२ कोरिन्थि 6 - याम्फु1 कानिङ निवाहाङ्नुङ सोरि योम्बोक ले़ःॽखुबाजि लिबॽआसे़ॽ हे़निङ बिन्ति ले़निम्ने़, हे़निङे़ॽ निवाहाङ्बाङ चुप्पॽआ अनुग्रहा खेरो ए़क्खे़ॽमेॽटानुमे। 2 निवाहाङ्डे़ॽ धारमिक नेॽचिराबेॽ इडोॽ लुये, “हे़ने़ॽ ले़ःॽपॽआ पारथना ठिक बेलाबेॽनोॽ खेम्नुङ मुक्तिमि याकपेॽ हे़न सहायता ले़टुङ।” खाक्से, निवाहाङ्मि अनुग्रहा चुप्मे ठिक बेला हागोनोॽ ले़ये मुक्तिमि याक इगोनोॽ ले़ये। 3 कानिङे़ॽ ले़ःॽपॽआ योम्बोकपेॽ आप्टिक मे़लेङ्रो लुनुङ बाधा ले़ःॽमे योम्बोक ले़टुङ्मानि। 4 तर निवाहाङ्मि चाइबमा योम्बोक ले़ःॽखुबाजि इन्डोॽ लिमा खे़ये मोडोक्नोॽ कानिङे़ॽ ले़ए़टुङ्मे़, सहनसिल लिमे खाबेॽ, खेःबेॽ, गारो सिॽमाबेॽनुङ आपद बिपद सिॽमाबेॽ योङ आङ्इन्डुङ्मे। 5 कानिङे़ॽ मोक्मा खेः आङ्इटुङ्मे, तिरिङ्गा खिमबेॽ से़क्चिमा खेः आङ्इटुङ्मे, बिरोध आङ्इटुङ्मे, योम्बोक ले़ःॽमाबेॽ सारोनोॽ याःक्चाघे़टिङ्मे़, इम्मा सिॽवानुङ साक आङ्इटुङ्मे। 6 कानिङ चोखो लिनुङ, निवाडे़ॽ आङ्हेमे सक्तिडे़ॽ, नम्नावाडे़ॽ, पबित्रा होङ्निवाडे़ॽ, चाइबमा नम्नमडे़ॽ, 7 चाइबमा खा यामुनुङ निवाहाङ्मि सक्तिडे़ॽ योम्बोक ले़ःॽपॽआ लुनुङ खाङ्मुसुङ्मा। याॽमिजिनुङ काक्मा सिॽहोङ्सो कानिङ्नुङ हतियार टुये, मो हतियार लुबॽआ चाहिँ निवाहाङ्डे़ॽ नेन्जामारोमा हिङ्मवा हिङ्मानोॽ ले़ये। 8 कानिङे़ॽ इजेतसो चुप्टुङ्मा बेजेतसो चुप्टुङ्मा। नुबासो लुम्मि, मङे़ॽमासो लुम्मि, कानिङे़ॽ चाइबमा खारेॽ यामुन्डिङ्मा, तर रेम्डेॽखुबा लुम्मे। 9 कानिङ नुरोॽ लेनुङ्सो मे़लेडिडोॽ ले़म्मे। कानिङ सिघे़ॽसिॽ पोरोक्पॽआहोङ्सो हिङ्इटिङ्मे, दन्डा आङ्नुङ्सो मे़सिघे़ॽटिॽ। 10 कानिङ बिलापबेॽ टुन्डिङ्मारोसो सानिङ हाङ्हाङ ले़न्डिङ्मा। कानिङ इमाङ मे़ॽनिङ्हा ले़न्डिङ्मासो बेॽलो याॽमिजि याङ्सरावानुङ्हा टोङ्इटुङ्मे। कानिङ इमाङ मे़ॽनिङ्हाजिडोॽ ले़टिहोङ्सो कानिङ्नुङ चोप थोक टुहा। 11 होउ कोरिन्थिबेॽहा वावानिसानुङ नानुसाजि, कानिङ्मि निवाहोङ्सिॽयुहा चोप खा हे़निङ लुबेॽनिम्ने़, कानिङ्होङ्सिॽयु हे़निङ्मि लागि बेॽलो नम्नम टुहा। 12 कानिङे़ॽ हे़निङ नम्नम ले़ःॽमा मे़लेॽटिॽ। बोरु हे़निङे़ॽ चाहिँ कानिङ नम्नम ले़ःॽमा लेॽपेटानुमे। 13 हागो के़ॽ हे़निङ टाङ्बामि नानिजि मिॽनुङ लुनिम्ने़, कानिङे़ॽ हे़निङ नम्नम ले़टिडोक्नोॽ हे़निङे़ॽसो कानिङ नम्नम ले़ःॽमाजे। अबिस्वासिजिनुङ इक्कोनोॽ ए़लिमे़ 14 खिरिस्टबेॽ बिस्वास मे़ले़ःॽखुबाजिनुङ इक्को ए़लिसानिङे, इन्ढोङ्होङ धरमिनुङ अधरमि इन्डोक्पेॽसो इक्को लिहेमिने, सेन्जुगुपनुङ उज्यालोमि सोरि योम्बोक लिनिबा। 15 खिरिस्टनुङ सैतानमि इन्डोक्टे खा टोङ्इहा ? मोडोक्नोॽ अबिस्वासिजिनुङ बिस्वासिजिमि खा इन्डोक्टे टोङ्इहा ? 16 निवाहाङ्मि मन्दिरनुङ मुरतिमि रुम्बेॽ इमाङ टोङ्इहा ? कानिङ हिङ्रिक निवाहाङ्मि मन्दिर ले़न्डिङ्मा, निवाहाङ खोमटाङ्बे़ॽ लुटे़, “का माहाजिबेॽ पेङ्इङे मोबा माहाजिमि रुम्बेॽ राम्डुङे, का माहाजिमि निवाहाङ लिङे, मोबा माहाजि चाहिँ के़हा याॽमिजि लिम्मे।” 17 मोडोगे़ॽ परमपरभु खोमटाङ्बे़ॽ लुये, “हे़निङे़ॽ माहाजि लेॽपेसानुमे अक्खाजिनुङ हाःघे़ॽनुङ पेनानिङे। असुद्ध खा इमाङ्सो ए़ॽके़गानुमे, मोबा हे़निङ काङ्मि खिमबेॽहाजि टोङ्इनिम्ने़।” 18 “का हे़निङ्मि पाबा लिङे, मोबा हे़निङ के़हा पसाजि लिन्डानिङे, चोप्पाङ सक्तिदाङबा निवाहाङ्डे़ॽ लुये।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.