२ कोरिन्थि 11 - याम्फुपावलनुङ मे़ॽनोक्हा खा इःघुबाजि 1 का उम्बरिङ याॽमिडोॽ यामुङाहोङ्सो हे़निङे़ॽ आङ्बेॽमाजे लुनुङ बिन्ति ले़ए़निम्ने़। 2 इक्कोमा नायोङ्बा खिरिस्टनुङ हे़निङ्मि साक्खि राःप्पेटुङे। इडोॽ इक्को नायोङ्बामि पबित्रा नायोङ्माडोॽ हे़निङ खिरिस्ट पिबेनिम्ने़। मोडोॽगे़ॽ निवाहाङ्बेॽ टुबॽआडोॽमा चेजेवा हे़निङ्मि लागि काबेॽसो टुये। 3 तर सैतानडे़ॽ पुसे़ॽ लिनुङ हब्बा रेम्बॽआडोॽ मोसे़ॽ हे़निङ्मि खिरिस्टबेॽ टिबॽआ सोझोनुङ चोखो भक्तिनुङ्मा निवासो नासि ले़न्डुएन्डे लुनुङ का किस्सिटिङे। 4 इन्ढोङ्होङ हे़निङ्बेॽ याॽमिजि लेन्नुङ हाइको येसुमि टुम्बेॽ परचार ले़पेॽमिहोङ मोबा हे़निङे़ॽ चुप्पॽआ होङ्निवानुङ सुसमाचारबाङ हाइकोनोॽ होङ्निवानुङ सुसमाचार खेम्मेॽमिहोङ हे़निङे़ॽ चइबानोॽ मिॽइन्डानुमेले़, मोबा हे़निङे़ॽको ने़ःक्चइ बिस्वास ले़न्डानुमेले़ः। 5 माहा खोजि टाङ्बा चोप्पाङ एप्पा चोङ्सा मिॽखुबाजिबाङ का इमाङ खाबेॽसो चुक्ङानिबा। 6 के़ॽ खोजिडे़ॽ लुडिडोॽ मे़इःलेसुङ्होङ्सो माहाजिबाङ चुक्लो निवा काबेॽ माॽआये। इघा चोप खा कानिङे़ॽ हे़निङ नुरोॽ लुबेटुङ्मे। 7 का ए़डेॽमा लिनुङ हे़निङ चाहिँ बेॽहा टोङ्नुङ निवाहाङ्मि सुसमाचार के़ॽ हे़निङ्नुङ इमाङ मे़लारेॽ खेम्मेॽमाबेॽ इमा के़ॽ पाप लेटुङे ? 8 हे़निङ्मि रुम्बेॽ सुसमाचारमि योम्बोक ले़ःॽमाबेॽ हाइखा मन्डलिबाङ याङ चामा उङ्मा सहायता लानुङ खोजिबाङ के़ॽ ङाप्टिडोॽ लिसा। 9 हे़निङ्नुङ का टुमाबेॽ इमाङ्मि खाँचो सिॽमाबेॽसो हे़निङ दुःख पिमा मे़मिनिङ। का खाँचो सिॽमाबेॽ माकेडोनिया मुलुकबेॽहा निसाजिडे़ॽ लाघिॽटामि। हागोसो हे़निङ दुःख पिमा मिङ्ङानि, इघा खाबेॽ याक्लोसो हे़निङ दुःख मे़म्पि, हागोसो दुःख पिनिम्नानि। 10 खिरिस्टमि चाइबमा खा काबेॽ टुडुङ्रो अखैया मुलुकबेॽहा याॽमि असे़ॽसो इगो के़ए़ गरबमि बोल हेजोहेसुजिनि। 11 के़ॽ इन्ढोङ इडोॽ लेटुङे ? हे़निङ नम्नम मे़ले़ःॽपॽआसे़ॽटे ? के़ॽ हे़निङ नम्नम ले़ःॽपॽआ चोप खा निवाहाङ्डे़ॽ लेन्डुहा। 