२ पत्रुस 2 - याम्फुमे़ॽनोक्हा सिक्छे इःॽखुबाजि 1 याक्लो इस्राएलि याॽमिजिमि रुम्बेॽ मे़ॽनोक्हा अगमबक्ताजि टुसामि, मोडोक्नोॽ हे़निङ्मि रुम्बेॽसो मे़ॽनोक्हा खा इःॽखुबाजि लेङ्इम्मे। माहाजिडे़ॽ हे़निङ्मि बिस्वास नासि ले़ःॽमामि मे़ॽनोक्हा सिक्छे पिम्मे, मोबा खोजि टाङ्बा मुक्ति पिघुबा परभुसो लेप्पेन्डुजे। मोडोगे़ॽ माहाजिडे़ॽ टाङ्बे़ॽनोॽ टाङ्बा नासि ले़न्डुजे। 2 माहाजिडे़ॽ ले़ःॽपॽआ चिक्चिमिॽमारोहा मङे़हा योम्बोक हाइखा बेॽलो याॽमिजिडे़ॽसो ले़न्डुजे, मोबा माहाजिमि योम्बोकडे़ॽ ले़ःॽमे़ॽ याॽमिजिडे़ॽ चाइबमा मराममि बिरोध ले़न्डुजे। 3 इडोक्हा मे़ॽनोक्हा सिक्छे इःॽखुबाजि लोभि ले़म्मे, माहाजिडे़ॽ माङ्माङ्हा पारलेन इःनुङ हे़निङ रेम्इम्मे। याक्लोनोॽ माहाजिमि न्याय लिबेटे़नुङ, माहाजि चइबानोॽ नासि लिम्मे। 4 निवाहाङ्डे़ॽ पाप ले़ःॽखुबा थाङ्सिरिदुतजिनोक्सो मे़लेडुजि। खोसे़ॽ माहाजि खेःलोकपेॽ वेएन्डुजि। माहाजि न्यायमि याकठोकमि लागि सेन्जुगुप्पेॽ से़क्युङ्इटुजे। 5 निवाहाङ्डे़ॽ याक्लोए मक्खाम्डेमसो मे़लेडु। निवाहाङ्मि खा मे़ङ्खेम्खुबा याॽमिजि चोप बेॽए वाडुमडे़ॽ नासि ले़टुजि। धारमिक खा परचार ले़ःॽखुबा नोआनुङ खोमि खिमबेॽहा याॽमिजिरेॽ हिक्सामि। 6 मोडोक्नोॽ निवाहाङ्डे़ॽ सदोमनुङ गमोरा लुमे सहरबेॽ पेङ्घुबा याॽमिजि न्याय ले़ःॽनुङ मिडे़ॽ हिॽनेसुजि। निवाहाङ्मि खा मे़ङ्खेम्खुबाजिमि बिजोग इन्डोक्मा लियेले़ लुमे खा लेमामि लागि इगो इक्को नमुना ले़ये। 7 निवाहाङ्डे़ॽ खोमि पोम्बेॽ धरमि लिनुङ हिङ्घुबा लोत चाहिँ जोगा ले़टु। खो पापि याॽमिजिमि चिक्चिमिॽमारोहा मङे़हा चाल चलन आङ्मे़ॽ सिजाघे़ॽपॽआ ले़टे़। 8 धरमि याॽमि लोत, माहा पापिजिमि रुम्बेॽ पेम्माबेॽ, सानिङ सेन्डा, लेन्डा माहाजिमि मङे़हा योम्बोक खाङ्नुङ, खेम्नुङ खोमि धरमि निवा दुःखि लिबॽआ ले़टा। 9 इडोॽ परभुडे़ॽ धरमि याॽमिजि दुःखमि याकपेॽ जोगा ले़न्डुए, मोबा पापिजि दन्डा पिमे याकठोक नुरोॽ युङ्लेन्डुए। 10 चइबानोॽ लुमाबेॽ इघा याॽमिजि निवाहाङ्मि खा हेला ले़ःॽखुबाजि, मोबा खोजिदाङ्बा चिक्चिमिम्मारो छाडा लिनुङ राम्घुबाजि न्यायमि लागि मो याकठोक हाम्युङ्इम्मे। इघा मे़ॽनोक्हा सिक्छे पिघुबाजि लुबॽआ मे़ङ्खेम्खुबानुङ काङायोङ्बा ले़म्मेनुङ इघाजिडे़ॽ थाङ्सिरिॽटुहाजिमि बेजेत ले़न्डुजे। 11 तर थाङ्सिरिदुतजि इघा मे़ॽनोक्हा सिक्छे इःॽखुबाजिबाङ बेॽलो सक्तिसालिनुङ महान लिनुङ्सो परभुमि पोम्बेॽ माहा मे़ॽनोक्हा सिक्छे इःॽखुबाजि हेला ले़टुजिने। 