२ थेस्लोनिकि 3 - याम्फुपारथनामि लागि बिन्ति 1 चोप्पाङ ए़क्साङ, वावानिसानुङ नानुसाजि, हे़निङे़ॽ निवाहाङ्मि सुसमाचार सम्मान ले़टिडोॽ हाइखा चोप ठाउँबेॽ निवाहाङ्मि बचन फोप्पुक्नुङ चोप याॽमिजिडे़ॽ सम्मान ले़ःॽहेसुजिरो लुनुङ कानिङ्मि लागि पारथना ले़ःॽपेॽमा। 2 मोबा निवाहाङ्डे़ॽ मङे़हा निवानुङ्हा मोबा दुस्ट याॽमिजिबाङ कानिङ रच्छे ले़ःॽरो लुनुङ कानिङ्मि लागि पारथना ले़ःॽपेमाजे। इन्ढोङ्होङ चोप याॽमिजिडे़ॽ सुसमाचारबेॽ बिस्वास ले़टुजिनि। 3 तर परभु सानिङ्नोॽ बिस्वासनुङ्मा ले़ये। खोसे़ॽ हे़निङ बोलियो टोङ्इयेनुङ दुस्टाबाङ रच्छे ले़ये। 4 कानिङे़ॽ लुबॽआडोॽ हे़निङे़ॽ ले़ःॽमे़ॽनिङ्सिन्डानुमेनुङ ए़क्साङ्सो मोडोक्नोॽ ले़न्डानुमे लुनुङ परभुबेॽ भरोसा ले़ए़टुङ्मे़। 5 परभुडे़ॽ हे़निङ्मि निवा निवाहाङ्मि नम्नमनुङ खिरिस्टडे़ॽ हुङ्हेमे सक्ति पिरो। चोबे़ॽ योम्बोक ले़ःॽमानोॽ खे़ये 6 वावानिसानुङ नानुसाजि, परभु येसुमि निङ्बेॽ हे़निङ आग्या पिनिम्ने़। इघा कानिङे़ॽ पिबॽआ सिक्छे मे़ङ्खेम्खुबानुङ पाङ्सुखुबा याॽमिजिबाङ ओः पेनानिङे। 7 इन्ढोङ्होङ याक्लो हे़निङ्नुङ टुमाबेॽ कानिङे़ॽ ले़ःॽपॽआडोक्नोॽ ले़ःॽमा खे़ये लुमे खागो हे़निङे़ॽ नुरोॽ लेन्डानुमे। हे़निङ्नुङ टुमाबेॽ कानिङ मे़म्पाङ्सुरेॽ पेनिङ्मा। 8 याङ मे़म्फोङ्लेॽ कानिङे़ॽ असामि इमाङ्सो मे़न्चासुङ्मा। तर हे़निङ्बेॽ कानिङ कुमे भार मे़सिॽलो लुनुङ कानिङे़ॽ लेन्डा सेन्डा मे़लुरेॽ दुःखनुङ टाङ्बा पाप्मिहा थोकमि लागि योम्बोक ले़चासिङ्मा। 9 हे़निङ्नुङ कानिङे़ॽ सहायोग लामे अधिकार माॽआडे़न्से़ॽ ने़ॽनि, तर कानिङे़ॽ ले़ःॽपॽआ खाङ्नुङ हे़निङे़ॽ चिनानुमे लुनुङ नमुनामि लागि मोडोॽ ले़टुङ्मा। 10 योम्बोक मे़ले़ःॽखुबा याॽमिडे़ॽ चामासो मे़न्चोसुजिरो लुनुङ कानिङे़ॽ हे़निङ्नुङ टुमाबेॽनोॽ लुबेॽनिम्ने़। 11 कानिङे़ॽ खेम्इटुङ्मे हे़निङ्मि रुम्बेॽ पाङ्सुखुबाजि टुम्मिरो। मोबा माहाजि, खोजि ताङ्बा चाहिँ इमाङ योम्बोकसो ले़ःॽमिने तर हाइखाजिमि योम्बोकनुङ खाबेॽ चेन्दुबा रे़ङ्इम्मिरो। 12 हागो कानिङे़ॽ इडोक्हा याॽमिजि परभु येसु खिरिस्टमि निङ्बेॽ आग्यानुङ अरति पिन्डुङ्मे। माहाजिडे़ॽ योङ उःक्नुङ योम्बोक ले़टुजिरो मोबा टाङ्बामि हुगे़ॽनोॽ योम्बोक ले़ःॽनुङ चे़ॽपॽआ खा चानुङ हिङ्मिरो। 13 वावानिसानुङ नानुसाजि, भलाइमि योम्बोक ले़ःॽमामि हे़निङ इन्डोक्पेॽसो याःक्चघे़ॽमा फे़न्निबा। 14 कानिङे़ॽ इगो पत्राबेॽ साप्पॽआ खाडोॽ मे़ले़ःॽखुबा याॽमिजि नुरोॽ लेयुङ्मे़नुङ, माहाजिनुङ लङ्गाम ए़ले़ःॽमे खो खोमटाङ्बा ङेम्मा सिॽइये। 15 तर मोडोक्हा याॽमिजिसो सतुरडोॽको ए़ले़टानुमे, तर टाङ्बामि वावानिसानुङ नानुसाजिडोॽ नम्नमनुङ अरति पिसानुमे। बिदाइमि बेला 16 कानिङ्मि सान्तिमि परभुडे़ॽ सानिङ्नोॽ हे़निङ सान्ति पिरो। हे़निङ चोपनुङ सोरि परभु टुरो। 17 का पावलडे़ॽ सेवा मुसुङ्यो लुनुङ काङ्टाङ्बामि हुगे़ॽनोॽ इगो पत्राबेॽ साप्मे़ॽनिङ्सिनुङे। के़हा चोप पत्रामि चिनारि इगोनोॽ ले़ये। मोडोक्नोॽ के़ॽ साप्मिनुङ्हा। 18 कानिङ्मि परभु येसु खिरिस्टमि अनुग्रहा हे़निङ चोपनुङ टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.