पिन्डुजे। 9 हेसुहोङ का चुप्सिॽ चान्डो आबे। 10 डेमासडे़ॽ इगो मक्खाम्डेम नम्नम मिॽइन्डुए, का याःॽयानुङ खो थेस्लोनिकिबेॽ खे़ॽए़टे़। मोबा केरेसेन्स गलातियाबेॽ खे़ॽए़टे़। तितस चाहिँ दलमतियाबेॽ खे़ॽए़टे़। 11 लुकारेॽनोॽ कानुङ टुये। हे़न आप्माबेॽ मरकुस हाम्बेॽ टुउहोङ्सो योक्नुङ सोरि चिक्आप्टे, इन्ढोङ्होङ खोसे़ॽ का चोप योम्बोक ले़ःॽमाराप्मिये। 12 तर तुखिकस चाहिँ एफिससबेॽ के़ॽ पाङ्इटुङे। 13 तोरोआसबेॽ कारपसनुङ के़ॽ याःॽयाबॽआ ओप्ताङ्नुङ नेॽचिरा, मोबाङ्सो चोप्पाङ बेॽए खा चाहिँ साउकमि पत्रा चाहिँ हे़न आप्माबेॽ लाआप्मे। 14 चे़क्चि उप्खुबा अलेक्जेन्डरडे़ॽ का सारोनोॽ चुङ्जासिङ। परभुडे़ॽ खोसे़ॽ ले़ःॽपॽआ योम्बोकमि इनाम खो पिन्डुए। 15 मोडोगे़ॽ आक्कोनुङ हे़नसो होसियार ले़टे, इन्ढोङ्होङ आक्कोसे़ॽ कानिङे़ॽ ले़ःॽपॽआ परचारमि सारोनोॽ बिरोध ले़ए़टुए। 16 तर का याक्लोएखेॽ मुद्दा सिॽमाबेॽ असासो के़ए़ पक्छेबेॽ यामुघुबाजि माडामि। चोबे़ॽ का याःॽयासामि। इगो खामि आप्टिक खोजि असासोक्पेॽसो मे़न्सिॽलो। 17 तर परभु काङ्मि पक्छेबेॽ येःप्पिॽटा। मोबा खोमि बचन चोप हाइखा जातिजि खेम्मेॽमामि लागि का बोल पिसिङ। इडोॽ खोसे़ॽ का किबामि याबुकबाङ जोगा ले़टिङ। 18 परभुडे़ॽ का चोप मङे़हा खाबाङ जोगा ले़टिङ। इडोॽ खोसे़ॽनोॽ का खोमि थाङ्सिरिमि राज्यबेॽ लाघे़ङे। खोमि सानिङ्नोॽ महिमा लिरो। आमेन। 19 पिरिस्किला, अकिलासनुङ ओनेसिफरसमि खिमबेॽहा चोप याॽमिजि के़ए़ सेवायो लुबेॽमे। 20 इरास्तस कोरिन्थिबेॽनोॽ टुयागा। तोरोफिमस टुक्पॽआसे़ॽ मिलेटसबेॽनोॽ याःॽयासुङ। 21 नानि हे़न हिउँदो लेम्मा याक्लोनोॽ भरसक आप्मामि बोल ले़ःॽमे। युबुलस, पुडेस, लिनस, क्लौडियसनुङ इगोबेॽहा चोप निसाजिडे़ॽ हे़न सेवायो लुटामे। 22 हे़ने़ए़ होङ्निवानुङ परभु सानिङ टुरो। हे़निङ चोपनुङ निवाहाङ्मि अनुग्रहा टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.