२ कोरिन्थि 8 - याम्फुहाइखाजि पिमाबेॽ इन्डोक्टे पिमे़ 1 वावानिसानुङ नानुसाजि, निवाहाङ्डे़ॽ माकेडोनियामि मन्डलिबेॽहाजि ले़ःॽपॽआ अनुग्रहामि टुम्बेॽ हे़निङ लुबेॽमा मिॽइन्डुङ्मे़। 2 माहाजिडे़ॽ बेॽलो खेः आङ्मा सिॽमाबेॽसो हाङ्हाङ्नुङ पेनामि मोबा इमाङ मे़ॽनिङ ले़टामिरोसो टाङ्बानुङ टुडिडोक्नोॽ साप्थाङ्मानुङ हाइखाजि पिसुजि। 3 इगो खामि गबाहि के़ॽनोॽ पिनुङे़, खोजिडे़ॽ इन्डोक पिहेसुजे मोबाङ्सो बेॽलो साप्थाङ्मानुङ पिसुजि। 4 इडोॽ माहाजिडे़ॽ भेटि पिनुङ खोजिडे़ॽ यहुदियाबेॽ टुघुबा खिरिस्टमि धरमि सेवाकजि कानिङे़ॽसो सहायता ले़ःॽटोक्मा लुनुङ माहाजिडे़ॽ बेॽलोखेॽ बिन्ति ले़टामि। 5 कानिङे़ॽ मिॽनोॽ मे़मिॽपॽआ खा माहाजिडे़ॽ ले़टुजि। माहाजिडे़ॽ याक्लो खोजि टाङ्बा परभुमि लागि पिसुजि, मोबा निवाहाङ्डे़ॽ मिॽपॽआडोॽ कानिङ्मि चोप खा खेप्सुजि। 6 तितसडे़ॽनोॽ खोजिमि रुम्बेॽ इगो भेटि सुम्मे योम्बोक याक्लो तरिक्पॽआसे़ॽ मो योम्बोक खोसे़ॽनोॽ पुरा ले़टुरो लुनुङ कानिङे़ॽसो खोनोॽ पाक्सुङ्मा। 7 हागो हे़निङ बिस्वासबेॽ, बचनबेॽ, निवादाङ्बा खाबेॽ, हाइखाजिमि सहायता ले़ःॽमे खाबेॽ हे़निङ चोप नुबा ले़न्डानिङ। मोडोक्नोॽ कानिङ्बाङ हे़निङे़ॽ नम्नम ले़ःॽमे खासो चिङ्इटानुमे मो बेॽलोनोॽ नुबा ले़ये, मोबा पिमे खाबेॽसो हे़निङ्मि निवाबाङ्नोॽ नम्नम ले़ःॽमानुङ सानिङ पिसानुमे। 8 के़ॽ इगो खा आग्या ले़ःॽपॽआ ने़ॽनि, तर हाइखाजिमि जोसनुङ सोरि योम्नुङ हे़निङे़ॽ हाइखाजि ले़ःॽपॽआ नम्नम चाइबमा ले़येन्डे ले़ःॽनिबा लुनुङ लेडोक्मामि लागि इडोॽ ले़ःॽपॽआ ले़ये। 9 कानिङ्मि परभु येसु खिरिस्टडे़ॽ ले़ःॽपॽआ अनुग्रहा हे़निङे़ॽ नुरोॽ लेन्डानुम। खो चोप थोकमि मायोङ्बा ले़टारोसो हे़निङ्मि लागि इमाङ मे़ॽनिङ्मा लिसा। खो इमाङ मे़ॽनिङ्मा लिनुङ हे़निङ टाङायोङ्बा टोङ्मामि लागि इडोॽ ले़टु। 10 इगो खामि टुम्बेॽ के़ॽ इडोॽ लुनिम्ने़ हे़निङे़ॽ नेम्निङ तरिक्पॽआ योम्बोक पुरा ले़टानुमहोङ नुबा लिये। मो योम्बोक हे़निङे़ॽ हाइखाजिबाङ्सो याक्लोनोॽ ले़ःॽमा मिॽपॽआ योम्बोक ले़ये, मोबा हे़निङे़ॽ याक्लोनोॽ मो योम्बोक तरिक्पॽआसो ले़टे़। 11 हागो हे़निङे़ॽ तरिक्पॽआ योम्बोकसो पुरा ले़टानुमे। मोडोक्पेॽ हे़निङे़ॽ बेॽलो पिमा मिडानुम हागो हेरो पिनुङ हे़निङे़ॽ पिमा मिॽपॽआ खा पिनुङ पुरा ले़टानुमे। 12 इन्ढोङ्होङ हे़निङ पिमा मिङ्इन्डानुमहोङ टाङ्बानुङ इमाङ टुहा माहा खानोॽ पिबॽआनोॽ निवाहाङ्डे़ॽ नेन्जोन्डुहा, तर हे़निङ्नुङ्नोॽ माॽअहा खा पिमा लुनिबा। 