१ तिमोथि 2 - याम्फुमन्डलिमि पारथना 1 चोप्पाङ याक्लो हे़न लुन्ने़, चोपमि लागि बिन्तिनुङ पारथना ले़ःॽमे़, मोबा माहाजिमि लागि निवाहाङ ओहाक पिमे़। 2 हाङ्बाजिमिनुङ सरकारबेॽहा याॽमिजिमि लागिसो पारथना ले़ःॽमे़। खोजि चोप नुबा लिमिहोङ कानिङे़ॽ सानिङ्नोॽ सुख सान्तिनुङ निवाहाङ्मि ओहाङ ले़ःॽसाङ हिङ्डोक्इन्डे। 3 इडोॽ ले़ःॽपॽआ कानिङ्मि मुक्तिदाङ्बा निवाहाङ्डे़ॽसो नेन्जोन्डुए। 4 चोप याॽमिजि हिङ्मिरो, मोबा चाइबानोक्मा चाइबमा खा लेसुजिरो लुनुङ खोसे़ॽ मिइन्डुए। 5 निवाहाङ इक्कोरेॽनोॽ टुये, मोबा याॽमिजि निवाहाङ लेमेॽखुबासो इक्कोनोॽ टुये। मो चाहिँ येसु खिरिस्ट ले़ये। 6 चोप याॽमिजिमि पापमि सिङि खोमि हरिडे़ॽ फोङ्नुङ छुटाबा ले़ःॽमामि खोम्दाङ्बा काप्सिङ्बेॽ सिसा। निवाहाङ्डे़ॽ चोप याॽमि हिङ्बॽआ नेन्जोन्डुए लुमे खामि परमान इगोनोॽ ले़ये। 7 मोडोगे़ॽ निवाहाङ्डे़ॽ का एप्पा चोङ्सा मोबा अयहुदि जातिहा याॽमिजि चाइबमा खा परचार ले़ःॽखुबा टोङ्इटे़। इगो खा के़ॽ चइबानोॽ लुबॽआयो, रेम्डेॽपॽआ ने़ॽनि। 8 वडाङ्पसाजिडे़ॽ चोप ठाउँबेॽ मे़सुरके़ॽलेॽनुङ खिमाचुमा मे़ले़ःॽरेॽ पबित्रा हुक ठेॽनुङ पारथना ले़टुजिरो के़ॽ मिॽइनुङे। 9 मोबा मोडोक्नोॽ मेॽनामिॽचिडे़ॽसो ताङ्बा खे़न्जारोमा चेॽ चाङ्मा खे़ये। खोजिडे़ॽ बेॽलो टाङ चाक्नुङ सुना, मोतिनुङ गरगहना बेॽलो माहागो चेॽ ए़ॽचाक्सुजिरो। 10 तर निवाहाङ्मि ओहाङ ले़ःॽखुबा मेॽनामिॽचिडे़ॽ नुबा योम्बोकरेॽनोॽ ले़टुजिरो। 11 मेॽनामिॽ पसाजि अधिनबेॽ योङ पेन्नुङ नुबा खा चिनुजिरो। 12 मेॽनामिॽ पसाजिडे़ॽ वडाङ्पसाजिसोक्पेॽ अधिन ले़ःॽमानुङ खा इःॽमे़ के़ॽ अनुमति पिसुङ्नि। मेॽनामिॽचि योङ्नोॽ पेम्मा खे़म्मे। 13 इन्ढोङ्होङ टोङ्माबेॽ याक्लो आदमनोॽ टोक्सु, मोबा ए़क्साङ्रेॽ हब्बा टोक्सु। 14 आदम रेम्सिघे़पॽआ ने़ॽनि, हब्बा चाहिँगोरे रेम्सिघे़ॽनुङ अपराधबेॽ सिॽपॽआ। 15 मेॽनामिॽजि सानिङ्नोॽ ए़डेम्मा लिनुङ बिस्वासबेॽ नुबा, नम्नमनुङ पबित्रा लिनुङ पेम्मिहोङ ओङेक टोक्माबेॽ खोजि हिङ्इम्मे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.