२ कोरिन्थि 1 - याम्फु1 निवाहाङ्डे़ॽ मिॽटिडोक्नोॽ खिरिस्ट येसुमि एप्पा चोङ्सा लिबॽआ का पावलनुङ कानिङ्मि निसा तिमोथिबाङ, निवाहाङ्बेॽ बिस्वास ले़ःॽखुबा कोरिन्थि सहरबेॽ पेङ्घुबा याॽमिजि, मोबा अखैया मुलुकबेॽ टुघुबा चोप पबित्रा याॽमिजिमि लागि इगो पत्रा साप्मे़ॽनिङ्सिन्जुङे। 2 कानिङ्मि निवाहाङ पाबानुङ परभु येसु खिरिस्टडे़ॽ हे़निङ अनुग्रहानुङ सान्ति पिरो। निवाहाङ्डे़ॽ चोप सन्त्वना पिये 3 कानिङ्मि परभु येसु खिरिस्टमि पाबा निवाहाङ्मि ओहाङ लिरो। खो नम्नावादाङ्बा पाबा ले़येनुङ खोसे़ॽ चोप याॽमिजि सान्त्वना पिन्डुजे। 4 निवाहाङ्डे़ॽनोॽ कानिङ चोप खालहा दुःखबेॽ सान्त्वना पिये, मोबा कानिङे़ॽसो दुःखबेॽ सिॽपॽआ हाइखा याॽमिजि सान्त्वना पिहेरो लुनुङ खोसे़ॽ कानिङ सान्त्वना पिटे़। 5 इन्डोक कानिङ खिरिस्टमि लागि कस्ट आङ्इन्डुङ्मे, मोडोक्नोॽ खिरिस्टबाङ कानिङे़ॽ बेॽलो सान्त्वना चुप्मिन्डुङ्मे। 6 कानिङे़ॽ दुःख आक्सुमहोङ मो हे़निङ्मिनोॽ सान्त्वनानुङ छुट्कारामि लागि ले़ये। कानिङे़ॽ सान्त्वना चुप्टुङ्माहोङ हे़निङे़ॽसो सान्त्वना चुप्मिन्डानुमे। मोबा कानिङे़ॽ आङ्बॽआडोॽहा दुःख आङ्मे सक्तिसो हे़निङे़ॽ चुप्मिन्डानुमे। 7 हे़निङ्बेॽ युङ्बॽआ कानिङ्मि आसा इन्डोक्पेॽसो सिनिबा। कानिङे़ॽ लेन्डुङ्मे़, इन्ढोङ्होङ कानिङे़ॽ आङ्बॽआडोॽहा दुःख हे़निङे़ॽसो आङ्इन्डानुमे, कानिङे़ॽ चुप्पॽआ सान्त्वना हे़निङे़ॽसो चुप्मिन्डानुमे। 8 वावानिसानुङ नानुसाजि खेप्सानुमे, कानिङे़ॽ एसिया मुलुकबेॽ आङ्बॽआ दुःखमि टुम्बेॽ हे़निङे़ॽ लेयागानुमे लुनुङ मिॽनिम्ने़। मोबेॽ कानिङे़ॽ सारोनोॽ बेॽएम्मा चुङ्जामा खेः आक्सुङ्मा, कानिङ हिङ्इन्डिमा लुमे आसानोॽ माॽआड। 9 कानिङ्मिगो सिमा बेला लेङ्इटे़ले़ लुनुङ मिप्पॽआ ले़टे़। कानिङ टाङ्बासोक्पेॽ भरोसा ले़ःॽखुबाजि लिमामि ने़ॽनि, तर सिघे़ॽपॽआजि हिङ्बोक्खुबा निवाहाङ्बेॽरेॽ भरोसा ले़ःॽहेखुबा लिसिॽ लुनुङ इडोॽ लिसा। 10 निवाहाङ्डे़ॽ कानिङ मोढे़ःॽलो किस्सिमारोमा याकबाङ छुटाबा ले़टानुङ खोसे़ॽ सानिङ छुट्कारा ले़ये। कानिङे़ॽ खोसोक्पेॽ भरोसा युङ्इटुङ्मे़ खोसे़ॽ फेरिसो कानिङ छुटाबा ले़ये। 