13 हे़निङ्नुङ्नोॽ माॽआहा खा हाइखाजि पिमेॽनुङ हे़निङे़ॽ चाहिँ रिये कोक खिसानुमे हाइखाजि चाहिँ सोपयाङ कोक खिमेॽमा के़ॽ मिॽपॽआ ने़ॽनिबा। कानिङ चोपनोॽ बराबरि लिरो लुनुङ लुबॽआ। 14 आइ हे़निङ्नुङ बेॽलो टुमाबेॽ इमाङ मे़ङ्काप्खुबाजि पिमाबेॽ नुबा लिये, ए़क्साङ हे़निङ्नुङ माॽआमाबेॽ खोजिडे़ॽसो हे़निङ पिम्मे। इडोॽ पिघुसे़ॽचुमाबेॽ चोपमि लागि बोरोबर लिये। 15 धारमिक नेॽचिराबेॽसो इडोॽ साप्पॽआ ले़ये, “बेॽलो सुम्घुबे़ॽसो बेॽलो इमाङ्सो मे़न्सुप्सु, ए़डे़ॽवा सुम्घुबासो खाँचो मे़सिॽटा।” तितस कोरन्थि पाङ्बॽआ 16 निवाहाङ ओहाक लिरो, हे़निङ नम्नम ले़ःॽमे काङ्मिडोॽमा निवा निवाहाङ्डे़ॽ तितसबेॽसो युङ्बेॽटु। 17 इन्ढोङ्होङ खो कानिङे़ॽ खडे लुबॽआसे़ॽरेॽनोॽ हे़निङ्बेॽ आप्मा मिम्बॽआ ने़ॽनि, तर खोमदाङ्बासो बेॽलो हे़निङ्बेॽ आप्मा मिने़से़ॽनोॽ आप्मे़ॽनिङ्सिये। 18 मोबा खोनुङ सोरि इक्को निसा पाङ्मे़ॽनिङ्सिनुङे, खो सुसमाचार परचार ले़ःॽमे योम्बोकपेॽ चोप मन्डलिबेॽहाजिबेॽ निङ मुक्पॽआ निसा ले़ये। 19 मोबा इडोक्रेॽनोॽ ने़ॽनि, पिघुबाजिडे़ॽ पिबॽआ भेटि सुम्मे योम्बोकपेॽ कानिङ्नुङ राम्मामि लागि इगो निसा खोमि मन्डलिबाङ से़न्इटुजे। इगो योम्बोक कानिङे़ॽ परभुमि महिमामि लागिनुङ कानिङे़ॽसो हाइखाजि साप्थाङ्मानुङ सहायता ले़ःॽमा मिङ्इन्डिङ्मे लुमे खामि परमान ले़ये। 20 इडोॽ साप्थाङ्मानुङ पिबॽआ भेटिमि टुम्बेॽ असे़ॽसो आप्टिक मे़न्डिहेसुजिरो लुनुङ इघा चोप भेटि नुबा योम्बोकपेॽ टिमा मिॽइन्डुङ्मे़। 21 निवाहाङ्मि पोम्बेॽरेॽनोॽ ने़ॽनि, याॽमिजिमि पोम्बेॽसो नुबा योम्बोक ले़ःॽमा बोल ले़न्डिङ्मे़। 22 मोडोगे़ॽ तितसनुङ मो निसा मोबा हाइको इक्को निसासो पाङ्मे़ॽनिङ्सिन्डुङ्मे, मो निसासो कानिङे़ॽ बेॽलोखेॽ खाक्सुङ्मा खो चोप योम्बोकपेॽ सानिङ पाङ्नुये, खोसे़ॽ हे़निङ्बेॽ बेॽए भरोसा ले़न्डुएनुङ आइ हे़निङ योम्बोक ले़ःॽमाराप्मा छना बेॽलो मिङ्इये। 23 इघाजिबेॽ तितस चाहिँ काङ्मि लङ्गाम ले़ये, खोसे़ॽ काङ्मि साटो हे़निङ्मि सेवा ले़ःॽमाराप्मिये। खोनुङ लेङ्घुबा हाइखा निसाजि चाहिँ खिरिस्टमि महिमामि लागि मन्डलिबाङ पाङ्बॽआ ले़म्मे। 24 हे़निङे़ॽ ले़ःॽपॽआ नम्नममि टुम्बेॽ के़ॽ गरब ले़ए़टुङे, मोमि परमान हे़निङे़ॽ माहा निसाजिसो नम्नम ले़ःॽनुङ मन्डलिमि रुम्बेॽ खाङ्मुसानुमे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.