१ तिमोथि 3 - याम्फुमन्डलिबेॽहा अगुवा 1 इगो खा चाइबमा ले़ये-आढा याॽमिजि पास्टर लिमा मिङ्इहोङ, मोसे़ॽ नुबानोॽ योम्बोक ले़ःॽमा मिॽइटुए। 2 मोडोगे़ॽ मन्डलिमि पास्टर आप्टिक मे़ॽनिङ्मा लिमा खे़ये, खो इक्कोरेॽ फुङ्सया ले़ःॽखुबा, खो टाङ्बामि निवा नुबा योम्बोक्पेॽ टिहेघुबा, बुजाकिनुङ आदरनुङ्मा लिमा खे़ये। चबाङ्जि नुरोॽ ले़ःॽखुबानुङ याॽमिजि नुरोॽ इःॽलेघुबा लिमा खे़ये। 3 इ, टोप्टे़ॽवा मे़उङ्खुबा याॽमिजिनुङ खिमाचुमा मे़योक्खुबा लिमा खे़ये। खोगो सहनसिल लिमा खे़ये, याङ्सरावामि लोभ ले़ःॽमा फे़न्निबा। 4 खो टाङ्बामि खिम नुरोॽ ले़चाहेघुबा, मोबा खोम पसाजि नुरोॽ तह टिहेघुबा लिमा खे़ये। 5 इन्ढोङ्होङ खोसे़ॽ टाङ्बामि खिमनोॽ नुरोॽ मे़ले़चोहेसुहोङ, निवाहाङ्मि मन्डलिमि रेखदेख इन्डोक्टे ले़ःॽहेन्डुए ? 6 पास्टर चोङ बिस्वासि ले़ःॽमा फे़न्निबा। बिस्वासबेॽ चोङ टुहोङ बेॽए रे़ङ्इये मोडोगे़ॽ निवाहाङ्मि दन्डाबेॽ सैतान सिॽटिडोॽ खोसो सिॽइये। 7 मो याॽमि बिस्वास मे़ले़ःॽखुबा याॽमिजिमि पोम्बेॽसो मान काप्खुबा ले़ःॽमा खे़ये। मोबाङ्रेॽ याॽमिजिडे़ॽ खो इःजोडोक्टुजिनेनुङ सैतानडे़ॽसो खो के़क्हेसुनिबा। मन्डलिबेॽहा डिकनजि 8 मोडोक्नोॽ डिकनजि आदरनुङ्हा याॽमि लिमा खे़म्मे। खोजि चइबानोॽहा खा इःॽखुबाजि, इनुङ टोप्टे़ॽवा मे़उङ्खुबा लिमा खे़ये, याङ्मि लोभ मे़ले़ःॽखुबा लिमा खे़ये। 9 खोजिमि बिस्वासमि गहिरो चाइबमा खा सानिङ्मु निवाबेॽ नुरोॽ युङ्मा खे़ये। 10 सेवामि योम्बोक ले़ःॽमा याक्लो खोजिमि नुरोॽ जाँच ले़ःॽमा खे़ये। मोबा खोजिबेॽ इमाङ आप्टिक मे़न्चुप्होङ्रेॽ खोजिडे़ॽ डिकन लिनुङ सेवामि योम्बोक ले़ःॽहेन्डुजे। 11 माहाजिमि बनिमाजिसो मोडोक्नोॽ आदरनिया, हाइखा याॽमिजि मे़इःजाघुबा, तर टाङ्बामि निवा अधिनबेॽ युङ्हेघुबानुङ चोप खाबेॽ बिस्वासनुङ्मा लिमा खे़ये। 12 डिकनमिसो इक्कोरेॽ बनिमा टुमा खे़ये। खोसे़ॽ खोमि पसाजि नुरोॽ अधिनबेॽ टिबॽआनुङ खिम नुरोॽ ले़ःॽखुबा लिमा खे़ये। 13 नुबा योम्बोक ले़ःॽखुबा डिकनजिडे़ॽ नुबानोॽ इज्जेत चुप्मिन्डुजे। मोबा येसु खिरिस्टसोक्पेॽ टुये खोजिमि बिस्वासमि टुम्बेॽ हाइखाजि साहसनुङ लुहेन्डुजे। 14 चान्डोनोॽ हे़नबेॽ आप्मिङे लुमे आसाबेॽ टुङे तरसो के़ॽ हे़न इगो पत्रा साप्मे़ॽनिङ्सिनुङे। 15 मोडोगे़ॽ का आप्मा ढिलो लिङाहोङ्सो मन्दिरबेॽहा याॽमिजिमि चाल चलन इन्डोक्मा टुमा खे़ये खा इगो पत्राबाङ लेन्डुए। मन्दिरबेॽहाजि लुबॽआ चाहिँ हिङ्रिक निवाहाङ्मि मन्डलिनुङ चाइबमा खामि खाँबानुङ जग ले़ये। 16 निवाहाङ्डे़ॽ कानिङ खाङ्मुबॽआ चाइबमा खा चइबानोॽ महान ले़ये, मो खा लुबॽआ चाहिँ खिरिस्ट चाहिँ याॽमि लिनुङ मक्खाम्डेमबेॽ लेस्सा, पबित्रा होङ्निवाबाङ धरमि ठहरबा लिसा, खो थाङ्सिरिदुतबाङ खाङ्मुसा, जाति जातिजिमि रुम्बेॽ खोमि परचार लिसा, मक्खाम्डेमबेॽहा याॽमिजिडे़ॽ बिस्वास ले़टुजिनुङ निवाहाङ्डे़ॽ खो महिमानुङ थाङ्सिरिॽटु लाघे़ॽटु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.