२ तिमोथि 2 - याम्फुयेसु खिरिस्टडे़ॽ नेन्जाबॽआ तिरिङ्गा 1 हागो तिमोथि के़ए़न्नोॽ पसाडोॽमा हे़न, खिरिस्ट येसुडे़ॽ पिबॽआ अनुग्रहाडे़ॽ बोलियो लिसे। 2 बेॽलो साक्छि पिघुबा याॽमिजिमि रुम्बेॽ हे़ने़ॽ काबाङ चिम्बॽआ सिक्छे, नुरोॽ इःॽलेघुबा हाइखा बिस्वासि याॽमिजिमि जिम्माबेॽ पिसाजे। 3 येसु खिरिस्टमि नुबा तिरिङ्गाडोॽ दुःख आङ्सिॽ कानिङ्नुङ सोरि पोरोगे। 4 तिरिङ्गा लिबॽआ याॽमिडे़ॽ हाइखा योम्बोक्पेॽ फोसिघे़ॽमा फे़न्निबा। खोसे़ॽको खोमि एप्पा तिरिङ्गा साप्थाङ्मेॽमा बोल ले़ःॽमा खे़ये। 5 खेल मुमाबेॽ खेलमि नियमडे़ॽ लुडिडोॽ मुमाहोङ्रेॽ इनाम चुप्मिये। 6 होप्तिॽवा ठे़ःॽसाङ बालि टिघुबे़ॽनोॽ, मोमि याक्लोए अन्न चुप्मा खे़ये। 7 के़ॽ लुबॽआ खा नुरोॽ मिडे, इन्ढोङ्होङ परभुडे़ॽनोॽ हे़न इघा चोप खा लेहेमे निवा पिये। 8 येसु खिरिस्ट हाङ्बा दाउद बङ्सबेॽए ले़टा, खो सिघे़ॽपॽआबाङ हिङ्बोक्पॽआ लेसानुमे। के़ॽ परचार ले़ःॽपॽआ सुसमाचार इगोनोॽ ले़ये। 9 मो सुसमाचार खेम्मेॽपॽआसे़ॽ के़ॽ इगो खेः आङ्मे़ॽनिङ्सिनुङे। आक्टोक्रेॽ ने़ॽनि, अपराधिडोॽ चे़क्चिमि कोङ्डे़ॽ हिःक्नुङ से़क्सिघे़टिङे। तर निवाहाङ्मि सुसमाचार चाहिँ से़क्सिघे़ॽनिबा। 10 मोडोगे़ॽ निवाहाङ्डे़ॽ से़म्बॽआ याॽमिजिडे़ॽ खिरिस्ट येसुबेॽ टुये इन्डोक्पेॽसो रुक्खे़ॽनिबा महिमानुङ्मा मुक्ति चुप्टुजिरो लुनुङ के़ॽ इघा दुःखनुङ खेः आङ्मे़ॽनिङ्नुङे। 11 इगो चाइबमा खा ले़ये, कानिङ खिरिस्टनुङ्नोॽ सिघे़न्डिङ्माहोङ, खोनुङ्नोॽ हिङ्बोक्इन्डिङ्मा। 12 कानिङे़ॽ खोसे़ॽडोक्नोॽ दुःख आक्सुङ्माहोङ, खोमि राज्य लेम्मे याकपेॽ खोनुङ्नोॽ राज्यसो ले़टोक्इन्डुङ्मा। कानिङे़ॽ खो इन्कार ले़ःॽटुङ्माहोङ, खोसे़ॽसो कानिङ इन्कार ले़ये। 13 कानिङ अबिस्वासि ले़न्डिङ्माहोङ्सो, खो चाहिँ बिस्वास ले़ःॽमारोमा ले़ये, इन्ढोङ्होङ खोसे़ॽ खोमदाङ्बा इन्कार ले़ःॽहेसुनिबा। 14 इगो खा हे़ने़ॽ मन्डलिबेॽहा याॽमिजि नुरोॽ लुबेॽटाजे। खोजि इक्को इक्को खाबेॽ ए़ॽखिमिरो लुनुङ, निवाहाङ्मि पोम्बेॽनोॽ लुसाजे। खिमवानुङ काक्मवाडे़ॽ इमाङ्सो नुबा लिनिबा तर इगो खाडे़ॽको खेम्खुबा याॽमिजिरेॽ फाङ्सिघे़म्मे। 