२ कोरिन्थि 12 - याम्फुपावलडे़ॽ खाङ्बॽआ सेन्जिसेम्माङ 1 के़ॽ इमाङ मे़न्चुप्सो गरब ले़ःॽमानोॽ खे़ये। परभुबाङ चुप्पॽआ सेन्जिसेम्माङ्नुङ निवाहाङ्डे़ॽ खाङ्मुबॽआ खा हागो इःनुङे। 2 खिरिस्टबेॽ बिस्वास ले़ःॽखुबा इक्को याॽमि के़ॽ लेनुङे़, खो इक्पोङ रि निङ याक्लो सुम्जि थाङ्सिरिबेॽ ठेॽखे़ॽटुजि, इगो खा हिङानुङ ठेॽखे़ॽटुजे ना होङ्निवासो ठेॽखे़ॽटुजे के़ॽ लेसुङ्नि, निवाहाङ्डे़ॽनोॽ लेन्डुए। 3 इगो खा के़ॽ फेरिसो लुनुङे, थाङ्सिरिॽटु ठेॽखे़ॽपॽआ खा लेनुङे़, तर मो याॽमि हिङानुङ्नोॽ ठेॽखे़ॽटुजे ना होङ्निवारेॽ ठेॽखे़ॽटुजे मो खा के़ॽ लेसुङ्नि, मो खा निवाहाङ्डे़ॽनोॽ लेन्डुए। 4 मोबा मोबेॽ खोसे़ॽ याॽमिमि खाप्लाबेॽ इःनोॽ इःहेनिहा खा खेप्सु, माहा खा निवाहाङ्डे़ॽ याॽमिजि मे़इःमेॽटा। 5 के़ॽ मो याॽमिमि लागि गरब ले़नुङे। तर काङ्टाङ्बामि खाबेॽ गरब ले़ःॽमारोहा खा चाहिँ काङ्मि कमजोरिबाङ हाइखा खानोॽ काप्टुङ्नि। 6 के़ॽ गरबनोॽ ले़ःॽमा मिङ्ङाहोङ्सो का उम्बरिङ चाहिँ लिङानिबा, इन्ढोङ्होङ के़ॽ चाइबमा खा इःमे़ॽनिङ्सिनुङे। याॽमिजिडे़ॽ काङ्मि टुम्बेॽ इमाङ खाङ्इटुजेनुङ खेम्इटुजे माहा खाबाङ बेॽलो का मे़मिॽमिरो लुनुङ के़ॽ मिॽइनुङे। 7 तर निवाहाङ्डे़ॽ खाङ्मुबॽआ बेॽलो खा चुप्मिटुङ्हा कानुङ का बेॽए मे़रे़ङ्लो लुनुङ काङ्मि हिङाबेॽ इक्को सेनडोॽमा खेः का पिबॽआ ले़ये। मोसे़ॽ काङ्मि हिङाबेॽ घरि घरि खाक्नुङ का काङायोङ्बा लिमे़ॽनिबा। 8 इगो काबाङ राप्पेबेॽमा लुनुङ परभुनुङ सुमखेॽ बिन्ति ले़टुङ। 9 तर परभुडे़ॽ का इडोॽ लुसिङा, “काङ्मि अनुग्रहा हे़ने़ए़ लागि के़ॽलो टुहा, इन्ढोङ्होङ के़हा सक्ति कमजोरिबेॽनोॽ पुरा लिहा।” मोडोगे़ॽ खिरिस्टमि सक्ति काबेॽ टुरो लुनुङ काङ्मि कमजोरिबेॽनोॽ बेॽलो साप्थाङ्मानुङ गरब ले़नुङे। 10 मोडोगे़ॽ खिरिस्टमि लागि का कमजोर ले़ःॽमाबेॽ, हेलाबेॽ सिॽमाबेॽ, अप्ठ्यारोबेॽ सिॽमाबेॽ, चुङ्जामाबेॽ मोबा दुःख आङ्मा सिॽमाबेॽ साप्थाङ्इङे, इन्ढोङ्होङ का कमजोर लिमाबेॽ छना बेॽलो परभुमि बोलनुङ्मा लिङे। पावलडे़ॽ कोरिन्थिबेॽहा बिस्वासिजि लुबॽआ 11 हे़निङे़ॽनोॽ का उम्बरिङ्डोॽ कामेॽटानिङ, इन्ढोङ्होङ हे़निङ्बाङ्गो काङ्मि आदर लिमा खडे़। का इमाङ मे़ले़टिङासो माहा बेॽहा बेॽहा एप्पा चोङ्साजिबाङ चुक्ङानिबा। 12 के़ॽ सानिङ काङ्मि निवा किॽयु मिॽयु मे़ले़ःॽलेॽ, सक्तिनुङ्हा मोबा खरिहा योम्बोक ले़ःॽनुङ का चाइबमा एप्पा चोङ्सा ले़ङे लुमे खामि चिङ्गा हे़निङ्मि रुम्बेॽ योम्बोक ले़ःॽनुङ परमान पिटुङे। 