१ तिमोथि 6 - याम्फुसेउतेजि सल्लाह 1 चोप सेउते बिस्वासिजिडे़ॽ टाङ्बामि मायोङ्बामि नुरोॽ आदर ले़ःॽमा खे़ये। मोडोगे़ॽ निवाहाङ्मिनुङ कानिङ्मि सिक्छेमि अपनाम लिनिबा। 2 कानिङ्मि मायोङ्बासो बिस्वासि ले़ये लुनुङ ए़डे़ॽवारेॽनोॽ आदर ए़ले़ःॽमे इन्ढोङ्होङ खोजि बिस्वासि वावानिसाजि ले़म्मे। माहाजिडे़ॽ खोजिमि मायोङ्बा छना बेॽलो आदर ले़ःॽमा खे़ये, इन्ढोङ्होङ खोजिडे़ॽ ले़ःॽपॽआ योम्बोकबाङ बेॽलो फाइदा चुप्खुबा खोजिडे़ॽ नम्नम ले़ःॽपॽआ बिस्वासि मायोङ्बाजिनोॽ ले़म्मे। हे़ने़ॽ इडोक्हा खा सेउतेजि इःडाजेनुङ मोडोक्नोॽ ले़ःॽमा लुसाजे। रेम्सिङ सिक्छेनुङ चाइबमा याङ्सरावा 3 आढाजि मे़ॽनोक्हा सिक्छे इःॽखुबा टुम्मेनुङ कानिङ्मि परभु येसु खिरिस्टमि बचननुङ निवाहाङ्मि भक्ति ले़ःॽमे सिक्छे खेप्सुजिने। 4 माहाजि काङायोङ्बा लिनुङ इमाङ्सो लेसुजिने। खो माङ्माङ निहु योॽइये, इक्को इक्को खामि टुम्बेॽ खिमा योॽइये। इडोक्हा खाडे़ॽ, चेजेवा, खिमाचुमा, अपमाननुङ मङे़हा सङ्क पुःक्इहा 5 मोबा खोजिमि निवा नासि लिटे़नुङ चाइबमा खाबाङ टेघे़टामे। मोबा निवाहाङ्मि रामबेॽ राम्मा लुबॽआ चाहिँ याङ्सरावा टोङ्मे राम मिॽइन्डुजे। 6 इमाङ इमाङ टाङ्बानुङ टुहा मो थोकबेॽ साप्थाङ्माहोङ निवाहाङ्मि रामबेॽ राम्माबेॽ छना बेॽलो फाइदा लिये। 7 इन्ढोङ्होङ कानिङ इगो मक्खाम्डेमबेॽ लेम्माबेॽ इमाङ्सो मे़याङ्जे़ॽटि, ए़क्साङ सिघे़ॽमाबेॽसो इमाङ्सो लाघे़ॽहेनिबा। 8 मोडोगे़ॽ कानिङ चामानुङ चाङ्मा के़ॽहोङ कानिङ साप्थाङ्मा खे़ये। 9 तर टाङायोङ्बा लिमा योक्खुबाजि लोभबेॽ सिॽइम्मेनुङ रेम्सिघे़म्मे। माहाजि योम्बोक मे़ॽनिङ्हा खानुङ नासि लिये हिङ्मवाबेॽ सिॽइम्मे इघा खाडे़ॽ माहाजि नासि लिम्मे। 10 इन्ढोङ्होङ याङ्मि लोभ ले़ःॽमानोॽ चोप खालहा मङे़हा खामि टुम्बिरा ले़ये। इन्डोॽ याॽमिजि याङ लोभ ले़ःॽनुङ निवाहाङ्बेॽ बिस्वास ले़ःॽमानोॽ ले़ःॽपेटुजे मोबा बेॽलो खेःडे़ॽ खोजिमि चुवाबेॽ खाॽइटुए। पावलबाङ तिमोथि सल्लाह 11 तर तिमोथि हे़न निवाहाङ्मि याॽमि, इघा चोप खालहा मङे़हा खाबाङ ओ पेम्मे। मोबा निवाहाङ्मि पोम्बेॽ नुबा लिमे, निवाहाङ आदर पिमे, निवाहाङ्बेॽ बिस्वास ले़ःॽमे, नम्नम ले़ःॽमे, धैरिय ले़ःॽमे, ए़डे़म्मा लिनुङ पेम्मे इघा चोप खाबेॽ निवा टिसे। 