१ तिमोथि 4 - याम्फुरेम्सिङ खा इःॽखुबाजिमि टुम्बेॽहा खा 1 पबित्रा होङ्निवाडे़ॽ कानिङ छे़ङ्गै लुटे़, ए़क्साङ ए़क्साङ इन्डोक याॽमिजि बिस्वासबाङ टेघे़म्मे। खोजिडे़ॽ रेम्सिङ होङ्निवामि आदर ले़न्डुजे मोबा मङे़ॽमा चापजिडे़ॽ इःॽपॽआ सिक्छे खेम्इन्डुजे। 2 इडोक्हा सिक्छे रेम्सिङ्जिबाङ लेङ्इहा। इघाजिमि निवा कुहाङ चे़क्चिडे़ॽ ङाम्बॽआडोॽ लिघे़टहा मोडोगे़ॽ खोजिडे़ॽ नुबानुङ मङे़हा खा लेसुजिने। 3 इघाजिडे़ॽ फुङ्सया ले़ःॽमा फे़न्निबा इःन्डुजे, मोबा निवाहाङ्डे़ॽनोॽ चोप थोक टोङ्इटुहा मोडोगे़ॽ खो बिस्वास ले़ःॽखुबाजिनुङ चाइबमा लेघुबाजिडे़ॽ निवाहाङ ओहाक पिनुङ इघा चामाया चामा नुबा खासो खोजिडे़ॽ चामानोॽ फे़न्नि लुनुङ इःन्डुजे। 4 निवाहाङ्डे़ॽ टोङ्बॽआ चोप थोक नुबा ले़हा। मोडोगे़ॽ निवाहाङ ओहाक पिनुङ चामाहोङ, चोप थोक चामानुहा। 5 इन्ढोङ्होङ निवाहाङ्मि बचननुङ पारथनाडे़ॽनोॽ माहा थोक चोखो टोङ्इन्डुहा। 6 इघा खा हे़ने़ॽ बिस्वासि वावानिसाजिसो इःडुजिहोङ, हे़न खिरिस्ट येसुमि नुबा योम्बोकदाङ्बा लिये। मो खा हे़ने़ॽ खाङ्मुन्डुए हाम्बे बिस्वासबेॽ हे़न वाबुइटे़ मो नुबा खा पालना ले़ःॽए़टुए। 7 भक्ति मे़ॽनिङ्हानुङ योम्बोक मे़ॽनिङ्हा पारलेनबाङ ओः पेने, तर निवाहाङ्डे़ॽ नेन्जोन्डुए खाबेॽ तालिम ले़टे। 8 आढा याॽमिडे़ॽ लुन्डुजे “तालिमडे़ॽ हिङामि लागि नुबा लिये मोबाङ्सो बेॽलो निवाहाङ्डे़ॽ नेन्जाये योम्बोकपेॽ तालिम ले़ःॽमाहोङ बेॽलो नुबा लिये। इगोसे़ॽ हागोए हिङ्मवामिनुङ ए़क्साङ्ए हिङ्मवामि लागि नुबा लिये हेन्ज्रुङ हे़ङ्इन्डुहा।” 9 इगो खा चाइबमानोॽ ले़येनुङ चोबे़ॽ खेम्नुङ मोडोक्नोॽ ले़ःॽमा खे़ये। 10 मोडोगे़ॽ कानिङे़ॽ बेॽलो दुःखनुङ बिस्वासमि लागि योम्बोक ले़न्डुङ्मा इन्ढोङ्होङ कानिङ्मि आसा हिङ्रिक निवाहाङ्बेॽ टुये। खो चोप याॽमिजि मुक्ति पिघुबा मुक्तिदाङ्बा ले़ये, मोबाङ्सो बेॽलो चाहिँ खोबेॽ बिस्वास ले़ःॽखुबाजिमि लागि ले़ये। 11 इघा मिॽटुहा खा इःडाजेनुङ मोसे़ॽ लुडिडोक्नोॽ ले़ःॽमे लुसाजे। 12 हे़न वेन्जा ले़ःॽपॽआसे़ॽ हे़न असे़ॽसो हेला मे़ले़ःॽहेमिरो। तर नुबा खारेॽ यामुमे, नुबा चाल चलन, नम्नम, बिस्वासनुङ चोखो हिङ्मवा हिङ्नुङ बिस्वासिजिमि लागि इघा खाबेॽ हे़न नमुना लिसे। 13 का मे़लेङ्रो हे़ने़ॽ धारमिक नेॽचिरा नेॽनुङ बिस्वासिजि खेम्मेॽटाजे, साहस पिसाजेनुङ खोजि सिक्छे इःॽमे खाबेॽ निवा टिसे। 14 हे़न्नुङ टुहा बरदान हेला ए़ॽले़टे। मो बरदान मन्डलिबेॽहा अगुवाजिडे़ॽ हे़न सोक्पेॽ खोजिमि हुक युङ्माबेॽ अगमबानिबाङ हे़ने़ॽ चुप्मिटुए। 15 के़ॽ लुबॽआ इघा खा हे़ने़ॽ नुरोॽ पालना ले़टेनुङ हे़ने़ए़ चोप निवा टिसे मोडोगे़ॽ हे़न परचार ले़ःॽमेनुङ इःॽमे खाबेॽ नुबा लिबॽआ हाइखा याॽमिजिडे़ॽ खाङ्डोक्इन्डुजे। 16 आमटाङ्बामि टुम्बेॽनुङ टाङ्बे़ॽ इःॽपॽआ खाबेॽ होसियार ले़टे। इघा खा सानिङ्नोॽ ले़टे मोबारेॽ आमटाङ्बे़ॽनुङ हे़ने़हा खा खेम्घुबाजिडे़ॽ मुक्ति चुप्मिन्डुजे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.