13 हे़निङ हाम्बे खाबेॽ हाइखा मन्डलिबेॽहाजिबाङ चुॽइन्डानिङे ? इडोॽरेॽ के़ॽ हे़निङ्बाङ इमाङ सहायतासो मे़ङाःगुङ! इगो खामि लागि का आम्लाङ पिमाजे! 14 याक्लो निघेॽ हे़निङ्बेॽ लेम्बेटिङे, हागो फेरिसो का हे़निङ्बेॽ आप्मे़ॽनिङ्सिङे, इगो खेपसो खरचामि लागि हे़निङ दुःख पिनिम्नानि। हे़निङ्मि याङ का पाप्ङानि, तर हे़निङ चाहिँ का पाप्मिङे। इन्ढोङ्होङ पाबा मामाडे़ॽ पसाजिबाङ ने़ॽनि, पाबा मामाडे़ॽ हाम्युङ्बॽआ याङ्सरावा पसाजिडे़ॽ चाहिँ चुप्मिन्डुजे। 15 हे़निङ्मि लागि के़ॽ साप्थाङ्मानुङ चोप थोक पिनिम्ने़, माहा थोकरेॽ ने़ॽनि काङ्मि हिङ्मवासो पिनिम्ने़। के़ॽ चाहिँ हे़निङ इडोॽ बेॽलो नम्नम ले़टुङ, इमा हे़निङे़ॽ चाहिँ का चुक्लो नम्नम ले़न्डानिङे ? 16 के़ॽ कानिङ पाप्मिहा खरचा मे़ङाःगुङ, इगो खा हे़निङे़ॽ लेन्डानुम, तर इक्को निप्पाङ याॽमिजिडे़ॽ का चेन्दुबा लिनुङ हे़निङ फाङ्सेडुङ लुनुङ लुम्मे। 17 के़ॽ हे़निङ्बेॽ पाङ्बॽआ याॽमिजिबेॽ हाम्बे याॽमिमि साटो के़ॽ हे़निङ्बाङ इमा फाइदा लासुङे ? 18 के़ॽ तितस हे़निङ्बेॽ खडे लुसुङ मोबा खोनुङ हाइको निसासो पाक्सुङ। इमा तितसडे़ॽ हे़निङ्बाङ इमाङ फाइदा लासुहा ? खोनुङ के़ॽ इक्कोनोॽ निवाडे़ॽ योम्बोक ले़टुङ्मे़ ने़ॽनेन्डे ? 19 इघा चोप खा कानिङे़ॽ टाङ्बा नुबा ले़न्डिङ्मा लुनुङ टाङ्बामि टुम्बेॽ लुबॽआ मिॽइन्डानुमे होला। निवाहाङ्मिनोॽ पोम्बेॽ खिरिस्टमि लामबाङ कानिङे़ॽ लुमे़ॽनिङ्सिडुङ्मे़। काङ्मि लङ्गामजि, कानिङे़ॽ ले़ःॽपॽआ इघा चोप खा हे़निङ्मि फाइदामि लागिनोॽ ले़हा। 20 का आक्कोबेॽ लेम्माबेॽ के़ॽ मिॽपॽआबाङ हे़निङ हाइकोनोॽ लिबॽआ, मोबा के़ॽ हे़निङे़ॽ मिॽपॽआबाङ हाइकोनोॽ बेबहार ले़ःॽमा खे़येन्डे मिॽनुङ किस्सिङे। हे़निङ्मि रुम्बेॽ खिमाचुमा, चेजेवा निवा, सुरिॽयाॽवा, टाङ्बामिरेॽ नुबा मिॽखुबा, हाइखाजि इःजाघुबा, इःजाघुसे़ॽचुबॽआ, बेॽए रे़ङ्बॽआनुङ गोलमाल लिटानिङेन्डे लुनुङ के़ॽ मिॽइनुङे। 21 हाइकोखेॽ हे़निङ्बेॽ लेम्माबेॽ आक्कोबेॽहा इक्को निप्पाङ याॽमिजिडे़ॽ याक्लोनोॽ इडोक्हा पाप योम्बोक असुद्ध योम्बोक, बेभिचारनुङ ङेसिमा टे़क्टे़क्हा योम्बोक ले़ःॽनुङ्सो निवाहाङ्बेॽ मे़न्टेबॽआ खाङ्नुङ दुःखि लिमा खे़येन्डे मिॽइनुङे। इडोॽ निवाहाङ्डे़ॽ का हे़निङ्मि पोम्बेॽनोॽ मिॽमु युङ्इयेन्डे मिॽनुङ का किस्सिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.