१ तिमोथि 1 - याम्फु1 कानिङ मुक्ति पिघुबा निवाहाङ्नुङ आसा पिघुबा येसु खिरिस्टडे़ॽ आग्या पिडिडोॽ का पावल खोमि एप्पा चोङ्सा लिसिङ। 2 काङ्मिडोॽमा बिस्वास काप्खुबा चइबानोॽ पसाडोॽमा तिमोथि हे़न इगो पत्रा साप्मे़ॽनिङ्सिन्ने़। निवाहाङ पाबानुङ कानिङ्मि परभु येसु खिरिस्टडे़ॽ हे़न अनुग्रहा, किरपानुङ सान्ति पिरो। मे़ॽनोक्हा सिक्छेबाङ अडिॽयो 3 का माकेडोनियाबेॽ खे़ॽसिॽपोरोक्माबेॽ हे़न एफिससबेॽनोॽ पेने। मोबेॽ निवाहाङ्मि बचनमि मे़ॽनोक्हा सिक्छे इःॽखुबा याॽमिजि आक्टोॽ एले़ॽमे लुनुङ वोबाजे। 4 हे़ने़ॽ माहाजि पारलेननुङ टुबालाबाजिमि इन्डोक्पेॽसो रुक्खे़ॽनिहा खानवाबेॽ ए़फोप्सिघे़ॽमे लुसाजे। इघा खाडे़ॽ खिमाचुमारेॽ लाजे़न्डुएनुङ निवाहाङ्मि योम्बोक फोःप्सेन्डुहा इन्ढोङ्होङ निवाहाङ्मि योम्बोक बिस्वासडे़ॽरेॽ ले़ःॽहेये। 5 कानिङे़ॽ पिबॽआ सिक्छेडे़ॽ नम्नम ले़ःॽखुसे़ॽचुमे खा इःये। इगो चाहिँ चोखो निवा, नुबानुङ मङे़ॽमा लेमे निवा चाइबानोक्मा बिस्वासबाङ लेङ्इये। 6 आढा याॽमिजि चाहिँ इघा खा लेॽपेनुङ योम्बोक मे़ॽनिङ्हा खाबेॽ फोःप्सिघे़टामे। 7 माहाजि यहुदि धारमिक नियम इःॽखुबा लिमा योॽइम्मे। तर खोजिटाङ्बे़ॽ इःबॽआ खासो इमाङ्मि टुम्बेॽ इःमे़ॽनिङ्सिन्डुजे लेसुजिने। मोडोक्सो माहाजि मिङ्इम्मे कानिङे़ॽ लेन्डुङ्मे़। 8 कानिङे़ॽ लेन्डुङ्मा नुरोॽ पालना ले़ःॽमाहोङ यहुदि धारमिक नियम बेॽलो नुबा ले़ये। 9 इगो खा लेयाक्मा खे़ये, नियमगो नुबा याॽमिमि लागि टोङ्बॽआ ने़ॽनि। नियमगो नियम पालना मे़ले़ःॽखुबा, लुबॽआ मे़ङ्खे़म्खुबा, निवाहाङ्नुङ मे़ङ्किस्सिखुबा, असुदधा, अधरमि, पापि, मोबा टाङ्बामि पाबा, मामा सेॽखुबाजि, याॽमि सेक्खुबाजि, 10 बेभिचारिजि, वडाङ्पसानुङ वडाङ्पसा बेभिचार ले़ःॽखुबाजि, याॽमि खुनुङ लाघे़ॽखुबाजि, रेम्डेॽखुबाजिनुङ ने़ॽनिहा खामि गबाहि पिघुबाजि, मोबा नुबा सिक्छेमि टेडिघरिक योम्बोक ले़ःॽखुबाजिमि लागि टोङ्बॽआ ले़ये। 11 इगो सिक्छे चाहिँ कानिङ आसिस पिघुबा निवाहाङ्डे़ॽ काबेॽ भोर ले़ःॽनुङ परचार ले़ःॽमामि लागि पिबॽआ महिमित सुसमाचारबेॽ टुये। निवाहाङ्मि नम्नावामि लागि ओहाक 12 खोमि योम्बोक ले़ःॽमे बल पिघुबा कानिङ्मि परभु येसु खिरिस्ट के़ॽ बेॽलो ओहाक पिनुङे़। खोसे़ॽ बिस्वासनुङ्मा खाङ्नुङ खोमि योम्बोकपेॽ टिसिङा। 13 कागो याक्लो चुङ्जाघुबा, सिॽचाघुबानुङ खोमिनोॽ अपमान ले़ःॽखुबा ले़टिङे। मोडोक्पेॽ के़ॽ येसु खिरिस्टबेॽ बिस्वास मे़ले़टुङेनुङ माहा चोप खा के़ॽ मे़ले़ःॽरेॽ ले़टुङ। मोडोगे़ॽ निवाहाङ्डे़ॽ का नम्नावा ले़टिङ्नुङ 14 काबेॽ कानिङ्मि परभुमि अनुग्रहा के़ॽलो युङ्बेॽटा, मोबा खिरिस्टबेॽ टुये बिस्वासनुङ नम्नमसो खोसे़ॽनोॽ का पिसिङा। 15 “येसु खिरिस्ट पापिजि पापबाङ हिङ्मे़ॽसिॽ इगो मक्खाम्डेमबेॽ लेम्बॽआ” खा बिस्वासि चोबे़ॽ लेन्डुजे। इगो खा चाइबानोक्मा ले़येनुङ चोबे़ॽ पुरा बिस्वास ले़ःॽमा खे़ये। 16 तर येसुडे़ॽ का बेॽलो नम्नावा ले़टिङ। ए़क्साङ चुप्मिये ए़ॽसिमे हिङ्मवा चुप्खुबाजिमि लागि नमुना लिरो लुनुङ खोसे़ॽ काडोक्मा चोप्पाङ बेॽलो पापि याॽमि नम्नावा ले़टिङा। 17 हागो सानिङ्ए हाङ्बा सानिङ हिङ्इयेनुङ सानिङ खाङ्डोक्खुबा इक्कोरेॽ निवाहाङ्मि सानिङ्नोॽ आदरनुङ सम्मान लिरो, आमेन। 18 खेप्से, हे़न के़ए़न्नोॽ पसाडोॽमा तिमोथि, बेॽलो याक्लो हे़ने़ए़ टुम्बेॽ निवाहाङ्बाङ्ए खाडे़ॽ लुबॽआडोॽ के़ॽ हे़न मिन्डुहा खा लुन्ने़। नुबा योम्बोक ले़ःॽमामि निवाहाङ्डे़ॽ लुबॽआ मो खाबाङ हौसला चुप्नुङ सुसमाचारमि लागि नुरोॽ ङे ले़टे। 19 मोडोक्पेॽ हे़ने़ॽ आमटाङ्बामि बिस्वास, मोबा नुबानुङ मङे़ॽमा लेमे निवा नुरोॽ हुप्युङ्मे़। मो निवाडे़ॽ लुबॽआ खा मे़ङ्खे़म्खुबाजिडे़ॽ टाङ्बामि बिस्वासनोॽ मे़चोबेसुजि। 20 मोजि हुमेनियसनुङ अलेक्जेन्डर ले़न्जे। निवाहाङ इजामा फे़न्नि लुमे खा लेसुजिरो लुनुङ के़ॽ माहाजि सैतानमि हुकपेॽ युङ्इटुङ्हाजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.