१ तिमोथि 5 - याम्फुएल्डरजि, राङ्मिॽमाजिनुङ सेउतेजि सल्लाह 1 टाङ्बाङ टुम्मि याॽमिजि ए़ॽयोबाजे, खोजिगो टाङ्बामि पाबाजिडोक्नोॽ नुरोॽ लुसाजे। मोबा टाङ्बाबाङ पाक्लोक्हा याॽमिजि निसाजिडोक्नोॽ नुरोॽ लुसाजे। 2 मोडोक्नोॽ टाङ्बाबाङ टुम्इहा मेॽनामिॽचि मामाजिडोॽ नुरोॽ ले़टाजेनुङ पाःॽइहा राङ्मिॽ पिच्छाजि चोखो निवे़ॽ टाङ्बामि निसाजिडोॽ बेबहार ले़टाजे। 3 टाङ्बाङ मे़ॽनिङ्हा राङ्मिॽमाजि नुरोॽ खाक्साजे। 4 तर राङ्मिॽमामिन्नोॽ पसा याङ्मेनजि टुमिहोङ, मो राङ्मिॽमामि पसा अथबा याङ्मेनजिडे़ॽ माहाजिमि खिमबेॽहाजि नुरोॽ खाङ्नुङ खोजिडे़ॽ निवाहाङ्बेॽ बिस्वास ले़ःॽपॽआ खाङ्मुमा खे़ये। याक्लो पाबा मामाडे़ॽ खोजि कुमाबेॽ ले़ःॽपॽआ दुःखमि साटो खोजिडे़ॽसो पाबा मामाजिमि लागि ले़टुजिरो। इन्ढोङ्होङ इगो खा निवाहाङ्डे़ॽ नेन्जोन्डुए। 5 तर टाङ्बाङ मे़ॽनिङ्हा चाइबमानोॽमा राङ्मिॽमाडे़ॽ चाहिँ निवाहाङ्बेॽ आसा ले़न्डुए। खोसे़ॽ लेन्डा, सेन्डा सानिङ्नोॽ निवाहाङ्नुङ पारथना ले़न्डुए। 6 तर खो सानिङ्नोॽ निवे़ॽ ले़ःॽमा मिॽपॽआ चोप खा ले़ःॽखुबा राङ्मिॽमा ले़येहोङ खो हिङ्रिक टुहोङ्सो सिबॽआडोक्नोॽ ले़ये। 7 खोजि असे़ॽसो आप्टिक मे़न्डिडोक्टुजिरो लुनुङ इघा खा बिस्वासिजि नुरोॽ इःडाजे। 8 आढाजिडे़ॽ टाङ्बाङ्जिबाङ्सो बेॽलो खिमबेॽहाजि नुरोॽ मे़ङ्खाक्सुजिहोङ, माहाजिगो चाइबमा बिस्वासिनोॽ ने़ॽनिहाजि ले़ःॽमिने। खोजि बिस्वास मे़ले़ःॽखुबाजिबाङ्सो मङे़हाजि ले़म्मे। 9 इक्खेॽरेॽ फुङ्सया ले़ःॽपॽआनुङ चुक्चिबोङ निङ्बाङ बेॽलो उमेर याक्पॽआ राङ्मिॽमारेॽ राङ्मिॽमाजिमि निङ् सुचिबेॽ साप्युक्से। 10 खो नुबा नुबा योम्बोक ले़ःॽनुङ आदरनुङ्मा लिमा खे़ये। खोसे़ॽ पसाजि नुरोॽ कुबॽआ, चाबाङ्जि नुरोॽ सेवा ले़ःॽपॽआ, निवाहाङ्मि याॽमिजिमि सराङ वसोक्पॽआ, दुःखबेॽ सिॽपॽआ याॽमिजिमि सेवा ले़ःॽपॽआ, खो सानिङ्नोॽ नुबा नुबा योम्बोक ले़ःॽयाङ लिमा खे़ये। 11 तर साठि निङ्बाङ पाक्लोहा राङ्मिॽमाजिमि निङ चाहिँ राङ्मिॽमा निङ साप्ठामबेॽ ए़साप्मे। इन्ढोङ्होङ खोजिमि हिङा अधिनबेॽ मे़युङ्हेसुजिहोङ फेरिसो फुङ्सया ले़ःॽमा मिङ्इम्मे, मोबा खोजिडे़ॽ येसु खिरिस्टमि योम्बोकपेॽ निवा टिसुजिने। 12 मोडोगे़ॽ खोजिटाङ्बे़ॽ याक्लो हुप्पॽआ हेन्ज्रुङ मिन्डेॽपॽआसे़ॽ खोजि निवाहाङ्मि दन्डाबेॽ सिॽइम्मे। 