२ कोरिन्थि 5 - याम्फुथाङ्सिरिमि हिङा 1 कानिङे़ॽ लेन्डुङ्मा, इगो कानिङ्मि हिङा लुबॽआ चाहिँ मक्खाम्डेमबेॽ याङ फोङ्नुङ नियाक डेराबेॽ पेन्डिडोॽरेॽ ले़ये। निवाहाङ्डे़ॽ पिबॽआ थाङ्सिरिबेॽ कानिङ्मि सानिङ्मि लागि खिम टुये, मो खिम चाहिँ याॽमिमि हुगे़ॽ टोङ्बॽआ ने़ॽनि। 2 चइबानोॽ लुमाबेॽ कानिङ इगो हिङाबेॽ टुमाबेॽ बेॽलो खेःनुङ टुन्डिङ्मा। कानिङ्गो थाङ्सिरिबेॽ टुये हिङा चुप्मा मिवे़ॽ सिसिॽपोक्रोइटिङ्मे। 3 मो हिङा कानिङे़ॽ चुप्मिन्डुङ्मे मोबा कानिङ्मि होङ्निवा हिङा मे़ॽनिङ लिनिबा। 4 इन्ढोङ्होङ इगो नासि लिघे़ये हिङाबेॽ टुसिरो कानिङ दुःखडे़ॽ याःक्चाघे़न्डिङ्मे़। कानिङ सिघे़ॽमा मिम्बॽआगो ने़ॽनि, तर इन्डोक्पेॽ थाङ्सिरिमि हिङा चुप्मे़ लुनुङ कानिङ सिजाघे़टिङ्मे। इगो नासि लिघे़ये हिङा सानिङ हिङ्इये हिङ्मवाबेॽ फेङ्घे़ॽमामि लागि ले़ये। 5 हागो कानिङ्मि हिङा फेम्मामि लागि पोरोक्खुबागो निवाहाङ्नोॽ टुये, खोसे़ॽ पबित्रा होङ्निवा कानिङ बैना पिटे़। 6 मोडोगे़ॽ कानिङ्मि हिङाबेॽ इगो मक्खाम्डेमबेॽ टुडिङ्लो परभु टुबॽआ ठाउँबाङ ओः टुन्डिङ्मा लेनुङ्सो कानिङ आसा ले़ःॽमा लेडुङ्मानि। 7 मोडोगे़ॽ कानिङ खाङ्मुहा खाबेॽ ने़ॽनि, तर बिस्वासबाङ हिङ्इन्डिङ्मे। 8 कानिङे़ॽ आसा ले़ःॽमा लेडुङ्मानि, थाङ्सिरिबेॽ चुप्मिये हिङा चुप्नुङ परभुनुङ पेम्मामि लागि इगो हिङा लेप्पेमासो पोरोक्इन्डिङ्मा। 9 मोडोगे़ॽ कानिङ इगो हिङाबेॽ टुमाबेॽहोङ्सो, परभुनुङ सोरि टुमाबेॽहोङ्सो परभुडे़ॽ नेन्जामारोमा योम्बोक ले़ःॽमा मिॽइन्डुङ्मे़। 10 इन्ढोङ्होङ कानिङ चोप खिरिस्टमि न्यायमि लागि खोमि पोम्बेॽ येःप्मानोॽ खे़ये। कानिङ चोबे़ॽ ले़ःॽपॽआ नुबानुङ मङे़हा योम्बोकमि इनाम चुप्मिन्डुङ्मे। खिरिस्टबाङ निवाहाङ चुप्मिये 11 परभुनुङ इन्ढोङ किस्सिमा खे़ये लुमे खा लेन्डुङ्मे़ मोडोगे़ॽ हाइखा याॽमिजिसो मोडोक्नोॽ ले़ःॽमा खे़ये लुनुङ इःन्डुङ्मा। कानिङ इन्डोक्हाजि ले़न्डिङ्मा लुनुङ निवाहाङ्डे़ॽ नुरोॽ लेयेनुङ का इन्डोक्मा ले़ङे लुनुङ हे़निङे़ॽ नुरोक्नोॽ लेन्डानुम लुमे के़ॽ मिॽइटुङे। 