२ थेस्लोनिकि 2 - याम्फुपरभुमि याक 1 वावानिसानुङ नानुसाजि, कानिङ्मि परभु येसु फेरि लेङ्इये लुमे खामि टुम्बेॽनुङ खो चुप्सिॽ कानिङ चोप सुम्इन्डिङ्मा लुमे खामि टुम्बेॽ हे़निङ बिन्ति ले़निम्ने़। 2 असे़ॽसो अगमबानि अथबा बचन अथबा पत्राबेॽ कानिङ्मि परभु लेम्मे याक लेङ्इटे़ लुमिहोङ, हे़निङे़ॽ माहा खा कानिङ्बाङ लेम्बॽआ खा मिॽनुङ सुरता ए़ले़टानिङे अथबा हे़निङ ए़ॽकिस्सिडानिङे। 3 तर हे़निङ असे़ॽसो मे़रेम्हेमिरो। इन्ढोङ्होङ निवाहाङ्मि बिरोधबेॽ बेॽए हुलदुङ्गा मे़लिरेॽलो, मोबा ब्यबस्थामि खा मे़ङ्खेम्खुबा, बेॽए नासबेॽ सिॽखुबा याॽमि मे़लेङ्रो मो याक लेन्निबा। 4 मोसे़ॽ आयुरो याॽमिजिडे़ॽ पुजा ले़ःॽपॽआनुङ निवाहाङ लुनुङ मिॽपॽआ चोप थोकमि बिरोध ले़न्डुए। मोसे़ॽको मन्दिरबेॽ पेन्नुङ कानोॽ निवाहाङ ले़ङे लुन्डुए। 5 हे़निङ्नुङ सोरि टुमाबेॽसो इघा चोप खागो के़ॽ हे़निङ लुबॽआ ले़टे़, ने़ॽनि ? 6 मोमि बेला लेम्माबेॽ मो दुस्टा खाङ्मुये, हागोनोॽ इगो खा ए़ॽलिमेॽमामि इमाङेॽ से़क्युङ्बॽआ ले़ये लुमे खागो हे़निङे़ॽ लेन्डानुमे। 7 मो ब्यबस्था पालना मे़ले़ःॽखुबामि सक्तिडे़ॽ याक्लोनोॽ होङ्सिॽयु होङ्सिॽयु योम्बोक तरिक्पेटुए। तर मो से़क्युङ्रो मोमि सक्ति पाखे़ॽयु खाङ्मुनिहा। 8 मोबा ए़क्साङ मो ब्यबस्था पालना मे़ले़ःॽखु खाङ्मुये। मोबा परभु येसुमि बचनडे़ॽ नासि ले़न्डुए मोबा खो लेम्माबेॽ उज्यालो जोतिमि सक्तिडे़ॽ मो नासि लेन्डुए। 9 मो ब्यबस्था पालना मे़ले़ःॽखुबाडे़ॽ सैतानमि सक्तिनुङ याॽमिजि रेम्एम्मामि बेॽलो खालहा रेम्सिङ चिङ्गा खाङ्मुन्डुहा, मोबा खरि खरिहा योम्बोक ले़न्डुहा। 10 नासि लिघुबा चोप याॽमिजि मोसे़ॽ खोमि दुस्ट चालडे़ॽ रेम्इन्डुजे, इन्ढोङ्होङ माहाजिडे़ॽ मुक्ति पिघुबा चाइबमा खा मे़नेन्जोसुजि। 11 मोडोगे़ॽ माहा याॽमिजिडे़ॽ रेम्सिङ खाबेॽनोॽ बिस्वास ले़टुजिरो लुनुङ निवाहाङ्डे़ॽ माहाजिबेॽ रेम्सिङ सक्ति पाङ्इन्डुए। 12 माहाजिडे़ॽ चाइबमा खाबेॽ बिस्वास मे़ले़टुजि मोबा मङे़हा दुस्ट योम्बोक ले़ःॽमा नेन्जाबॽआसे़ॽ माहाजिडे़ॽ दन्डा चुप्टुजिरो लुनुङ निवाहाङ्डे़ॽ आक्टोॽ ले़टु। बिस्वासबेॽ बोलियो लिमे खा 13 परभुडे़ॽ नम्नम ले़ःॽपॽआ वावानिसानुङ नानुसाजि, हे़निङ्मि लागि कानिङे़ॽ सानिङ्नोॽ निवाहाङ ओहाक पिमानोॽ खे़ये, इन्ढोङ्होङ याक्लोएम्बाङ्नोॽ पबित्रा होङ्निवे़ॽ चोखो टोङ्बॽआ योम्बोकबाङ मोबा चाइबमा खामि बिस्वासबाङ हिङ्मामि लागि निवाहाङ्डे़ॽ हे़निङ से़ङ्इटे़। 14 इगो खामि लागिनोॽ कानिङे़ॽ खेम्मेॽपॽआ सुसमाचारबाङ कानिङ्मि परभु येसु खिरिस्टडे़ॽ चुप्पॽआ महिमा चुप्मामि लागि खोसे़ॽ हे़निङ के़ए़टे़। 15 मोडोगे़ॽ वावानिसानुङ नानुसाजि, बिस्वासबेॽ बोलियो लिनुङ पेनानिङे, मोबा कानिङे़ॽ हे़निङ इःॽपॽआ सिक्छेहोङ्सो अथबा कानिङ्मि पत्राबाङ लुबॽआ खाबाङ्होङ्सो हे़निङे़ॽ कानिङ्बाङ चुप्पॽआ सिक्छेडे़ॽ लुडिडोॽ नुरोॽ ले़टानुमे। 16 कानिङ्मि परभु येसु खिरिस्टडे़ॽनुङ पाबा निवाहाङ्डे़ॽ कानिङ नम्नम ले़टा मोबा खोमि अनुग्रहाबाङ इन्डोक्पेॽसो रुक्खे़ॽनिहा आसानुङ हौसला पिसा। 17 खोजिडे़ॽनोॽ चोप नुबा योम्बोकनुङ खाबेॽ साहसनुङ सक्ति हे़निङ पिरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.