२ कोरिन्थि 13 - याम्फुए़क्साङ्ए चेतवनिनुङ बिदाइ 1 हागो का फेरिसो हे़निङ्बेॽ आप्मे़ॽनिङ्सिङे, इगो खेपडे़ॽ का हे़निङ्बेॽ लेम्बॽआ सुमखेॽ लिये। धारमिक नेॽचिराडे़ॽ लुये, “इमाङ आप्टिक टुहोङ्सो निप्पाङ अथबा सुमबाङ्मि साक्छिमि पोम्बेॽरेॽ पक्का लिये।” 2 इगो खेपबाङ याक्लोएखेॽ हे़निङ्बेॽ लेम्माबेॽ पाप ले़ःॽखुबाजि चेतावनि पिडिडोक्नोॽ आइसो के़ॽ इगोबाङ हे़निङ मोनोॽ चेतावनि पिमे़ॽनिङ्सिनिम्ने़। का फेरि आप्माबेॽ माहा पाप ले़टुङ्घे़ॽखुबाजिनुङ हाइखाजि असासो के़ॽ लेडुङ्जिनिबा। 3 मोडोक्पेॽ काबाङ खिरिस्ट यामुयेन्डे यामुनिबा मोमि परमान हे़निङे़ॽ चुप्मिन्डानुमे। हे़निङ्मि रुम्बेॽ यामुमाबेॽ माङ्माङ्मा ले़ःॽनिबा, तर खोगो हे़निङ्मि रुम्बेॽ सक्तिदाङ्बा ले़ये। 4 खो कमजोर लिनुङ काप्सिङ्बेॽ कानिङ्मि लागि बलि लिसा, तर निवाहाङ्मि सक्तिडे़ॽ खो हिङ्रिक लिसा। इडोॽ कानिङ्सो खोडोक्नोॽ कमजोर लिटिङ्मे़, तर कानिङे़ॽ हे़निङ्मि रुम्बेॽ निवाहाङ्मि योम्बोक ले़ःॽमामि खोमि सक्तिडे़ॽ खिरिस्टनुङ्नोॽ सक्तिनुङ्मा लिन्डिङ्मे़। 5 हे़निङ्मि बिस्वास चाइबमा ले़येन्डे ले़ःॽनिबा लुनुङ याक्लो हे़निङ टाङ्बे़ॽ टाङ्बा जाँच ले़ःॽखाक्सानुमे। चइबानोॽ हे़निङ्मि रुम्बेॽ खिरिस्ट टुये लुमे खा लेसानुमे, हे़निङ्मि रुम्बेॽ खिरिस्ट मे़न्चुप्टानुमहोङ हे़निङ्मि बिस्वास बोलियो ले़ःॽनिबा। 6 के़ॽ आसा ले़ए़टुङे, कानिङ्मि अधिकार चाइबमा लिटे़ लुनुङ हे़निङे़ॽ लेटानुमे। 7 कानिङे़ॽसो हे़निङे़ॽ मङे़हा योम्बोक ले़ःॽमा मे़सिॽरो लुनुङ निवाहाङ्नुङ पारथना ले़ःॽमे़ॽनिङ्सिन्डुङ्मे, कानिङे़ॽ इगो पारथना कानिङ नुबा ले़न्डिङ्मा लुनुङ खाङ्मुमामि लागि ले़ःॽपॽआ ने़ॽनि, तर कानिङ्मि अधिकार चाइबमा लिबॽआ मे़ङ्खाङ्डोक्सो हे़निङे़ॽ नुरोॽ योम्बोक ले़ःॽहेसानुमे लुनुङ पारथना लेन्डुङ्मे़। 8 इन्ढोङ्होङ कानिङ्गो चाइबमा खामि लागिरेॽ योम्बोक ले़न्डुङ्मे़, तर चाइबमा खामि बिरोधबेॽ इमाङ्सो ले़ःॽहेसुङ्मानि। 9 कानिङ चाहिँ इमाङ्सो मे़ले़ःॽहेघुबा कमजोर, तर हे़निङ चोप योम्बोक ले़ःॽहेघुबा बोलियो लिबॽआ खाबेॽ कानिङ साप्थाङ्इन्डिङ्मे़। मोबा हे़निङ बिस्वासबेॽ पक्का लिहेसानिङे लुनुङ हे़निङ्मि लागि कानिङ पारथना ले़न्डुङ्मा। 10 हे़निङ्बेॽ लेम्माबेॽ निवाहाङ्डे़ॽ का पिबॽआ अधिकार हे़निङ नम्नमनोॽ मे़ॽनिङ बेभार ले़ःॽमा मे़सिॽलो लुनुङ का हे़निङ्बाङ ओः टुमाबेॽ इघा खा साप्मे़ॽनिङ्सिनुङे। मो अधिकारगो हे़निङ नासि ले़ःॽमामि लागि ने़ॽनि, तर नुबा याॽमि टोङ्मामि लागि पिबॽआ ले़ये। तुरनि खा 11 के़हा वावानिसानुङ नानुसाजि हागो का बिदा लिङे, हाङ्हाङ्नुङ पेनानिङे। बिस्वासबेॽ पक्का लिमामि लागि सानिङ बोल लिसानिङे। हे़निङ बिन्ति ले़ःॽपॽआ खा खेप्सानुमे, इक्कोसे़ॽ लुबॽआ खा हाइकोसे़ॽ खेप्सानुमे, मे़ङ्खिरेॽ पेनानिङे। मोबा सान्तिनुङ नम्नम पिघुबा निवाहाङ हे़निङ्नुङ पेङ्इये। 12 इक्कोसे़ॽ हाइको चोखो नम्नमनुङ सेवा मुसानिङे। 13 इगोबेॽ खिरिस्टमि पबित्रा सेवाकजिडे़ॽसो हे़निङ सेवायो लुटामे। 14 परभु येसु खिरिस्टडे़ॽ हे़निङ अनुग्रहा ले़ःॽरो, निवाहाङ्मि नम्नमनुङ पबित्रा होङ्निवा हे़निङ्नुङ सानिङ टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.