11 हे़निङे़ॽसो कानिङ्मि लागि पारथना ले़ःॽनुङ सहायता ले़ःॽमा खे़ये। इडोॽ बेॽलो कानिङ्मि लागि पारथना ले़ःॽमाबेॽ मोमि साटो निवाहाङ्डे़ॽ कानिङ आसिस पिये, मोबा बेॽलो याॽमिजिडे़ॽ कानिङ्मि लागि निवाहाङ ओहाक पिन्डुजे। पावल कोरिन्थिबेॽ खे़ॽमा मे़मिना 12 मक्खाम्डेमबेॽहा याॽमिजिनुङ मोबाङ्सो बेॽलो हे़निङ्नुङ सोरि पेम्माबेॽ कानिङ्मि चाल चलन चोखो युङ्नुङ इमान्दार हिङ्बॽआ खा निवाबाङ इमाङ मे़मिॽलेॽ लुहेन्डुङ्मा। इघा खाबेॽ कानिङ ओहाक कान्डिङ्मे़। इगो चाइबमा निवा कानिङे़ॽ निवाहाङ्बाङ चुप्मिटुङ्मे। इगो निवाहाङ्मि अनुग्रहाबाङ चुप्पॽआ ले़ये, तर याॽमिमि निवा ने़ॽनिबा। 13-14 हे़निङे़ॽ नेॽमानुङ लेमा छॽइहा खा कानिङे़ॽ इमाङ्सो साबुङ्मानि। आयुरो हे़निङे़ॽ काजिङ्मि टुम्बेॽ चोपनोॽ मे़लेडिॽटानुमे, तर हागो चोप लेन्डानुमे लुनुङ आसा युङ्इन्चुङे। परभु येसु लेम्माबेॽ, कानिङे़ॽ हे़निङ्मि टुम्बेॽ गरब ले़टिडोॽ, हे़निङे़ॽसो कानिङ्मि टुम्बेॽ गरब ले़ःॽहेन्डानुमे। 15 कानिङे़ॽ इक्कोसे़ॽ हाइको नुरोॽ लेन्डानुमे लुमे खाबेॽ पक्का भरोसा काबेॽ टुसे़। मोडोगे़ॽ हे़निङे़ॽ फेरिसो आसिस चुप्टानुमे लुनुङ हाइके खेॽ हे़निङ चुप्सिॽ आप्मा मिनिङे। 16 माकेडोनिया मुलुकबेॽ खे़ॽमाबेॽसो मोबाङ टेमाबेॽसो हे़निङ चुप्सिॽ लेङ्इङे़ मोबा इडोॽ हे़निङ्बाङ यहुदिया खे़ॽमाबेॽ सहायोग चुप्मिनुङे लुनुङ मिॽटुङ। 17 इमा का आप्माबेॽ इमाङ मे़मिॽलेॽ आप्सिॽपोरोक्पॽआ मिडानिङे ? घरि नुये, घरि फे़न्निबा लुनुङ इमा के़ॽ काङ्मि नुबामि लागि लुबॽआडे ? 18 निवाहाङ बिस्वास ले़ःॽहेमारोमा ले़टिडोॽ कासो बिस्वास ले़ःॽहेमारोमा ले़ङे। का घरि “नुये” घरि “फे़न्निबा” लुघुबा याॽमि ने़ॽनिबा। 19 इन्ढोङ्होङ सिलास, तिमोथिनुङ के़ॽ हे़निङ्मि रुम्बेॽ परचार ले़ःॽपॽआ निवाहाङ्मि पसा येसु खिरिस्टमि टुम्बेॽ लुबॽआ खा चाहिँ भरोसा ले़ःॽमारोमा ले़ये। खोसे़ॽ लिये लुबॽआ खा इन्डोॽहोङ्सो लियेनोॽ। 20 इन्ढोङ्होङ निवाहाङ्मि चोप हेन्ज्रुङ खिरिस्टबेॽ पुरा लिहा, मोडोगे़ॽ निवाहाङ्मि महिमामि लागि “आमेन” लुन्डुङ्मे। 21 हे़निङ्नुङ कानिङ खिरिस्टबेॽ बोलियो टोङ्घुबानुङ कानिङ से़ङ्घुबा निवाहाङ्नोॽ ले़ये। 22 मोबा खोमिनोॽ ले़ये लुनुङ कानिङ्बेॽ पबित्रा होङ्निवामि छाप टिटे़। इडोॽ कानिङ्मि निवाबेॽ पबित्रा होङ्निवा बैनाडोॽ पिबेटे़। 23 निवाहाङ के़ए़ साक्छि ले़ये, हे़निङ योप्मा मे़मिॽपॽआसे़ॽ का कोरिन्थिबेॽ मे़आबिङ। 24 हे़निङ्मि बिस्वासबेॽ कानिङ्मि अधिकार ले़ःॽमा योक्पॽआ ने़ॽनिबा, इन्ढोङ्होङ बिस्वासबेॽको हे़निङ बोलियो ले़न्डानिङ। हे़निङ्मि हाङ्हाङ्मि लागि हे़निङ निवा टोङ्नुङ योम्बोक लेन्डानुम। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.