२ कोरिन्थि 4 - याम्फुआक्खामामि सुॽउबेॽ युङ्बॽआ याङ्सरावा 1 निवाहाङ्डे़ॽ कानिङ खोमि नम्नावाबाङ इगो योम्बोक पिटे़, मोडोगे़ॽ कानिङ्मि आसा सिमेॽटुङ्मानि। 2 कानिङे़ॽ याॽमिजिबाङ कुम्नुङ ङेसिमारोहा योम्बोक ले़ःॽनोॽ ले़ःॽटुङ्मानि। कानिङे़ॽ रेम्सिङ योम्बोक ले़टुङ्मानि, मोबा निवाहाङ्मि बचन फेनुङ्मानि, कानिङे़ॽको निवाहाङ्मि सानिङ आदर ले़ःॽसाङ चाइबमा खारेॽ इःन्डुङ्मे मोबा चोप याॽमिजिडे़ॽ नेन्जामारो बानि बेहोरानुङ्मा लिन्डिङ्मे़। 3 कानिङे़ॽ परचार ले़ःॽपॽआ सुसमाचार असाबाङ्सो मे़न्चुम्डिॽ बोरु नास लिघुबाजिमि लागि चाहिँ ओप्ताङेॽ टे़क्युङ्बॽआडोॽ लिटे़। 4 खोजिमि टुम्बेॽ लुमाहोङ बिस्वास मे़ले़ःॽखुबा याॽमिजिमि लेमे निवानोॽ मक्खाम्डेमबेॽए मङे़ॽमा चाप सैतानडे़ॽ मिक्सुरुम्बा टोङ्बेटे़। मोडोगे़ॽ खिरिस्ट लुबॽआ निवाहाङ्मि नरिङ ले़ये लुमे खा खोमि महिमानुङ्मा सुसमाचार माहाजिडे़ॽ लेहेसुजिने। 5 कानिङ टाङ्बामि खा परचार ले़टुङ्मानि, तर येसुमि लागि कानिङ हे़निङ्मि सेउते लिनुङ येसु खिरिस्टनोॽ परभु ले़ये लुनुङ परचार ले़न्डुङ्मे़। 6 “सेन्जुगुपमि रुम्बेॽ जोति लिरो” लुघुबा निवाहाङ्डे़ॽनोॽ खोमि जोति कानिङ्मि निवाबेॽ युङ्बेटे़। मो जोतिबाङ निवाहाङ इन्डोक बेॽलो ओहाङ्नुङ्मा ले़ये लुमे खा कानिङे़ॽ लेन्डुङ्मे़। चइबानोॽ मो जोति चाहिँ येसु खिरिस्टबाङ खाङ्मुटे़। 7 इडोक्मा जोति बेॽलो मोलनुङ्मा याङ्सरावा आक्खामामि सुॽउबेॽ युङ्डिडोॽ कानिङ याॽमिबेॽ युङ्बॽआ ले़ये। मोडोॽगे़ॽ कानिङ्बाङ ने़ॽनि, तर मो सक्ति चाहिँ निवाहाङ्मि हुकपेॽ टुये लुमे खा छे़ङ्गै लेडोक्इये। 8 कानिङे़ॽ फोरेन फोरेन्नोॽ बेॽलो खालहा खेः आङ्इटुङ्मे, तरसो पिजिक्टोॽ मे़ङ्घे़ॽटिॽ। इमाङ ले़ःॽमे ले़ःॽमे लिटिङ्मारोसो, कानिङ्मि आसा चाहिँ मे़न्सिघे़ॽटिॽ। 9 कानिङ बेॽलो चुङ्जाटामे, तर निवाहाङ्डे़ॽ कानिङ मे़याःॽयाडिॽ, कानिङ मारे मोइटामे, तर मे़सिघे़टिॽ। 10 येसुमिडोॽमा हिङ्मवा कानिङ्बेॽ खाङ्मुरो लुनुङ खोसे़ॽ आङ्बॽआडोॽमा खेः सानिङ कानिङ्मि हिङ्मवाबेॽ आङ्इन्डुङ्मे। 11 कानिङ्मि इगो सिघे़ये हिङाबेॽ येसुमि हिङ्मवा खाङ्मुरो लुनुङ सानिङ सिघे़ॽलो खेः आङ्इन्डुङ्मे। 12 इडोॽ कानिङे़ॽ सानिङ सिघे़ॽलो खेः आङ्मानुङ परभुमि योम्बोक ले़ःॽमाबेॽ हे़निङे़ॽ चाहिँ ए़स्सिमे हिङ्मवा चुप्मिन्डानुमे। 13 “के़ॽ बिस्वास ले़ए़टुङे, मोडोगे़ॽ का यामुङे,” लुनुङ धारमिक नेॽचिराबेॽ साप्खुबा याॽमिबेॽ बिस्वास ले़ःॽमे होङ्निवा टुडिडोक्नोॽ कानिङ्बेॽसो बिस्वास ले़ःॽमे होङ्निवा टुये। मोडोगे़ॽ कानिङे़ॽ बिस्वास ले़न्डुङ्मानुङ यामुन्डिङ्मे़। 14 कानिङे़ॽ लेन्डुङ्मे़, परभु येसु हिङ्रिक टोङ्घुबा निवाहाङ्डे़ॽ कानिङ्सो येसुनुङ हिङ्रिक टोङ्इये। मो निवाहाङ्डे़ॽनोॽ कानिङ्नुङ हे़निङ सोरि येसुनुङ खोमि पेन्ढामबेॽ लाघे़ये। 15 इघा चोप खा हे़निङ्मि लागिनोॽ लिबॽआ ले़ये, इन्ढोङ्होङ इन्डोक बेॽलो याॽमिजिडे़ॽ निवाहाङ्मि अनुग्रहा चुप्मिन्डुजे, मोडोक्नोॽ बेॽलो खोजिडे़ॽ निवाहाङ्मि महिमामि लागि ओहाक पिन्डुजे। बिस्वासबेॽ हिङ्मे 16 मोडोगे़ॽ कानिङ हरेस चासिङ्मानि। कानिङ्मि हिङा नासि लिघे़ॽहोङ्सो कानिङ्मि होङ्निवा चाहिँ सानिङ चोङ चोङ लिमे़ॽनिङ्सिये। 17 इन्ढोङ्होङ कानिङे़ॽ ए़क्साङ चुप्मिये इन्डोक्पेॽसो रुक्खे़निये महान महिमा पोरोक्मे़ॽनिङ्सिन्डुए। मो मिॽमाबेॽको आयु कानिङे़ॽ इॽछोॽ आङ्बॽआ खेःगो चइबानोॽ इमाङ्सो ने़ॽनिबा। 18 कानिङ खाङ्मुहा खामि लागि ने़ॽनि, तर खाङ्मुनिहा खाबेॽ निवा टिन्डुङ्मे, इन्ढोङ्होङ खाङ्मुहा खा चाहिँ इॽछोॽमि लागि ले़हा, तर खाङ्मुनिहा खा चाहिँ सानिङ टुडुङ्घे़हा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.