12 के़ॽ आयुरो ले़ःॽटिङ्बॽआ योम्बोक सानिङ्नोॽ ले़नुङे। माहा खोजि टाङ्बा चोप्पाङ एप्पा चोङ्सा रे़ङघुबा याॽमिजिडे़ॽ कानिङ्मिडोॽ योम्बोक ले़टुङ्मा लुनुङ बेॽहा खा इःनुङ बेॽए रे़ङ्डोक्मिने। 13 इन्ढोङ्होङ माहा याॽमिजि मे़ॽनोक्हा एप्पा चोङ्साजि, रेम्सिङ योम्बोक ले़ॽखुबाजि ले़म्मे। माहाजिगो खिरिस्टमि एप्पा चोङ्सा लिमारेॽ योॽइम्मे तर ने़ॽनिहाजि। 14 इगो इमाङ्सो खरिमा खा ने़ॽनि, इन्ढोङ्होङ सैतानसो जोतिनुङ्मा थाङ्सिरिदुतडोॽ लिनुङ खाङ्मुमा योॽइये। 15 मोडोगे़ॽ सैतानमि योम्बोक ले़ःॽखुबाजिसो निवाहाङ्मि पोम्बेॽ धरमि सेवाक लिनुङ खाङ्मुमा योॽइम्मे, इमाङ्सो खरिमा खा ने़ॽनिबा। ए़क्साङ्गो माहाजिडे़ॽ ले़ःॽपॽआ योम्बोकमि इनाम चुप्मानोॽ खे़ये। पावलडे़ॽ आङ्बॽआ खेः 16 के़ॽ फेरि लुनिम्ने़, का असे़ॽसो उम्बरिङ ए़मिॽमाजे। उम्बरिङ्नोॽ मिॽइन्डानुमेहोङ्सो के़ॽ काङायोङ्बानुङ्मा लुबॽआ खा बिस्वास ले़टानुमे। 17 चइबानोॽ का काङायोङ्बा लिनुङ के़ॽ उम्बरिङ खा इःमे़ॽनिङ्सिनुङे। इगो खा परभुडे़ॽ इःमेॽपॽआ ने़ॽनिबा। 18 हाइखा याॽमिजिडे़ॽ टाङ्बामि खाबेॽ काङायोङ्बा खा इःडिडोक्नोॽ कासो काङायोङ्बा लिङे। 19 हे़निङ इडोॽ बेॽलो निवादाङ्बा लिटानिङ, साप्थाङ्मानुङ उम्बरिङ्जिमि बिरोङ्सो योङ आङ्हेन्डानुमे ले़ए़! 20 इन्ढोङ्होङ याॽमिजिडे़ॽ हे़निङ सेउतेनोॽ टोक्सामिहोङ्सो, हे़निङ्मि चोप थोक लाघे़ॽटुजिहोङ्सो, हे़निङ रेम्जामिहोङ्सो, हे़निङ पोम्बेॽ बेॽए रे़ङ्मिहोङ्सो मोबा हे़निङ फे़ःक्मिहोङ्सो माहा चोप हे़निङे़ॽ योङ आङ्इन्डानुमे। 21 कानिङे़ॽ चाहिँ इडोॽ मे़ले़ःॽहेसुङ्मा मिॽनुङ का ङेसिङे। तर याॽमिजिडे़ॽ इमाङ इमाङ खाबेॽ काङायोङ्बा रे़ङ्मिहोङ कासोङ काङायोङ्बा रे़ङ्इङे। कामागो का उम्बरिङ्डोक्नोॽ कामे़ॽनिङ्सिङे। 22 इमा खोजि हिब्रु जातिजि ले़म्मे ? कासो हिब्रुनोॽ ले़ङे। खोजि इस्राएलिजि ले़म्मे ? कासो इस्राएलिनोॽ ले़ङे, इमा खोजि अब्राहाममि पसाजिडे ? कासो खोमिन्नोॽ पसा ले़ङे। 