२ कोरिन्थि 7 - याम्फु1 मोडोगे़ॽ के़हा लङ्गामजि, कानिङे़ॽ इघा हेन्ज्रुङ चुप्पॽआसे़ॽ हिङानुङ होङ्निवा असुद्ध टोङ्घुबा चोप खाबाङ ओः पेम्मा, मोबा निवाहाङ्मि आदर ले़ःॽसाङ सानिङ पबित्रा लिमानुङ हिक्सि। पावलमि हाङ्हाङ 2 हे़निङ्मि निवाबाङ्नोॽ कानिङ नम्नम ले़ःॽमाजे, कानिङे़ॽ असासो मङे़ॽमा मे़ले़ःॽटिॽ, असासो मङे़ॽमा रामबेॽ मे़लाघे़ॽटिॽ, कानिङे़ॽ असासो कानिङ्मि नुबामि लागि मे़रेम्डिॽ। 3 हे़निङ आप्टिक टिमामि लागि इडोॽ लुबॽआ ने़ॽनि। याक्लोनोॽ के़ॽ लुबेनिम्ने़, कानिङ्मि निवा होङ्सिॽयुरामनोॽ बेॽलो नम्नम ले़न्डुङ्मे़। हे़निङ्नुङ सोरि हिङ्मानुङ सिमा कानिङ पोरोइन्डिङ्मे। 4 हे़निङ्बेॽ के़ए़ बेॽए भरोसा टुये। हे़निङ्बेॽ का सारोनोॽ गरब ले़नुङे। हे़निङ्बाङ के़ॽ बेॽलो बोल चुप्मिटुङे। कानिङ्मि चोप खेःबेॽ का बेॽलो हाङ्हाङ ले़ङे। 5 इन्ढोङ्होङ कानिङ माकेडोनियाबेॽ लेन्नुङ्सो कानिङे़ॽ सुख मे़न्चुप्टुङ्मा। मोबेॽ चोपराजिबाङ खेः आङ्मा सिॽटे़, बिरोध ले़ःॽखुबानुङ चाहिँ खिमाचुमा लिसे़नुङ निवाबेॽ चाहिँ किस्सिमवा टुसा। 6 तर आसा मे़ॽनिङ्हाजि आसा पिघुबा निवाहाङ्डे़ॽ तितस कानिङ्बेॽ लेम्बॽआ खाडे़ॽ कानिङ बोल पिसा। 7 खो लेम्बॽआसे़ॽरेॽनोॽ ने़ॽनि तर खोसे़ॽ हे़निङ्बाङ चुप्पॽआ हौसलाबाङ कानिङे़ॽसो हौसला चुप्टुङ्मा। हे़निङ कानुङ बेॽलो चुप्मा मिङ्इटानिङ्रो लुनुङ खोसे़ॽ का लुबेॽटा। याक्लो हे़निङे़ॽ ले़ःॽपॽआ बिरोङ मिॽनुङ काङ्मि लागि दुःखि लिबॽआनुङ काङ्मि लागि हे़निङे़ॽ सुरता ले़ःॽपॽआ खासो का इःबेॽटिङा, इघा चोप खा खेम्नुङ का बेॽलो साप्थाक्सिङ। 8 मो काङ्मि पत्राडे़ॽ हे़निङ्मि निवा टुगानोॽ होला, तर मोमि लागि का हे़क्हे़क मिङ्ङानि, याक्लो इॽछोॽको हे़क्हे़क मिनिङा। तर आइ मो पत्राडे़ॽ हे़निङ्मि निवा टुक्मेॽसो इॽछोॽरेॽ टुक्मेॽटा लुमे खा के़ॽ लेडोक्इटुङ। 9 मो पत्राडे़ॽ हे़निङ्मि निवा टुगा लुनुङ का साप्थाङ्बॽआ ने़ॽनि, तर मो खाडे़ॽ हे़निङ्मि मङे़हा बेहोरा लेडानुम होला लुनुङ चाहिँ का साप्थाङइटिङे। इन्ढोङ्होङ हे़निङ निवाहाङ्डे़ॽ मिॽपॽआडोॽ दुःखि लिसानिङ मो खाडे़ॽ हे़निङ्मि लागि नुबा ले़ःॽपॽआसे़ॽ कानिङ्बाङ इमाङ्सो मङे़ॽमा मे़लिसा। 10 इन्ढोङ्होङ निवाहाङ्डे़ॽ मिॽपॽआडोॽ दुःखि लिनुङ कानिङे़ॽ पाप लेडुङ्माहोङ मुक्ति चुप्मिये, तर मक्खाम्डेमबेॽहा खामि लागि दुःखि लिसिङ्माहोङ मोसे़ॽको सिमा रामबेॽ चिक्खे़ये। 11 हागो हे़निङे़ॽ निवाहाङ्मि लागि हाःप्माबेॽ इमाङ लिसे़, मिॽखाक्सानुमे। इगोसे़ॽ हे़निङ चाइबमा खा इःघुबा टोक्सा, बिरोङ मे़ॽनिङ्मा खाङ्मुखुबा टोक्सा, मोमि लागि बेॽलो अत्तुर टिसा, बेॽलो सुरके़ॽमेॽटा, मोढे़ॽलो किस्सिॽमेॽटा, बेॽलो कानुङ चुप्मा मिम्मेॽटा, बेॽलो भक्ति ले़ःॽमे जोस पिसा, पापिजिडे़ॽ दन्डा चुप्मा खे़ये लुमे निवा लेस्सा, इघा चोप खाडे़ॽ हे़निङ आप्टिक मे़ॽनिङ्हाजि ले़न्डानिङ लुनुङ खाङ्मुये। 12 के़ॽ मो पत्रा अन्याय ले़ःॽमामि लागि साप्पॽआसो ने़ॽनि, अन्यायबेॽ सिॽखुबा याॽमिमि लागि साप्पॽआसो ने़ॽनि। तर निवाहाङ्मि पोम्बेॽ हे़निङे़ॽ कानिङ नम्नम ले़ःॽपॽआ खा खाङ्मुमामि लागि मो पत्रा साप्मिटुङे। 13 मोडोगे़ॽ कानिङे़ॽ हौसला चुप्मिटुङ्मे। मोरेॽनोॽ ने़ॽनि हे़निङ्बाङ तितसडे़ॽ बेॽलोनोॽ बोल चुप्नुङ साप्थाङ्बॽआसे़ॽ कानिङ्सो बेॽलो हाङ्हाङ लिसिङ्मा। 14 के़ॽ तितसनुङ हे़निङ्मि टुम्बेॽ बेॽहा खा इःसुङ मो खाबेॽ हे़निङे़ॽ का निरास मे़न्टोक्सानिङ। कानिङे़ॽ हे़निङ्नुङ सानिङ चाइबमा खा इःसुङ्मा। मोडोक्नोॽ कानिङे़ॽ तितसनुङ इःबॽआ बेॽहा खासो चाइबमानोॽ लिसा। 15 हे़निङ चोबे़ॽ खोमि पोम्बेॽ आग्या पालना ले़ःॽखुबा लिनुङ खो आदरनुङ्मा स्वागत ले़टानुम। हे़निङ्मि इघा खा मिॽनुङ तितसडे़ॽ हे़निङ छना बेॽलो नम्नम ले़ये। 16 का साप्थाङ्इङे, इन्ढोङ्होङ हे़निङ्बेॽ के़ए़ पुरा भरोसा टुये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.