२ पत्रुस 3 - याम्फुपरभुडे़ॽ फेरि लेङ्इङे़ लुनुङ हे़न्ज्रुङ हे़म्बॽआ 1 लङ्गामजि, हे़निङ्मि लागि साप्पॽआ इगो के़ए़ हाइके पत्रा ले़ये। इघा निच्चिनोॽ पत्राबेॽ साप्पॽआ खाबाङ हे़निङ्मि निवा चोखो युङ्मे खाबेॽ हौसला पिमा योॽइटुङे। 2 याक्लो याक्लोहा अगमबक्ताजिडे़ॽ पिबॽआ सिक्छे, मोबा एप्पा चोङ्साजिडे़ॽ खेम्मेॽपॽआ कानिङ्मि परभु मुक्तिदाङ्बामि आग्या हे़निङे़ॽ मिॽयुक्सानुमे। 3 चोप्पाङ याक्लो हे़निङे़ॽ लेयाक्मे खा इडोक्मा ले़ये, ए़क्साङ्हा याकपेॽ टाङ्बा खुसि ले़ःॽखुबा याॽमिजि लेङ्इम्मे। माहाजिडे़ॽ हे़निङ सिःक्चाम्मे, 4 “इमा खिरिस्टडे़ॽ का लेङ्इङे़ लुबॽआ ने़ॽने ? इन्ढोङ्होङ कानिङ्मि टुबालाबाजि सिघडामि, तर मक्खाम्डेममि सिरिस्टि लिनुङ आयुरोसो मोडोक्नोॽ टुसिइ।” 5 माहाजिडे़ॽ लेजिङ लेजिङ्सो सिरिस्टिमि खा मे़लेडिडोॽ ले़म्मे। निवाहाङ्डे़ॽ खोमि बचनबाङ थाङ्सिरिनुङ मक्खाम्डेम टोक्सु। मक्खाम्डेम चाहिँ योङाबाङ टोक्सु मोबा योङाबाङ फागु। 6 याक्लोए मक्खाम्डेम योङाबेॽ हुम्सिघडा। 7 तर निवाहाङ्मि मोनोॽ बचनडे़ॽ आयुए मक्खाम्डेमनुङ नान्द्रुङ्मा मिबाङ नासि ले़ःॽमामि लागि, मोबा निवाहाङ्मि खाबेॽ बिस्वास मे़ले़ःॽखुबा याॽमिजि न्यायमि लागि हाम्युङ्बॽआ ले़ये। 8 तर के़हा लङ्गामजि, इगो खा लेयुक्सानुमे परभुमि लागि इक्याक हजार निङ्डोॽ लिये, हजार निङ इक्याकडोॽ लिये। 9 परभु निवाहाङ टाङ्बामि हेन्ज्रुङ पुरा ले़ःॽमामि टाम ले़ये लुनुङ मिॽहोङ्सो खोसे़ॽ टाम ले़टुनिबा। इन्ढोङ्होङ असासो ए़स्सिमिरो, तर चोप याॽमिजि पापबाङ टेमिरो मिॽनुङ परभुडे़ॽ हे़निङ हुङ्मे़ॽनिङ्सिये। 10 तर परभुमि याक गो खुसुबाङ लेन्डिडोॽ हाजोक्टोॽ लेङ्इये। मो याक नान्द्रुङ्मा चाहिँ बेॽए सेम्लानुङ मे़खे़ये, नान्द्रुङ्माबेॽहा टुहा साङ्गे, ला चोप मिबेॽ हिॽखे़हा। मक्खाम्डेमनुङ मोबेॽ टुहा चोप थोक हिॽखे़हा। 11 इघा चोप खा इडोॽ माङ्माङ वायिम्घे़ये लुमे लेनुङ हे़निङे़ॽ हिङ्मे हिङ्मवा पबित्रानुङ भक्तिनुङ्मा हिङ्मा खे़ये। 12 हे़निङ निवाहाङ लेङ्इये याक हुङ्माबेॽ इगो याक चान्डो लिरो लुनुङ ले़ःॽमा खे़ये योम्बोक ले़टानुमे। मो याक नान्द्रुङ्मा, मोबा मोबेॽ टुहा चोप हिॽखे़हानुङ साङ्गे, ला चोप कुहाङ रापबेॽ वाइम्घे़ये। 13 तर कानिङ चाहिँ निवाहाङ्डे़ॽ हेन्ज्रुङ हे़म्बॽआ चोङ थाङ्सिरिनुङ चोङ मक्खाम्डेममि राम खाङ्इन्डुङ्मे। मोबेॽ धारमिक खानुङ योम्बोकरेॽ टुहा। 14 मोडोगे़ॽ लङ्गामजि, हे़निङ इघा खा हुङ्घुबाजि ले़ःॽपॽआसे़ॽ, निवाहाङ्मि पोम्बेॽ हे़निङ आप्टिकनुङ पबित्रा लिनुङ, मोबा सान्तिबेॽ पेङ्घुबाजि लिमामि बोल ले़टानिङे। 15 परभुडे़ॽ हे़निङ पापबाङ हिङ्मेॽमामि खो इन्डोक धैरियनुङ्मा ले़ये, मो खा नुरोॽ मिडानुमे। कानिङ्मि निसा पावलडे़ॽसो खो निवाहाङ्डे़ॽ पिबॽआ निवाबाङ हे़निङ इघा खानोॽ साप्पॽआ ले़टा। 16 पावलडे़ॽ खोमि चोप पत्राबेॽ इडोक्हानोॽ खामि टुम्बेॽ साप्मिटुहा। माहा खाबेॽ इन्डोक खागो लेमा छॽइहा। इमाङ मे़लेघुबा मोबा इमाङ खामिसो टुङ्गो मे़ॽनिङ्हा याॽमिजिडे़ॽ इघा खाडे़ॽ लुमायोक्पॽआ खा टेडिघरिक इःन्डुजे। खोजिडे़ॽ धारमिक नेॽचिराडे़ॽ लुमायोक्पॽआ खासो मोडोक्नोॽ लुन्डुन्जे। मोडोॽ ले़ःॽमाबेॽ खोजि टाङ्बानोॽ नासि लिये रामबेॽ रुॽइम्मे। 17 तर के़हा लङ्गामजि, हे़निङे़ॽ इघा चोप खा लेबेटानुमे, मोडोगे़ॽ होसियार ले़टानिङे। मोडोॽ ले़ःॽमाहोङ मङे़हा निवानुङ्हा याॽमिजिमि रेम्सिङ खाबेॽ रेम्सिघडानिङ्नि मोबा टाङ्बे़ॽ सिक्पॽआ ठाउँबाङ काङ्खडानिङ्नि। 18 तर कानिङ्मि परभुनुङ मुक्तिदाङ्बा येसु खिरिस्टमि अनुग्रहानुङ निवाबेॽ छना बेॽलो लिघडानिङे। खोमि हागोनुङ सानिङ महिमा लिरो। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.