२ कोरिन्थि 3 - याम्फुचोङ करारमि सेवाकजि 1 कानिङे़ॽ कानिङ्टाङ्बानोॽ नुबा ले़न्डिङ्मा लुमायोक्पॽआ चाहिँ ने़ॽनि, हाइखा इन्डोक याॽमिजिडे़ॽ खोजिटाङ्बामि लागि लुडिडोॽ कानिङे़ॽ हे़निङ, हे़निङे़ॽ कानिङ पत्रा साप्मा पाप्नि। 2 हे़निङ्मि हिङ्मवानोॽ चोप याॽमिजिडे़ॽ नेॽहेयेनुङ लेहेये याॽमिजिमि निवाबेॽ साप्पॽआ पत्राडोॽ ले़ये। 3 हे़निङ्मि हिङ्मवाबेॽ खाङ्मुये, चइबानोॽ खिरिस्टडे़ॽ साप्पॽआ पत्रा चाहिँ हे़निङ्नोॽ ले़न्डानिङे, मो पत्रा लाजे़ॽखुबा कानिङ्नोॽ ले़न्डिङ्मा। तर इगो पत्रा रुङ्गोॽवामि पाटिबेॽ मसिडे़ॽ साप्पॽआ पत्रा ने़ॽनि, तर हिङ्रिक निवाहाङ्मि होङ्निवाडे़ॽ हे़निङ्मि निवामि पाटिबेॽ साप्पॽआ ले़ये। 4 इडोॽ लुहेन्डुङ्मे़ खिरिस्टबाङ कानिङ निवाहाङ्बेॽ पुरा भरोसा युङ्इन्डुङ्मे। 5 इघा इमाङ खासो कानिङ्मि निवाबाङ, बुद्धिबाङ लेङ्इटा लुहेघुबा कानिङ ले़टिङ्मानि, तर कानिङ्बेॽ निवा, सक्ति चोपनोॽ निवाहाङ्बाङ्नोॽ लेङ्इहा। 6 खोसे़ॽ इक्को चोङ हेन्ज्रुङ चोगु, मोबा कानिङ मो हेन्ज्रुङ्बेॽ योम्बोक ले़ःॽहेखुबा सेवाक टोक्सा। इगो चाहिँ पबित्रा होङ्निवामि हेन्ज्रुङ ले़ये, यहुदि धारमिक नियमडे़ॽ चोक्पॽआ ने़ॽनि, मो नियमडे़ॽको सिमवा लाजे़न्डुए, तर पबित्रा होङ्निवाडे़ॽको हिङ्मवा लाजे़न्डुए। चोङ करारमि महिमा 7 मो सिमवा लाप्खुबा यहुदि धारमिक नियम रुङ्गोॽवाबेॽ साप्पॽआ ले़टे़, मो नियम इढे़ॽलो जोतिनुङ्मा ले़टे़। मोसामि नजिकपेॽ मो जोति मे़खे़ॽमे़निङ्सिडारोसो खोमि नजिक इस्राएलि याॽमिजिडे़ॽ मे़ङ्खाङ्हेसुजि। सिमवा लाजे़ॽखुबा यहुदि धारमिक नियमसो मोढे़ॽलो जोतिनुङ्मा ले़टाहोङ, 8 पबित्रा होङ्निवाबाङ लेम्बॽआ योम्बोक छना इन्डोक महिमानुङ्मा ले़ए़ होला ? 9 इन्ढोङ्होङ आप्टिक टिघुबा नियमनोक्सो मोढे़ॽलो महिमानुङ्मा ले़टाहोङ, छना याॽमि धरमि टोङ्घुबा योम्बोक इन्डोक बेॽलो महिमानुङ्मा ले़ए़ होला ? 10 आयुए इगो चोङ नियममि महिमाडे़ॽ, याक्लोए मो महिमा हेजोबेसु। 11 इक्याक नियाक ए़क्साङ मे़खे़ॽखुबा याक्लोए महिमानोक्सो मोढे़ॽलो पोगा, छना सानिङ्मि लागि लेम्बॽआ महिमा इन्डोक बेॽलो महान ले़ए़ होला ? 12 इडोॽ कानिङ्बेॽ इगो आसा टुबॽआसे़ॽ कानिङ बेॽलो आँटिलो लिटिङ्मे़। 13 कानिङ मोसाडोॽमा ने़ॽनि, खोसे़ॽ खोमि नजिकबाङ मे़खे़ॽमे़ॽसिबॽआ जोति इस्राएलिजिडे़ॽ मे़ङ्खाङ्डोक्टुजिरो लुनुङ खोमि नजिक टे़गुए। 14 तर खोजिमि निवा छाक्टुवाक लिबॽआ ले़टे़, मोडोगे़ॽ आइरोसो पुरानो करार नेॽमाबेॽ खोजिडे़ॽ चाइबमा खा मे़लेसुजिरो लुनुङ खोजिमि निवा टे़क्चुम्बॽआसे़ॽ खोजिडे़ॽ मो चाइबमा खा लेसुजिने। मो टे़क्चिरा चाहिँ खिरिस्टबाङ्रेॽनोॽ राप्खे़ये। 15 चइबानोॽ आयुरोसो मोसामि यहुदि धारमिक नियम नेॽमाबेॽ खोजिमि निवा ओप्ताङेॽ टे़क्पॽआडोॽ लुमायोक्पॽआ खा लेहेसुजिने। 16 तर इन्डोक्पेॽ याॽमि परभु येसुमि सुसमाचारबेॽ बिस्वास ले़न्डुए, मोबाङ मो टे़क्चिरा हेङ्घे़ये। 17 इन्ढोङ्होङ परभु लुबॽआ चाहिँ पबित्रा होङ्निवा ले़ये। असानुङ परभुमि होङ्निवा टुये, खोबेॽ इमाङ्मिसो बन्धन माॽआये। 18 कानिङ चोबे़ॽ नजिक टे़क्ठाम ओप्ताङ राप्पेबॽआ नजिकपेॽ परभुमि महिमा खाङ्मुन्डुङ्मे। परभु होङ्निवा ले़येनुङ खोबाङ लेङ्इये मो महिमाडे़ॽनोॽ कानिङ खोडोक्नोॽ टोङ्साङ हागोसो महिमित लिघे़न्डिङ्मा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.