23 इमा खोजि खिरिस्टमि सेवाकजि ले़म्मे ? का खोजिबाङ बेॽलो खिरिस्टमि नुबा सेवाक ले़ङे। का नाक्सुबाङ्डोक्नोॽ यामुमे़ॽनिङ्सिङे, खोजिबाङ बेॽलो दुःख ले़ःॽनुङ के़ॽ योम्बोक ले़टुङ, बेॽलोखेॽ तिरिङ्गा खिमबेॽ से़क्सिघे़ॽमा सिॽटिङा। नेॽनोक नेॽहेनिहा कोररामि मोःक्मा खेः आक्सुङ। कालमि याबुकपेॽ बेॽलोखेॽ सिॽटिङ। 24 यहुदिजिमि हुकबाङ के़ॽ उन्चालिस उन्चालिस कोररा ङाउमखेॽ मोःक्मा खेः आङ्इटुङे। 25 सुमखेॽ रोमिजिडे़ॽ का टोङ्इरे़ॽ मोगामि, इक्खेॽ के़हा सतुरजिडे़ॽ का सेॽनेमामि रुङ्गोॽवाडे़ॽ फे़क्सामि, सुमखेॽ का साङ्बॽआ योङा जाहाज पिजिक्टोॽ योघडा। इक याक इकसेङ योङाबेॽनोॽ पेम्मा सिॽटा। 26 सानिङ के़ॽ मरामबेॽ किस्सिमा खेः आक्सुङ, होङ्मा चःक्खे़ॽमाबेॽ, खुसुबाङ्जिमि हुकपेॽ सिॽटिङ, टाङ्बामि जातिजिबाङ चुङ्जामा खेः आक्सुङ, अयहुदि जातिजिबाङ किस्सिमवा खेः आक्सुङ। नाम्भुङ्लाबेॽ, माहोङ्माबेॽ, रेम्सिङ वावानिसानुङ नानुसाजिमि रुम्बेॽ बेॽलो खालहा किस्सिमा खेः आक्सुङ। 27 के़ॽ इन्डोक सेन्डा इम्सो मे़इम्लेॽ, होप्तिॽवानुङ योम्बोक ले़टुङ। बेॽलोखेॽ सकसिमानुङ वाइमा आक्सुङ। बेॽलोखेॽ चामासो मे़न्चारेॽनुङ चुङ्बेॽ कुहाङ चेॽ मे़ॽनिङ चुङ आक्सुङ। 28 माहा दुःखरेॽनोॽ ने़ॽनि, चोप मन्डलिमि लागि सुरतानुङ अबिभारा काबेॽ टुये। 29 बिस्वासबेॽ असा कमजोर लिमाबेॽ कासो मोडोक्नोॽ लिसिङ, खोजि पापबेॽ फाङ्सिघे़ॽमाबेॽ काङ्मि निवाबेॽ मि हक्सा। 30 के़ॽ काङायोङ्बानोॽ लिमा खे़ॽहोङ, का कमजोर लिबॽआ खाबेॽ काङायोङ्बा रे़ङ्इङे। 31 का रेम्डेॽङानि लुनुङ्गो परभु येसुमि पाबा निवाहाङ्डे़ॽनोॽ लेन्डुहा, सानिङ निवाहाङ ओहाङ लिरो। 32 का दमस्कस सहरबेॽ टुमाबेॽ अरितस हाङ्बामि एप्पा डायोङ्बाडे़ॽ का राःप्मामि लागि दमस्कस सहरमि मुल राम्डेमबेॽ तिरिङ्गाजि हुङ्मेॽटुजि। 33 तर के़हा लङ्गामजिडे़ॽ इक्को चे़न्डाबेॽ एन्नुङ पडागे़ॽ हिःक्नुङ परखालमि जोस्केलिबाङ का हेॽएन्नुङ माहाजिमि हुकबाङ चिःॽखे़ॽमाराप्टामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.