२ तिमोथि 1 - याम्फु1 खिरिस्ट येसुबेॽ टुये हिङ्मवामि हेन्ज्रुङ्मि टुम्बेॽ खेम्मेॽमामि निवाहाङ्डे़ॽ मिॽपॽआडोॽ परभु येसु खिरिस्टमि एप्पा चोङ्सा लिमा से़न्बॽआ का पावलबाङ, 2 के़ए़न्नोॽ पसाडोॽमा तिमोथि हे़न इगो पत्रा साप्मे़ॽनिङ्सिन्ने़। कानिङ्मि निवाहाङ पाबानुङ परभु येसु खिरिस्टडे़ॽ अनुग्रहा, किरपानुङ सान्ति हे़न पिरो। बिस्वासिलो लिमामि हौसला 3 के़ॽ काङ्मि नुबानुङ मङे़ॽमा लेघुबा निवाडे़ॽ सेवा ले़ःपॽआ निवाहाङ ओहाक पिनुङे़, याक्लो खो के़हा टुबालाबाजिडे़ॽ सेवा ले़टुजे। के़ॽ सानिङ्नोॽ के़ए़ पारथनाबेॽ हे़न मिॽइन्ने़। 4 तिमोथि हे़न हाःप्पॽआ मिॽमाबेॽ का सारोनोॽ हे़न्नुङ चुप्मा मिङ्इङे। चइबानोॽ हे़न्नुङ चुप्टोक्माहोङ का बेॽलो साप्थाङ्इङे। 5 हे़ने़ए़ मो चाइबमा बिस्वास मिॽइनुङे। मोडोक्मानोॽ चाइबमा बिस्वास याक्लो हे़ने़ए़ टुमा लोइसबेॽ, मोबा हे़ने़ए़ मामा युनिसबेॽसो टुसे़। मोबा के़ॽ लेनुङे़ मोडोक्मानोॽ चाइबमा बिस्वास हे़न्नुङ्सो टुये। 6 मोडोगे़ॽ हे़न लुन्ने़, के़ॽ हे़न सोक्पेॽ हुक युङ्नुङ पारथना ले़ःॽमाबेॽ निवाहाङ्डे़ॽ हे़न पिबॽआ बरदान हेरो योम्बोक्पेॽ टिसे। 7 इन्ढोङ्होङ निवाहाङ्डे़ॽ कानिङ किस्सिमे होङ्निवा पिबॽआ ने़ॽनि तर बोलनुङ नम्नमनुङ टाङ्बामि निवा अधिनबेॽ टिमे होङ्निवा पिटे़। 8 मोडोगे़ॽ कानिङ्मि परभु येसुमि टुम्बेॽ साक्छि पिमा, मोबा का खिरिस्टमि निङ्बेॽ तिरिङ्गा खिमबेॽ सिॽपॽआ खाबेॽ ए़ॽङेसिने तर हे़नसो सुसमाचार खेम्मेॽमामि लागि निवाहाङ्मि बोलबेॽ काडोॽ खेः आङ्सिॽ पोरोगे। 9 निवाहाङ्डे़ॽनोॽ कानिङ पापबाङ छुट्कारा ले़ःॽनुङ खोमि पबित्रा याॽमि लिमामि से़न्इटे़। कानिङे़ॽ नुबा योम्बोक ले़ःॽपॽआसे़ॽको ने़ॽनि तर खोमटाङ्बामि योजनानुङ अनुग्रहाडे़ॽ कानिङ पापबाङ छुट्कारा ले़टा। इगो अनुग्रहा याक्लोनोॽ येसु खिरिस्टबेॽ कानिङ पिबॽआ ले़टे़। 10 मो अनुग्रहा चाहिँ येसु खिरिस्ट लेन्नुङ ए़क्साङ खाङ्मुसा। खोसे़ॽ सिमवा हेजानुङ ए़स्सिमे हिङ्मवा सुसमाचारबाङ खाङ्मुसु। 11 निवाहाङ्डे़ॽ का इगो सुसमाचार परचार ले़ःॽखुबा, इक्को एप्पा चोङ्सानुङ इगो खा इःॽखुबा टोङ्इटिङे। 12 मोडोगे़ॽ इघा खामि लागि खेः आङ्मे़ॽनिङ्सिनुङे। तर का इघामि लागि खेः आङ्मा ङेसिङानि इन्ढोङ्होङ के़ॽ असासोक्पेॽ बिस्वास ले़ःॽए़टुङे मो के़ॽ नुरोॽ लेनुङे़। निवाहाङ्डे़ॽ का जिम्मा पिबॽआ योम्बोक खोसे़ॽनोॽ मो याकठोक जोगबा ले़ङे लुनुङ का ढुक्का ले़ङे। 13 येसु खिरिस्टबेॽ टुबॽआ बिस्वासनुङ नम्नमबेॽ हे़न के़ॽ पिबॽआ चइबाहा सिक्छे नुरोॽ पालना ले़ःॽनुङ नुबा नमुना लिसे। 14 हे़ने़ए़ जिम्माबेॽ पिबॽआ चाइबमा खा कानिङ्बेॽ पेङ्घुबा पबित्रा होङ्निवाबाङ जोगा ले़ःॽयुक्से। 15 एसियाबेॽ टुघुबा चोप याॽमिजि काबाङ कोघे़ॽपॽआ खागो हे़ने़ॽसो लेन्डुए। माहाजिबेॽ फुगेलसनुङ हरमोगेनससो ले़न्जे। 16 ओनेसिफरसमि खिमबेॽ परभुडे़ॽ नम्नावा ले़टुरो इन्ढोङ्होङ का तिरिङ्गा खिमबेॽ से़क्सिघे़ॽमाबेॽ का चुप्सिॽ लेम्मा खो मे़ङेसिडा, मोबा खोसे़ॽ का खेःबेॽ टुमाबेॽ बेॽलोखेॽ हौसला पिटे़। 17 खो रोमबेॽ लेम्मासोरोॽ धुइ धुइति योक्नुङ का चुप्सिॽ लेङ्आसा। 18 खिरिस्ट लेम्माबेॽ परभुडे़ॽ खो किरपा ले़ःॽरो। हे़ने़ॽ इगो खा नुरोक्नोॽ लेन्डुए, का एफिससबेॽ टुमाबेॽ खोसे़ॽ का बेॽलो सहायोग ले़टा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.