२ कोरिन्थि 2 - याम्फु1 मोडोगे़ॽ हे़निङ फेरि दुःख पिसिॽ हाइकोखेॽ हे़निङ्बेॽ ए़आप्मामि निधो ले़पेटुङे। 2 इन्ढोङ्होङ का साप्थाङ्मेॽखुबा याॽमि हे़निङ्बाङ हाइखा असासो माॽआम्मे, के़ॽ हे़निङ्मिनोॽ निवा टुक्मेॽटुङ्होङ्गो असे़ॽ का साप्थाङ्मेम्मे ? 3 मोडोगे़ॽ का लेम्माबेॽ का हाङ्हाङ टोङ्घुबा याॽमिबाङ्नोॽ दुःखि लिमा मे़सिॽलो लुनुङ के़ॽ मो पत्रा साबुङ। इन्ढोङ्होङ का हाङ्हाङ मिम्माबेॽ हे़निङ्सो हाङ्हाङ मिङ्इन्डानिङे लुनुङ के़ॽ बिस्वास ले़नुङे। 4 इन्ढोङ्होङ हे़निङ दुःखि टोङ्सिॽ ने़ॽनि, तर के़ॽ हे़निङ इन्डोक नम्नम ले़निम्ने़ लुनुङ बेॽलो दुःखि लिनुङ हाःप्साङ मिॽवानुङ हे़निङ मो पत्रा साप्पॽआ ले़टे़। 5 के़ॽ हे़निङ्मि बेॽलोनोॽ निवा टुॽमेॽमा योक्पॽआगो ने़ॽनि, तर का असे़ॽ दुःखि टोङ्इटे़ मोसे़ॽ काबाङ्सो बेॽलो हे़निङ चोप दुःखि टोङ्इटे़। 6 हे़निङ बेॽलो जनाडे़ॽ मो याॽमि दन्डा पिटानुमे, मो दन्डा मोमि लागि के़ॽलो लिटे़। 7 हागो बोरु हे़निङे़ॽ खो आम्लाङ पिनुङ नुरोॽ लुसानुमे, मोडोॽ ए़ले़ःॽमाहोङ खो बेॽलो सुरताबेॽ सिॽनुङ सारोनोॽ दुःखि लिये। 8 मोडोगे़ॽ के़ॽ हे़निङ बिन्ति ले़निम्ने़, मो याॽमि हे़निङे़ॽ चइबानोॽ नम्नम ले़न्डानुम लुमे खा खाङ्मुसानुमे। 9 के़ॽ लुबॽआ हे़निङे़ॽ खसिन्डानिङेन्डे खसिसानिङ्ने लुनुङ हे़निङ जाँच ले़ःॽमामि लागिनोॽ मो पत्रा साबुङे। 10 हे़निङे़ॽ आम्लाङ पिघुबाजि के़ॽसो आम्लाङ पिनुङ्हाजि। मोबा के़ॽ आम्लाङ पिमा खे़ॽहोङ खिरिस्ट येसुमि पोम्बेॽ हे़निङ्मि लागिनोॽ आम्लाङ पिनुङे़। 11 इडोॽ सैतानमि यिम्माङ्बेॽ कानिङ असासो मे़सिॽरो, इन्ढोङ्होङ मोमि चोप रेम्सिङ योम्बोक कानिङे़ॽ लेन्डुङ्मे़। पावल तोरोआसबेॽ 12 का खिरिस्टमि सुसमाचार परचार ले़ःॽसिॽ तोरोआस सहरबेॽ रुक्माबेॽ परभुडे़ॽनोॽ खोमि योम्बोक ले़ःॽमे नुबा मौका पिसा। 13 तर मोबेॽ काङ्मि निसा तितस मे़न्चुप्माबेॽ का बेॽलो हे़क्हे़क मिनिङ, मोबा मोबेॽहा बिस्वासिनुङ हाघे़ॽनुङ का माकेडोनिया मुलुकलाम खडिङ। खिरिस्टबेॽ चुप्मिये बिजय 14 निवाहाङ ओहाक पिमानोॽ खे़ये, इन्ढोङ्होङ खोसे़ॽ कानिङ सानिङ्नोॽ खिरिस्टमि बिजयबेॽ राम्मराप्मिये। खोमि निवामि नम्जानुये खा कानिङ्बाङ चोप ठाउँबेॽ टुप्इन्डुहा। 15 इन्ढोङ्होङ कानिङ्गो छुट्कारा चुप्पॽआजिनुङ नास लिमे़ॽसिबॽआजिमि लागि निवाहाङ्बेॽ खिरिस्टडे़ॽ चेॽटिबॽआ नम्जानुये केवा ले़न्डिङ्मा। 16 छुट्कारा चुप्खुबाजिमि लागिगो इगो नम्जानुये हिङ्मवा ले़ये, तर नास लिमे़ॽनिङ्सिबॽआजिमि लागि चाहिँ इगो सिमवा ले़ये। इडोॽ बेॽएम्मा योम्बोकमि जिम्मा लाहेघुबा असा टुये ? 17 इन्ढोङ्होङ हाइखा याॽमिजिडे़ॽ निवाहाङ्मि सुसमाचार इन्जाडिडोॽ कानिङे़ॽ चाहिँ मोडोॽ ले़टुङ्मानि, तर कानिङ्गो निवाहाङ्डे़ॽनोॽ पाङ्बॽआ ले़न्डिङ्मानुङ खोमिन्नोॽ पोम्बेॽ खिरिस्टमि अधिकारबेॽ मे़रेम्डेॽलेॽ यामुन्डिङ्मा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.