12 कानिङे़ॽ टाङ्बा नुबा ले़न्डिङ्मा लुमा योक्पॽआगो ने़ॽनि, तर कानिङ्मि टुम्बेॽ हे़निङे़ॽ गरब ले़ःॽठाम खा पिमे़ॽनिङसिनिम्ने़। इन्ढोङ्होङ हे़निङे़ॽ माहा निवाहोङ्सिॽयुहा खाबेॽ ने़ॽनि, तर खाङ्मुहा खाबेॽ काङायोङ्बा रे़ङ्घुबाजि लिहेसानिङे लुनुङ मिॽइन्डुङ्मे़। 13 कानिङ निवा मे़ॽनिङ्हाजि ले़न्डिङ्माहोङ हे़निङ्मि लागिनोॽ ले़न्डिङ्मा। कानिङ निवानुङ्हाजि टुन्डिङ्माहोङ हे़निङ्मि लागिनोॽ टुन्डिङ्मा। 14 कानिङ्गो खिरिस्टमि नम्नममि अधिनबेॽ टुन्डिङ्मे, इन्ढोङ्होङ कानिङे़ॽ इगो खा लेन्डुङ्मे़, चोप याॽमिजिमि लागि इक्को सिघे़ॽपॽआसे़ॽ चोप सिसामि। 15 खो चोप याॽमिजिमि लागि सिसा, हागो खोबेॽ बिस्वास ले़ःॽखुबा चोप याॽमिजि खोजिमि लागि सिनुङ हिङ्बोक्खुबामि लागि हिङ्मा खे़ये। 16 मोडोगे़ॽ कानिङे़ॽ असासो याॽमिजिडे़ॽ खाङ्डिडोॽ खाक्सुङ्मानि। कानिङे़ॽ याक्लो इक्खेॽ खिरिस्टसो याॽमिजिडे़ॽ खाङ्डिडोॽ खाक्सुङ्मे, तर हागोएम्बाङ आक्टोक खाक्सुङ्मानि। 17 मोडोगे़ॽ असा खिरिस्टबेॽ टुये खो चोङ सिरिस्टि लिटे़, याक्लोहा हिङ्मवा माॽआहा, खाक्सानुमे हागो चोङ हिङ्मवा लिटे़। 18 इघा चोप ले़ःॽखुबा निवाहाङ्नोॽ ले़ये, खोसे़ॽ कानिङ खिरिस्टबाङ खोमि लङ्गाम टोङ्इटे़। मोबा हाइखाजिसो कानिङ्डोक्नोॽ खोमि लङ्गाम लिमे मौका टुये लुनुङ लुमे योम्बोक कानिङ पिटे़, 19 अथबा निवाहाङ्डे़ॽ खिरिस्टबाङ मक्खाम्डेमबेॽहा याॽमिजिमि पापि योम्बोकमि लेखा जोखा मे़ले़ःॽलेॽ खोमि लङ्गाम लिमामि लागि के़डुजि, मोबा इडोक्मा खा खेम्मेॽमे योम्बोकमि जिम्मा कानिङ पिसा। 20 मोडोगे़ॽ कानिङ खिरिस्टराम्बाङ बिन्ति लेन्डुङ्मे़, मोबा निवाहाङ्डे़ॽ कानिङ्बाङ्नोॽ याॽमिजि बिन्ति ले़ःॽमे़ॽनिङ्सिये। हे़निङ निवाहाङ्बेॽ आबानिङे लुनुङ खिरिस्टराम्बाङ हे़निङ बिन्ति ले़न्डुङ्मे। 21 खिरिस्टबेॽ इक्कोसो पाप माडा, मोडोक्सो निवाहाङ्डे़ॽ कानिङ धरमि टोङ्मामि लागि खिरिस्टसोक्पेॽ कानिङ्मि पाप युङ्बेॽटु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.