15 हे़न ङेम्मा सिॽनिबा पाप्निबानुङ निवाहाङ्मि बचन नुरोॽ इःॽखुबा योम्बोकदाङ्बा लिसे, हेरो निवाहाङ्मि पोम्बेॽ नेन्जारोमा लिसे। 16 भक्ति मे़ॽनिङ्हा उम्बरिङ, योम्बोक मे़ॽनिङ्हा खाबाङ ओःनोॽ पेने। इन्ढोङ्होङ इडोक्हा खाडे़ॽ याॽमिजि छना बेॽलो अधरमि टोङ्इये। 17 इडोक्हा खा इन्डोक्पेॽसो नुबुक्निहा हुवाडोॽ लिहा। हुमेनियसनुङ फिलेतसमि खासो मोडोक्मानोॽ ले़हा। 18 इघाजि चाइबमा रामबाङ ए़ङ्घे़टामे। सिघे़ॽपॽआबाङ हिङ्बोक्मे खा याक्लोनोॽ लिबेटे़ हागो ए़क्साङ इडोॽ लिनिबा लुनुङ इडोक्हा खा याॽमिजि इःॽनुङ इन्डोक याॽमिजि बिस्वासबाङ फाङ्बेटुजे। 19 तर निवाहाङ्मि सिक्छेमि चर हागोरोसो बोलियो ले़ःॽसिये। मोबेॽ इडोॽ साप्पॽआ ले़ये “परभुडे़ॽ खोमि याॽमिजि लेन्डुजे” मोबा “परभुबेॽ बिस्वास ले़ःॽखुबाजि चोप पापबाङ ओःनोॽ पेम्मा खे़ये।” 20 बेॽहा याॽमिजिमि खिमबेॽ सुनानुङ सिसे़ङ्मि खोङ्खोरियारेॽ ने़ॽनि, तर सिङ्बुमिनुङ आक्खामामि खोङ्सो युङ्इन्डुजे। माहा खोङ्खोरिया आढा बेॽहा योम्बोकमि लागि आढा चाहिँ ए़द्रिहा योम्बोकमि लागि युङ्इन्डुजे। 21 मोडोगे़ॽ चोप खालहा मङे़हा खाबाङ ओः पेन्नुङ टाङ्बा चोखो युक्सुहोङ, मो याॽमि बेॽए योम्बोकमि लागि युङ्बॽआ खोङ्खोरियाडोॽ लिये। मोबा खो खोमि मायोङ्बामि लागि चोखोनुङ योम्बोकमि लागि पोरोक्पॽआ नेन्जाये खोङ्खोरियाडोॽ लिये। 22 मोडोगे़ॽ वेन्जा टुमाबेॽ लेङ्इहा मङे़हा लालचाबाङ ओः पेने। मोबा चोखो निवाडे़ॽ परभुमि निङ लाघुबा धरमि याॽमिजिनुङ सोरि बिस्वास, नम्नमनुङ सान्तिबेॽ पेने। 23 तर योम्बोक मे़ॽनिङ्हा उम्बरिङ खाबाङ ओः पेने। हे़ने़ॽ लेन्डुए इडोक्हा खाडे़ॽको खिमावारेॽ पुइये। 24 परभुमि योम्बोक ले़ःॽखुबे़ॽ खिमा काक्मा फे़न्निबा। खोगो चोप याॽमिजिनुङ टोङ्जाघुबा, मोबा नुरोॽ इःॽलेघुबानुङ आङ्हेघुबा लिमा खे़ये। 25 खो टाङ्बामि बिरोधि याॽमिजि चानुये खाडे़ॽ चोप्हेखुबा लिमा खे़ये। मोडोक्होङ्रेॽ निवाहाङ्डे़ॽ खोजि पापि मरामबाङ टेआप्नुङ चाइबमा खा लेहेमे निवा पिन्डुजेन्डे, 26 मोबा माहाजिमि निवा लेङ्इयेनुङ सैतानमि यिम्माङ्बाङ लेॽखे़ॽहेम्मे। इन्ढोङ्होङ मो सैतानडे़ॽ मङे़हा योम्बोकपेॽ बेॽलो निङ्बाङ से़क्युङ्इटुजे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.