२ कोरिन्थि 9 - याम्फु1 यहुदिया मुलुकबेॽ टुघुबा खिरिस्टमि पबित्रा याॽमिजि पिबॽआ भेटिमि टुम्बेॽ के़ॽ इगोबेॽ हे़निङ साप्मा पाप्निबा। 2 हे़निङ हाइखाजि सहायता ले़ःॽमा बेॽलो मिङ्इन्डानिङे लुमे खा के़ॽ नुरोॽ लेनुङे़। हे़निङ्मि इगो खामि टुम्बेॽ के़ॽ माकेडोनिया मुलुकबेॽहा याॽमिजिनुङ लुटुङे। नेम्निङ्एम्बाङ अखैया मुलुकबेॽहा याॽमिजि भेटि पिमामि पोरोइटामे लुनुङ के़ॽ लुबेटुङ्हाजि। हे़निङ्मि इडोक्मा खा खेम्नुङ माहाजिबेॽ बेॽलो जना जोसिलो लिटामे। 3 तर इडोॽ कानिङे़ॽ हे़निङ्मि लागि गरब ले़ःॽपॽआ खा मे़ङ्के़न्डिॽखे़ॽलो, के़ॽ हे़निङ लुबॽआडोॽ पोरोगानिङे लुनुङ के़ॽ इघा निसाजि पाङ्मे़ॽनिङ्सिनुङे। 4 माकेडोनिया मुलुकबेॽहा याॽमिजि कानुङ सोरि हे़निङ्बेॽ आप्माबेॽ हे़निङे़ॽ इमाङ्सो पिमामि लागि मे़म्पोरोक्पॽआ चुप्मिहोङ कानिङ्गो ङेम्मा सिॽइन्डिङ्मा कानिङ्बाङ्सो बेॽलो हे़निङ ङेम्माबेॽ सिॽइन्डानिङे। 5 मोडोगे़ॽ हे़निङे़ॽ पिन्डुङ्मे लुबॽआ भेटि पोरोक्युङ्मामि लागि काबाङ याक्लो इघा निसाजि पाङ्माबेॽ नुबा लिये मिॽइटुङे। इडोॽ ले़ःॽमाहोङ हे़निङे़ॽ पिन्डुङ्मे लुबॽआ भेटि पोरोक्युङ्इन्डानुम मोबा भेटि करडे़ॽ ने़ॽनि टाङ्बामि राजिखुसिडे़ॽ पिबॽआ लिये। 6 तर इगो खा लेजासनुमे, अडे़ॽवा चरि टुप्खुबे़ॽ अडे़ॽवानोॽ चे़न्डुहा, बेॽलो चरि टुप्खुबे़ॽ बेॽलोनोॽ चे़न्डुहा। 7 पिमा मिॽखुबा चोप याॽमिजिडे़ॽ टाङ्बामि निवाडे़ॽ इन्डोक पिमा मिॽइन्डानुमे मोडोक्नोॽ पिसानुमे, निवे़ॽ पिमा मे़मिॽसाङ हाइखाजिमि करबेॽ सिॽनुङ ए़पिसानुमे, इन्ढोङ्होङ निवाहाङ्डे़ॽको राजिखुसिडे़ॽ पिबॽआरेॽनोॽ नेन्जोन्डुए। 8 हे़निङ इमाङ खामिसो खाँचो मे़सिॽलो, मोबा हे़निङे़ॽ चोप नुबा योम्बोकमि लागि बेॽलो पिहेसानुमे लुनुङ निवाहाङ्डे़ॽ हे़निङ पाप्मिहाबाङ्सो बेॽलो पिये। 9 धारमिक नेॽचिराबेॽसो इडोक्नोॽ साप्पॽआ ले़ये, “साप्थाङ्मानुङ खोसे़ॽ इमाङ मे़काप्खुबाजि पिन्डुजे, खोसे़ॽ ले़ःॽपॽआ नुबा योम्बोक सानिङ टुडुङ्घे़ये।” 10 निवाहाङ्डे़ॽ खेति ले़ःॽखुबाजि चरिनुङ चामामि लागि चामा पिये। मोडोक्नोॽ खोसे़ॽ हे़निङ पाप्मिहा चोप थोक पियेनुङ बेॽलो बेॽलो येॽपिये, मोबा हे़निङे़ॽ हाइखा बेॽलो नुबा योम्बोक ले़ःॽहेन्डानुमे। 11 हे़निङ साप्थाङ्मानुङ हाइखाजि सानिङ पिजाहेघुबा टोङ्मामि लागि निवाहाङ्डे़ॽ बेॽलो पिये। मोबा हे़निङे़ॽ पिबॽआ खा हाइखा मन्डलिबेॽ हाबेॽमाबेॽ खोजिडे़ॽ निवाहाङ ओहाक पिन्डुजे। 12 हे़निङ्मि इडोक्मा खाडे़ॽ निवाहाङ्मि पबित्रा याॽमिजि पाप्मिहा खारेॽनोॽ पुरा लिनिबा, तर इडोक्मा योम्बोगे़ॽ याॽमिजिडे़ॽ निवाहाङ सानिङ ओहाक पिन्डुजे। 13 इडोक्हा योम्बोकबाङ हे़निङ इन्डोक्हा याॽमिजि ले़न्डानिङे लुनुङ खाङ्मुये। खिरिस्टमि सुसमाचारमि लागि हे़निङे़ॽ भक्तिनुङ नुबा निवाडे़ॽ हाइखाजिमि लागि पिबॽआ खाङ्नुङ याॽमिजिडे़ॽ निवाहाङ ओहाङ ले़न्डुजे। 14 हे़निङ्बेॽ निवाहाङ्डे़ॽ इडोॽ बेॽलो अनुग्रहा ले़ःॽपॽआ खाङ्नुङ माहाजिडे़ॽ बेॽलो नम्नम ले़ःॽनुङ हे़निङ्मि लागि पारथना ले़न्डुजे। 15 इगो लुमा योक्माबेॽसो लुहेनिबा निवाहाङ्डे़ॽ पिबॽआ बरदानमि लागि खो ओहाकयो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.