१ थेस्लोनिकि 3 - याम्फुतिमोथि थेस्लोनिकिबेॽ पाङ्बॽआ 1 मोडोगे़ॽ हे़निङ्बाङ हाघे़ॽनुङ पेम्मा नुबा मे़मिॽपॽआसे़ॽ कानिङे़ॽ एथेन्सबेॽ तिमोथि मे़ॽनिङ्नोॽ पेन्नुङ्होङ्सो खो हे़निङ्बेॽ पाङ्मे निधो ले़टुङ्मा। 2 कानिङ्मि निसा तिमोथि, खिरिस्टमि सुसमाचार खेम्मेॽखुबा निवाहाङ्मि सेउते ले़ये। खो हे़निङ साहस पिनुङ बिस्वासबेॽ बोलियो टोङ्मामि कानिङे़ॽ हे़निङ्बेॽ पाक्सुङ्मा। 3 मोडोगे़ॽ दुःखनुङ खेःडे़ॽ हे़निङ बिस्वासबेॽ निङ्सिघे़ॽमा फे़न्नि लुनुङ कानिङे़ॽ मिॽइटुङ्मे़। इडोक्हा दुःखगो निवाहाङ्मि याॽमिजिडे़ॽ आङ्मा सिॽइहा लुनुङ हे़निङे़ॽ नुरोॽ लेन्डानुम। 4 इन्ढोङ्होङ कानिङे़ॽ हे़निङ्नुङ टुमाबेॽनोॽ हिङ्मवाबेॽ दुःख लेङ्इहा लुनुङ याक्लोनोॽ लुबॽआ ले़टे़। चइबानोॽ कानिङे़ॽ लुबॽआडोक्नोॽ लिसा। इगो खासो हे़निङे़ॽ लेन्डानुमे। 5 के़ॽ हाइखा बेॽलो याक मे़हुङ्हेसुङ इन्ढोङ्होङ रेम्एङ्घुबा सैतानडे़ॽ हे़निङ्मि बिस्वास नासि ले़टुएन्डे मिॽनुङ का बेॽलो किस्सिडिङा। मोडोगे़ॽ हे़निङ्मि बिस्वास इन्डोॽ ले़ये लुनुङ लेडोक्मामि लागि के़ॽ तिमोथि हे़निङ्बेॽ पाक्सुङ। 6 तर तिमोथि हे़निङ चुप्नुङ इगोबेॽ हागोनोॽ लेङ्इटे़। हे़निङ्बेॽ हागोसो बेॽलो नम्नमनुङ बिस्वास टुहा लुमे नुबा खा खेम्मेॽटा। मोबा हे़निङे़ॽ सानिङ्नोॽ कानिङ नम्नम ले़ःॽनुङ मिॽयुङ्इटानिङे ले़ए़ लुमे खासो खोसे़ॽ का खेम्मेॽटा। 7 मोडोगे़ॽ वावानिसानुङ नानुसाजि, हे़निङ्मि बिस्वासमि खा खेम्नुङ निङ्सिघे़ॽमाबेॽनुङ दुःखबेॽ सिॽपॽआ बेलाबेॽसो कानिङ साप्थाङ्इटिङ्मे़। 8 इन्ढोङ्होङ हे़निङ परभुबेॽ नुरोॽ बिस्वास ले़न्डानुमे लुमे खा खेम्माबेॽ कानिङे़ॽ चइबानोॽ हिङ्मवा चुप्टिडोॽ मिङ्इन्डिङ्मा। 9 हे़निङे़ॽ ले़ःॽमे़ॽ कानिङ निवाहाङ्मि पोम्बेॽ साप्थाङ्इन्डिङ्मा। इगो खामि लागिगो कानिङे़ॽ निवाहाङ इन्डोक ओहाङ पिमाबेॽसो चुक्खे़ये। 10 हे़निङ्नुङ चुप्हेमा लुनुङ कानिङ लेन्डा सेन्डा निवाहाङ्नुङ निवाहोङ्सिॽयुबाङ्नोॽ पारथना ले़ःॽमे़ॽनिङ्सिन्डिङ्मा। हे़निङ्नुङ चुप्टोक्माहोङ हे़निङ्मि बिस्वासबेॽ इमा इमा चुक्खे़ॽपॽआ ले़हा माहा पुरा ले़ःॽटोक्इन्डुङ्मा। 11 हागो कानिङ्मि निवाहाङ पाबा खोम टाङ्बे़ॽनुङ परभु येसुडे़ॽनोॽ हे़निङ्नुङ चुप्मामि लागि राम हेम्बेॽलो लुमे आसाबेॽ पेङ्इटिङ्मे़। 12 कानिङे़ॽ हे़निङ नम्नम ले़ःॽपॽआडोक्नोॽ परभुडे़ॽसो हे़निङ्टाङ्बा नम्नम ले़ःॽखुसे़ॽचुघुबा लिसानिङे, मोबा खोसे़ॽ याॽमिजि नम्नम ले़ःॽखुबा टोक्सुरो। 13 निवाहाङ्डे़ॽ इगो नम्नम पिनुङ कानिङ्मि परभु येसु खोमि पबित्रा याॽमिजिनुङ लेम्माबेॽ कानिङ्मि निवाहाङ पाबामि पोम्बेॽ हे़निङ चोखोनुङ आप्टिक मे़ॽनिङ्हा लिमामि लागि हे़निङ्मि निवा बोलियो टोङ्बेॽलो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.