२ तिमोथि 3 - याम्फुए़क्साङ्ए याक 1 तर इगो खा लेयुक्से, ए़क्साङ्ए याकपेॽ किस्सिमारोहा खेःमि याक लेङ्इहा यो। 2 इन्ढोङ्होङ मोडोक्पेॽहा याॽमिजि टाङ्बारेॽनोॽ नम्नम ले़ःॽखुबा, याङ्मि बेॽलो लोभ ले़ःॽखुबा, काङायोङ्बा, लुबॽआ खा मे़ङ्खेम्खुबा, हाइखाजि बेजेत ले़ःॽखुबा, पाबा मामामि खा मे़ङ्खेम्खुबा, बैगुनि, असुद्ध, 3 असासो नम्नम मे़ले़ःॽखुबाजि, आम्लाङ मे़म्पिघुबाजि, याॽमिजिमि मङे़हा खा खिडिखुबाजि, मङे़हा चालनुङ्हाजि, दुस्टाजिनुङ नुबा खा मे़नेन्जाखुजि लिम्मे, टाङ्बा अधिनबेॽ मे़युङ्हेघुबा ले़म्मे। 4 माहाजिडे़ॽ हाइखा याॽमिजि फेल्लाम (धोका) पिन्डुजे, इमाङ्गो इमाङ ले़म्मेनुङ बेॽए रे़ङ्इम्मे, मोबा निवाहाङ्बाङ्सो बेॽलो सुख बिलास चाहिँ नेन्जोन्डुजे। 5 माहाजि निवाहाङ्मि याॽमिजि कामानिम्मे तर खोमि सक्तिबेॽ चाहिँ बिस्वास ले़टुजिने। इडोक्हा याॽमिजिबाङ हे़न ओःनोॽ पेम्मे। 6 इन्ढोङ्होङ माहाजिबेॽ इन्डोक जनाडे़ॽ चाहिँ खिम-खिमबेॽ खे़ॽनुङ पाप ले़ःॽखुबानुङ मङे़हा योम्बोकमि अधिनबेॽ सिप्पॽआ मेॽनामिॽचि टाङ्बामि अधिनबेॽ युङ्इन्डुजे। 7 माहा मेॽनामिॽचि चिम्मागो सानिङ्नोॽ चिङ्इम्मे तर चाइबमा खा चाहिँ इन्डोक्पेॽसो लेसुजिने। 8 यान्नेसनुङ याम्ब्रेसडे़ॽ मोसामि बिरोध ले़ःॽपॽआडोक्नोॽ इघा याॽमिजिडे़ॽसो चाइबमा खामि बिरोध ले़न्डुजे। इघा याॽमिजिमि निवानोॽ नासि लिबेटे़नुङ चाइबमा बिस्वास काप्टुजिने। 9 तर यान्नेसनुङ याम्ब्रेसडोॽ इघा याॽमिजिसो बेॽलो याकठोक टुडुङ्घे़ॽमिने इन्ढोङ्होङ इघाजिमि उम्बरिङ खा चोबे़ॽ लेडोक्इन्डुजे। पावलडे़ॽ तिमोथि अरति पिबॽआ 10 तर के़ॽ हे़न इःॽपॽआ सिक्छे नुरोॽ लेन्डुहा, के़हा बानि, के़ए़ हिङ्मवामि लक्छे, के़ए़ बिस्वास, काबेॽ टुये खेः आङ्मे बोल, के़ए़ नम्नम, काबेॽ टुये हुङ्हेमे बोल हे़ने़ॽ लेन्डुए। 11 एन्टिओखिया, आइकोनियननुङ लुस्त्राबेॽ के़ॽ बेॽलो दुःखनुङ चुङ्जामा खेः आक्सुङ माहा चोप हे़ने़ॽ नुरोॽ लेन्डुहा। तर माहा चोप खेःबाङ परभुडे़ॽनोॽ का छुटबा ले़टा। 12 खिरिस्ट येसुबेॽ बिस्वास ले़ःॽनुङ भक्तिमि हिङ्मवा हिङ्खुबाजिबेॽ दुःखनुङ चुङ्जामा खेः लेङ्इहा। 13 तर दुस्टाजिनुङ हाइखाजि रेम्जाखुबाजि चाहिँ, हाइखाजिडे़ॽ रेम्इन्डुजे। माहाजि मङे़हाबाङ छना बेॽलो मङे़हा लिम्मे। 14 तर हे़न चाहिँ टाङ्बे़ॽ आयुरो चिम्बॽआ खानुङ बिस्वास ले़ःॽपॽआ चाइबमा खाबेॽ सानिङ्नोॽ निवा टिसे। हे़ने़ॽ लेन्डुहा, माहा खा असा असाबाङ हे़ने़ॽ चिङ्इटुहा। 15 हे़ने़ॽ पिच्छाबाङ्नोॽ धारमिक नेॽचिराबेॽहा खा नुरोॽ लेन्डुहा। माहा खाडे़ॽ हे़न येसु खिरिस्टबेॽ टुये बिस्वास ले़ःॽनुङ चुप्मिये मुक्तिमि टुम्बेॽ लेमे निवा पिये। 16 निवाहाङ्मि होङ्निवामि सक्तिबाङ्ए निवाडे़ॽ इगो धारमिक नेॽचिरा साप्पॽआ ले़ये। इगो याॽमिजि सिक्छे पिमामि, अरति पिमामि, मङे़हा याॽमिजि नुबा टोङ्मामिनुङ धरमि हिङ्मवा इन्डोक हिङ्मे लुमे खा इःॽमामि लागि नुबा ले़ये। 17 निवाहाङ्मि याॽमिजिडे़ॽ चोप नुबा योम्बोक ले़ःॽहेसुजिरो लुनुङ्नोॽ धारमिक नेॽचिरा पिबॽआ ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.