13 मोबासो राङ्मिॽ राङ्मिॽमाजि पाङ्सुबुॽइम्मेनुङ हाइखाजिमि खिम खिम वाइसाङ खा खिडिखुबाजि लिम्मे। मोडोक्रेॽ ने़ॽनि याॽमिजि इःजाखुबा, हाइखाजिमि योम्बोक हाप्सेॽखुबानुङ इःमानोॽ फे़न्निहा खा इःघुबाजि लिम्मे। 14 मोडोगे़ॽ के़ॽ सल्लाह पिनिम्ने़, राङ्मिॽ राङ्मिॽमाजिडे़ॽ चाहिँ फुङ्सया ले़ःॽनुङ पसाजि टोक्नुङ नुरोॽ खिम बेबहार ले़ःॽचामिरो। मोडोॽ ले़ःॽमाहोङ्रेॽ कानिङ्मि सतुरजिडे़ॽ कानिङ बिरोध ले़टोक्टुजिने। 15 के़ॽ लुनुङे इन्ढोङ्होङ इन्डोक जना राङ्मिॽ राङ्मिॽमाजि याक्लोनोॽ सैतानमि रामबेॽ खे़ॽपेटामे। 16 इडोॽ बिस्वासि मेॽनामिॽमि खिमबेॽ टाङ्बाङ राङ्मिॽमाजि टुमिहोङ खोसे़ॽ मो राङ्मिॽमाजि नुरोॽ खाङ्मा खे़ये। इडोॽ ले़टुजिहोङ मन्डलिडे़ॽ खोजि खाङ्मा पाप्निबा। मोडोगे़ॽ खोजि खाङ्खुबा टाङ्बाङ मे़ॽनिङ्हा चाइबमा राङ्मिॽमाजि मन्डलिडे़ॽ खाङ्हेन्डुजे। 17 मन्डलिबेॽ नुरोॽ योम्बोक ले़ःॽखुबा एल्डरजि आदर ले़ःॽमा खे़म्मेनुङ के़ॽलो नमयाक पिमा खे़म्मे, माहाजिबेॽसो बेॽलो निवाहाङ्मि बचन खेम्मेॽमामि दुःख ले़ःॽखुबानुङ बचन इःॽखुबाजि नमयाक पिमानोॽ खे़म्मे। 18 इन्ढोङ्होङ धारमिक नेॽचिराडे़ॽ लुये, “दाँइ ले़ःॽखुबा गोरुजिमि याबुकपेॽ काक्पा ए़ॽओम्डिबेॽटानुमे” मोबा “योम्बोक ले़ःॽखुबे़ॽ खोजिमि नमयाक चुप्मानोॽ खे़ये।” 19 एल्डरबेॽ टिबॽआ आप्टिक निप्पाङ सुम्बाङ याॽमिजिडे़ॽ साक्छि मे़ॽपिरो मो खा ए़ॽखेम्मे। 20 पाप ले़ःॽखुबा एल्डरजि मन्डलिबेॽहा चोप बिस्वासिजिमि पोम्बेॽ योबाजे, मो खाङ्नुङ हाइखा एल्डरजि पाप ले़ःॽमा किस्सिम्मे। 21 निवाहाङ, येसु खिरिस्टनुङ निवाहाङ्डे़ॽ से़म्बॽआ थाङ्सिरि दुतजिमि साक्छिबेॽ के़ॽ हे़न इगो आग्या पिन्ने़। के़ॽ लुबॽआ इघा खा हे़ने़ॽ ले़ःॽमाबेॽ असासो काखा पाखा ए़ले़ःॽमे। 22 मन्डलिबेॽ योम्बोक ले़ःॽमामि अगुवा से़न्माबेॽ मो याॽमिमि टुम्बेॽ नुरोॽ मे़लेरेॽ चान्डोनोॽ ए़से़न्मे़ हाइखाजिमि पापबेॽ हे़न ए़ॽठुमे। आमटाङ्बा चाहिँ पाप योम्बोकबाङ ओःनोॽ पेम्मे। 23 हे़ने़ए़ रुङ्मा टुक्माबेॽ योङारेॽनोॽ ए़उक्से तर सिडामि लागि अङ्गुरमि मद्य ए़दरेॽवा उक्से। 24 आढा याॽमिजिडे़ॽ ले़ःॽपॽआ पाप चाहिँ चोबे़ॽ छे़ङ्गै खाङ्मुयेनुङ चान्डोनोॽ खोजिडे़ॽ दन्डा चुप्मिन्डुजे, तर आढाजिमि पाप चाहिँ ए़क्साङ्रेॽ खाङ्मुहा। 25 मोडोक्नोॽ नुबा योम्बोकको छे़ङ्गै खाङ्मुहा। इमाङ इमाङ खाङ्मुनिहा माहा चोपसो खाङ्मुहा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.