२ पत्रुस 1 - याम्फु1 का सिमोन पत्रुस येसु खिरिस्टमि सेउतेनुङ एप्पा चोङ्साडे़ॽ इगो पत्रा साप्मिटुङे। के़ॽ इगो पत्रा कानिङ्मि निवाहाङ्नुङ मुक्तिदाङ्बा येसु खिरिस्टमि धारमिक खाबाङ कानिङे़ॽ चुप्पॽआडोॽमा बेॽलो मुल्यनुङ्मा बिस्वास चुप्खुबा चोपजिमि लागि साप्मे़ॽनिङ्सिनुङे। 2 निवाहाङडे़ॽ हे़निङ बेॽलो बेॽलो अनुग्रहानुङ सान्ति पिरो। इन्ढोङ्होङ हे़निङे़ॽ निवाहाङ्मिनुङ कानिङ्मि परभु येसु खिरिस्ट लेटानुमे। निवाहाङ्डे़ॽ के़ःॽपॽआनुङ से़म्बॽआ 3 धरमि हिङ्मवा हिङ्मामि लागि पाप्मिहा चोप खा निवाहाङ्मि सक्तिबाङ्नोॽ चुप्मिटुङ्मे, इन्ढोङ्होङ टाङ्बामि महिमानुङ भलाइबाङ कानिङ के़ःक्खुबा निवाहाङ कानिङे़ॽ लेटुङ्मे। 4 इगो महिमानुङ भलोबाङ हे़निङ बेॽलो मोलनुङ्मानुङ बेॽहा बेॽहा हेन्ज्रुङ पिटे़। हे़निङ इगो मक्खाम्डेमबेॽ टुये नासि ले़ःॽखुबा मङे़ॽमा खाबाङ जोगाबा ले़ःॽनुङ निवाहाङ्मि बानि बेहोराबेॽ पेनानिङे लुनुङ खोसे़ॽ हेन्ज्रुङ हे़म्बॽआ ले़ये। 5 मोडोगे़ॽ हेरो हे़निङ्मि बिस्वासबेॽ बेॽलो नुबा योम्बोक ले़टानुमे। मोबा मो नुबा योम्बोक ले़ःॽनुङ निवासो येॽखे़टानुमे, 6 हे़निङ्मि निवाबेॽ टाङ्बा अधिनबेॽ युङ्मे बोल येडानुमे, मोसोक्पेॽ स्थिरनुङ्हाजि लिसानिङे, स्थिरसोक्पेॽ भक्ति येडानुमे 7 भक्ति ले़ःॽसाङ चोप वावानिसाजिनुङ सानुङ्उमि नम्नम येॽखे़टानुमे। मोबा इडोॽ चोपजिनुङ नम्नम ले़ःॽखुसे़ॽचुसानिङे। 8 इन्ढोङ्होङ हे़निङ्बेॽ टुमा खे़हा खा इघा ले़हा। इडोॽ कानिङ्मि परभु येसु लेबॽआसे़ॽ बेॽलो योम्बोक ले़ःॽखुबाजिनुङ नुबा चा किङ्घुबा डाङ लिन्डानिङे। 9 तर इडोक्हा नुबा बानि मे़ॽनिङ्हा याॽमिजिडे़ॽको निवाहाङ्बाङ्हा खानोॽ मे़लेहेघुबा अथबा मिक मे़ए़ःॽखुबाजिडोॽ ले़म्मे। माहाजिमि पाप आम्लाङ लिबॽआ खासो खोजिडे़ॽ मिन्डेॽपेटुजे। 10 मोडोगे़ॽ वावानिसानुङ नानुसाजि, निवाहाङ्डे़ॽ हे़निङ के़ःॽपॽआनुङ से़म्बॽआ खा पक्का टोङ्मामि बोल ले़टानुमे। हे़निङे़ॽ इडोॽ ले़टानुमहोङ हे़निङ्मि बिस्वास इन्डोक्पेॽसो काङ्घे़ॽनिबा। 11 इडोक्नोॽ कानिङ्मि परभुनुङ मुक्तिदाङ्बा येसु खिरिस्टमि सानिङ टुडुङ्घे़ये राज्यबेॽ निवाहाङ्डे़ॽ हे़निङ बेॽए स्वागत ले़ये। 12 मोडोगे़ॽ इघा खा हे़निङ सानिङ लुनिम्ने़। हे़निङे़ॽसो इघा खा नुरोॽ लेन्डानुमे, हे़निङे़ॽ चुप्पॽआ चाइबमा खाबेॽ सानिङ बोलियो ले़न्डानिङ। 13 इन्डोक्लो का हिङ्इङा, मोडोक्लो के़ॽ इघा खा हे़निङ लुमा नुबा लिये मिॽइनुङे। 14 इन्ढोङ्होङ का सिमे याक के़क्पेॽनोॽ लेम्बेटे़ लुनुङ कानिङ्मि परभु येसु खिरिस्टडे़ॽ का खाङ्मुटिङे। 15 का सिघे़ॽनुङ ए़क्साङ्सो हे़निङे़ॽ इघा खा निवाबेॽ सानिङ युङ्हेसानुमे लुनुङ हेरो के़ॽ हे़निङ सानिङ नुरोॽ लुनिम्ने़। खिरिस्टमि महिमामि साक्छि 16 कानिङ्मि परभु येसु खिरिस्ट महिमानुङ सक्तिबेॽ फेरिसो लेङ्इये लुनुङ हे़निङ पारलेनरेॽ इःबेॽपॽआ ने़ॽनिबा, कानिङ टाङ्बामिनोॽ मिगे़ॽ खोमि बेॽएम्मा महिमा खाङ्इटुङ्मे। 17 निवाहाङ पाबाडे़ॽ येसुमि आदरनुङ सम्मान ले़ःॽमाबेॽ मोबा “इगो के़ॽ नम्नम ले़ःॽपॽआ पसा ले़ये, इगोनुङ का सारो साप्थाङ्इटिङे” लुनुङ इक्को परम महिमाबाङ इडोॽ लुमाबेॽ कानिङ मोबेॽनोॽ टुसिङ्मा। 18 मो पबित्रा टोक्टोक्माबेॽ कानिङ खोनुङ टुमाबेॽ थाङ्सिरिबाङ लेम्बॽआ मो अगमबानि कानिङ टाङ्बे़ॽनोॽ खेप्सुङ्मा। 19 मोडोगे़ॽ अगमबक्ताजिडे़ॽ लुबॽआ बचनबेॽ कानिङ छना पक्का लिनुङ भरोसा ले़न्डुङ्मे़। हे़निङे़ॽ इगो खाबेॽ निवा टिमा नुबा लिये इन्ढोङ्होङ इगोसे़ॽ मो याक मे़लेङ्रो, मोबा हे़निङ्मि निवाबेॽ माक्मिए साङ्गे मे़उरो सेन्जुगुप्पेॽ हाङ्इये कुप्पिडोॽ लिये। 20 तर धारमिक नेॽचिराबेॽ अगमबक्ताडे़ॽ लुबॽआ खा चाहिँ याॽमिमि निवामि सक्तिडे़ॽ इःबॽआ ने़ॽनिबा लुनुङ नुरोॽ लेयुक्सानुमे। 21 इन्ढोङ्होङ अगमबानि लुघुबा याॽमिमि निवामि सक्तिबाङ लेम्बॽआ खा ने़ॽनिबा, तर पबित्रा होङ्निवामि सक्तिबाङ याॽमिजिडे़ॽ निवाहाङ्बाङ यामुबॽआ खा ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.