१ थेस्लोनिकि 4 - याम्फुनिवाहाङ्डे़ॽ नेन्जामारोमा हिङ्मवा 1 हागो वावानिसानुङ नानुसाजि, हे़निङे़ॽ निवाहाङ्डे़ॽ नेन्जामारोमा हिङ्मवा इन्डोक्टे हिङ्मे लुमे खा कानिङ्बाङ चिङ्इटानुमे। चइबानोॽ कानिङ्बाङ चिम्बॽआ चाल चलन हे़निङे़ॽ ले़ःॽमे़ॽनिङ्सिन्डानुमे, मोबा अक्खा चाल चलन छना नुरोॽ ले़ःॽखे़ॽटानुमे लुनुङ बिन्ति ले़न्निम्ने़। 2 इन्ढोङ्होङ कानिङे़ॽ परभु येसुबाङ चुप्पॽआ हाम्बे हाम्बे आग्या हे़निङ पिटुङ्मे मो खा लेन्डानुमे। 3 हे़निङ पबित्रा लिसानिङे लुनुङ निवाहाङ्डे़ॽ मिॽइटे़, मोडोगे़ॽ चोप खालहा बेभिचारि योम्बोकबाङ ओः पेनानिङे। 4 पबित्रा, आदरनुङ टाङ्बामि हिङा अधिनबेॽ युङ्मे खा हे़निङ चोबे़ॽ लेमा खे़ये। 5 निवाहाङ मे़लेघुबा याॽमिजिडे़ॽ ले़टिडोॽ हे़निङे़ॽ बेभिचारि निवा खिमा फे़न्नि। 6 इडोॽ टाङ्बामि वावानिसाजिमि बिरोधबेॽ पाप ले़ःॽमा फे़न्निबा। इन्ढोङ्होङ निवाहाङ्डे़ॽ इडोक्हा मङे़हा योम्बोकमि बेॽए दन्डा पिये लुमे खामि टुम्बेॽको कानिङे़ॽ याक्लोनोॽ हे़निङ चेतवानि पिबेटुङ्मे। 7 इन्ढोङ्होङ निवाहाङ्डे़ॽ कानिङ असुद्ध लिमामि ने़ॽनि, तर पबित्रा लिनुङ हिङ्मामि लागिनोॽ के़ए़टे़। 8 मोडोगे़ॽ असे़ॽ इघा सिक्छेडे़ॽ लुबॽआ खाडोॽ ले़टुनि मोसे़ॽ याॽमिमि ने़ॽनि, निवाहाङ्मिनोॽ खा खेप्सुनिबा, हे़निङ पबित्रा होङ्निवा पिघुबा निवाहाङ खोनोॽ ले़ये। 9 बिस्वासि वावानिसाजिनुङ नम्नम ले़ःॽखुसे़ॽचुमा खे़ये लुनुङ्गो हे़निङ लुमा पाप्निबा। इन्ढोङ्होङ हे़निङ निवाहाङ खोमटाङ्बे़ॽनोॽ नम्नम ले़ःॽखुसे़ॽचुमा खे़ये लुनुङ इःॽपेटे़। 10 हे़निङे़ॽ माकेडोनिया ठाउँबेॽहा बिस्वासिजि चइबानोॽ नम्नम ले़न्डानुमे। तर वावानिसानुङ नानुसाजि मोडोक्नोॽ हागोसो बेॽलो नम्नम ले़ःॽसाङ खडानिङे लुनुङ हौसाला पिनिम्ने़। 11 हागोसो हे़निङ लुनिम्ने़, सान्तिमि हिङ्मवाबेॽ निवा टिसानुमे। मोबा टाङ्बामि योम्बोकपेॽ निवा टिनुङ नुरोॽ ले़चासानिङे। 12 इडोॽ ले़ःॽटानुमहोङ याॽमिजिडे़ॽसो हे़निङ आदर ले़म्मे। मोबा हे़निङ पाप्मिहा खामि लागि हाइखा याॽमिजिबेॽ आसा ले़ःॽमा पाप्नि। परभु लेङ्इये खामि टुम्बेॽ 13 होउ वावानिसानुङ नानुसाजि, सिघे़ॽपॽआ बिस्वासिजिमि टुम्बेॽ हे़निङ लुनिम्ने़। आसा मे़ॽनिङ्हा हाइखा याॽमिजिडे़ॽ सोम्दुॽवा ले़टिडोॽ हे़निङे़ॽ ए़ले़टानुमे। 14 इन्ढोङ्होङ कानिङे़ॽ येसु सिघे़ॽनुङ्सो हिङ्बोॽइटे़ लुमे खाबेॽ बिस्वास ले़न्डुङ्मा। मोडोक्नोॽ निवाहाङ्डे़ॽ खोबेॽ बिस्वास ले़ःॽनुङ सिघे़ॽपॽआजि फेरि हिङ्रिक टोङ्नुङ येसुनुङ्नोॽ लाघे़न्डुजे। 15 कानिङ्मि परभुडे़ॽ इःॽपॽआ सिक्छेनोॽ कानिङे़ॽ हे़निङ पिनिम्ने़। परभु लेम्मे याकठोक कानिङ हिङ्घुबाजिडे़ॽ माहा याक्लो सिघे़ॽपॽआजिबाङ पोम्बेॽ यङ्घडिङ्मानि। 16 इन्ढोङ्होङ हुकुममि सेम्ला मुक्मानुङ, चोप्पाङ एप्पा थाङ्सिरिदुतमि सेम्ला मोबा निवाहाङ्मि तुरहि मिःॽमाबेॽ परभु थाङ्सिरिबाङ उङ्इयेनुङ मोडोक्पेॽ खिरिस्टबेॽ बिस्वास ले़ःॽनुङ सिघे़ॽपॽआ याॽमिजि याक्लो हिङ्बोॽइम्मे। 17 मो याक लेङ्लो हिङ्घुबाजि कानिङ्सो खोजिनुङ्नोॽ परभु चुप्सिॽ मिन्डु खिम्मिॽवे़ॽटु ठेॽपोक्खे़न्डिङ्मा मोबा सानिङ्नोॽ परभुनुङ पेङ्इन्डिङ्मा। 18 इडोक्नोॽ इघा खाडे़ॽ इक्कोसे़ॽ हाइको हाङ्हाङ पिघुसे़ॽचुसानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.