12 तर इघा याॽमिजि खोजिडे़ॽसो मे़लेबॽआ खामि टुम्बेॽ सिःक्चोन्डुजे। इघाजि नुबानुङ मङे़हा लेमे निवानोॽ मे़ॽनिङ्हा जन्तुजिडोॽ ले़म्मे। इघाजि राःप्नुङ सेॽनेमामि टोक्पॽआडोॽ ले़म्मेनुङ इघाजि जन्तुजिडोॽ नासि लिघे़म्मे। 13 माहाजिडे़ॽ हाइखाजि दुःख पिन्डुजे मोडोगे़ॽ खोजिसो दुःखबेॽ सिॽइम्मे। माहाजिमि लागि हाङ्हाङ ले़ःॽमा लुबॽआ चाहिँ लेन्डानोॽ हिङेॽ मिॽपॽआ भोग बिलास ले़ःॽमा ले़ये। माहाजिनुङ सोरि चामा चासिॽ पेम्मानोॽ हे़निङ्मि लागि बेजेतनुङ ङेम्मा सिॽमे खा ले़ये। अक्खाजि सानिङ्नोॽ खाल खालहा मङे़हा खा ले़ःॽमा नेन्जाम्मे। 14 माहाजिमि मिक सानिङ्नोॽ छाडा मेॽनामिॽचिबेॽ टिन्डुजेनुङ माहाजि पापि योम्बोक ले़ःॽनुङ याःक्चाघे़ॽमिने। माहाजिडे़ॽ कमजोर बिस्वासनुङ्हा याॽमिजि फाङ्सेन्डुजे। माहाजि लोभ ले़ःॽमा बानि लिबेटामे। माहाजिसोक्पेॽनोॽ निवाहाङ्मि चापहिमा सिॽइये। 15 माहाजि बओरमि पसा बालाममि मङे़ॽमा रामबेॽ राम्मे़ॽनिङ्सिम्मे, बालाम मङे़ॽमा योम्बोक ले़ःॽनुङ टोङ्बॽआ याङ्सरावा चुप्नुङ साप्थाक्से़। 16 मोडोगे़ॽ खोमि पाप योम्बोकबाङ खोसे़ॽ योप्मा खेः आक्सु। मे़यामुघुबा गधाडे़ॽ यामुमानुङ मो उम्बरिङ योम्बाक ले़ःॽमाबाङ से़गु। 17 इडोक्हा याॽमिजिगो योङा मे़ॽनिङ्मा पिॽठामडोॽ ले़म्मे। हिॽवाबाडे़ॽ येप्खे़ये खिम्मिॽवाडोॽ ले़म्मे। इडोक्हाजिमि लागि निवाहाङ्डे़ॽ खेःलोकपेॽ सेन्जुगुप पोरोक्युङ्बेटुजे। 18 माहाजिडे़ॽ काङायोङ्बानुङ उम्बरिङ खा इन्डुजे, मोबा हिङाडे़ॽ ले़ःॽमा मिॽपॽआ मङे़ॽमा योम्बोक ले़ःॽमेॽनुङ भरखरि बिस्वासबेॽ लेम्बॽआ याॽमिजि रेम्इन्डुजे। 19 माहाजिडे़ॽ चाहिँ छुट्कारा ले़ःॽनिम्ने़ लुनुङ हेन्ज्रुङ हे़न्इन्डुजे, तर खोजि टाङ्बानोॽ नासि ले़ःॽखुबा बानिमि सेउते लिम्मे। हाम्बे खाडे़ॽ याॽमि हेजोन्डुए, मो खामिन्नोॽ याॽमि सेउते लिये। 20 तर माहाजिडे़ॽ कानिङ्मि परभुनुङ मुक्तिदाङ्बा येसु खिरिस्ट लेबेनुङ्सो मक्खाम्डेमबेॽहा चोप खालहा मङे़हा खाबाङ टेबेबॽआ याॽमिजिसो फेरि याक्लोहा मङे़हा खाबेॽनोॽ टेघे़ॽमिहोङ, माहाजिमि बिजोक याक्लोएबाङ्सो चुरोक्नोॽ मङे़ॽमा लिये। 21 इन्ढोङ्होङ माहाजि पिबॽआ पबित्रा आग्या लेनुङ्सो फेरि मङे़हा खाबेॽनोॽ टेघे़म्मिहोङ्गो बोरु खोजिडे़ॽ धारमिक खानोॽ मे़लेबॽआहोङ्सो नुडे़। 22 माहाजिगो इगो चाइबमा पारलेनडे़ॽ लुडिडोक्नोॽ ले़म्मे, “हुःॽवाडे़ॽ टाङ्बामि पेःॽमा फेरि चोन्डुए” मोबा “आक्मा इन्डोक वासोक्मासो फेरि हिलोबेॽनोॽ खे़ॽनुङ इम्इये।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.