२ कोरिन्थि 10 - याम्फुपावलमि योम्बोक 1 का पावल, हे़निङ्मि पोम्बेॽ ए़डेम्मा लिङेरो, तर ओः टुमाबेॽ याटेवा ले़ङेरो लुमे खा मुॽइटे़ले़। खिरिस्टडोक्नोॽ ए़डेम्मा लिनुङ, नम्नावानुङ्मा लिनुङ हे़निङ बिन्ति ले़निम्ने़। 2 का लेम्माबेॽ याटेवा ए़लिमेॽमाजे लुनुङ के़ॽ बिन्ति ले़निम्ने़। कानिङ मक्खाम्डेमबेॽहा याॽमिजिडोॽ ले़न्डानिङ लुघुबा याॽमिजिनुङ का याटेवानोॽ लिङे। 3 कानिङ हिङाबेॽ टुन्डिङ्मा तर मक्खाम्डेमबेॽहा याॽमिजिडोॽ खिमाचुमा ले़टिङ्मानि। 4 ङे ले़ःॽमाबेॽ पाप्मिहा कानिङ्मि हतियार मक्खाम्डेमबेॽहा हतियारडोॽ ले़ःॽनिहा, कानिङ्मि हतियारगो किल्लाडोॽहा छॽइहा खा योबेहेघुबानुङ निवाहाङ्मि सक्तिनुङ्बा हतियार ले़हा। 5 निवाहाङ्मि निवा टेडिघरिक्हा खानुङ काङायोङ्बानुङ्हा बाधा कानिङे़ॽ नास ले़न्डुङ्मे। खिरिस्टमि आग्या पालना ले़ःॽखुबा लिमामि लागि चोप मङे़हा निवा अधिनबेॽ युङ्इन्डुङ्मे। 6 हे़निङ चोप आग्या पालना ले़ःॽखुबा लिबेयेम्बाङ, आग्या पालना मे़ले़ःॽखुबाजि चोप दन्डा पिमामि पोरोक्इन्डिङ्मा। 7 हे़निङ्मि पोम्बेॽ टुहा खा खाक्सानुमे, इक्को याॽमिडे़ॽ का खिरिस्टमि याॽमि ले़ङे मिॽइन्डुहोङ, खोडोक्नोॽ कानिङ्सो खिरिस्टमि याॽमि ले़न्डिङ्मे लुमे खा खोसे़ॽ लेमा खे़ये। 8 परभुडे़ॽ का पिबॽआ अधिकारमि खाबेॽ के़ॽ बेॽहा खा इःसुङ्होङ्सो ङेसिङानि, इन्ढोङ्होङ काङ्मि अधिकार हे़निङ नास ले़ःॽमामि लागि ने़ॽनि, तर हे़निङ नुबा याॽमिजि टोङ्मामि लागि ले़ये। 9 के़ॽ हे़निङ पत्रा साप्नुङ किस्सिमा उःक्पॽआ ए़मिडानुमे। 10 इक्को निप्पाङ याॽमिजि काम्मि होला, “पावलमि पत्रा सारोनोॽ खरोनुङ छॽइहा, तर पोम्बेॽ चुप्माबेॽ चाहिँ सोझो लिनुङ यामुहेनिबा लिये।” 11 मोडोक्हा याॽमिजिडे़ॽ इगो लेमा खे़ये कानिङ ओःबेॽ टुमाबेॽ पत्राबाङ लुबॽआ खानुङ हे़निङ्नुङ सोरि टुमाबेॽहा खा इक्कोनोॽ ले़न्डुङ्मे। 12 टाङ्बा बेॽएम्मा मिॽखुबा याॽमिजिनुङ कानिङ्सो खोडोक्नोॽ बेॽए लिमा बोल ले़टुङ्मानि। खोजिडे़ॽको खानोॽ लेसुजिने। तर खोजिटाङ्बे़ॽ टाङ्बा नुबा मिङ्इम्मेनुङ इक्कोसे़ॽ हाइको बेॽए लिमानुङ काङायोङ्बा रे़ङ्इम्मे। 13 कानिङ्गो माहाजिडोॽ चुघे़ॽलो काङायोङ्बा लिसिङ्मानि। निवाहाङ्डे़ॽ कानिङ हे़निङ्ठोक रुक्मे योम्बोक पिटे़ मोमि लागिरेॽ बेॽए खा इःन्डुङ्मे। 14 हे़निङ्बेॽ याक्लो कानिङ मे़लेम्बॽआ खा इसाङ बेॽहा रे़क्सिङ्मानि, इन्ढोङ्होङ हे़निङ्बेॽ चोप्पाङ याक्लो खिरिस्टमि सुसमाचार खेम्मेॽसिॽ कानिङ्नोॽ लेम्बॽआ ले़टिङ्मा। 15 हाइखाजिडे़ॽ ले़ःॽपॽआ योम्बोकसो कानिङे़ॽ ले़ःॽपॽआ लुनुङ बेॽहा खा इःसुङ्मानिबा। कानिङ्मि बेॽए आसा चाहिँ हे़निङ बिस्वासबेॽ बोलियो लिसानिङे मोबा कानिङ्मि योम्बोक ले़ःॽठाम ठाउँ बेॽलो लिघे़ॽरो। 16 मो लुबॽआ चाहिँ हाइखा याॽमिजिडे़ॽ याक्लोनोॽ ले़ःॽपेबॽआ योम्बोकपेॽ बेॽहा खा इःमा ने़ॽनि हे़निङ्मि ठाउँबाङ हाइखा देसबेॽ सुसमाचार परचार ले़ःॽहेसुम लुनुङ मिॽइन्डुङ्मे़। 17 धारमिक नेॽचिराडे़ॽ लुये, “बेॽहा खा इःमा मिॽखुबाजिडे़ॽ निवाहाङ्मि टुम्बेॽनोॽ इःसुजिरो” 18 इन्ढोङ्होङ खोमटाङ्बे़ॽ टाङ्बा नुबा ले़ङे काघुबा नुबा लिनिबा, तर परभुडे़ॽ नुबा लुबॽआ याॽमि चाहिँ नुबा लिये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.