१ थेस्लोनिकि 5 - याम्फु1 वावानिसानुङ नानुसाजि, इघा इन्डोक्पेॽनुङ हाम्बे यिडे़ॽ लिये लुनुङ हे़निङ साप्मा पाप्निबा। 2 इन्ढोङ्होङ हे़निङे़ॽ इगो खा नुरोॽ लेन्डानुमे, मे़मिॽपॽआ बेलाबेॽ सेन्डा खुसुबाङ लेन्डिडोक्नोॽ हजोक्टोॽ परभु लेम्मे याकसो लेङ्इये। 3 याॽमिजि “सान्ति, रच्छे ले़ये” लुनुङ ढुक्का लिमानुङ पेन्डिङ्माबेॽनोॽ उक्खाइसुम्मा बेथा साःबोक्टिडोॽ हजोक्टोॽ आपद बिपत याक लेङ्इये, मोबा माहाजि असासो लेक्खे़ॽटोक्मिने। 4 वावानिसानुङ नानुसाजि, हे़निङ सेन्जिगुप्पेॽ माॽआन्डानिङे। मोडोगे़ॽ परभु लेङ्इये याक हे़निङ्मि लागि खुसुबाङ्डोॽ हजोक्टोॽ लेन्निबा, 5 इन्ढोङ्होङ हे़निङ चोप उज्यालोमि पसाजि ले़न्डानिङे। कानिङ सेन्जुगुप्नुङ सेन्डामि पसाजि ने़ॽनि। 6 मोडोगे़ॽ कानिङ हाइखाजिडोॽ इम्मा फे़न्निबा, तर टाङ्बा चङ्खो पेन्नुङ चेन्दुबा लिनुङ पेम्मा खे़ये। 7 इन्ढोङ्होङ इम्घुबा याॽमिजि सेन्डानोॽ इम्इम्मे, मोबा सेॽखे़ॽखुबाजिसो सेन्डानोॽ सेक्खे़म्मे। 8 तर कानिङ्गो लेन्डामि पसाजि ले़ःॽपॽआसे़ॽ टाङ्बा अधिनबेॽ युङ्मा खे़ये। कानिङे़ॽ बिस्वासनुङ नम्नममि हाङ्डाङ पाताडोॽ चाङ्मा, मोबा मुक्ति चाहिँ चे़क्चिमि टोपिडोॽ ओम्मा। 9 इन्ढोङ्होङ निवाहाङ्डे़ॽ कानिङ्सोक्पेॽ सुरिक ओप्एम्मामि लागि ने़ॽनि, तर परभु येसु खिरिस्टबाङ मुक्ति पिमामि कानिङ से़ङ्इटे़। 10 परभु लेम्माबेॽ कानिङ सिबॽआहोङ्सो, हिङ्बॽआहोङ्सो खोनुङ्नोॽ हिङ्मामि लागि परभु कानिङ्मि साटोबेॽ सिसा। 11 मोडोगे़ॽ आयु ले़टिडोक्नोॽ हे़निङ टाङ्बा हाङ्हाङ पिघुसे़ॽचुसानिङेनुङ बिस्वासबेॽ बोलियो टोङ्घुसे़ॽ चुसानिङे। ए़क्साङ्ए सल्लाहनुङ बिदाइ 12 वावानिसानुङ नानुसाजि, हे़निङ्मि रुम्बेॽ दुःख ले़ःॽसाङ परभुमि योम्बोक ले़ःॽनुङ हे़निङ सिक्छे पिघुबा मोबा मङे़हा योम्बोक ए़डिॽयो लुघुबा अगुवाजि हे़निङे़ॽ आदर ले़टानुमे। 13 खोजिडे़ॽ ले़ःॽपॽआ योम्बोकमि लागि नम्नमनुङ खोजि बेॽए मान ले़टानुमे, मोबा आम्निटाङ्बा टोङ्जासानिङे। 14 वावानिसानुङ नानुसाजि, हे़निङ लुनिम्ने़ पाङ्सुघुबाजि नुरोॽ योम्बोक ले़ःॽचामा लुनुङ चेतवानि पिसानुमे, निङ्सिघे़ॽखुबाजि हाङ्हाङ पिसानुमे, किस्सिखुबाजि सहायता ले़टानुमे, मोबा चोप खा आङ्हेघुबा लिसानिङे। 15 हे़न दुःख पिमिहोङ हे़ने़ॽसो खोसे़ॽडोक्नोॽ ए़ले़टे। सानिङ हे़निङ टाङ्बानुङ चोप याॽमिजिनुङ नुबा बेबहार ले़टानुमे। 16 सानिङ्नोॽ साप्थाक्सानिङे। 17 सानिङ्नोॽ पारथना ले़टानिङे। 18 दुःख सुख इन्डोक्पेॽहोङ्सो निवाहाङ ओहाङ पिसानुमे, इन्ढोङ्होङ येसु खिरिस्टबेॽ बिस्वास ले़ःॽखुबा चोबे़ॽ इडोक्नोॽ ले़ःॽपॽआ निवाहाङ्डे़ॽ नेन्जोन्डुए। 19 हे़निङ होङ्सिॽयु टुये पबित्रा होङ्निवामि उज्यालो ए़सेडानुमे। 20 अगमबानि हेला ए़ले़टानुमे। 21 तर अगमबानि नुरोॽ जाँच ले़टानुमे, मोबा नुबा खाबेॽ निवा टिसानुमे। 22 मोबा चोप मङे़हा खाबाङ ओः पेनानिङे। 23 सान्तिदाङ्बा निवाहाङ्डे़ॽ हे़निङ पबित्रा युक्सुरो। कानिङ्मि परभु येसु खिरिस्ट मे़लेङ्रो हे़निङ्मि होङ्निवा, हिङा, सोःक्मा आप्टिक मे़ॽनिङ्मा लिरो। 24 हे़निङ के़ःॽखुबा निवाहाङ बिस्वासनुङ्मा ले़ये, मोबा खोसे़ॽ इघा खा चइबानोॽ ले़न्डुहा। 25 वावानिसानुङ नानुसाजि, कानिङ्मि लागिसो पारथना ले़ःॽपेॽमाजे। 26 चोप वावा नानुसाजि, हे़निङ चोबे़ॽ नम्नम ले़ःॽसाङ सेवा मुसानिङे। 27 चोप वावानिसानुङ नानुसाजि, इगो पत्रा नेॽनुङ खेम्मेॽटानुमे लुनुङ परभुमि निङ्बेॽ के़ए़ बिन्ति टुये। 28 कानिङ्मि परभु येसु खिरिस्टमि अनुग्रहा हे़निङ्बेॽ सानिङ्नोॽ टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.