२ थेस्लोनिकि 1 - याम्फु1 कानिङ्मि निवाहाङ पाबानुङ परभु येसु खिरिस्टमि थेस्लोनिकिबेॽ टुघुबा मन्डलिबेॽहा याॽमिजि कानिङ पावल, सिलासनुङ तिमोथिडे़ॽ इगो पत्रा साप्मे़ॽनिङ्सिन्डुङ्मे। 2 निवाहाङ पाबानुङ परभु येसु खिरिस्टडे़ॽ हे़निङ अनुग्रहानुङ सान्ति पिमिरो। खिरिस्टडे़ॽ ले़ःॽमे न्याय 3 वावानिसाजि, हे़निङ बिस्वासबेॽ छना पक्का लिमे़ॽनिङ्सिन्डानिङे। नम्नम ले़ःॽखुसे़ॽचुमे खाबेॽसो हे़निङ नुबा ले़ःन्डानिङे। मोडोगे़ॽ हे़निङ्मि लागि सानिङ्नोॽ निवाहाङ ओहाक पिमानोॽ खे़ये। 4 मोडोक्नोॽ हे़निङे़ॽ चुङ्जामा खेःनुङ दुःख आङ्साङ्सो बिस्वासनुङ भरोसाबेॽ बोलियो ले़न्डानिङे इगोमि टुम्बेॽ कानिङे़ॽ हाइखा मन्डलिबेॽसो साप्थाङ्मानुङ लुहे़न्डुङ्मा। 5 इघा चोप खा निवाहाङ्मि राज्यमि लागि हे़निङ योग्य टोङ्घुबा मोबा ठिक न्याय ले़ःॽखुबा ले़ये लुमे खामि टुम्बेॽ लेघुबा खोनोॽ ले़ये। मोमि लागिनोॽ हे़निङे़ॽ खेःसो आङ्मे़ॽनिङ्सिन्डानुमे। 6 निवाहाङ न्याय ले़ःॽखुबा लियेसे़ॽ, खोसे़ॽ हे़निङ चुङ्जाखुबाजि दुःख पिन्डुजे। 7 हे़निङ दुःख आङ्घुबा मोबा कानिङ्सो खोसे़ॽ खेःबाङ छुट्कारा पिये। परभु येसुडे़ॽ इघा चोप योम्बोक खोमि सक्तिनुङ्हा थाङ्सिरि दुतजिनुङ लेम्मा यिडे़ॽ ले़न्डुहा। 8 मोबा निवाहाङ मे़लेघुबाजिनुङ कानिङ्मि परभु येसुमि सुसमाचार मे़ङ्खेम्खुबाजि खो मिमि राप्लवाबेॽ लेन्नुङ दन्डा पिन्डुजे। 9 माहाजि सानिङ्मि लागि नासि लिमे दन्डानुङ निवाहाङ्मि पोम्बाङ मोबा खोमि सक्तिनुङ्मा महिमाबाङ ओः लिम्मे। 10 इघा चोप खा परभु येसु लेम्मा यिडे़ॽ लिहा। मो यिडे़ॽ खोमि पबित्रा याॽमिजिनुङ खोबेॽ बिस्वास ले़ःॽखुबाजि चोप बिस्वासिजिबाङ ओहाङ्नुङ आदर चुप्मिन्डुए। मोडोक्पेॽ हे़निङ्सो मोबेॽ टुन्डानिङे इन्ढोङ्होङ हे़निङ कानिङे़ॽ परचार ले़ःॽपॽआ सुसमाचारबेॽ बिस्वास ले़टानुम। 11 मोडोगे़ॽ निवाहाङ्डे़ॽ हाम्बे हिङ्मवामि लागि हे़निङ के़ॽपॽआ ले़ये, मो हिङ्मवाबेॽ योग्य टोङ्मामिनुङ खोमि सक्तिडे़ॽ नुबा योम्बोक ले़ःॽमे निवा, मोबा बिस्वासमि योम्बोक पुरा ले़ःॽमाराप्लो लुनुङ कानिङ हे़निङ्मि लागि सानिङ्नोॽ पारथना ले़न्डिङ्मा। 12 मोडोॽ लिहोङ कानिङ्मि परभु येसुमि ओहाङ लिये। मोबा खोबाङ्सो हे़निङ्मि ओहाङ लिये, इन्ढोङ्होङ हे़निङे़ॽ निवाहाङ पाबानुङ परभु येसु खिरिस्टबाङ अनुग्रहा चुप्मिटानुमे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.