12 हे़ने़ए़ बिस्वासमि लागि नुरोॽ ङे ले़टेनुङ ए़ॽसिघे़ॽमे हिङ्मवा नुरोॽ जोगा ले़टे। इन्ढोङ्होङ इगोमि लागिनोॽ हे़न निवाहाङ्डे़ॽ के़ए़टे़। मोडोक्पेॽ हे़ने़ॽ खिरिस्टबेॽ टुये बिस्वासमि टुम्बेॽ बेॽलो साक्छिजिमि पोम्बेॽ लुटुए। 13 चोप थोक हिङ्मवा पिघुबा निवाहाङ्नुङ पन्तियस पिलातसमि पोम्बेॽ चाइबमा खामि साक्छि पिघुबा येसु खिरिस्टमि पोम्बेॽ इगो आग्या पिन्ने़, 14 हे़न असे़ॽसो आप्टिक मे़न्टिहेसुजिरो लुनुङ इगो आग्या कानिङ्मि परभु येसु खिरिस्ट फेरि मे़लेङ्रो नुरोॽ पालना ले़टे। 15 निवाहाङ्डे़ॽ येसु खिरिस्ट फेरि पाङ्मामि लागि मो याक पक्का ले़पेटुए। कानिङ्मि आसिसित निवाहाङ। खोरेॽ चोप्पाङ बेॽएम्मा। हाङ्बाजिमि हाङ्बा मोबा परभुजिमि परभु ले़ये। 16 निवाहाङ्रेॽ इन्डोक्पेॽसो सिघे़ॽनिबा, खो जोतिबेॽ पेङ्इयेनुङ मोमि के़क्पेॽ असासो खे़ॽहेनिबा। खो असे़ॽसो मे़ङ्खाङ्डिटुजे, खो असे़ॽसो खाङ्हेसुजिनेनुङ सानिङ्मि लागि खो आदरनुङ मान लिरो। आमेन। 17 इगो मक्खाम्डेमबेॽहा याङ्सारावदाङ्बाजि काङायोङ्बा ए़रेङ्मेनुङ याङ्सरावाबेॽ भरोसा ए़ले़ःॽमे लुसाजे, इन्ढोङ्होङ इघागो सानिङ्मि लागि टुडुङ्घे़ॽनिहा। तर कानिङ साप्थाङ्मे हिङ्मवामि लागि के़ॽलो चोप थोक पिघुबा निवाहाङ्बेॽ भरोसा ले़टानुमे लुनुङ आग्या पिसाजे। 18 नुबा योम्बोक ले़ःॽखुबाजि, बेॽलो नुबा योम्बोकमि टाङायोङ्बाजि, निवादाङ्बाजिनुङ हाइखाजिनुङ हाःजाखुबाजि लिमे लुनुङ आग्या पिसाजे। 19 इडोॽ खोजिडे़ॽ ए़क्साङ्ए चाइबमा हिङ्मवामि लागि याङ्सरावा सुप्सुजिरो। खोजिमि लागि मो ए़क्साङ्ए हिङ्मवामि नुबा जग लिये। मोबारेॽ खोजिडे़ॽ ए़क्साङ्ए चाइबमा हिङ्मवा चुप्मिन्डुजे। 20 तिमोथि, हे़न निवाहाङ्डे़ॽ पिबॽआ आग्या नुरोॽ हुपयुक्से। निवाहाङ मे़ॽनिङ्हा हिङ्मवानुङ योम्बोक मे़ॽनिङ्हा खा इःॽखुबा याॽमिजिबाङ ओ पेम्मे। माहाजिडे़ॽ इःॽपॽआ खा “निवामि खा” लुन्डुजे तर चइबानोॽ लुमाबेॽ माहा निवामि खा ने़ॽनिहा। 21 इन्डोक याॽमिजिडे़ॽ मोडोक्हा खाबेॽ निवा टिनुङ निवाहाङ्मि रामबाङ टेघे़टामे। हे़निङ चोपनुङ निवाहाङ्मि अनुग्रहा टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.